رتبها

تأثير تراجع زحل على الابراج 🪐..
- زحل متراجع بالدلو وراح ينتهي التراجع بتاريخ ٢٣ اكتوبر ٢٠٢٢
- مهم تعرفون تأثيره على ابراجكم
- أكثر الأبراج المتأثرة هي #الدلو #الاسد #الميزان #الثور #الجدي

نبدأ ب #الدلو
الفترة الأخيرة طلعتوا من حياتكم الأشخاص اللي يستنزفون طاقتكم، اي شخص يشكك بذاتك وبجمالك وحتى بصحتك العقلية تبعده عنك، كثير تحسون بذنب وحاولوا تقاومون الشعور لأنكم سويتوا التصرف الصحيح بابعاد هالاشخاص، عندكم معجبين مهووسين فيكم..

هالمعجبين يلقون صعوبة بالغة بأنهم يتركوكم بحالكم، يحاولون بكل جهودهم انهم يجذبوكم لهم، وكل ما قسيتوا عليهم كل ما حبوكم زيادة، اقطعوا التواصل بطلوا تكونون حنونين مع هالاشخاص لان يستنزفوكم كثير..

غالبًا قبل ما يبدا التراجع دخلتوا بعلاقة مع شخص ناضج ما يحب الاتنشن على حسابكم، ولا يستغلكم بأي شكل، مو شرط علاقة عاطفية ممكن صداقة، وممكن اكثر من شخص واحد، حافظوا عليهم خصوصًا بفترة التراجع اشوف تصرفات طفولية من الطرفين، لو احتجتوا مساعدة تكلموا لان يمكن ما ينتبهون..

ممكن تأدي لمشاكل بسيطة وابتعاد، ما انصح تبتعدون عن بعض ولا تجمعون الأذى القديم بالاشخاص الحاليين، ممكن عندكم برود أو انعدام ثقة بالذات ماراح يدوم هذا الشعور واكتموه ما انصح تتكلمون عنه بس ثقوا انها فترة وبتتحسنون..

في ضغط من ناحية العمل ويمكن في تأجيل للترقية، اما اللي يدرسون لا تأجلون اشغالكم استعينوا بحد مب مشكلة، بعضكم بيصرف مبالغ عشان حد يسويله شغله، عندكم ابتعاد من السوشال ميديا والظهور، انتبهوا تدخلون بنزاعات لانه مب لصالحكم، اشوف تكاسل بالرغم من هذا في نتايج حلوة باذن الله

اشوف في افكار انتقامية للأشخاص اللي استغلوكم او تمصلحوا معكم، لا تخافوا راح تاخذون حقكم حتى بدون اي انتقام، لكن اشوفكم مصرين تسوون اللي ببالكم 🫢 خذوا حقكم بس انتبهوا تبالغون بردات الفعل او بالانتقام نفسه.. ممكن مشاكل جلدية قديمة ترجع لكم..

انتبهوا من جفاف البشرة اشربوا سوائل قد ما تقدرون، اللي يتمرنون اشوف في الام بالعضلات لا تضغطون على انفسكم واستشيروا مختص، ممكن حساسية بالأسنان، وهالاسبوعين ممكن تواجهون جفاف بالعيون، اخيرًا ممكن الام بالساقين وغالبًا لكثرة المشي وانتو مب حاسين.. ممكن تعانون من توتر هي فترة وتروح!

#الأسد
فترة حلوة لكم بالرغم من الصعوبات اللي تواجهوها، الا ان الكارما الحسنة راح ترجع لكم، عكس الدلو انتو اذا دخلتوا بعلاقة قبل التراجع ف ممكن تفهمون انها ما تناسبكم خلال هالتراجع وتفكرون تقطعوها بشكل حكيم..

