بقالي حبة عايش في ايرلندا ولسه عارف ان في القرن ال ١٧ هجم قراصنة جزائريين على قرية ايرلندية وخطفوا معظم رجالتها وودوهم الجزاير كعبيد بيض. وان ده اتكرر كذا مرة لدرجة ان كان في ايامها نوع مزيكا شعبي جزايري باللغة الايرلندي الاصلية زي البلوز بتاعت العبيد الافارقة في امريكا. دنيا
لا والقرية اللي كل رجالتها اتخطفت دي اسمها Baltimore. لو عارف أمريكا شوية حاتقدر ال Irony. en.m.wikipedia.org
وقائد الهجوم ده كان قرصان هولندي برضه كان عبد في الجزاير واطلقوا سراحه لما اعلن اسلامه وانضم لتجار العبيد الجزائريين. التاريخ برضه ابن قحبة فشيخ
حاجة تانية مثيرة اكتشاف هيكل عظمي لقرد من المغرب مات في كهف في ايرلندا من ٢٠٠٠ سنة. ايه اللي جاب القرد من المغرب لهنا؟ في كلام في كتب دينية قديمة في ايرلندا ان قبائل البربر من الاجناس الاصلية اللي عمرت أيرلندا. وبشكل غير علمي طول عمري باقول ان الايرلنديين اقرب لينا من الاوروبيين.
ازيدك ان في القرن ال ١٩ إمام جامع من بيروت زار دبلن وقابل مجموعة قساوسة. ولما ابتدى يرتل القرآن بترتيل على مقامات شرقية، القساوسة اكتشفوا ان الطريقة والمزيكا متطابقة مع اغاني بيغنيها الستات العواجيز من جنوب ايرلندا لما يقربوا من بيت مسكون ويحاولوا يرقوه من الجن. على مقام الحجاز.
ولسه من كام سنة تحاليل ال DNA اظهرت ان ايرلنديين كتير اصولهم راجعة لشمال افريقيا. عموما بشكل انطباعي بحت طول عمري باحس ان ايرلندا اقرب لينا من اوروبا. وياعيني برضه اتحط عليهم حطة استعمارية ٧٠٠ سنة بيتهانوا من البيض الانجليز. مش حاتهرب من مصيرك فين ما رحت يا صاحبي.
ايرلندا بلد شبه اتمسحت هويتها بعد الاحتلال الانجليزي ليها. نص الشعب مات في مجاعة واللغة تقريبا انتهت لولا انهم لحد النهاردة مصرين تبقى في مناهج التعليم. المزيكا برضه لسه حية بسبب المقاومة دي. لو سمعت المزيكا التراثية تحديدا حاتشوف تشابه كبير بينها وبين مزيكا الامازيغ في المغرب.
ده مثال واضح للتشابه. استخدام شبه متطابق العُرَب والمقامات الشرقي وربع التون ( السيكا ) في الغنا التقليدي في ايرلندا والمغرب soundcloud.app.goo.gl
وبالمرة عشان نحط كل حاجة في الثريد في نوع من المراكب الشراعية في غرب ايرلندا متطابق مع المراكب اللي كان البربر بيستخدموها في العصور الوسطى للتجارة والتنقل والسفر والغزوات.
الشيء العجيب بقى ان حتى الأسامي الأيرلندية القديمة شبه أسامي القبائل البربرية في شمال أفريقيا. واشهر اسم هو Mcgill اللي جاي من أسم قبيلة امازيغية مشهورة. وطبعا محبي better call saul حايقدروا المعلومة دي جدا.
بقالي فترة مسحول في الموضوع ده بحكم اني عايش هنا، وفعلا ما تقدرش تتجاهل التشابهات الخفية في الطباع وتفاصيل صغيرة في العادات والتقاليد والتربية والمزاج العام. عكس تماما الجنس الأبيض القح في المانيا او هولندا او حتى انجلترا. في صراع خفي بين المعسكرين. ده غير الصراع السياسي المعروف.
النظرية الواضحة هي ان البربر كانوا محتلين اسبانيا سنين طويلة وان جزء كبير من ايرلندا أصوله من اسبانيا اللي هي جزء كبير من تاريخها شمال افريقي. لكن اللي مثير بالنسبالي في الحدوتة دي هو الانماط اللي متعودين عليها ان الأوروبي الابيض كان دايما هو المستعمر.
الحقيقة ان احنا بس عايشين في آخر ٤٠٠ سنة من تاريخ طويل مل الشعوب استعمرت واستغلت الشعوب التانية وكله كان بيجري على مصلحة الناس بتوعه. اللي معاه التكنولوجي والقوة كان بيركب. والثريد ده مجرد سرد لأمثلة كادت تختفي من تاريخ قديم كانت الأدوار فيه مقلوبة. وقد تتقلب تاني كمان كام قرن.
جاري تحميل الاقتراحات...