ماذا لو كانت احلامك هي الطعم الذي يوقع بك في صنارة العدو ؟ عن اول شخص اخذ الانترنت كمصيدة كبرى لضحاياه سنتحدث
🔴 تنوية 🔴
قصة اليوم تشمل تفاصيل جرائم مروعة من لا يحتمل هذه الاحداث يرجى منه عدم إكمال القراءة
قصة اليوم تشمل تفاصيل جرائم مروعة من لا يحتمل هذه الاحداث يرجى منه عدم إكمال القراءة
قصتنا اليوم تبدأ أحداثها بعام 1984 بكانسيز ميزوري الولايات المتحدة الأمريكية بولا قودفري ابنة 19 سنة كانت تدور وظيفة وحصلت إعلان وظيفي بالجريدة يبحث عن سكرتيرة عندها إستعداد للسفر و كان الراتب عالي جداً باولا قالت عز الطلب سفر وراتب عالي وش أبي أكثر من كذا ؟
قررت تقدم على الوظيفة و صباح ذاك اليوم قالت لأهلها عندي مقابة اليوم دعواتكم و للأسف كانت هذي آخر مره يشوفونها , طبعا الأم و الأب من أول يوم ما رجعت فيه وهم يدورونها و قدموا بلاغ بأختفائها و تمر الأيام و توصلهم منها رسايل و فحواها إنها تبي وقت لنفسها بعيد عنهم
عشان تقدر تبني شخصيتها كبالغة مستقلة الأهل قالو وش هالكلام بنتنا ماهو هذا منطقها أبد بس الشرطة قالت خلاص البنت بالغة و ما تبي تتواصل معكم حقها و لا نقدر نسوي شي
وتجي سنة 1985 و يوصل إتصال لـ 911 من وحده قلقانه على مرت ولدها ليسا ستيسي اللي ماهي عارفه وش صار معها ليسا عمرها 19 سنة كانت أم عازبة لطفلة عمرها 4 أشهر أسمها تيفاني تطلقت من زوجها بعد ثلاث شهور زواج بس
هو راح للجيش و هي ما كان عندها وظيفة و لا كان عندها أهل ممكن تروح لهم فأضطرت تسكن مع أهل طليقها بعد كذا راحت سكنت بملجأ للنساء و لا أبطت و قالت لأخت طليقها إنها أنقبلت ببرنامج تبع الولاية اللي هم ساكنين فيها
كان يركز على الأمهات العازبات كيف ممكن يوقفون على رجولهم و يساعدون انفسهم و أطفالهم و طوال فترة التدريب راح يوفرون لهم بيت و حضانة للاطفال بالوقت اللي ما يكونون معاهم الامهات و بنهاية البرنامج راح يحصلون على وظيفة ثابتة و اللي كان ماسك البرنامج واحد أسمه جون أسبورن
وطبعا مثل ما تشوف عزيزي المشاهد هذي فرصة تكاد تكون خيالية ! و عشان كذا القبول محدود جداً فلما أنقبلت ليسا ما حبت تضيع هالفرصة و على طول تواصلت مع جون وقالها يلا الحين بامرك انتي و بنتك و مايحتاج تشيلين اغراضك حتى بس بما إن لسى البرنامج ما بدأ و لسى ما جهزنا البيوت
بحطكم بهوتيل قريب من مكاتبي لين يجهز البيت ليلة ذاك اليوم دقت ليسا على أم طليقها و هي تصيح و تقولها ليش تقولين للناس إني أم مب كفؤ لبنتي ؟ و إنك تبين تاخذينها مني ؟ قالت أم طليقها يا بنت الحلال تعوذي من ابليس و الله أني ما قد قلته !
هدي بس و علميني وش قاعد يصير معك ! قالت أبد الناس اللي أنا عندهم قالو لي هالكلام و خلوني اوقع على اوراق فاضية هنا العجوز حست ان الموضوع ما هو مضبوط و قالت لها لا توقعين على شي هنا ليسا قالت تراهم جو و سكرت الخط وهذا كان اخر تواصل لها مع عائلتها
هنا جاء وقت مكالمة 911 اللي تكلمنا عنها و قالت لهم كل شي سمعته من ليسا و من بكره العجيز دقت على الهوتيل اللي فيه ليسا و قالولها البنت طلعت و حسابها أندفعت عن طريق واحد اسمع جون رابنسون ! بعد كم يوم أم الرجال و صلتها رسالة من الأب مارتن و قالها أنا أشتغل بالكنيسة
و مرت ولدكم وبنتكم طيبين لكنها سافرت مع رجال أسمه بيل بس العجيز الذهينه دقت على الكنيسة تسأل إذا صدق عندهم واحد يقاله الأب مارتن ؟ وقالولها لا ما عندنا ! راحت دقت على الشرطة و قالت على الاقل جيبوا لي خبر هالرجال اللي يقاله جون رابنسون
راحوله الشرطة و قالهم أيه أنا أخذت ليسا من بيتها و جبتها للهوتيل بس من بكرة جتني و معها رجال أسمه بيل و قالت هذا حبيبي و خلاص جزاك الله خير ما قصرت بس ما عاد أنا بحاجة هالبرنامج و ودي لو أخلي هالفرصة لوحده فعلا محتاجة
الشرطة راحوا و قالو هالكلام للعجوز بس قالت هالكلام ما هو منطقي أبد قالو هذا اللي عندنا و لا نقدر نسوي شي ليسا تعتبر بالغة و لها الحق تختار أنها تغادر المدينة أو لا و بعد كم يوم و صلتهم رسالة من ليسا تقول فيها انها لقت شخص تحبه و تبي ابدا حياة جديدة معه ! وكانت موقعة بتوقيع ليسا!
