للأسف هتقابل في كل مرحلة من حياتك ناس مرضى كل هدفهم يشوهوا صورتك قدام غيرك بدون سبب فعلي غير المرض اللي في قلوبهم.. هيتكلموا عنك بالسوء من وراك، وهيوصفوك باللي مش فيك، وهيحذروا غيرك منك لمجرد بس إن قربك من غيرهم واجعهم.. ولو سألت نفسك ليه؟.. دايماً هترجع بإيدك فاضية بدون إجابة..
المحبة مالهاش سبب لإنها لو مبنية على سبب هتزول بزوال السبب، لكن الكراهية ليها مليون سبب.. جايز اللي بيتكلم عنك مش بيحبك فبينقل لغيرك إنطباعه هو عنك.. جايز أنت نفسك مش بتحب اللي بيتكلم عنك فبتعامله معاملة غير اللي بتعاملها لغيره فهو قرر يشوهك قدامهم.. جايز معقد نفسيًا من ناحيتك..
جايز بيحبك بس أناني عايز يبقى هو الوحيد القريب منك فبيبعدهم عنك.. جايز وجايز وجايز.. مليون احتمال واحتمال أنضفهم هو عدم نضافة الشخص اللي قرر يسيء لناس ماشفش منهم غير كل خير، ويوقع بينهم وبين غيرهم عشان يكشف عن الجنب المشوه الحاقد في قلبه..
عاملوا الناس باللي بتشوفوه منهم مش باللي بتسمعوه.. مع الوقت هتكتشف إن أحسن خدمة تعملها لـ نفسك و لـ غيرك إنك تقفل ودانك عن رأى الناس في بعضهم وادي فرصة تانية في حكمك لـ مخك أنت.. أنت عاقل وكبير للدرجة اللي تهلّيك تكتشف الناس بعيونك أنت.
جاري تحميل الاقتراحات...