ثريد حول الانتخابات في دائرة بيروت الثانية في ظل تعدد اللوائح. 🧵
بأواخر تشرين الثاني ٢٠٢١ شاركنا انا ومجموعة من الرفاق بتأسيس حملة بيروت تقاوم مع ناشطين من شبكة المدى و"كلنا بيروت". التقينا ليس على اسامي مرحشين، بل على رؤية لتشكيل حملة قاعدية شعبية في بيروت الثانية في الانتخابات، تمنع هيمنة قوى المال السياسي والرجعية على الحالة الاعتراضية.
بلش الشغل وكنا مبسوطين كتير بنوعية الخطاب والشكل يلي عم نأسسه سوا. اذا بتشوفو هالبيان التأسيسي، الخطاب منسجم كتير مع افكارنا ومنطق العدالة الاجتماعية ومشكلتنا مع النظام.
مع مرور الوقت وبدء تركيب اللوائح، ازدادت الهواجس الشعبوية كما لم اراها من قبل. الهوس ب تشكيل "لائحة واحدة" اوصل المجموعات الى القبول بالجلوس على الطاولة مع أسوأ خلطة من المرشحين والقوى. قوى لا تنسجم في المبادئ او الممارسة ولن تنسجم يومًا في فريق واحد.
الطاولة تحولت سريعًا الى مساحة توزيع حصص بين الرجال. ملحم خلف دفع باتجاه القبول بالجميع حتى مروان الايوبي و"ثوار بيروت" الذين حرضوا على ناهدة خليل بسبب الهوموفوبيا المقرفة، ويرفضون الدولة المدنية والزواج المدني. اصبح النقاش حول الافراد واختفت كل الاعتبارات المبدئية.
تم القبول ايضًا بوضاح صادق، صاحب شركات الاعلانات الذي عمل واستفاد من الحريري لسنوات طويلة حتى ٢٠١٨ قبل ان يصبح من "الثوار". اسس مجموعة رجال اعمال، اسمها "انا خط احمر"، بينت عن وجهها الحقيقي لما قررت انو مشروعها "حماية القطاع الخاص" بينما في صراع مع النظام ودم بالشارع.
انا خط احمر ايضًا نشرت منشورات ذات بعد طائفي وطبقي حول موضوع "كيف شكل الثائر الحقيقي". المشكلة انو بعد كل هالشي ضل في كتير مجموعات تقعد مع انا خط احمر وتعطيها مشروعية. ليش؟ يا اما براغماتية، او سذاجة، او انتهازية (مجموعة رجال اعمال = 💸).
كرمال هيك انا والرفاق ب لحقي يلي انضمينا لحملة بيروت تقاوم رفضنا التحالف مع هالقوى الرجعية الخبيثة بأي شكل من الاشكال. لا وضاح ولا المحافظين. ولما قررت الجمعية العامة ب بيروت تقاوم تنضم لهيدي اللائحة، خرجنا من الحملة وانسحب المرشح ادهم الحسنية لنفس السبب.
بيروت مدينتي انسحبت من اللايحة لأن تم تحجيمها واقصاء مرشحتهم. حزب لنا (حسن سنو) كمان انسحب. بس ما حدا قِبل ينفتح على احتمال تشكيل لائحة ثورية وتقدمية منسجمة منقدر ندافع عنها وبتحمل مشروع اقتصادي سياسي واضح وبيحقق تغيير جذري بوجه لائحة الانتهازيين.
فبالآخر بيروت مدينتي نزلوا لحالهم وبيروت تقاوم ركبت بلائحة "التغيير" المدعومة من نخبة المعارضة (يعقوبيان، واصف، خط احمر، كتلة، منصات التمويل) ومواطنون نزلوا بلائحة قادرين لحالهم. صار في ٣ لوائح "معارضة"، هيدا غير لائحة المخزومي (بيروت بدها قلب) ولائحة السنيورة (بيروت تواجه)، الخ.
طب شو بيعمل الانسان ليقرر كيف يصوت بهالدائرة؟ في مرشحين مناح بكل لايحة، بس ما فيه يكون هيدا المعيار لأن صدقوني، اذا ربح وضاح صادق او هاني الاحمدية (يميني آخر على لائحة التغيير على المقعد الدرزي) بسبب تصويتكم ما رح يكون شي ايجابي. مش انتصار بأي شكل، بل هزيمة مدوية.
كرمال هيك صراحة القرار بده يكون بين التكتيك والمشروع. بالنسبة للمشروع برأيي ما في طرح جدي ومنسجم بالدايرة غير ب لائحة قادرين. للأسف مع محبتي لناهدة واحترامي لعدة مرشحات لا اعتقد ان لائحة مدينتي لها منطق او نهج سياسي يميزها او يجعلها قطب سياسي حقيقي.
اما لائحة بيروت التغيير فهي ظاهرة مختلفة. مجموعة من الافراد يتنافسون بين بعضهم. اشخاص معروفين وممكن يجيبوا اصوات. ف اذا ولا بد بدكن تصوتوا لهاللايحة لسبب تكتيكي، جربوا صوتو لحدا عنده حظوظ يربح او يمنع حدا اسوأ منه يخرق. نهاد يزبك مرشحتي المفضلة على اللائحة (ممرضة، نقابية، خلوقة).
اما يلي بده يصوت بناءً على واقع الصراع الاجتماعي اليوم، بيننا وبين مجموعة من اصحاب المصارف والزعماء يلي عم يسرقوا المجتمع ويدمروه، أعتقد لائحة قادرين هي الخيار الطبيعي. لا تحوي اي نجوم ومشاهير ولكن تشارك في استفتاء وطني حول المشاريع السياسية وهذا مهم. انشالله يكون ثريد مفيد ✌🏽🧵
جاري تحميل الاقتراحات...