ازرعوا الغرور في عيالكم
فيه عيال يكبرون ويتأثرون بالي يشوفونه بجوالاتهم او بالتلفزيون
وفيه الي مايتأثرون مهما شافوا
يعني وش يضمنك ولدك مايتأثر بلوك عيسى أو بنتك تتأثر بالشاذات؟
المنع والقمع مافاد الاولين
هذا كله يعتمد على زرعك الثقة بمبادىء اهلهم وان هذي المبادىء والتعليم الجيد

هي الي تمثل الطبقة الراقية وان بيتنا واسرتنا طبقة أعلى من طبقة الناس الي ماعندها قيود ومبادىء
بتستغربون كلامي تقولون تزرعين فيهم الغرور وشوفة النفس
ايه ازرعوا فيهم الغرور والاعتداد بأنفسهم وبمبادئهم وتعليمهم
الغرور صفة انسانية طالعة طالعة اما بالفلوس أو بالشهرة أو بالمظاهر

فخلوها تطلع من نفوسهم على شي يسوى تعليم ومبادىء ونجاح ومناصب
يوم انهم تربوا على إن هذي الايجابيات هي طموحهم وهي الي ترضي غرورهم بيصيرون راقين تلقائياً ويجتهدون لتحقيقها
اما اذا شافوا ان الي يرضي غرورهم شهرة أو شذوذعن المجتمع بشي غريب او مظاهر مزيفة
بتكون طموحاتهم وأهدافهم دونية

المعتدة بنفسها والي زارعين اهلها غرورها بأشياء ايجابية من يومها صغيرة اذا كبرت ما تتأثر اذا شافت سلوك سلبي حتى لو كان منتشر بين قريناتها وحتى لو صار موضة
لأنه مايرضيها ولا هو بالنسبة لها طموح
ولا تنسون تسوون مواقف عملية تثبت كلامكم قدام أطفالكم
يعني أنا ماأرمي المخلفات فالشارع

لأني متعلم مؤدب واهالينا ربونا على هذا السلوك لأننا عايلة راقية متعلمة
بكذا يشعر انه مرتبط بمجتمع حوله كلهم بيرفضونه لو خالف سلوكهم وان تصرفاته الخاطئة بتخرب سمعتهم
دايم اربطوا مبادئهم الايجابية بفكرة الجماعة والانتماء لعايلة ووطن ودين
التفرد فقط في الموهبة وليس في المبادىء