بعد عندكم اشخاص ما ييأسون منكم مهما انرفضوا، وهالاشخاص يتأثرون جسديًا منكم خصوصًا لو معكم من فترات طويلة ممكن تجيهم مثلًا رجفة باليدين او الساقين اذا كان الموضوع يتعلق فيكم وببعدكم عنهم او اذا قسيتوا عليهم حتى

حاولوا تهدأون مع الاشخاص وحتى لو بتقطعوها معهم اقطعوها ببطئ وتحملوا الثقل عشان ما ينتقمون منكم، هالاسبوعين ممكن تواجهون صداع او جفاف حاد بالأنف، روحوا مواعيدكم لا تأجلوها، اشوف في طلعات كثير مع صديق لكم وبيساعدكم بهذي الضغوط وراح تستانسون

يمكن تحسون انكم صايرين جدًا حساسين اتجاه اي شخص يتكلم عن كرمكم، انتو كريمين بس هالفترة مضغوطين ف راح توفرون مبالغ لانفسكم لان جد محتاجين لها، وهذا الصح لا تتأثرون من الكلام القاسي من اللي حولكم، خصوصًا لو رجل اكبر منكم من الاهل، يمكن حد يطلب منكم مبلغ لكن راح يرجع لكم وما يطول

بعد راح تتحسسون من اي شخص يقترح عليكم تغيير ستايل او شي من هذا القبيل، حاولوا ما تسرعون بالحكم على غيركم ممكن يكون مجرد اقتراحات، في زيادة بسيطة بالوزن باذن الله ماراح تستمر الزيادة هذي، لان الشهية مفتوحة بسبب الضغوط.. فرصة جيدة للي يبون يزيدون اوزانهم

ممكن تواجهون نقص بالعضل ف ركزوا على الوجبات اللي تساعد للحفاظ على العضلات، راح تنعزلون شوي وتفضلون الجلوس بالمنزل هالفترة، يفضل انكم ترتاحون وتاخذون بريك من السوشال ومن الشغل شوي

اللي قدموا على وظايف من فترة طويلة ففي فرصة ان الشركات تتواصل معكم هالفترة لين ينتهي التراجع ان شاء الله، في اشخاص كبار بالسن راح يكرموكم ممكن من الاهل او حتى بالاماكن العامة بتلاحظون في تصرفات لطيفة من الاشخاص وهذا تأثير الكارما الحسنة، في تصالح مع شخص ببيئة الدراسة او العمل

#الميزان
قبل التراجع اكيد طورتوا من مهاراتكم ومواهبكم بشكل عام واجتهدتوا وممكن بعضكم اشترك بدورات او تكلم مع شخص اكبر منه يساعده، خلال التراجع بترجعون تفكرون مرة اخرى ويمكن تقولون ان الاشياء اللي تعلمتوها ما فادتكم او فقدتوا الشغف اتجاهها، هي فترة بس وبيرجع الشغف..

ممكن بعضكم يحس ان ايامه مافيها متعة ويمكن تطلعون من البيت بدون اي خطة وبعدين تحسون بملل وترجعون، التراجع شوي مشتتكم ومخليكم مب عارفين كيف تروقون او تمتعون انفسكم بالطلعات وغيره، يمكن حتى تشترون اشياء وبعدين ترجعوها، ممكن تميلون للخروج لأماكن فيها مسبح او للبحر بشكل عام

الاشياء اللي بتشتروها بترجعوها خصوصًا لو كانت لاشخاص معينين بتدققون شوي على المبلغ ولو الشخص يستحق ولا لا، اشوفكم بتوفرون مبالغ كثير لين ينتهي التراجع ويمكن بعدين تصرفوها بشي تتمنون تشتروه من زمان او على سفر ممكن بس غالبًا بتصرفوها على شي يخليكم جدًا سعداء ومرتاحين..

