رتبها

ما تيجوا نتكلم في حاجة مهمة و مفيدة عن سيدنا محمد 🤍
و اللي مش فاهم مننا كمسلمين يفهم و اللي فاهم يجدد معلوماته ..
ثريد طويل ...

حنتكلم عن زوجات الرسول .. مين هما ؟
ليه الرسول تزوج اكتر من زوجة ؟
و حيبقى في جزء خاص عن زواج الرسول الكريم بالسيدة عائشة بنت أبي بكر و توضيح نقطات فيما يخص سنها الصغير اللي يمكن كتير ميكونوش فاهمين النقاط دي ..
يلا نبدأ ..

مين هما زوجات النبي؟
١- خديجة بنت خويلد
٢-سودة بنت زمعة
٣-عائشة بنت أبي بكر
٤-حفصة بنت عمر بن الخطاب
٥-زينب بنت خزيمة
٦-أم سلمة "هند بنت أبي أمية المخزومية"
٧-زينب بنت جحش
٨-جويرية بنت الحارث
٩-صفية بنت حُيي
١٠-أم حبيبة "رملة بنت أبي سفيان"
١١-ميمونة بنت الحارث

الوحيدة اللي الرسول الكريم تزوجها " بأرادته " هي " السيدة خديجة بنت خويلد "
و قعد متزوجها " ٢٥ سنة "
و لم يتزوج بعد وفاتها لمدة " ٣ سنين "
حتى جاء له أمر الله بالزواج من باقي امهات المؤمنين تباعًا..

ما اسباب تعدد زوجات الرسول ؟ " نركز بقى هنا جدًا و نقرأ الكلام بالمنطق و بالعقل "
١- وقت وفاة الرسول كان عدد الصحابة ٣٠ ألف صحابي .. فضلوا ال ٣٠ ألف صحابي دول " كلهم " يساعدوا في نقل العلم اللي تلقوه عن الرسول و نقل حياة النبي " العامة اليومية "

ف يا ترى لما ٣٠ ألف شخص ينقلوا حياة الرسول العامة .. كام زوجة تقدر تنقل حياة الرسول الخاصة و تعاليمه في حياته الخاصة ؟!
ايه ده هو احنا ليه نعرف حياة الرسول الخاصة اصلًا ؟

لازم تعرف حياة الرسول الخاصة في بيته عشان تقدر تعرف ازاي كان بيدخل الحمام و بيقول ايه و هو داخل و هو خارج .. ازاي كان بيغتسل رضى الله عنه .. ازاي كان بيعامل زوجته عشان يبقى قدوة لباقي الرجال المسلمين ..

طيب هو يعني زوجة واحدة مكنتش تكفى انها تنقل حياته الخاصة دي ؟
لأ ..
ليه؟
مش يمكن واحدة تنسى .. واحدة يجي عليها وقت و تمرض و متاخدش بالها من تصرفات معينة للنبي .. واحدة تموت ..

طيب ليه الرسول كان في فترة علي ذمته ٩ زوجات مرة واحدة ؟
في حاجة في علم نقل الحديث اسمها " حديث متواتر "
و ده اعلي درجات الاحاديث صحة .. و ده الحديث اللي تلقاه و ذكره من ٩ اشخاص الي ١٠
يعني ٩ اشخاص او ١٠ قالوه هو هو بالحرف
يبقى اسمه حديث متواتر يعني حديث من اعلي درجات الصحة

طيب لما يبقى في ٩ زوجات بيقولوا الرسول ازاي بيتصرف في البيت في موقف ما بنفس الكلام بالظبط ال ٩
ال ٩ بيقولوا نفس طريقة دخول الرسول و خروجه من الحمام
و ال ٩ بيشرحوا نفس طريقة اغتساله عشان نتعلم منها
يبقى كدة المعلومات دي من مضمونة و من اعلي درجات الصحة

