كيف يصبح ماضي الابوين الاليم جحيم ابنائهم ؟
و كم يتطلب من جيل يُعذب حتى يغفر الانسان ما حدث له ؟
قصتنا اليوم عن عائلة التوربين
و كم يتطلب من جيل يُعذب حتى يغفر الانسان ما حدث له ؟
قصتنا اليوم عن عائلة التوربين
اليوم بنتكلم عن عائلة التوربن اللي تتكون من 13 طفل للأم لويس توربين و الأب دايفيد توربين اللي تزوجوا عام 1985 بعد ما هربوا عن أهلهم و غالبا يرجع سبب هروبهم لأن ديفيد كان 24 سنة بينما لويس عمرها 16 سنة ! و علاقتهم بدت من لما ديفيد كان عمره 17 سنة و لويس عمرها عشر سنوات🚩
ويقول من أول ما شفتها و أنا عارف أنها هي أم عيالي وكان يشوفها لانها بنت القس حق الكنسية اللي يروح لها , حبيبي القس يحسبه جاي يبي الآخرة طلع يبي بنته
لكن مافيه شي يثبت إن بينهم علاقة قبل يصير عمر لويس 15 اللي بهالوقت لويس كانت تعاني بالمدرسة و البيت فهي كانت دايما وحيدة و للأسف هالشي ما كان بأختيارها و كانت تعاني من تنمر طلاب مدرستها على شكلها ولبسها اللي كان فعلا قديم
أنا وأنت عزيزي المتابع نعرف إنه من السخافة النقدعلى الناس لهالأسباب وأتمنى أنك معاي بهالنقطة إذا ما أنت معاي وش مقعدك عندي؟بس لويس ما كانت بين ناس عاقلة كانت بين مراهقين و نرجع نقول المراهقين أخطر من النووي أثنينهم قوة تدمير فتاكة وما تقدر تسويلهم شي لان الإعتداء عليهم محرم دوليا
المهم خل نرجع و نتكلم عن ديفيد اللي كان عكس لويس بكل شي طفولته كانت جميلة وكان ذكي جدا وكان عنصر فعال بنشاطات المدرسة صح البعض كان يشوفه -نيرد- وغريب شوي لكنه كان خفيف دم و ينحب وكان يعتبر معروف إجتماعيا
فتخيلو شعور طفلة تعاني إجتماعي تلقى هالرجال المشهور و الناجح دايخ عليها ؟ المهم جاء ذاك اليوم اللي هجوا فيه و تزوجوا طبعا أبو لويس ما كان راضي و العايلة كلها تصيح و اللي يلفظ أنفاسه الأخيرة وحالهم لله
لين جت لويس و قالت تراه يستلم ملايين سنويا يا بابا قال أجل روحي الله يستر عليك و الله إني حبيته من يوم كان يجي للكنيسة و عينه ما تطيح من عليك وأنتي عشر سنين 🚩
المهم أنهم راحو لديرة ثانية و الحياة فعلا ضحكت للويس يعني ما بين البيت الفخم إلى السفرات المتتابعة إلى هالذكي الناجح اللي ميت عليها يعني فعلا خلاص كل شي صار بصفها أخيراً و بعام 1988 أستقبلوا طفلتهم الأولى جينفر اللي بدأت سلسلة الـ 13 طفل و كلهم تبدأ أساميهم بحرف الـ ج
كانو مبسوطين مره و لويس شرت تذاكر طيران لأهلها عشان يقدرون يجون يشوفون بنتها وهالشي أستمر بكل مناسبة تصير لعائلتها تحجز لأهلها و يجون و توديهم لأغلى المطاعم و تشريلهم من أحسن المحلات و ما يرجعون لبيتهم إلى وهم مبسوطين على الآخر
حتى إن وحده من خواتها كانت تمزح وتقول إن لويس ما تزوجت عشان الجمال لويس تزوجت عشان الفلوس يسفاب العشاء اللي كانت تعشيك اياه بس