في مشاكل عاطفية تمرون فيها مو شرط مع الحبيب ممكن حتى مع الام خصوصًا اللي امهاتهم موظفات ممكن تلاحظون ضغط عليهم ويصير التعامل معهم صعب، نفس الشي على الآباء، وبتلاحظون الغضب يطلع عليكم انتو اكثر شي، تحملوا وحاولوا ما تكبرون المواضيع): لان اكيد راح يهدأون معكم ويعوضوكم بوقت آخر

التراجع بيعلمكم كيف تتعاملون اكثر مع الشريك لما يكون بارد او غاضب ونفس الشي مع الوالدين، ممكن الشريك يتساءل بشكل مستمر عن برودكم وممكن بعضكم شركائكم صرحوا بأنفسهم يشوفوكم باردين بالرغم من انكم مب باردين وبس الايام هذي ثقيلة عليكم وتحتاجون تتوازنون فيها جسديًا وعقليًا..

في لقاء مع اصدقاء قدماء جدًا اللقاء سعيد بس يمكن تفتحون قلبكم وتتكلمون عن ضغط مريتوا فيه واشوف في دعم قوي من الاصدقاء، ممكن بعضكم يفكر يرجع يلعب لعبة رياضية (كرة قدم مثلاً) لا ترجعون بشكل مفاجئ عشان ما تتعبون اجسامكم وانتو بعد انتبهوا للسوائل

بعضكم يطري الانفصال كثير مع صديق او مع شريكه بشكل عام، وممكن تفكرون بجدية بالانفصال وفجأة تستوعبون انها مجرد افكار سلبية والقرار خاطئ وبتندمون عليه، لذلك حاولوا تبعدون عن الكل وقت الغضب وتبررون للي حولكم وقت الايام تكون صعبة عليكم، ممكن اخر فترة دخلتوا بعلاقات صداقة وندمتوا عليها

المتزوجين وعندهم اطفال ممكن تحسون فجأة انكم مب مسؤولين وهذي مجرد مشاعر لحظية وبتروح ان شاء الله، وللي متزوجين وما انجبوا اشوفكم بتحاولون تأجلون فكرة الانجاب لان تبون تعتنون اكثر بصحتكم النفسية وتحاولون تلقون سعادتكم وتأمنون مكان مناسب للأطفال، ممكن توسوسون من ناحية مستقبلهم اهدأو

قبل التراجع ممكن ابتعدتوا عن شخص جدًا يحبكم وحكيم بشكل وواضح انكم ندمانين شوي الحين، غالبًا ابراج الشخص اسد دلو سرطان حمل، اذا تبون ترجعون مع هذا الشخص ما انصح هالفترة لان يمكن يجرحكم بردة فعلة تواصلوا معه بعد التراجع افضل، الحنين عندكم قوي هالفترة، حساسية والام بالظهر مؤقتة

#الثور
عندكم اشغال كثير ببالكم تبون تسووها، وتبدون فيها وتتكاسلون تكملوها، ممكن وضعكم قبل التراجع كان ماشي عدل ولما صار التراجع بديتوا تملون ووقفتوا، التراجع يبا يعلمكم عن مقاومة الشعور وعدم وضع الاعذار اللي تمنعكم من اكمال اعمالكم بشكل عام

غالبًا ودكم تساعدون شخص اكبر منكم، الاب او الاخ الكبير او حتى الاخت، لكن ما عندكم القدرة المادية، بالرغم من هذا تحاولون تساعدون بأي طريقة اخرى، عليكم ضغط بالمنزل لكن اشوفكم صابرين..

غالبًا صرتوا فاهمين كيف تتعاملون مع كل فرد بالعائلة، وصرتوا تحاولون ما تتكلمون عن احد وقت المشاكل عشان ما تزيد المشكلة، تحاولون تتصالحون داخليًا مع الاخطاء اللي ارتكبتوها السنوات الماضية اللي اثرت على آلامكم حاليًا، راح توصلون للسلام الداخلي بإذن الله..

في تأخير بالتوظيف وللي يدرسون في تأجيل خطط ويمكن بعضكم يفكر يغير تخصصه حتى لو كان على اخر سنواته، انصحكم تفكرون عدل بالموضوع وتراجعون قراراتكم بعد انتهاء التراجع، بعضكم تجيه فرص عمل مؤقتة او بارت تايم وتفضلون الراحة على انكم تروحون له..

