تحت هذي التغريده بسوي ثريد اتكلم فيه عن بداياتي بتعلم الانجليزيه والاشياء اللي فادتني وطورتني. ممكن تستفيدون مني لكن بالاخير كل واحد يقدر يطور نفسه بالطرق اللي تناسبه 👏🏻
نبدأ من عام ٢٠١٤ لما كنت في اولى ثانوي. وقتها كنت اكره ماده الانجليزي لان الاستاذه كانت مره شاطره بالانجليزي وتتكلم انجليزي طول الحصه فكنت ابدا ما افهم. ووحده من البنات كانت شاطره مره مره اذكر اسمها غاده كنت اغار منها كانت تسولف مع الاستاذه بالانجليزي وكانت ضابطه لكنه الامريكان!
فقلت لنفسي وش ناقصني عن غاده هذي! عندي مخ وعقل ليه ما اصير شاطره!. قررت بعدها اراجع الدرس اللي بناخذه واترجم كل كلمه في الكتاب. وبكل مره تجي حصة الانقلش اتحمس مره اني اعرف عن ايش بنتكلم
بعدها صرت بثاني ثانوي وقررت اجيب معي بالمدرسه دفتر خاص للكلمات الجديده اللي اعرف معناها بالحصه واكتب جنبها المعنى. هذي صورة الدفتر لما الحين محتفظه فيه والخط كان كارثه
بعدها اتوقع التيتشر قالت لنا نشتري قاموس اكسفورد الصغير. يجي صغير على حجم الكف. وصرت اذا عندنا حصه فراغ اطلع القاموس واقرا كلمات 😭 ياناس كنت بزر بس صدق ياحلوني 😔♥️. مو مدح فيني بس حرفيا كانوا صحباتي من النوع اللي يطلع ويلعب ويطلعون من الحصص بس ما كنت اتأثر فيهم نهائيًا
طبعا مع كل ترم احيانا تتغير التيتشر فجتنا وحده تهبل مره كانت تبي تطور عند الطالبات السبكينق فكنا اذا اخذنا درس جديد تقول يلا اختاروا بعض الكلمات اللي فهمناها واضيفوها بجمل. كنت اتحمس مره. "بالاول والاخير الفهم وتلقي المعلومه يعتمد على التيتشر"
بعدها كانت تصادفني مشكلة السبيكنق. لما اقرا بنفسي بدون صوت كانت قراءتي منطلقه لكن لما اقوم بالفصل كنت اتأتأ والاغلب تقريبا مثلي. هنا عرفت السبب. لما نتدرب على القراءه نكون اساسا ساكتين ومانسمع نطق الكلمات من فمنا! وهنا الخطأ. فصرت بالبيت اقرا الكلمات والقطع بصوت عالي ومسموع.
ونجي الحين سنة ٢٠١٧ لما دخلت اول جامعه. طبعا الكل يعرف اول ترم جامعه يكرفون ام امك في مادة الانجليزي كان ٤ ساعات. واللي تدرسنا بريطانيه. فيعني حتى الابكم راح ينطق غصب انجليزي. كان يوميا تدريبات وسبيكنق ولازم نكتب قطعه. كل خميس من كل اسبوع اختبار في الوحده السابقه. كان كرف حمير
من كثر كتابة الرايتنق بدا خطي يتحسن ويصير ارتب. كنت اول ترم قبل كل اختبار اسوي رايتنق بالبيت واحفظه صم🙃 هذي كارثه ومتعبه مره. مع الوقت تطورت الحمدلله وصرت لما اعرف ايش عنوان الرايتنق بالاختبار اجهز بس عن ايش بكتب وصرت بالاختبار ارتجل واكتب اللي بمخي! بعد ماكنت احفظ الرايتنق!
تقريبا نقدر نقول الجامعه كانت نقله لي باللغه حرفيا! هذا غير السبيكنق خلال الكلاس. غير لما التيتشر تطلعك قدام الطالبات تسالك اسئله بالانقلش وتجاوبين. يعني حرفيا كان شي متعب لكن صدق حصدت ثماره. (درست سنتين جامعه بعدها ماكملت بسبب ظروف)
نسيت شغله وقت مستقطع⛔️
صار لي موقف ايام الثانوي مع وحده من البنات عطاني دافع قووووووووي.
