وزارة التربية والتعليم فتحت تحقيق عاجل يخص نتيجة الثانوية العامة في شوية مدارس في محافظة سوهاج.
الطلبة في المدارس دي جايبين فوق 90٪ ومعظمهم بينتموا لعائلات كبيرة جدًا في الصعيد.
وطبعًا دي حاجة تثير الاستغراب، لما كل طلبة عائلات بعينها يبقوا متفوقين فدي حاجة وتستحق تحقيق عاجل

كويس إن وزارة التربية والتعليم تأمر بالتحقيق في واقعة زي دي؛ لكن الحقيقة أن الوزارة لا تملك أصلًا محققين على درجة عالية من الكفاءة لكشف هذا الغموض -اللي هو مش غموض ولا حاجة وواضح وضوح الشمس.
النيابة العامة المصرية لازم تتحرك وتبعت أفضل وكلائها على الإطلاق للقيام بهذا التحقيق.

الثانوية العامة أمن قومي؛ ويجب على الفور التحرك ونشر نتائج التحقيقات والكشف عن ملابسات الواقعة الغامضة -اللي هي مش غامضة ولا حاجة وواضحة وضوح الشمس.
لو صحت الأقاويل؛ وكانت اللجان دي بالفعل لجان غش جماعي لأولاد الأكابر؛ لازم رقاب مسؤولين كبار تطير فيها

لأن لولا السوشيال ميديا -اللي بتقول إن الواقعة دي مكررة من سنوات- مكنش حد من البهوات اكتشف أيّ حاجة.
التعامل مع الواقعة دي هيظهر مدى هيبة الدولة؛ ومدى قدرتها على تحقيق العدالة لطلاب في بداية طريقتهم.

الطالب اللي اتظلم -لما زميله في لجنة الأكابر غش- هيفقد كل قيم العدالة وهيكبر وهو عارف إن الغش طريق النجاح. والطالب اللي غش ولم يُعاقب هيكبر هو كمان ويعرف إن الغش أمر عادي وممكن برضه يوصل للنجاح
العدالة وكل قيم المساواة والحق تنسفها من الأساس تلك الواقعة ومستنين تحقيق عادل وشفاف