اهتمامكم للمال عشان تشيلون مسؤوليات، يعني مب عشان تدلعون انفسكم وعشان الكماليات، بالرغم من ان لكم حق تستخدمون اموالكم كيف ما تبون، فكروا بأنفسكم وقت تحصلون على مبالغ مو مشكلة تعطون بس خلوا الجزء الاكبر لكم لانكم محتاجين

راح تحصلون على مساعدة شخص كبير بالسن من بيئة العمل عشان تترقون او عشان تنقلون لقسم يناسبكم اكثر، اما اللي يدرسون فممكن تشيلون مسؤولية مشروع وراح تتعبون فيه كثير بس حاولوا تطلعون قساوتكم على المتخاذلين لان انتو بعد تبون راحة

اما اللي يبحثون عن وظيفة ممكن تحسون مب لاقيين اي مكان يقبل خبرتكم او حتى شهادتكم، بالرغم من ان واضح تعبتوا كثير على انجازاتكم، ممكن شخص كبير بالسن يساعدكم تتوظفون وماراح يكون من العائلة لكنه من نفس المنطقة ممكن حد يدلكم له، لا تنخذلون هي فترة محدودة..

#الجدي
ممكن صرتواتميلون لتخزين اموالكم اكثرمن قبل،ممكن تطلعون املاك لكم وتفكرون تبيعوها، غالبًاقبل التراجع اشتريتوا اشياء ثمينة وما استخدمتوها كثير وندمانين عليها،فكرة جيدة لكم انكم تبيعوها بالبرامج عشان تكسبون على الاقل نصف الخسارة،ممكن توظفتوا بمكان وحسيتوا الترقية تأخرت عليكم

ويمكن بديتوا تكشفون الزملاء والمدراء حقين الوظيفة على حقيقتهم وبديتوا تنفرون بشكل، واضح قللتوا تواصل بشكل مع الاشخاص اللي حولكم سواء زملاء ولا اصدقاء وحتى الاهل عشان تركزون على عملكم، حتى اللي يدرسون في اختفاء لكم من مواقع التواصل، استخدامكم للهاتف بشكل عام قل بشكل..

يمكن تطلع ترندات كثير وما تلحقون عليها، ممكن بس تستخدمون الهاتف عشان فقط تشوفون الاخبار اللي تتعلق بالعالم، بتبعدون عن اخبار المشاهير والاشياء اللي ما تفيدكم، حسابات المشاهير اللي عندهم محتوى راح تقللون دخولها، راح تكشفون اللي دخلوا حياتكم عشان مصالح مادية وراح تقسون عليهم..

بعد ممكن الفترات اللي راحت في ناس انعجبوا فيكم انعجاب سطحي ممكن بشكلكم وحاولوا يكسبوكم بأموالهم او بالهدايا راح تقطعون التواصل معهم، في عودة تواصل اشخاص من الماضي خصوصًا اللي التقيتوا فيهم من برامج تواصل او برامج تعارف، وراح تتصالحون عن كل شي صار بالماضي ..

في تقليل لتناول الحلويات بشكل اشوفكم تميلون لأكل الخضار او الفواكه ويمكن الحلويات المرة، في نقص بالوزن بسبب ان الشهية خفت عندكم انتبهوا من نقص الدهون المبالغ فيه راح يسبب لكم صداع وصعوبة بالنوم وممكن دوخة، اشربوا عصاير كثير حتى لو عصير بالفواكه راح يفيدكم ويخفف التعب..

في تأخر لمكافأة لكم وممكن تمرون بضائقة مادية وتعتمدون على شخص اكبر منكم ممكن الاب او الاخ الاكبر، لا تخافون راح ترجعون اموالكم لهذا الشخص اول ما يتحسن وضعكم المادي، حاولوا ما تعتمدون على اي شخص من خارج العائلة، ممكن تواجهون الام ومشاكل بالحلق ممكن كحة جافة ودوخة التزموا بالسوائل

انتبهوا من الاكلات والمشروبات الباردة بزيادة، حاولوا ما تدخلون بنزاعات مع الاصدقاء اشوف تحسون بطاقة سلبية لما تكثرون تواصل معهم بدون سبب منطقي او بسبب ضغوطكم حاولوا ما تجرحوهم، في تأجيل لمواعيد وافنتات ويمكن تأجيل لمقابلات عمل، في تأجيل لزيارة الاصدقاء او لمساعدة صديق..

