مفيش حاجة قادرة تعتصر قلبا الما وحنينا وتدخلني في حاله حب وشوق حتى وانا مش بحب ومحدش سايبني وماشي، غير صوت شادية واغنية قولوا العين الشمس ما تحماشي
ومكنتش شادية اول حد يغني الاغنية دي الاغنية اقدم من كده بكتير وليها قصة
قولوا لعين الشمس ما تحماشي، أحسن غزال البر صابح ماشي)،

والمقصود بغزال البر الشاب الوطني الصيدلي "إبراهيم الورداني" الذي قام باغتيال رئيس الوزراء آنذاك "بطرس نيروز غالي" بعد تواطئه مع الاحتلال الإنجليزي لتمديد حق إمتياز قناة السويس 40 سنة أخرى لصالح إنجلترا، وتم الحكم عليه بالإعدام، وتحولت القضية لرأي عام

وكان الشارع المصري كله يتعامل مع "الورداني" بصفته البطل الذي خلص مصر من أحد الخونة، لدرجة أنه تم تأليف وتلحين الأغنية لغناءها ليلة إعدامه، وبمرور الوقت نست الأغلبية العظمى الأغنية مثلما نسوا "إبراهيم الورداني" نفسه.

لحد ما قرر مجدي نجيب يعيد الاغنية ويحتفظ بمطلعها ويلحنها بليغ حمدي وتغنيها شادية، شادية وهي بتقول (الآه بقولها وهو ميدراشي) الجملة بتطلع من قلبها مش لسانها
كتير جدا كنت اتمنى اتحب بنفس الصدق والحنية اللي في صوت شادية والكلام ده يتقال عشاني.

مين بيحب كده بالحنية دي لدرجة إنه يقول "طير قابله قوام ياحمام خليله يا حمام الشمس حرير ياحمام"
"آه ياناس مطروح خطاويه ما تروح اسقوه بحنان، واسقوه وردوله الروح"
واختصرت كل ده وقالت "في بعده طعم الدنيا ميحلاشي"
شكرا يا ست شادية إنك عملتي العظمة دي
شكرا ياعم مجدي نجيب شكرا يا بليغ❤️