اول مرة اتقبض عليا كانت في ٢٠١٣ كانت علشان شاركت في مظاهرات احداث مجلس الشورى اكيد انتم عارفين تفاصيل القضية دي كنت لسه صغير شوية وشايف الدنيا بشكل عادي جدا مكنتش متخيل اللي هيحصل بعد كدة كنت واقف مع الناس قدام مجلس الشورى في شارع القصر العيني وكنت بتفرج علي اللي بيحصل
وشاركت في المظاهرة ولما حصل فض جريت مع الناس بس لقيت بنتين دخلوا البنك اللي قدام مجلس الشوري الناحية التانية وبيجري وراهم عساكر انا كنت بعرف اهرب من الحكومة عادي بس دخلت ومعايا كمان شباب عملت زيي بالضبط ودخلنا نحاول نطلع البنات دي من المكان ده علشان ميتحبسوش
بس واحنا بنعمل كدة البنات عرفنا نمشيها بس اتقبض علينا ودخلونا في عربية ترحيلات خدونا علي قسم القاهرة الجديدة وهناك كانت اول مرة في حياتي ادخل محبوس في قسم شرطة مكنتش خايف خالص مكنتش شايف اي حاجة هتحصل غير انهم هيخرجونا دلوقتي بس حصل عكس كدة
وتاني يوم الصبح خدونا لسجن طرة عنبر الزراعة فضولنا زنزانة كبيرة جدا قضينا ٩ ايام وبعدين خرجنا اخلاء سبيل وروحت البيت والقضية مستمرة لسه بس عايش في حياتي عادي زي اي حد بس في الفترة دي اهتميت اعرف الاخبار اكتر عن اللي بيحصل
ونزلت مظاهرة تاني يوم ٨/١/٢٠١٤ واتقبض عليا في قضية احداث طلعت حرب وعشت شهرين بين قسم قصر النيل وقسم الدرب الاحمر وسجن طنطا العمومي من غير اي حاجة ولا هدوم ولا زيارات ولا حاجة خالص كأني منفي محدش يعرف عني حاجة غير في اقسام الشرطة وبعدين نزلنا جلسة واخدت اخلاء سبيل وخرجت ارجع تاني
لحياتي احاول اجمع عايز اعمل ايه لاني اتعذبت جامد في الفترة دي بالذات ومش عايز احكي عن ده بس اللي يعرفني من الفترة دي عارف كويس
المهم بعد فترة اتحكم عليا بالسجن ١٥ سنة حكم غيابي في القضية الاولى واول ما سمعت الخبر كنت ماشي الصبح انا وواحد صحبي في شارع هدى شعراوي في وسط البلد
المهم بعد فترة اتحكم عليا بالسجن ١٥ سنة حكم غيابي في القضية الاولى واول ما سمعت الخبر كنت ماشي الصبح انا وواحد صحبي في شارع هدى شعراوي في وسط البلد
كلمني المحامي قالي اتحكم عليا بالسجن مكنتش مستوعب اي حاجة غير اني واخد حكم قريب من نص عمري اللي عشته وفي اللحظة دي دماغي كلها بتحاول تستوعب الخمستاشر سنة اللي هقضيهم في السجن
المحامي قالي اختفي لحد ما اعمل اعادة اجراءات روحت انا وصحبي اشتريت نظرتين شمس وطاقية قولت اختفي زي ما قالي المحامي لقيت حد بيناديني من بعيد بيقولي اهرب ياياسين طلع واحد صحبي
وكمان قولت مش هينفع ابات في البيت اليومين دول زي ما قالي المحامي روحت قضيتها اوتيلات استلف من اهلي واصحابي وقعدت في أوتيل بالبطاقة انتوا متخيلين كنت عامل ازاي !