تخيلوا هذي البنت اعرفها وكانت تعرف انجليزي مره (مابي اذكر تفاصيل يمكن تعرف نفسها او تتابعني ما اعرف) كنت اسولف لها اني شريت كتاب ويجنن قالت جيبيه بكره بقراه قلت طيب (انا وقتها قرأته)..تكمله
صار لي موقف ايام الثانوي مع وحده من البنات عطاني دافع قووووووووي.
تخيلوا هذي البنت اعرفها وكانت تعرف انجليزي مره (مابي اذكر تفاصيل يمكن تعرف نفسها او تتابعني ما اعرف) كنت اسولف لها اني شريت كتاب ويجنن قالت جيبيه بكره بقراه قلت طيب (انا وقتها قرأته)..تكمله
اليوم الثاني جت وعطتني اياه قالت حلو الكتاب بس من جدك تترجمين كل شي! الكتاب سهل 🙂. وقتها حسيت بشعور خايس مره طيب انتي تكلمين شخص توه مبتدىء 🙂. هذا هو الكتاب اول كتاب قرأته.
نرجع الحين نكمل ٢٠١٩ قررت اتابع مسلسل فرندز. تخيلوا مسلسل من ١٠ مواسم وكل موسم فيه ٢٥ حلقه! وكنت يوميا اتابعه🤯😂. صرت لا تلقائي القط منهم كلمات ولصقت بمخي الاكسنت وطريقة التعبير والانفعالات والنكت حقتهم. يعني صدق مسلسل فرندز كان ثاني نقله بحياتي بعد الجامعه 🥺
طبعا هذا غير لما اسمع كلمه غريبه في المسلسل وعلى طول افتح الترجمه واسجل الكلمه بصوتي واشوف معناها. نهايه اليوم او بعد فتره افتح المترجم واشوف الاشياء اللي اترجمها وارجع لدفتري واكتبها فيه. يعني ما احكيلكم صدق اللي يبي يتعلم صح وهاوي الشيء اللي يبي يتعلمه راح يجيبه غصب
بعد البكاء واللطم اللي صار لما خلصت مسلسل فرندز. تفرغت اكثر للكتب. طبعا سلسلة wimpy kid كانت الخيار الافضل ليه؟ لان السلسله لغتهم لهجه امريكا العاميه ولهجه الشوارع. وهذا شي حلو مررره انك تفهم american slang اللي هو الامريكيه العاميه.
انتوا ملاحظين اني الى الان ماجبت طاري تطبيقات صح؟ لاني ماكنت اقتنع نهائيا كشخص مبتدىء انه يتعلم من تطبيق. التطبيقات حقت الطقطقه والفراغ مو تأسيس. وثاني شغله ما عمري فكرت اتعلم القرامر والقواعد 😂 بس الحين افهمها واعرف اركب جمل والامتنان كله يروح للمسلسلات الخفيفه والكتب👏🏻
ذيك الفتره اضفت هذي الامريكيه اسمها "شانن مونيان" كانت اتوقع في جده ومثلت في مسلسلات كوميديه برمضان. وكانت تتكلم عربي واضح مره. الشيء اللي شدني كانت بسناب تشات تنزل معلومات او معاني كلمات بالانجليزي. وبعد فتره نزل لها كتاب تشرح فيه الامريكيه العاميه وطبعا شريته🤪(في جرير)
طبعا حبي للقراءه كان من الصغر مو بس محصور على الانجليزي. ابوي كان عنده مكتبه وكتب وكل مازانت الجلسه رحت انقي كتب. طبعا طحت على مجموعه كتب من قصص كلاسيكية معروفه. اللي عجبني مثل ما انتوا شايفين عربي انجليزي نفس الصفحه العربيه مقابلها ترجمتها بالانجليزي. يعني وناسه مره (من جرير)
بعدها صرت انوع بالكتب وطحت على هذي الكتب من نفس دار النشر. كلها قصص كلاسيكية المعروفه. "الحديقه السرية، جين اير، ايما،الخ" هالنوع من الكتب كان بالنسبه لي دسم لان اللغه كانت الانجليزيه الفصيحه (بريطانيا) كانت الكلمات شوي صعبه لكن رحله الترجمه ماتوقفت دفتر يروح دفتر يجي (من جرير)
بعدها قلت لازم انوع بالكتب غير سلسله wimpy kid لان حتى جرير طفشوا مني. قررت اغير واخذ مثل الكوميكس تصير خفيفه وبنفس الوقت فيها صور يعني ماتطفشين بسرعه. طبعا مع الكتب هذي عودت نفسي اقرا بصوت مسموع عشان اتعود على مخارج الحروف والنطق والخ. (كلها من جرير الا كتاب المومن من جملون)
واخيرا الخطوه اللي كنت متخوفه منها مره اقدمت عليها وشريت كتب مافيها صور ولاشي بس كلام. بس كانت قصص اطفال مو مراهقين. اللي هي هذي الكتابين. اخذت كتاب "ماتيلدا" لها فلم مشهور اللي تحب القراءه واهلها يحبطونها اكيد عرفتوه. قلت احسن اخذ كتاب اعرف قصته من قبل عشان ممكن يسهل علي فهمه.
