إذا افترضنا جدلاً أن الوظيفة "عبودية"، فهي عبودية 8 س باليوم 5 أيام بالاسبوع 10 شهور بالسنة، في المقابل بيكون التاجر عبد 7/24 طول السنة، عبد للعمل عشان تستمر الأرباح ومايخسر، للعميل اللي لازم يرضيه، للموظف اللي لو جاه عرض أفضل بيتركه ويروح للمنافس.
الموظف خارج ساعات الدوام "حر" وما يحق لمديره يطلب منه أي شي، أما التاجر جواله ما يقدر يقفله ولا دقيقة، لأنه لو صارت مشكلة وما انحلت في وقتها قد تكون تكلفتها باهظة جداً.
التاجر ينام ومخه صاحي يفكر بالفرص والمخاطر المحتملة، يتابع الأخبار اللي احتمال تأثر على تجارته، أما الموظف نايم ومكبر المخدة، حتى لو انهارت الشركة حسب النظام أول شي يسدد رواتب الموظفين ثم باقي الالتزامات، يعني في أسوأ احتمال بياخذ الموظف حقوقه اللي تكفيه حتى يحصل وظيفة ثانية.
الموظف لما يمرض ياخذ إجازة، في بعض الحالات قد تستمر شهور وراتبه ماشي وما له أي علاقة بالعمل، أما التاجر ما يقدر يمرض مدة طويلة! لأنه بعض المهام والقرارات ما في أحد غيره يقدر يتخذها، ولازم يكون متواجد حتى لو عن بعد، فحتى لما يسافر إجازة تجيه اتصالات تتعلق بالعمل ومضطر يتواصل.
الموظف إذا أخفق قد يخسر ترقية أو يخصم مبلغ من راتبه، أما التاجر إذا أخفق هو "أو أحد من موظفينه" قد يكلف الشركة هذا الإخفاق ملايين، فمثل ما أرباحه ضخمة كذلك خسارته المحتملة بتكون ضخمة والأمثلة على ذلك كثيرة وشهيرة.
التاجر اللي يرى الوظيفة عبودية، هو في هذه الحالة يعلن أنه لا يبحث عن موظفين بل يبحث عن عبيد، ولا أظن أحد سيقبل العمل لدى شخص ينظر له على أنه عبد عنده.
الموظف مسخر للتاجر، والتاجر مسخر للموظف وللعميل، ولو أن كل الناس صارو تجار لن يجد أحد موظفين يعملون عنده، أو سيجد موظفين يشتغلون سنة أو سنتين وبعدها يتركونه وهذا مرهق ومكلف جداً على التاجر.
بعض الناس لديه عقلية وشخصية تاجر يحب المخاطرة ويتقبل الربح والخسارة، والبعض لديه عقلية وشخصية موظف يحب يطلع من عمله ويعيش حياته مع عائلته وأصدقاءه بدون ما يشيل هم العمل معاه في كل مكان.
الخلاصة: ليست الوظيفة أفضل من التجارة ولا العكس، المقارنة بحد ذاتها خطأ كالمقارنة بين تفاحة وشجرة تفاح، العلاقة بينهم قوية وجذرية لكن المقارنة خطأ.
لذلك حاول إنك تحدد شخصيتك بدقة وظروفك وقدراتك، وابحث عما يناسبك أنت بغض النظر عن نجاحات الآخرين.
لذلك حاول إنك تحدد شخصيتك بدقة وظروفك وقدراتك، وابحث عما يناسبك أنت بغض النظر عن نجاحات الآخرين.
جاري تحميل الاقتراحات...