المهم بعد كدة عملت اعادة اجرائات واتحددت جلسات وبقيت احضر كل جلسة وفي نفس الوقت ده القضية التانية اتحكم فيها عليا بسنتين سجن. كدة مجموع الاحكام ١٧ سنة سجن و٧ سنين مراقبة و١٠٠ الف جنيه غرامة قولت يالهوي بقى بقيت متوتر اكتر وقلقان من كل حاجة مش مركز خالص
بس بحضر كل الجلسات بتاعت القضية الاولى لحد ما في يوم اتحفظ علينا ودخلت سجن طرة تحقيق وبقيت انزل جلسات كتير ونسيت موضوع القضية التانية ما انا في مصيبة اساسا ، القاضي خفف حكم القضية الاولي ( احداث مجلس الشورى ) لثلاث سنين سجن وزيهم مراقبة وغرامة ١٠٠ الف جنية
قضيت منهم سنة في سجن طرة تحقيق كانت صعبة جدا عشت مع اخطر المسجلين خطر في مصر سواءا سرقة وقتل واغتصاب وجرائم بشعة لحد ما جمعتني مع زمايلي في زنزانة واحدة وبعدين فرقونا تاني وفي يوم ٢٤سبتمبر ٢٠١٥ خرجت بعفو رئاسي استغربت بصراحة لاني عندي حكم بالسجن سنتين في القضية الثانية ،
بس فجأة بعد ما كنت في اوسخ زنزانة في سجن طرة تحقيق بقيت في الشارع وسط اصحابي ، رجعت تاني لحياتي الطبيعية واشتغلت في مكان لطيف وحاولت اتعلم حاجات جديدة تقويني في حياتي
وفي شهر ابريل ٢٠١٦ نزلت مظاهرات علشان جزيرتين تيران وصنافير علشان كنت شايف ان الارض اهم شيء والقضية قضية ليها علاقة بانتمائي وحبي لبلدي اللي حصلي فيها الحلو والوحشة واتقبض عليا واتعذبت جامد وقالولي اني خاين ورخيص واتحبست اسبوع او اقل مش فاكر بالتحديد
وبعدين اخدت اخلاء سبيل وبعد ما خرجت بقيت مضطرب اكتر وانعزلت عن الناس والحياة وبقيت مبخرجش من البيت لاني اخدت حكم غيابي في قضية تيران وصنافير بالسجن خمس سنين وكان عليا سنتين في قضية طلعت حرب فا كدة خلاص مفيش اي امل جوايا لشيء كنت مستخبي ومتوتر وموتر كل اللي حواليا وجيت في شهر
اكتوبر وقررت اول ما صحيت من النوم الصبح اني اسلم نفسي لاني مش قادر خالص وبخسر نفسي وحريتي ومبشتغلش ولا فيه مستقبل روحت سلمت نفسي في اقرب قسم شرطة وقولتلهم اني كنت بنزل مظاهرات ومليش علاقة بحد بس مبقتش انزل وعايز اعيش واشوف مستقبلي بعيد عن القصص دي كلها
وكانت اول مرة يعاملني ظابط باحترام وعملي محضر اني جيت بارادتي وسلمت نفسي في احكام قديمة وقالي ان مفيش حد هيلمسني تاني وفعلا في التحقيق مع امن الدولة اول مرة ميتعاملوش وحش من كمية الذكريات المرعبة اللي حصلتلي معاهم بقيت مرعوب والضابط هو اللي بقى يقولي محدش يقربلك خالص
وانا طبعا متغمي مش واثق في اي حاجة لحد ما فجأة قالي تقدر تمشي دلوقتي قولته بجد فعلا ! قالي ايوة ونادى للشاويش ياخذني واستاذنت ادخل الحمام واول ما بقيت لوحدي انفجرت عياط من التوتر وكل حاجة حصلت وبعدين غسلت وشيء وطلعت دخلوني الزنزانة وبعدين اترحلت لتخشيبات كتير
لحد مادخلت سجن وادي النطرون قضيت فيه سنة وبعدين نزلت جلسة في قضية تيران وصنافير اترحلت لسجن استقبال طرة ومع المحاكمات نزل الحكم لغرامة ١٠٠ الف جنيه غرامة كدة يبقى عليا سنة كمان واخرج وادفع الغرامة ، قضيت سنة في استقبال طرة ورجعت في اخر شهرين لسجن وادي النطرون
عايز اقولكم ان السنتين دول عشت فيهم مع كل الجماعات الاسلامية وكان اصعبهم بتوع داعش والاخوان وخرجت في يوم عيد ميلادي ٢١سبتمبر ٢٠١٨ وبقيت بحاول ارجع من جديد انسان خالي من الامراض والمشاكل
بس لحد النهاردة لسه بعاني من كل ده في تصرفاتي وثقتي بنفسي بس انا عارف اد اي اني قوي وهيجي وقت كل ده مش هيكون ليه اي اثر غير في اني اخدت منهم خبرة خلتني اعيش بشخصية عجوز عرف حاجات كتير بس وهو صغير
جاري تحميل الاقتراحات...