من سنتين تم تدشين اول محطة وزن تابعه لل IGFA في مصر و الشرق الاوسط بالجونه من قبل الاتحاد المصري لصيد الاسماك و شرفت بالاشراف عليها ك weighting master , خلال العامين دول مصر حققت اكتر من ١٢ رقم قياسي عالمي و اصبح عندنا ٣ كباتن صيد معترف بيهم من IGFA و بالتالي لفتنا نظر كتير من
اعضاء المنظمه نتيجة اخبار مصر الغير منقطعه في ال newsletter اللي بيروح للصيادين الرياضيين المحترفين حول العالم و فعلآ الناس ابتدت تيجي تصطاد في مصر كما هو موثق في هذا الفيديو الحديث (الشهر ده) youtu.be ده صياد من IGFA جه مصر يصطاد مع كابتن IGFA مصري
و الاتحاد الدولي كانوا سعداء جدآ باللي بيحصل و بالانجازات اللي بتتحقق لدرجة اننا طلبنا منهم اقامة الاجتماع السنوي للمنظمه في الجونه العام القادم و ضم مصر الي World Cup Tour و ده لو اتحقق هيكون انجاز غير مسبوق بالوطن العربي و المنطقه، المهم ان الناس رحبت
بالفكره و قرروا يبعتوا لجنه مصغره تعاين كل حاجه الشهر الجاي و تشوف امكانية اقامة الاجتماع و كاس العالم بمصر و. احنا طبعآ (بالتنسيق مع الاتحاد المصري) كننا هندلعهم و نتباهي بجمال بلدنا و كننا متاكدين ان قرارهم هيكون ايجابي و هنتمكن من استضافة الاجتماع و كاس العالم،
الان و بعد تقرير حادث القرش المضلل و اللي بسببه تم منع الصيد الرياضي اللجنه دي هتيجي تلاقي الصيد ممنوع عندنا و بالتالي مافيش اجتماع ولا كاس عالم ولا سياحة صيد من اعضاء المنظمه ولا كباتن صيد هتشتغل و الارقام القياسيه المصريه هتقف ، انا بكتب القصه دي لاني محبط و دوشتكوا امبارح
لكن ده من كتر الاحباط اللي اصابني، احنا بنشتغل بايدينا و سناننا علشان نحط اسم مصر علي الخريطه العالميه لرياضة صيد الاسماك و حققنا انجازات كبيره و ييجي واحد جاهل يكتب كلمتين كلهم تضليل و افتراء و مخالفين لكل الدراسات العلميه يدمرلنا شغل سنين !!! حط نفسك مكاني و قوللي هتعمل ايه؟؟
جاري الان الاعتذار عن استضافة الاجتماع و كاس العالم و الغاء زيارة اللجنه حتي يتم الوقوف علي الوضع النهائي للصيد الرياضي بجمهورية مصر العربيه و الله يجازي اللي كان السبب و اسف للإطاله.
جاري تحميل الاقتراحات...