العجوز قعدت تحاول تتأكد هل هالتوقيع مصور او مزور لكن ابد هذا توقيع البنت صدق رجعت للشرطة و قالت انا قلبي ما هو متطمن دوروها احياناً ام زوجك الحقنه لها فايده قالو الشرطة والله يا خالة لو بيدنا شي سويناه بس هي بالغة والقانون يكفل لها حق الانتقال متى ما تبي و وقفت قضية ليسا على كذا
ويجي عام 1987 و وقتها كانت كاثرين كلامبيت بعمر 27 سنة أنتقلت لميزوري من تكساس تبغى بداية جديدة بحياتها و كانت تدور وظيفة وحصلت إعلان بالجريدة مطلوب مساعدة لمدير تنفيذي شغله واصل لراسه بس الراتب مجزي جدا و فعلا كاثرين تقدمت على هالوظيفة و حصلت عليها و مديرها كان اسمع جون دوسن
كاثرين من انتقلت على ميزوري وهي تتواصل بشكل يومي مع اهلها لكن فجأة البنت انقطعت و يدقون عليها ما ترد ثم العائلة وصلتها رسالة موقعة من كاثرين تقول فيها أنها قررت تغير وظيفتها و تركز على نفسها و كيف ممكن تكون مستقلة أكثر
العائلة أستغربوا هالكلام مره من كاثرين و حسوا أنها مو هي اللي كاتبتها كلموا الشرطة بس للمره ثانية قالو ما نقدر نسوي لكم شي بس أخوها قرر أنه يبحث عن الموضوع بنفسه و أول شي سواه بدأ يبحث عن الشركة اللي قالت أنها تشتغل فيها وحصل رقم الشركة
و أتصل و ردت عليه وحده قالها حوليني على المدير جون دوسن قالت ما عندنا أحد بهالأسم قالها طيب وين كاثرين قالت ماعمر وحده بهالأسم أشتغلت معنا هنا الأخو أنهبل و قرر يسافر لهالديرة بنفسه و يتحرى راح لشقتها وبدأ يفتش بأغراضها ولقى إيصال لغرفة بهوتيل مدفوعة من قبل واحد أسمه جون روبنسن!
برضو لقى أوراق تثبت إن كاثرين كانت تشتغل بشركة أسمها أكوا 2 وكانت شركة إستشارات و مديرها مين ؟ أتحداك مين ؟ صح عليك جون روبنسن ! الشركة فعلا موجودة وحقيقة و من بكرة راح لهالشركة لكن حصلها مقفلة و السبب إن هالجون كانت راح تبدأ محكوميته بالسجن بتهمة الاحتيال و السرقة !
الشرطة ما قدرت تحل قضية بولا و ليسا و كاثرين ومرت السنين و هالنساء الثلاث صنفوا كنساء هاربات وبس و بعام 2000 بنت بعمر الـ 27 باسم سوزيت تروتين كانت تعيش مع أمها بميشغان وكانت جاهزة تبدأ حياتها و تستقل
وقدرت تحصل وظيفة عند رجال غني و حياته كلها سفر محتاج وحده تقعد بكانزيس ترعى أبوه وهالرجال وش أسمه ؟ جون روبنسون, سوزيت و أمها كانو مره قريبين من بعض فلما سافرت سوزيت كانت كل يوم تكلم أمها و ترسلها إيميلات يعني التواصل على مدار اليوم بعد شهر من الأنتقال سوزيت أنقطعت تماما
أمها بدت تقلق و راحت دقت على الرقم اللي عطتها سوزيت للشخص اللي تشتغل عنده لما رد الرجال قال والله بنتك أشتغلت عندي شوي بعدين جتني و معها رجال أسمه جيمس ترنر و قالوا أنهم بيروحون بكروز حول العالم وخلاص ما تبي تشتغل عندي قالت الأم مستحيل بنتي ما تشك خيط بأبرة بدون ما تقولي
قال عاد هذا والله اللي عندي ولا عندي معلومات ثانية أقولها أم سوزيت راحت بلغت الشرطة و قالت أن بنتي مختفية و آخر من شافها هو الشخص اللي كانت تشتغل عنده جون روبنسون و ترا عندها كلبين واحد أسمه بيكا و الثاني أسمه هيري مستحيل تروح أي مكان بدونهم
ثم الأم بدت توصلها رسايل مطبوعه من سوزيت ! وحده جتها من كالفورنيا و وحده من مكسيكو بهالرسايل كانت تقول فيها أنها راحت برحلة بحرية حول العالم مع حبيبها الجديد و أنك المفروض ما تقلقين علي و بالنهاية توقيعها
الأم من أول ما قرت الرسايل قالت هذي مو بنتي اللي كاتبتهم بنتي مستحيل تكتب كذا بدون أخطاء إملائية !