#الجوزاء
ممكن عندكم مشاكل بتنظيف الطاقة السلبية وممكن بعضكم اشترك بدورات بس ما استفادوا كثير، التراجع يخليكم تفكرون كثير وتتوترون خصوصًا بالمواضيع اللي تتعلق بالترقية والعمل وحتى البعثات للي يدرسون،ممكن بعضكم جته بعثة خارجية لكن تفكرون تكنسلون الموضوع او عرض عمل آخر لكن مترددين

اذا عطوكم وقت تفكرون بهذي البعثة، ف انصح تنتظرون لين يخلص التراجع وتتخذون قراركم، حتى قراراتكم اللي تتعلق بشراء منزل بمنطقة اخرى او الانتقال بشكل عام عندكم تردد فيها ومب عارفين تحددون وجهتكم الانسب..

قطعتوا علاقات طويلة جدًا حتى لو شخص تحبوه والسبب هو الثقل اللي تحملتوه لفترات طويلة من هذا الشخص، الشخص هذا راح ينحرج يرجع يتواصل معكم لكن احتمال بعد انتهاء التراجع، اغلبكم يحس بإرهاق روحي وان الحظ ضده مهما كانت اموره ماشية.. اكرر هي فترة محدودة ان شاء الله

لكن هالثقل بيروح باذن الله والتراجع يذكركم بأشياء كان لازم تتخلصون منها عشان مصلحتكم الشخصية، جاهزين تسوون اي شي عشان تتخلصون من الطاقة السلبية حرفيًا كل اللي تبوه هو انكم تتنفسون، ممكن بعضكم يلجأ لأشياء خاطئة عشان ينفس عن طاقته لكن انتبهوا ولا تدخلون بعلاقات مؤقتة بيتعبكم اكثر

لا تزيدون الطين بلة هي فترة وتتحسنون وحاولوا تفهمون الرسالة اللي يبا يوصلها تراجع زحل، انتوا موهوبين وسهل عليكم تتعرفون على الاشخاص بس هالفترة انتو يادوب تتواصلون مع الناس اللي تقابلوهم يوميًا، في تخفيف تواصل مع الاهل وبعضكم انقطاع حتى وتركيز شامل على الذات..

بعضكم موهوب بالتحليل والكتابة او اي شي يدوي في شعور بالضجر والملل ويمكن خيالكم صار ضيق جدًا ف تأجلون الاعمال، ماراح ينتهي التراجع الا واحزانكم العميقة اختفت بس في بكاء وانعزال وتقليل تواصل مع الاصدقاء لا تكبتوه

اشوف اغلبكم ملتزم بمواعيده الصحية،في شخص اكبر منكم بالعمر متعلقين فيه يرشدكم للصواب واشوفكم ملتزمين جدًا بالرغم من الثقل اللي تحسون فيه، في انجازات راح تخلصوها قبل ما ينتهي التراجع، ممكن شهادة دورات او نجاح في اختبارات محددة، كسب بعثة باذن الله،لا تثقون بمشاعر الاعجاب بهذي الفترة

#الحوت
بديتوا تستوعبون الاخطاء اللي كنتوا تسوونها بالماضي وتأثر على نفسيتكم وشخصياتكم، في انتباه لكل شي للعلاقات والاكل واللايف ستايل بشكل عام، ماصرتوا تتهربون من المشاكل نفس قبل تواجهوها ولو حد انتقدكم تسمعون وما تعطون ردة فعل مبالغ فيها او حتى ما تتحسسون نفس قبل..