٢- النبي المفروض انه قدوتنا و ان اي تصرف يعمله يبقى حلال و مقبول و جائز .. فالرسول في تعدد زيجاته تزوج المطلقة و الأرملة " عشان يقول للمجتمع دول نساء عادي اننا نتزوجهم و اوعى تبص لواحدة فيهم يوما ما نظرة دونية

او انها اقل من غيرها او تقلل من حقها في المهر او تفكرها درجة تانية زي ما احنا في 2022 و لسة في ناس بتفكر كدة
و نسوا ان الرسول تزوج الزوجات دول مخصوص عشان يعلمنا انه عادي و مش عيب ولا حرام و ان حقوقهم محفوظة زيهم زي اي ست لم تتزوج "

تزوج الرسول المسيحية التي اسلمت و اليهودية التي اسلمت
و تزوج الرسول من البكر صغيرة السن و من المرأة الكبيرة في السن
تنوع زيجات الرسول ليعلمنا ان كل الفئات دي جائزة و ان امهات المؤمنات كان منهم المطلقة و الصغيرة و الارملة و الكبيرة و غيرهم ...

٣- اثبات الكمال البشري لرسول الله.
يعني ايه؟
يعني لو في راجل دلوقتي متزوج واحدة و جيت سألتها في يوم كان هي متخانقة فيه مع جوزها و قولتلها ايه اخبار فلان معاكي ؟
حتقولك فلان ده منه لله ده بيعمل و بيخلي و بيسوي و و و و و

طيب لو في راجل متجوز ٢ ؟
و جيت للاتنين و سألتهم اخبار فلان ايه معاكم؟
الاتنين حيشتموا فيه و يقولوا ده بيعامل التانية احسن ده بيخلي ده بيعمل و و و و و
طيب الرسول كان في وقت علي ذمته ٩
لما اتسألوا ال ٩ عن النبي
قالوا " انه قرأنًا يمشي علي الأرض "

و ده دليل علي الكمال البشري الرسول
تخيل لما ٩ ستات علي ذمتك يقولوا عليك راجب كويس و محترم و قرأنًا يمشي علي الارض ..
احنا كلنا عارفين الستات اصلا لهم عين ناقدة و بيني و بينكم اوقات في ستات بينكروا وقت الرفاهية اللي عاشوا فيه مع ازواجهم ..

الرسول مرة قال للصحابيات رأيت النار فوجدت اكثر اهلها من النساء
فقالوا لم يا رسول الله
فقال تكفرن العشير .. فيحسن لكنّ الرجل الدهر كله ثم يخطئ خطأ فتقول احداكن لزوجها و الله ما رأيت منك خيرًا قط .

ده دليل ان الستات بطبعها وقت الزعل بتنسى الفضل بينها و بين زوجها و ده بيدل ان الرسول لكماله البشري اجمع عليه ال ٩ زوجات علي اخلاقه و ده من اسباب انه يتعدد في الزيجات .

٤- لو انت مقتنعتش بكل اللي فات فخليني افكرك تاني ان احد الاسباب هو أمر الله له بالزواج منهن ..
حد حيقولي فين الآيات اللي من القرآن اللي تثبت انه أمر رباني؟

حقول لأ ثواني .. هو سيدنا جبريل الوحي كان كل تعاليمه و رسائله من الله للرسول بالقرآن ؟!
لأ مش كلها بالقرآن .. انواع وحي سيدنا جبريل : • القرآن
• الالهام
• ان يرى الرسول جبريل في صورته الملائكية
• ان يرى الرسول جبريل في صورته البشرية
• الرؤية الصالحة بالنسبة للانبياء

هل القران قالك صلي الفجر ركعتين و الضهر ٤ ركعات و المغرب ٣ و و و و
لأ القرآن مقلش كدة
هل معنى كدة انك لو صليت الضهر هو ال ٣ ركعات ينفع ماهو بقى مش أمر من ربنا عشان منزلش في القران ان الضهر ٤
حقولك لأ طبعا صلاتك مش حتحتسب لو صليت الضهر ٣ ركعات

يبقى خلينا متفقين ان زواج الرسول كان بأمر من الله و أن الوحيدة اللي تزوجها بأرادته و فضل معاها ٢٥ سنة حتى وفاتها و انقطع عن الزواج ٣ سنين بعد الوفاة هي السيدة خديجة

طيب تعالوا نقول شوية أمثلة كدة من اهمية تعدد زوجات الرسول قبل ما ننتقل لقصة زواج الرسول من السيدة عائشة في سن صغيرة ..

