هو أنا لما أبعد عن شخص علاقتي بيه متعبة، وبتأذي نفسيًا بالتعامل معاه، أبقى شخص بيّاع؟
لا مش بيّاع، ولا ده تخلّي من الأساس، ده اسمه حفظ لحق نفسك ،معظم الناس اللي بيعانوا من مشاكل نفسية صعبة، من عدم إحساس بالأمان، مرورًا بانعدام حب النفس، وصولًا للاكتئاب، بيكون أساس كل ده غالبًا

استسلامهم لضغوط علاقة مكنش ينفع يكملوا فيها..العلاقات المؤذية كده كده بتنتهي، بس إنهائها بيحتاج شجاعة كبيرة، وقدرة على التحكُّم في ضعفك العاطفي؛ لأنك غالبًا بتكون متعلق بشكل مرضي بالطرف التاني..كلنا فينا عيوب، كلنا بنغلط، كلنا بنقصَّر، بس مش كلنا بنؤذي باستمرار وتلذذ وتعمُّد،

مش بنستمتع بوضع الطرف التاني في خوف وقلق مستمر، مش بنبعد ونقرب على مزاجنا، مش بنتعمد نحسسه إنه مش كفاية..دي اسمها علاقات سامة ملهاش علاقة بالحب، وملهاش علاقة بإن كل البشر بيغلطوا

كلنا بنغلط آه.. بس اللي غلطه بيدوس فيه على غيره، يبقى ده مش غلط، ده مرض وصاحبه لازم يتعالج قبل ما ياخد حد في سكته.. آه وهو مش محتاجلك زي ما بيحسسك كل ما يحس إنك هتبعد وتخرج عن سيطرته، دي لعبة نفسية مش أكتر.. فيه ناس مبيتصلحوش مهما صبرت عليهم، عمرك هيتسرق جنبهم بس