يمكن من بدا التراجع وانتو بس تشوفون كوابيس تتعلق بآلامكم وبالاشخاص اللي تحسون بذنب اتجاههم او جرحتوهم بالماضي، يمكن هذي مجرد رسايل انه ما تأخر الوقت عشان تصلحون هذا كله، في ناس كنتوا تشوفوهم اعداء اكتشفتوا انهم طيبين ومب سيئين يعني وتعلمتوا ما تتسرعون بالحكم غالبًا..

غالبا صرتوا ما تحسون بأمان لأنفسكم، يعني تخافون ترجعون لعادات قديمة وتأثر على نفسياتكم، تخافون انكم ما تلتزمون يعني، لكن اشوف في تطور من هالناحية لا تخافون، عندكم تمسك بمبادئ هالفترة ممكن قبل التراجع في ناس حاولت تغيرها بس اشوفكم ما سمعتوا لحد وهذي نقطة جيدة..

الجذب عندكم قوي حاولوا ما تجذبون اشياء ما تناسبكم، تحتاجون تتأملون وتسوون يوغا عشان تطهرون افكاركم وتبعدون السلبية، لا تقررون قرارات مصيرية بدون استشارة شخص تثقون فيه لان اشوفكم تحطون ببالكم اسوأ السيناريوهات وهذا بيتعبكم نفسيًا، في تقرب من صديق عنده شي بالقوس السرطان الاسد..

وممكن اكثر من صديق وكلهم اشوف بيساعدوكم تتخذون قرارات صحيحة وراح يدعموكم نفسيًا، في الام وجفاف بالقدمين ويمكن برودة بالاطراف مستمر، ممكن توتر وراح تنسون تاكلون وجباتكم بانتظام حطوا منبه ولا خلوا حد يذكركم، تحتاجون شوي سكريات عشان التشتت القوي اللي تمرون فيه ..

في تخفيف واضح لاستخدام السوشال ميديا بعضكم اريدي مر اسبوع بدون ما يتفاعلون بشي، ممكن بس تتابعون القضايا اللي تحسون مرتبطة بشي يخص حياتكم او حتى اللي تتعلق بالبلد اللي انتو فيها، مركزين على عيوبكم بشكل وتحاولون تصلحوها لكن لا تقسون على انفسكم، انتبهوا من الشرب المبالغ فيه للسوائل

#العذراء
شخص من الاهل اكبر منكم يعتمد عليكم بأغلب الاشغال واشوف انكم بتشيلون مسؤولية الاهل بشكل عام هالفترة، ممكن تدرسون اخوانكم اللي اصغر منكم او تساعدوهم بخصوص تخصصاتهم او ميولهم وكيف يطوروها بتعطون انتقادات حلوة لهم عشان يتطورون، ممكن في مشاكل جسدية رجعت لحد تعزوه كبير بالسن

وراح تحاولون تنتبهون له، يمكن تشوفون في دراما ببيئة العمل وتلاحظون الزملاء صايرين يتغيبون على اشياء عادية ويمكن تزيد ساعات الشغل عليكم بسبب هذا الشي، حتى اللي يدرسون ممكن زملائكم بمشروع معين تحسوهم اتكاليين وانتو مالكم نفس الا تخلصون المشروع وترتاحون.. ويتغيبون بعد عن الحصص

يعني مالكم نفس تدخلون بأي مشكلة، الاناث ممكن تاخذون مكملات او فيتامينات وفي تساقط للشعر بسبب قلتها اشوف بعضكم بيقص شعره، اما الاولاد ففي حلق للشعر غالبا نفس الشي انتو تاخذون مكملات، اشوف في فحص بتلتزمون عليه الفترة القادمة وهذي نقطة جيدة وبتحاولون تزيدون العضل عندكم..

ممكن عندكم نقص فيتامين د، مشاكل بالمسالك البولية، الام بالمعدة ومشاكل بالامعاء بشكل عام او حموضة، مايحتاج اوصيكم راح تنتهبون لانفسكم لكن كل هالمشاكل ان شاء الله ما راح تطول عليكم وراح تنتبهون اكثر لانفسكم عشان ما تمرون فيها مرة ثانية..

