من فترة قريبة خلصت قراءة الكتاب اللطيف ده لدكتور الأعصاب البريطاني أوليفر ساكس اللي بيستعرض فيه مجموعة من أغرب الحالات اللي مرت عليه في تاريخه المهني. ما يميز أسلوب ساكس أنه مش بيكتب كعالم/طبيب ولكن كفيلسوف وإنسان في المقام الأول..
من البداية (وأنا شخصيًا حبيته أول ما قال الكلمتين دول) وضح أن مشكلة الطب الحديث أنه بيختزل المريض لمجموعة من الأعراض والتحاليل والنسب بدون أي سياق يخص الجانب الإنساني للمريض اللي هو بيشوفه كحدوتة أو أسطورة مختلفة عن غيرها (ليا حق أحبه طبعًا 😀)..
المهم أنه طول الكتاب وهو بيتكلم عن الحالات دي، واضح رغبته للربط بين الجانب الجسدي/العصبي والجانب النفسي/الروحاني وبيستنكر فصل الجانبين دول عن بعض في شكل علوم مختلفة: علوم خاصة بالجسد وعلوم خاصة بالنفس والروح..
رؤية ساكس لمرضاه كمان ممتعة وبتعكس قدر كبير من الحكمة والإنسانية.. يعني المريض اللي العلم والمجتمع ككل شايفه عنده مشكلة هو بيقدر يشوف فيه جانب إبداعي أو روحاني وبالتالي بيشوف المريض ده 'مكتمل' بشكل ما أو على الأقل بيغير مفهومنا لما يجب أن يكون عليه الكمال..
الحالات اللي اختارها ساكس علشان يتكلم عنها غريبة وملهمة وأحيانًا كتير مؤلمة لما تظهره من تعقيد العقل البشري وجوانب إنسانية تخلي أي حد، سواء مريض أو بصحته، يتفكّر في نفسه وشخصيته ووجوده ككل.
الجدير بالذكر أن أوليفر ساكس هو برضه صاحب كتاب Awakenings اللي بيحكي فيه تجربته مع مجموعة من المرضى في أول حياته المهنية. الكتاب تحول لفيلم جميل بنفس الاسم عام ١٩٩٠ وكان بطولة روبرت دي نيرو وروبين ويليامز
جاري تحميل الاقتراحات...