قرارات الرئيس السيسي اللي صدرت النهاردة معناها إن الدولة لا تتوقع انفراجة قريبة للأزمة العالمية، وإن مزيد من الصعوبات في الطريق..
القرارات موجهة لفئة محدودي الدخل، وهي فئة بتواجه أخطار في احتياجاتها الأساسية، لكن اللي لازم ينتبه ويركز الفترة الجاية هي الطبقة المتوسطة..

صحيح إن مستوى الدخل في الطبقة دي أعلى من محدودي الدخل لكن كمان في تحديات أكبر.. جزء كبير من الطبقة المتوسطة مش بياخد دعم مباشر من الدولة، وبيواجه الزيادات بالموارد الذاتية إلى حد كبير..
المطلوب مننا التفكير في قراراتنا كويس،
التقسيط حل لطيف حتى لو معاك تمن الحاجة اللي هتشتريها،

تحديد الأولويات بدقة هيساعد جدا في التكيف مع الأزمة..
وفي الظروف دي هكرر اللي بقوله دايما، واللي ماينفعش مسؤول رسمي يقوله لكن احنا بيننا وبين بعض نقوله:
قناعتك بإن ربنا هيوفقك وهتعدي الأزمة، حسن الظن بالله يعني، هيساعدك جدا وهتلاقي معجزات في حياتك حرفيا،

ده عن تجارب شخصية وتجارب لناس تانية كتير.. طريقة التفكير ونوعية الأفكار بيأثروا في واقعك طول الوقت..
الرزق مش خاضع لقرارات البنك المركزي ولا السياسة النقدية للفيدرالي الأمريكي ولا لقرارات الحرب.. ربنا مش محتاج سلاسل إمداد وتوريد علشان يبعتلك رزقك..

مش معنى إن في ظرف عالمي يبقى لازم كل واحد فينا يتأثر بيه، زي بالظبط ما تبقى راكب عربية مكيفة في درجة حرارة ٤٠ ومش حاسس بالحر..
اليقين والأخد بالأسباب ليهم مفعول السحر، فاطمن واشنغل وفكر ازاي تزود دخلك يمكن فكرة واحدة تنقل حياتك نقلة تانية خالص..