رتبها

هو ليه بترمش بعينها كتير؟ هو ليه عمال يهز دراعه؟
تابع الثريد👇

السلام عليكم أهلًا بيكم،
متلازمة توريت هي حالة بتصيب الشخص وبتسبب أصوات وحركات لا إرادية تعرف باسم "Tics" أو العرَّات.
بتبدأ تظهر خلال الطفولة بين سن سنتين ولحد 15 سنة بمتوسط 6 سنين.
المتلازمة بتصيب أكتر الذكور بمعدل تلت لأربع أضعاف إصابتها للإناث.
طيب إيه أسبابها؟

السبب الرئيس ليها مش معروف لكن الأبحاث وضحت تداخل عوامل جينية وبيئية في ظهورها مع وجود مشاكل في العمليات الكيميائية المتعلقة بالنواقل العصبية وأبرزها الدوبامين ومنطقة "Basal ganglia" والمسئولة عن التحكم في حركات الجسم.

وأما عوامل خطورتها تتمثل في الجينات والوراثة حيث تعتبر متلازمة في جينات سائدة وبتبقى نسبة الإصابة بيها 50% لو حد من الوالدين عنده خلل في الجينات دي، كمان بعض الأبحاث وضحت ارتباط التدخين أثناء الحمل وكذلك مضاعفات الحمل بظهور المتلازمة؛
وهنا نيجي للأعراض.

تتنوع الأعراض بين عرَّات جسدية وعرَّات صوتية؛
أما الجسدية فزي:
-رمش العين ودورانها.
-التكشير.
-هز الكتف والرأس والأطراف.
-وأخيرًا لمس الأشخاص والأشياء.

لكن بالنسبة للعرَّات الصوتية:
-النعير والنحنحة.
-الشخير.
-النباح.
-الكحة والصفير.
-تقليد أصوات الحيوانات.
-تكرار للجمل والعبارات.
-السب والتلفظ بعبارات وألفاظ بذيئة ولكن ده حدوثه نادر فبيصيب 1 من كل 10 مصابين بمتلازمة توريت.
والعرَّات بتتقسم لبسيطة زي رمش العين ومعقدة زي الشخير.

الحقيقة العرَّات مبتضرش صحة الفرد ولا حياته لكن ممكن العرَّات الجسدية تسبب بعض الألم وبتبدأ تتحسن مع الزمن وممكن تختفي تمامًا، لكنها ممكن تسوء في فترات القلق والتوتر والتعب،

وممكن كمان المصابين يعانوا من مشاكل في السلوك أو المزاج زي: اضطراب نقص الانتباه وفرط الحركة ADHD، اضطراب الوسواس القهري OCD، الاكتئاب أو القلق، والأطفال المصابين بيكونوا عرضة للتنمر بسبب العرَّات دي.

الحقيقة العرَّات بيسبقها شعور مستحث بإن العرَّات هتحصل قريب والشعور مبيخفش إلا لما تنفذ العَّرة ومن الأحاسيس دي -واللي بتعرف ب"Premonitory sensation"- :
-حرقان العين قبل الرمش.
-التهاب الحلق قبل النعير أو النحنحة.
-حكة في المفاصل والعضلات قبل الرعشة العنيفة للحركات والمفاصل.

إزاي تقدر تشخص المتلازمة؟
مفيش اختبار محدد لتشخيصها لكن ممكن الرنين المغناطيسي MRI والأشعة المقطعية للدماغ CT Brain تساعد في استبعاد اضطرابات تانية.
وبتتشخص بالمتلازمة لو حصل عرَّات كتير خلال سنة على الأقل.
وهنا نوصل لمرحلة العلاج،

الحقيقة مفيش علاج محدد للمتلازمة لكن ممكن تقلل الأعراض بالعلاج السلوكي زي تدريب عكس العادة habits reversal training أو التعرض مع منع الاستجابة exposure with response prevention.
ممكن كمان العلاج بالأدوية ولكن مبنستخدموش إلا لو العرَّات شديدة أو مؤثرة على الأنشطة اليومية.