هنا الشرطة أخيرا بدت تربط بين قضايا هالنساء الأربعة يمكن هالشي يرجع للتطور التكنلوجي و قدرتهم على الأحتفاظ بملفات المفقودين بطريقة أفضل حتى أنها تدخلت الـ FBI بالبحث عنهم
اشغلتكم انا بجون رابنسون صح ؟ طيب خلونا نسولف عن أبن الكلب هذا شوي .
جون رونسون أنورد عام 1948 لأب مدمن كحول و أم مفرطة بالتأديب وكان الطفل الثالث من أصل خمسه يعني وشو ؟ يعني الطفل الأوسط وكلنا نعرف أن اللي بالوسط ما أحد يذكرهم بشي لكن جون قال لا وهذا حنا نسولف عنه اليوم .
بصفتي قعده وحبي رعده حابه أسألك عزيزي الأوسط وش تحس فيه داخلياً ؟ و كيف هي الطريقة السليمة للتعامل معك ؟ هل لازم أخاف على نفسي منك ؟ و كيف تقدر تدافع عن نفسك بعد قصة اليوم ؟
المهم أنه بعمر 13 فاز بجائزة بالكشافة و بنفس الوقت دخل مدرسة كاثوليكية على أساس أنه بيصير قس إذا كبر بس يقول أنه هون بينما بالحقيقة تم طرده لأن درجاته كانت نازلة و لأسباب سلوكية ثانية وشهي ؟ والله ما أعرف بس لا تصفون فيه النية تكفون .
المهم بعدها درس بمدرسة مهنية عشان يبي يتخرج فني أشعة و بعد سنتين برضو ما فلح و ترك الدراسة بس راح و زور شهادته و توظف بمستشفى أطفال
بهالوقت لما كان عمره 21 تزوج بشابة أسمها نانسي وجاب معها أبنه الأكبر ثم ولدين توأم وبعام 1966 تم فصله بسبب عدم كفاءته لكن لا تخاف عليه عزيزي المتابع خاف على نفسك لانه لقى وظيفة ثانية بمستشفى ثاني
اللي سرق منهم عشرات الآلاف و برضو دخل بعلاقات غير شرعية مع الموظفات و المريضات ! لكن الحمدلله هالمره ما فلت منها و بعام 1969 أنحكم عليه 3 سنوات سجن مع وقف التنفيذ لكن كان تحت المراقية و فيه شروط لازم يلتزم فيها
على الرغم من مشاكل جون المتكررة مع القانون من عام 1966 إلى عام 1991 إلا أنه قدر يلقى له وظيفة بعدد من الجمعيات الخيرية حتى إنه بعام 1977 كان يشتغل بمنظمة خدمة ذوي الاحتياجات الخاصة و قدر يصيررئيس مجلس الإدارة و أول شي سواه أنشأ مسابقة باسم رجل العام و فوز نفسه !
لما الإعلام غطى هالحفل الناس بدوا ينبشون ورا روبنسون و أكتشفوا أنه زور التوصيات اللي على أساسها أستلم الجائزة و الصحافة على مدار أسبوعين ما كان لهم سالفة غيره و نشروا غسيله ! ليتنا من حجنا سالمين صدق
ونجي لعام 1987 النسة اللي أختفت فيها كاثرين بهالسنة روبنسون أدين بالسرقة و أنسجن حتى عام 1993 و لما طلع كان بأنتظاره شيء أحلى من جائزة رجل العام ألا وهو الشبكة العنكبوتية .
طبعا شخص مثل جون تتوقعون بيبحث عن كيف تتقن اللغة الفرنسية بخمسة أيام ؟ لا طبعا راح لمواقع التعارف بحثاً عن نساء يرضون ي.بيعون أنفسهم له بالمعنى الحرفي يبي وحده توقع معاه عقد أنها باعـ،ـت نفسها له !
نرجع للوقت اللي بدا ال FBI تتحرى عنه شافوه مجرد شخص محتال و أحتياله على قده كما أنه الحين رجل عائلة عنده أربع أطفال و منخرط بعدد من الأعمال التطوعية و محترم بين افراد مجتمعه فكان موضوع ربطة بأختفاء هالنساء غريب شوي !
ماني عارفه ليش طلعت التغريدات من السلسلة هنا الكمالة
جاري تحميل الاقتراحات...