السيدة عائشة نقلت عن النبي ٢٢٥٠ حديث ..
السيدة حفصة بنت عمر بن الخطاب ثاني الخلفاء الراشدين و اللي حكم المسلمين ١٠ سنين .. كان لازم حيبقى محتاج مستشار له في أمور النساء عشان يصدر الفتاوي و الاحكام

فكان لازم يبقى جنبه حد من زوجات النبي تقوله الرسول كان بيعمل ايه و بيتصرف ازاي مع النساء و الشرائع الخاصة بالنساء ايه
طيب حد يقول يعني مكنش ينفع الرسول يتجوز واحدة بس و هي تبقى المستشار ده
حقوله لأ
ليه؟

هل اي راجل .. عادي انه يروح لأي ست غريبة عنه و يسألها عن الحيض مثلا ؟
عن النفاس ؟
عن وقت الجماع مثلا ؟
طيب هل اي راجل ينفع يروح لاي ست في اي وقت و يقولها عايز اعرف الرسول كان بيعمل ايه في الموقف ده؟
لا طبعا... لكن لما تكون دي بنتك الحرج حيترفع و حتعرف تاخد منها المعلومات .

في قصة كدة في ليلة ما و تحديدا قبل الفجر سيدنا عمر كان ماشي بيتفقد احوال شعبه فمر علي بيت سمع منه صوت ست بتقول شعر فيما معناه ان زوجها وحشها اوي و انها لولا بتتقى الله كان زمانها يعني عملت خطيئة ..

سيدنا عمر راح جري في نفس الوقت " الفجر " خبط علي بنته السيدة حفصة و قال لها : يا حفصة قال النبي كم تصبر المرأة علي بعد زوجها؟
فقالت له : أربعة أشهر و لا تزيد يومًا

في نفس الوقت سيدنا عمر طلع منادي بقرار ان ممنوع أي مجاهد يقعد في أرض الجهاد اكتر من ٤ أشهر حتى لو الامر مستدعي جلوسه و انه اجبار عليه يقطع المدة و يرجع يقعد مع مراته يشوف احتياجتها النفسية و المادية و الاجتماعية و بعدها يرجع للجهاد تاني ..

و ده أمر اجباري ألا اذا كانت مراته موافقة و مسمحاه انه يفضل في ارض الجهاد .
يعني متخيل انك لو قعدت بعيد عن مراتك في دولة تانية اكتر من ٤ شهور و مرجعتلهاش و بعدين رجعت سافرت تاني و هي مكنتش مسامحة في عدم رجوعك فأنت آثم و بتاخد ذنوب كل يوم من بعد ال ٤ شهور ..

نيجي لموقف تاني.. السيدة زينب بنت جحش .. كانت متزوجة في الأول " زيد بن حارثة " اللي قبل الاسلام كان ابن الرسول بالتبني
لحد ما جاه الاسلام و حرم التبني و قال تعالى { ادْعُوهُمْ لِآبَائِهِمْ هُوَ أَقْسَطُ عِندَ اللَّهِ... }
المهم السيدة زينب كانت عصبية شوية و بتعلي صوتها كتير

فكان زيد يروح للرسول يقوله انا عايز اطلق زينب دي بتعلي صوتها عليا يا رسول الله
فالرسول يقوله اتقى الله يا زيد و أمسك عليك زوجك
يعني يا زيد هي معملتش حاجة حرام هي بس عصبية شوية و دي شخصيتها فاستحملها شوية ..
المهم ربنا اراد ان بردو زيد و زينب يتطلقوا ..

