تركت المدرسة عشان أساعد أهلي! بدور بالمزابل ع بلاستيك! عشان خمسة شيكل اخر النهار، مرة لقيت مكروفون، بعته ب خمسين شيكل، كنت محظوظ! محمد من فيلم Born in Gaza .. فيلم لكل واحد لسا ما بعرف شو يعني غزة ومعانتها ، اطفال غزة بدهم حياة مش حرب
عدي: اخوي محمد كان يحبني كثير، كان يوخذني معه عكل محل، كان عمره ٢٢، مات بالقصف، شفته بعيني مقطع
محمود: ابوي مزارع، بزرع خيار وبندورة وفلفل وملوخية،مزرعتنا ٣٠ دونم عالحدود، لما بفوت الجيش بدمر كل شي، حتى الجمل والاغنام قتلوهم،احنا مزارعين مسالمين، ما منزرع متفجرات عشان الجيش يفجر أرضنا
سندس: لما بلش القصف قررنا نخلي بيتنا، عند شارع عمر ابن العاص، سقطت قذيفة، اصبت ب بطني، كل امعائي طلعت برا، انا طفلة ، ما معي قذائف ولا دبابات، ليش هيك بعملوا فينا؟!
رجب : ابوي كان سائق سيارة إسعاف ، راح ينقل ثلاثة جرحى، قصفوا السيارة، كلهم استشهدوا، ما عرفنا نميزهم من بعض، ابوي بطل كان ينقذ ارواح الناس
ملك: فكرنا حالنا محظوظين لانه لجأنا ل مدرسة وكالة عليها علم الامم المتحدة، اجوا قصفوها، استشهدوا ٢٢ واحد، منهم اخوي وابن خالي، بطلنا نآمن بالامم المتحدة
حمادة ومعتصم: كنا ثمان ولاد نلعب عالشط، ضربونا صاروخ، استشهدوا منا اربعة
بيسان: كنا قاعدين بالبيت، انا ومحمد وشيماء، قصفوا بيتنا
هالة: عمري ست سنين مثل عمر بيسان ، بس هي خالتي، بيسان دائما حزينة لانه امها وابوها استشهدوا، هي ما بتحب تحكي عن اللي صار، حلمها تصير معلمة انجليزي لما تكبر، انا حلمي اصير طبيبة
محمود: بدنا نرجع نعمر المزرعة، خايفين من مخلفات القصف، من قذائف ما انفجرت، حلمي اصير مهندس زراعي، اعيش بدون خوف، كيف عايشة باقي الاطفال بالعالم
رجب: ما بعرف ليش قصفوا سيارة الاسعاف تاعت ابوي، كان ينقل جرحى وجثث بالتنسيق مع الصليب الاحمر، نفسيتنا تدمرت، اخوي كان شاطر، ترك المدرسة، اختي حولت من علمي ل ادبي، بتفكر تترك، خايف ع مستقبل اخوي الصغير
حمادة: هاي مش عيشة، البحر مسكر والبر مسكر، لما اكبر بدي اصير مقاوم، عشان اجيب حق ولاد عمي
معتصم: انا طفل، بدي اعيش مثل باقي الاطفال، حلمي لما اكبر اصير صياد
ملك: من ٣٥ محتمين بالمدرسة، ما في أكل الا قليل، ما في تلفزيون ولا خصوصية، ما بعرف انام، كل الوقت بفكر بالقصف، حلمي لما اكبر اصير طبيبة، اعالج الناس كيف بعالجوني الاطباء، انا مريضة سرطان
محمد: سيدي لاجىء من يافا ، انا خايف اصير لاجىء كمان مرة، ابوي وامي مرضى، انا بشتغل عشان اجيب مصاري ع البيت، ما معي مصاري اشتري كفوف، عشان الم البلاستيك من المزابل، حلمي لما اكبر اصير صياد
ما قدرت اكمل الفيلم للاخر، مشاهد الدمار كثير مرعبة، حكايا الاطفال فيها كل حزن وبؤس الدنيا
جاري تحميل الاقتراحات...