و كانو يقولون بكل مره نجي ديفيد ما كان يكلمنا أبد يعني يجي و يقعد ويناظرهم و بس رغم كثرت جياتهم للبيت إلا أنهم ما كسروا حاجز هالصمت أبدا بس كانو يقولون شكله من ذولاك الأذكياء اللي ما يعرفون يتعاملون مع الناس! حبيت إنهم فكروا كذا ما قالو حامت كبده ما يبينا
بعد كذا أنتقلوا لتكساس وبهالوقت معهم 3 أطفال لويس صار عندها مشكلة بالقمار لدرجة العائلة بدت تتجمع عليها الديون ! لكن الموضوع ماكان كان قمار و بس العائلة كانت عايشه ببذخ بيتهم من أكبر البيوت سياراتهم من أفضل السيارات و لويس كانت تتباهى بإن زوجها كل سنة لازم يشتري سيارة جديدة
اللوحة مكتوب ديفيد ولويس فورئيفر 👩❤️💋👨
هنا بدت بنتهم جينفر تدرس و من أول يوم لها بالمدرسة على طول صارت هدف للتنمر كانو البزران يقولون ريحتها مره شينه و كانت كل مامرت من مكان الكل يسكر خشمه و كانت ما كانت تتروش ما كانت تفرش أسنانها ما كانت تسرح شعرها يعني كان وضعها جدا سيء💔
لدرجة كل يوم تلبس النفس بدون حتى يغسل رغم إن إن أحد أقاربهم تقول كنت أدخل غرفة جينفر و أشوف درجها مليان فساتين و كانت هالفساتين قيمتها تتعدى الـ 500 دولار لكن كانت مغبرة و التاق مازال عليها !
بعد لويس ما جابت طفلها الرابع أخذت عيالها و راحت لأهلها لأن كذا أرخص من جيبتهم أتوقع يوم دخلت عليهم كانو مجهزين شناطهم ينتظرونها ترسل التذكرة أهلها يقولون هالمره بدينا نلاحظ أن لويس وضعها مو طبيعي مع عيالها كانت مره مسيطرة عليهم
لكن ما فكروا بالموضوع بالحيل كانو شايلين هم متى يرجعون ملابسهم اللي بالشنطة للدولاب
يوم جت تروح لويس جتها أختها إليزابيث قالت عادي أروح معك لبيتك بهالصيفية ؟ ماعندي شي أسويه قالت لويس أبرك الساعات تعالي ساعديني مع عيالي هنا إليزابيث بدت تشوف الوجه الثاني للويس و ديفيد مع عيالهم كانو أبدا ما يظهرون إي مشاعر حب لعيالهم دائما لازم يستأذنون قبل يسوون أي شي
و إذا جاء وقت الأكل لويس كانت تجهز السفرة لكل العائلة لكن بالنسبة للأطفال كانت تناديهم واحد واحد بحيث إذا خلص الأول يرقى ثم تنادي الثاني و كانو إذا نزلوا لازم يوقفون و يناظرون أمهم و يبتسمون لها إذا ردت الإبتسامة يعني أيه أقعد
و إذا خلصوا اكل يرجعون يسسوون نفس الحركة و إذا ردت الإبتسامة يعني إيه خلاص أرقى ! و إليزابيث برضو إكتشفت إن ديفيد ما هو الشخص الخجول الهادي طلع إنسان عنيف و ممشي العائلة على المسطرة و يقودهم كأنه يقود معسكر وكان معنف أختها !
وتتذكر حادثة حصلت لها بذيك الإجازة لما كانت تتروش دخلوا عليها ديفيد و لويس و لما صارخت قعدوا يضحكون يقاله مقلب ! عموما هالصيف ما أنتهى على خير إليزابيث أنطردت من البيت لما أكتشفوا إنها كانت تكلم واحد بالشغل
و رفضوا يردون على إتصالاتها أو يعطونها أغراضها حتى و أضطرت تنام بالكراسي العامة لين قدرت تأمن طريقة ترجعها لأهلها !