الفترة القادمة حد مسؤول بالمنزل يسافر وتشيلون مسؤولية المنزل، ماشوف بيكون في ضغوط مبالغ فيها عليكم بالعكس اشوفكم قادرين ان شاء الله، غالبًا السفر لاجل عمل ولا لاجل علاج، يمكن تجيكم دعوة لهذا السفر وترفضون بسبب التزاماتكم اللي ماتسمح..

اغلبكم ملتزم بتمارين رياضية وتشتهون اشياء ساخنة وحلوة لا تحرمون انفسكم خذوا بكمية تناسب لان بيحسن نفسيتكم، اشوف ان شخص مسؤول بالعمل بيكون قاسي مع الكل الا معكم بسبب التزامكم واحترامكم وصبركم، نفس الشي اللي يدرسون ممكن المسؤول يركز على مثاليتكم وصبركم وهذا الشي بيسعدكم

#السرطان
انتو اكثر ناس طلعتوا اشخاص من حياتكم الفترة الماضية، ممكن ماصار يأثر عليكم بعد او قرب أشخاص، واضح دائرتكم صارت صغيرة بشكل ومرتاحين اكثر فيها، في عودة علاقة عاطفية قديمة او حتى صديق بينكم شي عميق وتشيلون همه، في تقرب اكثر من هالشخص وراح يساعدكم في عمق روحي بينكم..

من دخل زحل بالدلو وانتو صرتوا تنتقمون لو حد اذاكم، ممكن هالفترة تحسون بالذنب لو بالغتوا بردات الفعل، ممكن بعد تحسون انكم كنتوا متوازنين اكثر بالسابق، راح تفهمون انه الحياة تحتاج تكونون فيها شرسين ببعض الاحيان خصوصًا لو حد المكم وانتو ما اذيتوه، فترة كارما للاشخاص اللي اذوكم..

كل علاقات المصلحة طلعوا من حياتكم سواء مصلحة مادية ولا استنزاف ولا غيره، هالفترة راح تحلمون بأحلام تتعلق بهذول الاشخاص غالبًا بسبب شعورهم بالندم لخسارتهم لكم، في تطور اكثر من الناحية الروحية والوعي صرتوا تختارون اشخاصكم بعناية وتقسون بالحكم بينكم وبين انفسكم..

في اشخاص بالماضي استغلوكم عشان ظهوركم او عشان محبة الناس لكم ولما حصلوا اللي يبوه صاروا جافين معكم وحاولوا يقللون من ثقتكم بأنفسكم،زحل بيعلمكم انكم مميزين وعاطفتكم ومواهبكم نعمة وقوة بالنسبة لكم وكثار يتمنوها، في تطورات بعد انتهاء تراجع زحل اشياء تنتظروها من فترات طويلة..

ممكن منزل جديد او عمل او شي معطل عندكم من سنوات راح يمشي باذن الله على نهايات تراجع زحل او بعد انتهاء تراجع زحل، وبسبب انكم داخلين لمرحلة جديدة بحياتكم زحل يبا يتأكد ان اغلب الدروس وصلتكم عشان لا تعيدون الاخطاء اللي سويتوها بالماضي وتكونون جاهزين للتغيرات الجذرية..

في تطور لمهاراتكم بالعلوم الفلكية والتاروت في اشخاص اكبر منكم راح يركزون على موهبتكم ويدعموكم، ممكن بعضكم يفتح بزنس هالفترة وتستغلون هالمواهب فيكم، ممكن تفكرون تستغلون جمالكم او مواهبكم الفنية عشان تجلبون اموال، انتبهوا تسوون اشياء تندمون عليها لاحقًا..

ممكن تحسون بانعدام الشعور بالأمان زحل بيعلمكم ان في آلاف مصادر الدخل اللي تقدرون تجلبون اموال منها، بس اختاروا المصادر اللي تناسبكم لفترات طويلة وتخليكم سعيدين، ممكن تضيعون محفظة او بطاقة بنكية، في عثور على اغراض قديمة لكم بتفرحون فيها..

#القوس