لما فتحت الكتاب بجرير وقرأت اول صفحه منه وفهمت كل شي خنقتني العبره😭 قلت اوميقاد رهام صرتي تفهمين. اقسم بالله قشعريره شعور الانجاز غريب ويدغدغ الجسم
نجي الحين للتطبيقات الخفيفه كنت استخدمها قبل سنه او سنتين.
١- تطبيق voscreen
ممتع مره ينفع للي مستواهم متوسط. التطبيق بس يعرض عليك مقاطع من افلام ومسلسلات وكرتون ويحط لك خيارين وانت تختار الترجمه الصحيحه للمقطع
١- تطبيق voscreen
ممتع مره ينفع للي مستواهم متوسط. التطبيق بس يعرض عليك مقاطع من افلام ومسلسلات وكرتون ويحط لك خيارين وانت تختار الترجمه الصحيحه للمقطع
٢- Speak English Conversation
التطبيق الاحب لقلبي يطور السبكينق مره. يحتوي على ملايين من المحادثات. بعد ماتسمع المحادثه تسجل صوتك وتقرأ المحادثه اللي قدامك ويرد عليك جهاز الي. يجنن مره مره والتسجيلات حقت صوتك تقدر ترجع لها بعدين
التطبيق الاحب لقلبي يطور السبكينق مره. يحتوي على ملايين من المحادثات. بعد ماتسمع المحادثه تسجل صوتك وتقرأ المحادثه اللي قدامك ويرد عليك جهاز الي. يجنن مره مره والتسجيلات حقت صوتك تقدر ترجع لها بعدين
٣- EWA
تحدد مستواك وبعدها يعطيك كورس اذا خلصته ينفتح لك كورس ثاني. كل كورس يتكلم عن موضوع معين. الصداقه او الاهل او الطعام. يعرض عليك مقاطع من مسلسلات وتمارين تحلها. وبرضو فيه لعبه من يختار الترجمه الصحيحه تلعبها مع شخص حقيقي. بعض الكورسات تشتغل بالاشتراك او بمشاهده اعلان.
تحدد مستواك وبعدها يعطيك كورس اذا خلصته ينفتح لك كورس ثاني. كل كورس يتكلم عن موضوع معين. الصداقه او الاهل او الطعام. يعرض عليك مقاطع من مسلسلات وتمارين تحلها. وبرضو فيه لعبه من يختار الترجمه الصحيحه تلعبها مع شخص حقيقي. بعض الكورسات تشتغل بالاشتراك او بمشاهده اعلان.
قبل سنة تقريبا وبالحجر قررت اتفرج بنتفلكس على افلام كرتون بالانجليزي واشغل الترجمه الانجليزيه. كنت اسمع الكلمه واقراها. اللي ماعنده نتفلكس اليوتيوب نفس الطريقه تقدر تفعل الترجمه الانجليزيه. (بيض اخضر ولحم ترى يجنن تابعوه😭)
حاليا الحمدلله صرت اشتري كتب مراهقين وروايات للكبار والى يومكم مو مصدقه نفسي اني قرأت رواية كامله وفهمت قصتها كلها. لا واخذ اقتباسات تعجبني😔♥️
الترجمه لازالت على قدم وساق لان مهما تعلمت وقرأت انت تتعلم لغه كامله فطبيعي بتواجه كلمات ماتعرف معناها. هذا الدفتر الحالي اللي معي الخط تحسن كثيييير الحمدلله. طبعا الكلمات ما احفظها ولا الزم نفسي بالحفظ لكن هالدفتر جنب سريري اذا فضيت افتحه واقرا الكلمات بين فتره وفتره
واخيرا كتب ديزني اشتريها اطقطق عليها واحيانا اقرا لاختي الصغيره واحيانا تصير محتوى مثل الكارثه اللي صارت قبل كم يوم بالمنشن. وبالاخير نقول "work hard pays off" 😭👏🏻 اللي ماعرف وش معنى العباره يروح يترجمها الان!
جاري تحميل الاقتراحات...