بدت السنة الجديدة و جينفر الحين صارت بثاني و مازال التنمر مستمر و ما زالت جينفر بنفس الهيئة و بنفس الوضع و بهالوقت أهلها أعلنوا إفلاسهم وهم حاليا معاهم 6 أطفال و باعو بيتهم الكبير الحلو و أنتقلو لبيت ثاني
و الناس اللي أشتروا البيت يقولون أخذ منا 3 شهور تنظيف بس عشان تروح الفضلات اللي كانت مالية البيت هذا غير إن الجدران كلها خدوش يعني البيت فعلا كان تعبان ويقولون ما نتخيل حتى الفيران تعيش بهالوضع !
وهنا بدت العائلة تتقوع على نفسها أكثر من قبل مافيه إي علاقات مع الجيران أو مع الأهل أنقطعوا عن العالم تماما و بعام 1999 صارو 7 أطفال و التشدد عليهم زاد و كانو يخافون من أهلهم لدرجة إنهم ما يتعدون عتبة البيت و لو تكرموا و طلعوهم ممنوعين أنهم يقولون أسمائهم لأي أحد
و أساسا ممنوعين إنهم يتكلمون مع الناس ! و أحد بنات الجيران شافت هالبيت اللي فيه 7 بزران و قالت أبد هنا الهيصة وكانت تلعب معهم من وقت لوقت لين امها ابعدتها عنهم
هنا جينفير بدت تكبر شوي و بدت تشكي لأهلها التنمر اللي بالمدرسة فكان حلهم إنهم يفصلونها من المدرسة وجينفر كانت الوحيده من هالـ 13 اللي راحوا لمدرسة ! لأنهم قالو خلاص حنا بندرس عيالنا بالبيت و فعلا لويس شرت سوابير و أقلام و وسائل تعليم لكن عمرها ما درستهم !
طبعا هم تاركين عيالهم كل السنة بدون أكل بدون تعليم بدون حتى يسمحون لهم يتروشون ! لكن مره أو مرتين بالسنة يطلعونهم يسافرون و يخلونهم يلبسون ملابس حلوة عشان يصورونهم و يحطونها بالفيسبوك وهالشي خلا الكثير يشوفهم عايلة سعيدة !
ومع الوقت ديفيد بدا يبتكر طرق جديده لتأديب " تعذيب " عياله ! حتى إن الوضع أستفحل لدرجة إنه بناء أقفاص مثل أقفاص الكلاب و يسجن عياله فيهم !
الثلاجة و دروج المطبخ كان عليها أقفال !حتى إن الجيران كانو يشوفون البزران يفتشون الزبايل يقولون بذاك الوقت كنا نعتقد إنهم مضيعين شي و يدورونه أو قاعدين يلعبون لكن الحين ما نصدق إننا كنا شهود و خذلناهم !
و أحد الجيران كان يقول الكراج حقهم مليااااااااان سياكل و ألعاب جديده ما أحد أستعملها ابد
و استمر هالحال لسنوات بل زاد سوء بعام 2008 لويس صار عمرها 40 ويقال إن جتها أزمة منتصف العمر وهنا خلوا 10 من عيالهم بترلير " مقطورة " و الأب و الأم و الأثنين الصغار أخذولهم شقة تبعد عن هالمقطورة مسافة ساعة بالسيارة !
و تركو للأثنين الكبار مسؤولية أخوانهم و كان الأب كل راس أسبوع يجي و يجيب لهم أكل مجمد حتى ما يكفي لآخر الأسبوع و يروح وحتى و الأم و الأب مو موجودين كانو بحالة رعب و لا قدروا يطلعون برا أبداً لأنهم قايلين لهم لو طلعتوا بتجي الحكومة تاخذكم و تحط كل واحد منكم بديرة
لويس مثل ما قلنا فصلت و أول شي سوته تركت الكنسية رغم إنها كانت متدينة جداً و بدت تدخل علاقات مع رجال و زوجها كان هو اللي يوصلها لهم !!!!!! يعني والله ما أدري وش ينقال عنهم لا هم مع المعزا ولا هم مع الظان ، طاردين الضعيفة إليزابيث للشوارع عشانها كانت تكلم واحد و الحين يسوون كذا !