و عشان ربنا يؤكد حرمانية التبني لان العرب زمان كانوا بيتبنوا كتير جدا.. فأمر الله تعالى الرسول انه يتزوج زينب بنت جحش ...
يعني ايه؟
يعني دلوقتي لو انتي ست متزوجة فحماكي " محرم دائم لكى " حتى لو زوجك اتوفى او طلقك..

فلو الرسول تزوج زينب " اللي هي كانت زوجة زيد اللي كان يوما ما ابن النبي بالتبني " يبقى كدة الرسول بيؤكد حرمانية التبني و انك يا زيد لأ مش أبني لأنك لو ابني فعلا كان استحالة اتزوج زينب ..

مع العلم ان زينب دي بنت عم الرسول يعني الرسول لو كان عايز يتزوجها من زمان كان تزوجها لكن هو مكنش عايز اصلا ولا هو باصص لجمال ولا حسب ولا نسب و لا الكلام ده خالص انما هو أمر آلهي لتأكيد انتهاء التبني في الاسلام ..

طيب ايه الدليل ان زيجات الرسول امر آلهي ؟
قول الله تعالى
{ لا يَحِلُّ لَكَ النِّسَاءُ مِن بَعْدُ وَلَا أَن تَبَدَّلَ بِهِنَّ مِنْ أَزْوَاجٍ وَلَوْ أَعْجَبَكَ حُسْنُهُنَّ إِلَّا مَا مَلَكَتْ يَمِينُكَ ۗ وَكَانَ اللَّهُ عَلَىٰ كُلِّ شَيْءٍ رَّقِيبًا }

طيب هو الرجل المسلم العادي اللي بيعدد الزوجات مش مأمور في القران بالعدل بينهم .. ولو معدلش بيهم فهو آثم و يأتي يوم القيامة و شقه مائل .. انت بقى تعرف ان الرسول بما انه مش هو اللي اختار زوجاته فمكنش مأمور من الله بالعدل بينهم ..
ايه ده مين قال كدة؟

ربنا اللي قال { تُرْجِي مَن تَشَاءُ مِنْهُنَّ وَتُؤْوِي إِلَيْكَ مَن تَشَاءُ... }
و مع ذلك رسولنا الكريم كان بيعدل بين زوجاته ..

يلا عشان طولت عليكم نتكلم في اخر نقطة و هي زواج الرسول من عائشة ذات التسع سنوات

تعالوا كدة مع بعض .. احنا دلوقتي في سنة 2022.. تعالوا نروح قرية من قرى مصر او منطقة من مناطق البدو و نشوف كدة بيزوجوا البنات و هما كام سنة ؟

حتلاقي بالكتير اوي لما البنت تبقى 12 او 13 سنة ..
ده و احنا في سنة 2022
فما بالك من1400سنة وقت مكنش فيه جامعات ولا مدارس تفتكر متوسط عمر زواج البنت كان كام وقتها ؟!
بالمنطق الاجابة حتكون اول ما البنت تبلغ ..

طيب خلونا نسأل .. هل الرسول خالف الاعراف في زمنه بزواجه من بنت ٩ سنين؟
احب اقول لأ ..
ازاي؟

الرسول تزوج السيدة صفية بنت حيي " بنت قائد اليهود " و هي عمرها ١٤ سنة
و كانت متزوجة مرتين قبل الرسول و قبل ما تدخل الاسلام ..
يعني تخيل يهودية تزوجت مرتين قبل سن ١٤ سنة
يعني لا الاسلام وقتها هو اللي امر بزواج صغار السن ولا الرسول خالف اعراف مجتمعه ..
طب اقولك حاجة كمان

انت عارف ان الرسول مش بس مخالفش اعراف مجتمعه العربي ده كمان مخالفش الاعراف العالمية
ازاي؟
في فرنسا الاميرة أنياس تزوجت الامبراطور البيزنطي أكسيوس الثاني و هي عندها ٩ سنين

و الأميرة مارجريت تزوجت أيزك انجلوس الثاني و هي عندها ٨ سنين
و ده مش كلامي ولا كلام المسلمين ده كلام الكتب التاريخية الفرنسية

يبقى الرسول لا خالف اعراف مجتمعه ولا اعراف اليهود ولا الاعراف العالمية ..

