بحكم شركتي دي أكتر مرة أبقي قريب أوي من الماركتنج وأخيرا فهمت إزاي بتشوف علي فيسبوك وإنستاجرام إعلانات الحاجات اللي شوفتها في مواقع تانية. ثريد سريع عن اللي إتعلمته...
أي حاجة بتعملها علي أي موقع أو تطبيق الموقع بيسجلها. عملت سيرش علي حاجة ، فتحت صفحة منتج معين ، أضفت حاجة للباسكت ، قريت مقالة ، عملت سكرول للآخر ، قريت ال reviews... إلخ
التسجيلات دي في عالم الإنترنت إسمها events ، كل إيڤنت بيعبر عن أكشن معين إنت عملته عالموقع/التطبيق وبيبقي جواه بياناتك. كل موقع بيحدد إيه ال events اللي عايز يعملها tracking.
علي سبيل المثال ، في التجارة الإلكترونية إنك تشوف صفحة منتج معين دة event مهم وأغلب المواقع بتسجله. نفس الشئ لما تضيف منتج للباسكت ، أو حتي تشيل منتج.
أو مثلا كتير من مواقع الأخبار بيبقي في زرار في نص المقالة بتدوس عليه عشان تقرأ بقيتها ، الزرار دة لازمته إنه يحسب إيفنت إنك قريت المقالة عشان يفرق بين عدد اللي قرأو للآخر واللي بصو بس علي أول جزء.
نيجي بقي للإعلانات ، ببساطة شديدة أغلب المواقع بتبقي حاطة سوفت وير من فيسبوك ، السوفت وير دة بيعرف إنك نفس مصطفي اللي فاتح فيسبوك/إنستاجرام علي نفس الجهاز. بيعرف دة إزاي؟ من ال cookie.
ال cookie هي ملف الموقع بينزله في جهازك ، لما بتخش علي فيسبوك/إنستاجرام هو بينزل ملف علي جهازك فيه رقمك عندهم ، بعدها لما إنت تدخل علي موقع تاني وليكن أمازون ...
أمازون بيكون حاطط البرنامج بتاع فيسبوك عندهم ففيسبوك بيدور علي جهازك عالملف بتاع فيسبوك وبياخد الرقم اللي جواه وبكدة بيقدر يعرف إنك نفس الشخص ويتابع إنت عملت إيه علي أمازون.
عشان كدة ال cookies بالعربي ترجمتها ملفات تعريف الإرتباط لأنها لا مؤاخذة بتربطك ما بين المواقع المختلفة.
طيب إزاي بقي إنستاجرام بيطلع لك إعلان عن المنتج اللي إنت بصيت عليه؟ الموضوع طلع بسيط جدا ... الموقع ممكن يبعت events - زي viewed a product - لفيسبوك ويبعتله من ضمن الداتا المنتج اللي إنت بصيت عليه ... وبعدها يقول لفيسبوك أي حد عمل ال event دة طلعله إعلان اللينك بتاعه المنتج
ويقدر كمان لما تشتري المنتج يبعت إيفنت لفيسبوك عشان يبطل يطلعلك الإعلان.
أنا طول عمري عارف موضوع ال events بس كنت بستخدمها لتحليل إزاي الناس بتستعمل الموقع/التطبيق ومكنتش أعرف إنها ينفع تتبعت لفيسبوك وجوجل وشبكات الإعلانات ويتعمل targeting بيها مش بس بال demographics. حاسس إني كنت حمار سيكا بس هي دي ميزة إن يبقي عندك ستارتاب إن غصب عنك هتتعلم 😅
أولسو دة ثريد كامل عن ال cookies كنت لسة معرفش إزاي فيسبوك وجوجل بيعرفو يعلنولك عن إيه
جاري تحميل الاقتراحات...