وبما إن العيال كانو بالمقطورة لحالهم الأم و الأب كانو معطين أجهزة جوال لعدد من عيالهم " اللي يثقون فيهم " و واحد منهم ولدهم الكبير و هو الوحيد اللي أكمل تعليمه ودرس جامعة بس كانت أمه تروح معه و توقف برا الكلاس لين يخلص و ترجعه هذا حبيبهم أجل وش بيسوون باللي ما يحبونه
المهم هنا وحده من بناتهم أسمها جوردان بدت تسرق الجوالات اللي ماعاد أحد يستخدمها و تدخل على اليوتيوب و هنا لقت جاستين بيبر و أكتشفت إن فيه عالم ثاني غير العالم اللي هي عايشه فيه و بدت تتعلق بجاستين مره
هنا قرروا لويس و ديفيد يجددون زواجهم وراحوا اخذوا عيالهم من التريلر ومشوا للاس فيغاس
الاسرة شكلها احسن احوالهم المادية و أنتقلوا لبيت جديد بكاليفورنيا و كان بيت كبير و من أفضل أحياء كاليفورنيا و الكل كان يشوفهم عايلة عايشة أحسن عييشة حتى إن أهل لويس يقولون هي الوحيدة اللي مستانسة بحياتها عندها هالبيت الفخم و هالزوج الغني الحبيب و عيالها كثار و مؤدبين
لكن ما أدري شلون ما لاحظو إن هالعيال ما كانو يعرفون يتكلمون حتى ! جينفر اللي تعليمها وقف على ثالث إبتدائي كانت هي اللي تحاول تعلمهم شلون يتكلمون بس مصطلحاتها جداً محدوده ! أحد المرات جينفر قدرت تتجرأ و هجت من البيت وراحت تركض لين دخلت المدينة و تمسك الناس اللي بالشارع
تقولهم ممكن تعطوني وظيفة و سيارة و شقة!حبيبتي ما تدري شلون الدنيا ماشيه و دلوها على محلات وقالو أسألي إذا يبون موظفة لكن البنت ما كان معها بطاقة هوية و كانت رافضة تعطيهم أسمها و ماهي عارفة تاخذ و تعطي معاهم هالشي خلاهم يعتقدون إنها متأخرة عقلياً وجت الشرطة ورجعتها لأهلها!
ما تصور إلا بالحمام إذا أمها و أبوها طلعوا وكانو الناس يعلقون عليها ليش دايم أنتي لحالك و ليش ما تصورين إلا بالحمام بالليل ؟
هنا قعدت تسولف مع واحد من اللي بالتعليقات و تعلمه كيف عايشين قالها وش تقولين أنتي وشلون عايشين كذا أنت ؟ دقي على 911 وقعدت تخطط هي و أختها جينفر لمدة سنتين عشان يكلمون 911 و جاء ذاك الصباح من عام 2018
لما جوردن كان عمرها 17 نقزت من الدريشة و أخذت معها جوال أخوها القديم اللي ماكان فيه بطاقة بس كانت تقدر تتصل على الطوارئ !
مكالمتها مع 911
لما وصل الشرطي لها
وهذي الصور اللي ورته
الشرطة راحو مع جوردن لبيتهم و فتحت لهم لويس وتقول أهلين سمو وش بغيتوا كأن الأوضاع طبيعية قالو لازم ندخل نتطمن على الأطفال و لما دخلو و كانو مصدومين
احد غرف الاطفال و ملابسهم اللي يلبسونها من سنة 💔
لكنهم ما حصلوا أطفال مقيدين بس اللي ماكانو يعرفونه إنهم كانو حطين كراتين على الغرفة اللي فيها البزران عشان ما يبين إن فيه باب! ؟
لحظة اعتقال لويس و ديفيد
الشرطة أخذوا الأطفال للمستشفى و اللي بالمستشفى يقولون كانو مره مؤدبين و لطيفين الكبيره اللي بذاك الوقت عمرها 29 سنة كان وزنها 14 كيلو بس ! وكلهم كانو يعانون من سوء تغذية لكن للأسف واحد من العيال يده ما نمت وكأنها يد طفل بالمهد💔
و 2 من البنات ما راح يقدرون يجيبون أطفال لأنهم يعانون من(psychosocial dwarfism)اللي هو قصر القامة النفسي بسبب نقص في هرمون النمو من أعراضه قصر القامة الشديد الوزن الغير مناسب و عدم نضوج الهيكل العظمي و هالمرض يحدث تدريجيا بسبب و جود الطفل ببيئة مليانة توتر وخوف وسوء معاملة مستمرة
هنا الشرطة حصلت يوميات الاطفال اللي كانو يكتبونها على مدار السنوات و كان فيها تفصيل لكل انواع سوء المعاملة اللي تعرضوا لها منها انهم يتروشون مره بالسنة اكلهم وجبة وحده باليوم و يكون ساندوتش فول سوداني ماهو مسموح لهم المشي ولا الحركة يا يجلسون يا ينسدحون !
بينما الام و الاب ياكلون من اجمل انواع الاكل و اذا خلصوا حطوه على كونتر المطبخ لين يعفن لكن ماهو مسموح لاي احد من الاطفال يمد يده وياكل منه !
كل الأبوين تم إجراء فحوص نفسية لهم و كانو مهيئين للمحاكمة و أساسا دليلك إنهم واعين إن الشي اللي يسوونه خطأ أنهم ما يطلعون عيالهم إلا بعد ما ينظفونهم و يلبسونهم أحسن لبس وكلهم أنسجنوا 25 سنة و عيالهم تكلموا بالمحكمة و بالبداية تقريبا كلهم كانو يدافعون عن أمهم و أبوهم ماعدا اثنين
ماتقدر تلوم هالمساكين ما يعرفون شي بالدنيا إلا هالحياة و هالناس ! ما يدرون شلون الناس الطبيعية عايشة و لا يدرون وش الخطأ اللي أهلهم كانو يسسونه !💔
شهادة الاثنين المتبقين
لكن بعد فترة كلهم طلبوا حكم من المحكمة ضد والديهم بعدم التعرض و هالقرار يشمل منع المكالمات و الرسائل و اي شكل من اشكال التواصل
نرجع للويس و لسرها المخفي
- محتوى حساس للغاية يحتوي على تفاصيل اعتداء على الاطفال -
- محتوى حساس للغاية يحتوي على تفاصيل اعتداء على الاطفال -
اخت لويس تعتقد ان اختها فعلت ما فعلته بسبب انخراطها في السحر !
صدقوا او لا تصدقوا جاستن بيبر لعب دور كبير بهالقصة و لو ما سمعت له جوردن كان ممكن ما زالوا مسجونيين !
وجاء البوم الموعود و عزمتها هايلي بيبر على حفلة لجاستين و وفرت لها هي و اخوانها مقاعد خاصة
كما انها حاليا نشطة على وسائل التواصل الاجتماعي و تقول ان كلام الناس لها ساعدها على التشافي
و صلنا لنهاية قصة اليوم التجربة المؤلمة اللي مرت فيها لويس لاشك انها ممكن تدمر اي انسان و اؤمن انها تعاني لكن هذا ما يعطيها عذر اسائتها لاطفالها ، قلبي مع كل الضحايا اللي لا صوت لهم و احب اذكر الجميع بخط التبليغ عن العنف الاسري بالسعودية : 1919
القصة كتبت على طلب الجميلة @uli90s 🧚♀️❤️
جاري تحميل الاقتراحات...