طب انت عارف ان ابو جهل تزوج بنفس الطريقة دي
و ان ابسط حاجة لو الرسول كان عمل التصرف ده و كان غريب في مجتمعه كان حيطلع ابو جهل يشكك في مصداقية الرسول و نبوته و يقول هو ده مدعى النبوة اللي بيتزوج البنات الصغيرة ..
بس ابو جهل معملش كدة
ليه؟
لان دي كانت الاعراف زمان

طيب نيجي للبنت نفسها بقى.. هل البنت اللي عندها ٩ سنين دي حتكون بلغت؟
الاجابة اه .. زمان عوامل الجو و الاكل و المعيشة كانت بتخلي البنات تبلغ بدري..

احنا دلوقتي في سنة 2022 و متوسط اعمار بلوغ البنت بيكون ١٢ او ١٣ سنة مثلا .. مع ان في عادي بيبلغوا قبل كدة ..
زمان مع تغيير المناخ و المعيشة كان متوسط البلوغ ٨ او ٩ سنوات

تعالا انت دلوقتي هات بنت من مدينة و بنت من البدو
و الاتنين عندهم ٩ سنين
حتلاقي الفرق بينهم رهيب
البنت اللي من المدينة صغيرة كدة و جسمها صغير و يمكن تكون مبلغتش ..
انما بنت البدو حتحس انها كبيرة و جسمها علامات الانوثة فيه ظهرت و حتلاقيها بلغت.

طيب اقولك مفاجأة .. ان عائشة اصلا قبل زواجها من النبي كانت مخطوبة ..
اه و الله كانت مخطوبة من جبير بن المطعم بن عدى .. بس الزواج لم يتم ..
يعني ده كان العادي عند العرب من ١٤٠٠ سنة

طب نيجي لسؤال مهم .. ياترى البنت في السن ده نفسيًا كانت مجهزة للزواج ؟
اقولك اه بردو زمان بما ان ده كان سن الزواج الطبيتي للبنت فهما كانوا مهأيين انهم يتزوجوا و يتحملوا المسئولية عادي جدا ..

اقولكم حاجة .. كل واحد و واحدة يروحوا يسألوا جدتهم كدة اتجوزوا و هما عندهم كام سنة .. جدتكم اللي هي مش اكيد من ١٤٠٠ سنة .. اللي ممكن اقصى حاجة تكون من ٧٠ او ٨٠ سنة بالكتير .. حتلاقوها اتجوزت و هي ١٤ او ١٥ و يمكن اقل كمان ..
فما بالك من ١٤٠٠ سنة بقى

اخر حاجة حنهي بيها هي مقولة بودلي المستشرق المنصف اللي قال :
كانت عائشة علي صغر سنها ناضجة ذلك النضج السريع الذي تنضجه نساء العرب و الذي يسبب لهن الهرم في اواخر العشرينات .. اما غيري من المستشرقين فقد نظروا من وجهة نظر المجتمعات العصرية التي يعيشون فيها ..

فلم يقدروا ان زواجًا مثل ذاك لا يزال عادة اسيوية و لم يفكروا في ان هذة العادة لازالت ايضا قائمة في شرق اوروبا و كانت امرًا طبيعيًا في اسبانيا و البرتغال و انها كانت عادية ايضًا في المناطق الجبلية البعيدة في الولايات المتحدة .

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة