رتبها

لو كنت من اللي يسافروا كثير سواءا رحلات داخلية أو خارجية فنصيحة فكر جدياً إنك تبطل تسافر ومعاك شنط سفر تقول معاك عفش بيت وأبدأ التفكير جدياً إنك تكون من أصحاب الشنطة الواحدة ومش أي شنطة كمان .. شنطة ظهر والسلام!
ثريد ع الخفيف نوضح بعض النصائح .. 👇

أول نصيحة لو تعتقد إنه بسم الله بتقول بتبز شنطة من الطارف وتقول هيا بنا نسافر بشنطة ظهر يبقى غلطان ونهايتك بتكون أليمة .. الموضوع محتاج تخطيط يوصل لحد الفنق بس خلينا اولاً نقول ليش محتاج إنك تسافر بشنطة ظهر .. 👇

١) ممكن توفر فلوس إضافية بتدفعها حق شحن الشنط بالذات بالرحلات الخارجية.
٢) الوقت .. تخيل الوقت اللي تضيعه وانت تعمل بوردينج بالمطار علشان تشحن عفشك وبعدين تستلمها وقت الوصول.
٣)الحرية! بالسفر بتواجه الف موقف وموقف بيكون شنطة سفرك عائق كبير .بتركب مترو تنزل درج مواصلات الخ👇

طيب أول خطوة ع طريق تحقيق الهدف ذا واللي بيآخذ ٩٠٪ من الموضوع هو الشنطة .. ثم الشنطة .. ثم الشنطة!
نصيحة من القلب تجنب ثلاث حاجات في اختيار الشنطة:
*البخل في إنك تقول بتوفر فلوس!
*إنك تشتري شنطة ما تشوفها بعينك وتفحصها!
*إنك تآخذ شنطة حجمها ما يوسع كبينة الطايرة ..👇

طيب نيجي على الشنط الخاصة بالسفر طبعا هي نوعها Carry On وتنقسم لنوعين:
١) النوع اللي تحمله ورا ظهرك واللي أفضله جدا واسمه Carry on Backpack🤩
٢) النوع الثاني اللي ممكن تسحبه وانت تمشي لو تشعل انه وضعك مش مناسب تحمله ورا ظهرك Carry on Suitcase.
وممكن جدا تلاقي نوع يجمع بينهم!

أكمل إن شاء الله الثريد في وقت لاحق اليوم او بكرة .. الموضوع لازال فيه تفاصيل كثيرة 🙌

نكمل الثريد ...
بحسب منظمة الـ IATA الأبعاد المقبولة للشنطة اللي ناوي تطلعها معاك لكبينة الطيارة لازم ما تتجاوز قياساتها
56 cm × 45 cm × 25 cm
بس لاحظت عملياً بمعظم الشنط بالذات القماشية إنه حجمها أصغر بـ 5 سم وأظن إنه علشان توسع الشنطة في حالة إنك عبيتها بزيادة .. 👇

ملاحظات متفرقة قد تخدمك عند اختيارك للشنطة:
١) لا تتوقع إنك تحط ثياب شهر (أسبوع هو الحط الأقصى المنطقي ولو انه بتتعلم مستقبلا إنه ٣-٤ أيام حتكفي مع وجود اختراع اسمه الغسيل 😅).
٢) لو الشنطة قماشية لا تنسى تختارها ضد الماء Water proof!
٣) .... 👇

٣)لو الشنطة ظهر لازم بطانة الظهر تكون مريحة وكمان ابحث عن النوع اللي ممكن يتوفر مع أحزمة تثبت الظهر والبطن لتوزيع الوزن لانه حتفرق معاك كثير .. 👇

٤) صحيح نتكلم عن شنط سفر تحديداً بس مش بطال لو ذكرناك إنه الأشياء اللي تستخدمها بشكل متكرر ودائم .. تلفون ، بطارية شحن ، أوراق ثبوتية ، فلوس .. في أنواع كثيرة سواءا اللي تعلقها ع رقبتك او تربطها ع الصدر او حول الخصر .. عن نفسي افضل الموضح بالصورة 👇

٥) طالما إنك مش سوبر مان وإنت مش رايح الجيم .. والسفر دايما مرهق وتقطع فيها مسافات كبيرة داخل وخارج المطار فنصيحة من القلب بلاش الشنط اللي تحملها بيدك Handbag .. 👇

الأفكار كثيرة بس تقريباً ذا كل حاجة متعلقة باختيار الشنطة و بننتقل قريباً للكلام عن الملاحظات المهمة لما ترتب حاجاتك داخل الشنطة .. صبركم عليا حأكمل الثريد لاحقاً اليوم 😅
بالمناسبة هل جربت موديل شنطة سفر وعجبتك .. شاركنا بالتعليقات 👋

بعد ما اشترينا الشنطة المناسبة نبدأ تجهيزها:
١) صناديق الملابس .. باختصار فكرة إنك تعتقد إنك بتحط كله ع بعضه بحيث تعبي شنطتك بثياب نظيفة وتروح وغالباً ثيابك وسخة ومختلطة ببعض او بأكياس بشكل عشوائي فانسى موضوع شنطة الظهر وسافر بحاوية وتخارج 😅 .. 👇

١) الصناديق تسمح لك تضغط ملابسك وتفرغها من الهواء وتسهل على نفسك استخراج اللي تحتاجه وادخاله إن لزم بدون ما تخربط الشنطة كلها وتختصر وقت طويل!
٢) تعطيف ثيابك بطريقة تتناسب مع الصناديق ذي وما فيش مجال لسنتميتر مهدر لانك محكوم بالمساحة
٣) فصل الثياب الوسخة عن النظيفة! 👇

بالمناسبة الصناديق ذي مش حصرية ع الملابس ذا ممكن تشل صندوق كمان لاغراضك زي الفرشاة والعطور وصوابين و إلى آخره ويا سلام لو كان صندوق تخرجه زي ما هو ويتعلق بالحمام بهوك للاختصار (لي رجعة مع الموضوع ذا تحديداً فيما بعد!)
وللعلم عادي جدا تسافر وترجع وباقي معاك ثياب نظيفة 😅 .. 👇

طيب بحكم إنه ذكرنا تقسيم الصناديق اللي بنحط فيها الثياب فأكيد ما يحتاجش أذكرك بانه كل صندوق لنوع معين من الثياب .. صندوق للسراويل .. للشرابات .. للثياب الدخلية فوق .. للتشيرتات .. وياسلام لو ميزتهم بلون او بالكتابة!
وتذكر القاعدة الذهبية:
أندروير اند شرابات دونت مكس 🤣 .. 👇

ولأنه صناديق وثياب فهنا برضه لازم برضه أنبهك .. مش معقول تجيب صناديق تشل مساحة كبيرة وتزحم الشنطة اختيار النوع المناسب وبالحجم المناسب مهمة.
وأكيد ما باذكركم بأهمية إنك تتعلم كيف تعطف ثيابك تمام .. وتمام هنا معناها مساحة أقل نحن نتكلم عن شنطة مش كبتك 🤣
صور توضح القصد .. 👇

لهنا تقريباً كملنا الكلام عن تقسيم ثيابك داخل الشنطة باستخدام الصناديق .. والتكملة الجاية بوقت لاحق بنتكلم عن أختيار الثياب من الأساس الهدرة ذي كلها مالهاش قيمة نهائيا لو بتشل كبتك كله داخل الشنطة😅

نكمل موضوعنا الان تخارجنا من الشنطة وعرفنا إنه لابد من التقسيم داخل صناديق .. نيجي لجزئية مهمة جدا وهي كيف آخذ ثياب كافية وبنفس الوقت قليلة وتآخذ أقل مساحة .... بأشارككم شوية ملاحظات وللاسف باتكلم من زاوية إننا رجل وماليش في ملابس البنات فممكن تقيسوا عليها 👇

١) ميز بين الحاجات اللي ممكن تلبسها أكثر من مرة وبين الحاجات اللي لا يمكن تكرر لبسها .. مثلا سروال جنز تجيب نص درزن ليش يكفيك اللي انت مسافر به وجنبه واحد قابل للبس .. لكن ما ينفعش تقولي باجيب شرابتين و طقم او اثنين كاندروير .. إنت طالع تتمشى وتقضي عمل مش تصبن وتغسل ! .. 👇

واهو لحسن الحظ قطع الثياب اللي بتحتاج كمية منها زي الشرابات و الاندروير بتقدر تحط كمية (عن نفسي احط لأسبوع كامل) وما بتاخذ منك إلا كيس شبسي ع قولة النكتة الشهيرة 😅
وبنفس الوقت لو طالت سفرتك عن كذا أظن الغسيل مرة بالاسبوع مقبول جدا ... 👇

بالمناسبة في ناس فنقين او خلينا نقول أكثر تنظيم وبطبيعتهم الشخصية يروح يصبن ع السريع وقت الاغتسال الغيارات والشرابات فذا مسموح له يروح حتى بقطعتين .. وما اظنش انه غالبيتنا منهم 🤣 .. 👇

٢) لازم يكون لك نمط للبس Dress Code يعتمد ع قلة القطع اللي بتحتاجها وامكانية المطاقمة بين الوانها بدون ما تضطر تشتري طقم مستقل لكل لبس.
مثلا عن نفسي بدأت اعتمد ع نمط بسيط معتمد ع مجموعة تيشرتات بيزيك +سروالين جنز+جاكت صيفي او شتوي وقادر استخدمهم مع بعض بأقل عدد من القطع .. 👇

ادواتك الشخصية (فرشاة .. مشط .. .. إلخ) سيبها واشتري ادوات خاصة بالسفر لسببين:
* شغلة كل ما تسافر او ترجع من السفر تطلع وترجع حاجاتك.
* الأهم من كذا انه تروح تبحث عن نفس الادوات ذي بحجم أصغر وبتفرق معاك كثير.
* حطها داخل شنطة مخصصة وفيها هوك تقدر تعلق منها الشنطة كلها بالحمام.

تقريبا انتهى الثريد رسمياً وبيتبقى معانا فقط شوية ملاحظات متنوعة .. اكملها لكم بوقت لاحق أن شاء الله 👋
شكرا للمتابعة وشاركونا ملاحظاتكم ان وجدت.

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة