رتبها

مفهوم العدالة الإنتقالية و تحقيق المصالحة الوطنية من خلال الإعتراف بالجرائم اللي ضد الإنسانية و اللي إرتكبتها أنظمة ديكتاتورية بحق المدنيين و محاكمة المسئولين عنها و تعويض الضحايا لطي صفحة الماضي و عدم السماح بتكراره !
قريت بحث و عاوزة ألخصه لكم يا رفاق - مشاركة المعرفة

المفهوم ده بدأ في التبلور مع نهاية الحرب العالمية التانية مع ضحايا النازية.
البحث عن تشيلي (دراسة حالة) لأن كل بلد حالة قائمة بذاتها

قبل ما أكتب تلخيص البحث هاحكي بإختصار إيه اللي وصل تشيلي للنقطة إللي إحتاجت فيها تعمل مصالحة وطنية عشان نبقى كلنا في الصورة و نفهم فهم متماسك
.. إبقوا معنا ففي التاريخ لو تعلمون دروس و عبر .. و أحيانا نبؤات !
هو أنا بعشق التاريخ من شوية ❤️😊

تشيلي كانت جزء من إمبراطورية حضارة الإنكا إحتلها الأسبان سنة 1532وأبادوا جزء كبير من السكان الأصليين وعلى مدار3 قرون إتشكلت إثنية جديدة من خليط عرقي وثقافي بتتكون من المستيزو (كلمة أسبانية تعني خليط) ودول حوالي 65% من حجم الكتلة السكانية وهم نتاج إختلاط الأسبان مع السكان الأصليين

وحوالي 25% من أصول أوروبية و 5%من السكان الأصليين
وحصلت على إستقلالها عن أسبانيا سنة 1818ولأن النعم تتحول عند الشعوب المستضعفة لنقم ثروة تشيلي من النحاس (الثالثة على مستوى العالم ) جعلتها مطمع للرأسمالية الغربية خصوصا أمريكا اللي هاتبقى سبب في حزن وظلم كبير إتعرض له الشعب التشيلي

بعد خروج الأسبان كان نظام الحكم ديموقراطي من خلال برلمان بيتشكل من الطبقة الإقطاعية اللي كانت مصالحها مرتبطة بالشركات الإحتكارية الأمريكية واستمر الحال ما بين إضرابات عمالية لتحسين الأجور وظروف العمل و صراعات سياسية بين كل القوى السياسية الموجودة عالساحة

و الجيش كان برة لعبة السياسة و تدخلاته كانت محدودة من وقت للتاني و كانت دايما ضد الشعب و لصالح الطبقة الحاكمة ..
و بنوصل لستينات القرن العشرين .. البلد كانت هادية رغم الظروف المعيشية الضيقة لأغلبية الناس ..

بيحصل إنقسام داخل الطبقة الحاكمة و الصراعات السياسية بتسخن على حس الحرب الباردة و بدون الدخول في تفاصيل كتير .. بيوصل الطبيب اليساري سلفادور الليندي للحكم بإنتخابات ديموقراطية نزيهة سنة 1970

بالمناسبة هو عنده بنت اسمها إيزابيل و أحيانا بيحصل خلط بين إيزابيل الليندي بنت الرئيس سلفادور الليندي و إيزابيل الليندي الروائية التشيلية الشهيرة كاتبة رواية بيت الأرواح اللي تحولت لفيلم من بطولة ميريل ستريب
ذات الوشاح الأحمر هى بنت الرئيس و التانية الروائية الشهيرة

إنتخابات سنة 70 كانت أخر إنتخابات ديموقراطية شهدتها تشيلي لمدة 17 سنة دخلت فيهم نفق الإنقلابات العسكرية المظلم .. إزاي ده حصل .. خللونا نشوف

الليندي كان راجل إصلاحي و عنده برنامج طموح لإصلاح الصحة و التعليم و رفع الأجور و وضع حد أدنى لها و تحسين ظروف العمل و كان شايف إن إستحواذ الشركات الأمريكية على مناجم النحاس بمثابة إحتلال مقنع .. قام أمم المناجم و أمم كمان أراضي و أملاك الإقطاعيين

هو كده خلق لنفسه أعداء داخليين من الإقطاعيين اللي أمم أموالهم و دول إشتغلوا بكل همة على شراء الذمم و جمع الأعوان و زرع بذرة الفساد و بدأ الجهاز الإداري يعرقل قرارات الرئيس في الخفاء و العلن و البوليس رفع ايده عن المجرمين و الإرهابيين و سمح لهم يزعزعوا الأمن الجنائي

الليندي خللى مسألة القضاء عليه بالنسبة للأمريكان مسألة حتمية لأنه نزع المناجم منهم و لأنه جعل تشيلي جيب للشيوعية والحرب الباردة في عزها .. رئيس أمريكا في الوقت ده كان المحروس نيكسون و وزير خارجيته التعلب هنري كسينجر .. و بدأ تحرك السي آي إيه لإسقاط الليندي ..

كانوا بيشتغلواعلى المهمة من خلال عدة محاور..الأول خنق إقتصاد تشيلي لخلق حالة من السخط الشعبي وتأليب الناس اللي إنتخبت الليندي عليه
وضغطت أمريكاعلى المؤسسات الماليةالعالمية محدش يعامل الليندي ولا يسلفه وهو كان بدأ فعلا حركةالإصلاح بتاعته ومحتاج فلوس وبقى لاعارف يطلع ولاقادر ينزل

الليندي طلب الغوث من السوفيت لكنهم طنشوه .. عشان هو إشتراكي فالصو جه للحكم من خلال الديموقراطية مش من خلال ثورات دامية و حركات 😊
كانت وجهة نظرهم أنه هايسقط و خسارة إستثمار فلوس فيه

المحور التاني اللي كانت المخابرات الأمريكية شغالة عليه هو إحداث إنقلاب عسكري ضد الليندي و القضاء على الحكم الديموقراطي عشان تخلص من وجع الدماغ و تضمن أنه مافيش رئيس اشتراكي هايوصل للحكم لفترة طويلة جاية

المهمة المطلوب إنجازها هى إيجاد حد جوة الجيش يقبل و يقدر ينفذ الدور الخسيس المطلوب والمهمة التانية كانت إزاحة رئيس الجيش رينيه شنايدر اللي لايمكن يسمح بأن يحصل إنقلاب من داخل الجيش على الرئيس وللسخرية بيتم خطف الجنرال شنايدر وقتله بدعم وسلاح من أمريكا لمجموعةمن جوة الجيش ذات نفسه

بعد مقتل الجنرال شنايدر قام الليندي عين مين قائد أعلى للجيش ؟؟ أيون حضرتك .. السفاح أوجوستو بينوشية ! كان المسكين مش عارف أنه بيحط في عبه حية و بيسلم رقبته و بلده لخاين حليف عدوه و عدو بلده .. أمريكا

بينوشية كان الشخص اللي وقع إختيار أمريكا عليه لتنفيذ الإنقلاب العسكري و اللي من فجره ضرب القصر الرئاسي بالطيرات بعد ما رفض الليندي التنحي ..بدون الدخول في تفاصيل اللحظات الأخيرة للرئيس .. الوغد بينوشية بقصفه للقصر الرئاسي وجه رسالة مرعبة بليغة للشعب .. و حل على العاصمة صمت الخوف!

بينوشية لم أنصار الليندي ونكل بيهم تنكيل شديد وحول ملاعب الكورة لسلخانات بشرية .. ناس اتصفت و ناس ماتت تحت التعذيب و ناس اختفت محدش يعرف مصيرهم وناس اترمت في السجون و ناس انطردت برة البلد

و بدأ التشيليين يطلبوا اللجوء السياسي هربا من الملاحقة الأمنية .. و كان من اللي خرجوا لجوء الشاعر الكبير بابلو نيرودا

من الناس اللي هربوا المخرج السينمائي ميجيل لاتين اللي قدر يتسلل لتشيلي متنكرا و صور و وثق ما آلت إليه أحوال البلاد العباد وبينجح في انه يهرب الشرايط ويرجع لأسبانيا و بيعد فيلمه الوثائقي بعنوان ( عين في قلب تشيلي) مغامرة لاتين كتبها جارسيا ماركيز في روايته الوثائقية (رحلة المخاطر)

طبعا بينوشية ما ضيعش وقت .. حل البرلمان و عطل الدستور و رجع المناجم للشركات الأمريكية و تبني سياسة الخصخصة و إنحازت الدولة إنحياز سافر لأصحاب رؤوس الأموال و لغى الحد الأدنى للأجور !
والموقف بقى إقتصاد رأسمالي حر في دولة نظام حكمها عسكري ديكتاتوري🙄

على فكرة السي آي إيه أفرجت عن وثائق عملياتها في تشيلي .. و مع ذلك رفض باراك أوباما تقديم إعتذار للشعب التشيلي عن دور بلده في إسقاط و إغتيال الليندي و دعم الديكتاتور السفاح بينوشيه لما زار تشيلي سنة 2011 😑

بينوشية بالغ في محاباة رجال الأعمال الأمريكيين على حساب رجال الأعمال التشيليين و بدأ يحصل إنقسام جوة الطبقة المنتفعة اللي أحاط نفسه بيها بالتزامن مع تصاعد حالة الغليان المكتوم بين طبقات الشعب اللي إزداد فقر رغم إنجازات الزعيم الإقتصادية لأنها إنجازات لاتخدم القطاع العريض من الشعب

رد فعل الوغد كان رد فعل مثالي يليق بديكتاتور أعمته سلطته .. أمعن في إرهاب الناس بالبطش العشوائي .. لدرجة أن الفرد مبقاش عارف هو المفروض يعمل ايه تحديدا عشان يبقى آمن!
حتى لو مشي جوة الحيط ممكن زبانية بينوشية تلوشه

ده بقى جاب نتيجة عكسية للي كان متوقعه الزعيم .. بدأت تتشكل قوى معارضة من الحركات العمالية في مناجم النحاس و الطلبة من منطلق أنه يا روح ما بعدك روح .. كده كده ميتين !
حركات سرية نشيطة و واعية و هى دي اللي ساعدت المخرج ميجيل لاتين في تصوير فيلمه و خروجه بسلام

معذرة يا رفاق .. نعست 😅
أكمل لكم باقي الحكاية بكرا إن شاء الله ❤️🌷

مسا التماسي أجدع تماسي .. أحسن تقولوا إن أنا ناسي 💃💃🎶
نكمل بقى قصة الوغد و الحرية😊

هارد على كل المنشنز بعد ما أخلص الثريد 🙏

سنة 83 قررت الحركات العمالية في مناجم الفحم تنظيم إضراب لكن بينوشية حاصر المناجم بالجنود فغيروا الخطة لإضراب عام لمدة يوم واحد الناس بدأت تستجيب على إستحياء والإضراب يوسع بالتدريج على مدار اليوم وبالليل بدأوا الخبط على الحلل من الشبابيك و بعدين تجرأوا و نزلوا الشوارع أدام بيوتهم

الإضراب كان ناجح و رفع الروح المعنوية للناس و بناء عليه قررت المعارضة تكراره مرة كل شهر .. و فعلا إتكرر 10 مرات .. بينوشية كان شايف ده لعب عيال لكن لما بدأ يلفت أنظار الصحافة العالمية قرر ينهيه و نزل 16 ألف جنود في شوارع العاصمة .. و بقت مدعكة !

أصر الناس على إستمرار إعلان الرفض خصوصا في الأحياء الفقيرة حيث ليس لدى المرء الكير ليخسره و فورا أعتبر بينوشية الأحياء دي أرض الأعداء ونكل بيهم تنكيل شديد وهم قاوموا مقاومة شديدة و بتنضم الكنيسة الكاثوليكية لصوت الشعب مطالبة بوقف العنف .. لكن النظام طبعا ما بيسمعش أي صوت غير صوته

وبقت الناس ترد على العنف بالعنف وبدأ يبقى في تشكيلات مسلحة تابعة للشيوعيين و في سنة 86 بيتعرض بينوشية لمحاولة إغتيال ! هو نجا منها زي العفريت و مات خمسة من حرسه و خبر نجاته كان محبط جدا للناس اللي كانوا بيتمنوا فعلا لو داهية تنزل عليه تمحيه من الوجود .. وطبعا بسلامته قرر الإنتقام

ريحة النظام التشيلي بقت تزكم الأنوف و بتصدر الأمم المتحدة إعلان بإن في ممارسات ممنهجة ضد الإنسانية من تعذيب و إحتجاز تعسفي في تشيلي و بتتشكل لجنة دولية تابعة لمنظمة الدول الأمريكية و بتحقق لمدة سنة و بتقدم توصياتها بأن المجتمع الدولي لازم يحاكم المسئولين عن التعذيب 🙄

يقوم بينوشية يصدر عفو رئاسي عن كل ظباطه المتهمين (ماهى اللجنة ما إتهمتش راس الأفعى) و وصفهم بأنهم من ساهموا في إستتباب الأمن وقيام الحكم العسكري الرشيد ! 🤪

سنة 88 بينوشية كان عاوز يمرر قانون يسمح له بالحكم لمدة 8 سنين إضافية .. المحكمة العليا أصرت أنه لازم يعمل إستفتاء شعبي تشارك فيه المعارضة
و قد كان .. لكن بينوشية اللي بقت سمعته في العالم أسواء من هباب الحلل و اللي كان خايف من إنفجارة شعبية مايقدرش عليها ..

قرر أن الحزب اللي عاوز يشارك في الحملة الدعائية قبل الإستفتاء و يمنح 15 دقيقة كل يوم على التلفزيون لمدة 4 أسابيع و يكون له مندوب في الفرز لازم يجمع 35 ألف توقيع .. كان بيراهن على أن الناس هاتخاف تكتب اسمها في عريضة المعارضة .. لكن رهانه طلع على فاشوش 😎

المعارضة بذلت جهود جبارة في القرى و من بيت لبيت بيقنعوا الناس تشارك و مايخافوش من التزوير و أن صوتهم فعلا له قيمة و أنه في بصيص من الأمل لإسترداد الديموقراطية .. و نجح حزب لاجوس في أنه يجمع 35 ألف توقيع 💪💃

و بيظهر زعيمه ريكاردو لاجوس في برنامج شهير في التلفزيون و قال جملته المشهورة موجها كلامه لبينوشية ( أنت تعد تشيلي ب 8 سنوات أخرى من العذاب و الفقر) و في لحظة بقى ريكاردو بطل وطني .. ❤️

حملة لا عملت فيديوهات تذكر بجرائم النظام .. لكن إستطلاعات الرأي قالت أنها جابت نتيجة عكسية و عززت الخوف و اليأس عند الناس و بسرعة بتغير المعارضة إستراتيجيتها و بتعمل حملة عنوانها (الأمل) من خلال أغاني و ألحان مست قلوب الناس باسم (تشيلي الفرح قادم )

و بقت ال 15 دقيقة المخصصة للمعارضة على التليفزيون مقدسة عند الناس ولا ماتش الأهلي و الزمالك عندنا .. ماتلاقيش حد في الشارع .. النظام قرر يعمل حملة مضادة و عمل فيديوهات بتصف المعارضة بالخونة المخربين و كان دمها تقيل و صفراوية و محدش حبها 😆

يوم الإستفتاء 3 نوفمبر 88 تمت عملية الفرز تحت مراقبة المعارضة و إتأخر الإعلان الرسمي للنتيجة لمنتصف الليل لما توجه قادة أسلحة الجيش المختلفة للقصر و أدام القصر بيعلن قائد سلاح الطيران فرناندو ماتيه للصحافة ( يبدو أن لا قد فازت ) .. و ده إعلان من أسلحة الجيش بالإنحياز للشعب ..

خلاص كده .. جرد السفاح من مخالبه !
و إندلعت فرحة عارمة .. 💃
هنا يطفو فوق الفرحة سؤال .. ماذا لو لم ينحاز الجيش للشعب ؟؟🤔
فكروا فيها على مهلكوا ..

و بيتم عمل إنتخابات رئاسية ديموقراطية ( وكان شرط الجيش للتنازل عن السلطة للمدنيين هو عدم الملاحقة القانونية لعناصره) 🤨
و يبدو أن القوى المدنية وافقت من منطلق نزيحهم و بعدين نشوف هانعمل ايه 🙄

و فعلا بيتم عمل إنتخابات رئاسية ديموقراطية نزيهة و بيعلن باتريسيو إيلوين رئيس لجمهورية تشيلي .. و كان عليه عبء تقيل جدا .. و هو تفكيك الإرث الأسود اللي سابه الحكم العسكري و محو الكراهية و منع عمليات الإنتقام !
هنا بقى النقطة اللي إحتاجت فيها تشيلي المصالحة الوطنية ..

الموضوع مكانش سهل أبدا و تفكيكه مكانش نزهة و ما خلصش في سنة ولا اتنين .. ده استغرق 16 سنة من الكفاح .. ضيف عليهم ال 17 سنة السود بتوع حكم الإنقلاب .. أعمار بتتحرق في عبث الطغاة و ولاد المتسخة ..
إقامة العدل صعبة يا رفاق .. صعبة فعلا

سنة 1990 بيشكل الرئيس باتريسيو لجنة الحقيقة و المصالحة عشان يقفل ملف الإنتهاكات الجسيمة اللي حصلت
و لأن العدالة الإنتقالية هى عملية سياسية في الأساس بتضافر فيها كل الأطراف .. الحكومة و منظمات و جمعيات حقوق الإنسان و المجتمع المدني .. فهى بترتكز على تحقيق العدالة للضحايا ..

لكن..مش دايما محاسبة المتورطين بتكون ممكنة!
في الغالب بتركز الجهود على التعويض الفردي والجماعي للضحايا و إصلاح مؤسسات الدولة المتورطة في الإنتهاكات لضمان عدم تكرارها مستقبلا وكل ده بيتم من خلال لجان قانونية رسمية
لكن مش دايما بيكتفوا الضحايا بكده و بيكون مطلبهم الأساسي ..القصاص

الرئيس باتريسيو كان عشمان أن الإقرار بوجود إنتهاكات جسيمة و كشف الحقيقة يكون كافي لتحقيق التطهر الروحي الفردي و الجماعي من الكراهية و الرغبة في الإنتقام .. لكن ده مكانش كافي أبدا بالنسبة لأسر الضحايا و أصروا أنه يكون في ألية لعقاب المتورطين كشرط لتحقيق المصالحة الوطنية

لجنة المصالحة اللي شكلها الرئيس كانت مكونة من 8 أعضاء 6 رجالة و 2 ستات كانت مهمتها التحقيق في الإنتهاكات اللي أرتكتبت بدوافع سياسية في الفترة من 11 سبتمبر 73 ل 11 مارس 90 .. و مكانش من سلطاتها تقديم أي حد يشتبهه في تورطه للمحاكمة

المهم اللجنة قدمت توصياتها بعد فحص الحالات اللي عرضت عليها بالتعويضات و الحقيقة كانت تعويضات مالية كبيرة و معاشات مدى الحياة للأسر اللي فقدت عائلها و رعاية صحية و تعليمية لأبناء الضحايا و أعادة تأهيل صحي و نفسي للناجين من التعذيب و حل المشاكل القانونية المترتبة على حالات الإختفاء

زي مشاكل الميراث و الزواجات و الزواج المعلقين لعدم تحديد مصير الشريك المختفي (الطلاق أقر في تشيلي سنة 2004 ) .. كل ده كلف خزانة الدولة 3.2 مليار دولار !

كل ده..و الضحايا و أسرهم حسوا بالخذلان!
من منطلق أن معرفة الحقيقة حق من حقوق الفرد .. فما ينفعش تبقى المعرفة (الحق) مقابل التنازل عن حق تاني هو (القصاص) و كل الضغوط لقبول مبدأ الحقيقة مقابل العفو .. قوبل بالرفض !
إعتبروه عدالة منقوصة .. إيه رأيكم ؟ هل ده كان موقف متشدد من الناس ؟

طيب عاوزين نعرف بينوشية فين ؟ كان إيه مصيره ؟
كان قائد الجيش و عضو في البرلمان !!!!! أحيه😂🤪
محدش يضرب .. هاقولكم ده حصل إزاي ..

سنة 1980 بينوشية عمل تعديلات دستورية عمل عليها إستفتاء (من إياهم) .. و قالت الصناديق للزعيم .. نعم 🤓
التعديلات دي كانت بتنص على أنه في حالة تركه لمنصب الرئيس فإنه يحتفظ بمنصب قائد الجيش و أن كل رئيس تنتهي ولايته أو يتنحى ..تلقائيا بيكون عضو في مجلس الشيوخ و له حصانة برلمانية !

عشان كده محدش قدر يلاحقه قضائيا بعد سقوطه ..حد يسألني طب ليه الرئيس الجديد مالغاش التعديلات دي ؟.. و الإجابة .. أن ده جزء من صفقة تنازل الجيش عن السلطة .. لا ملاحقة قانونية و لو إتحاكم بينوشية هايجرهم كلهم لحبل المشنقة

و كان لازم الناس تنتظر لسنة 98 لما قرر الوغد أنه يستقيل من الجيش و يسافر لندن عشان يتعالج .. هناك بقى كانت في إنتظاره مفاجأة .. السلطات البريطانية قبضت عليه و حطته في الإقامة الجبرية بناء على مذكرة تقدمت بها أسبانيا تتهمة إرتكاب جرائم ضد الإنسانية في حق أسبان كانوا في تشيلي

المذكرة صدرت بناء على بلاغات رفعتها للمحكمة جمعيات حقوقية أسبانية و تشيلية ضد إنتهاكات حقوق الإنسان اللي أرتكبت وقت حكم بينوشية.. اللي ورط بينوشية دوليا هو أن بوليسه السري كان بيصفي و يخطف معارضين خارج تشيلي و بالتالي ممكن توقيفه و محاكمته دوليا

العجيب أن دولة تشيلي إحتجت و إعتبرت أن إعتقال و حاكمة بينوشية خارج تشيلي تدخل في شئونها الداخلية !!!!و دي كانت ضربة قوية أضرت كتير بمصداقية مبادرة المصالحة الوطنية و أثارت الشبهات حول نزاهة القائمين على أجهزة الدولة 🤨

مش بقولكم إقامة العدل صعبة .. و الإنسان وغد بالسليقة !
المهم .. السلطات البريطانية دعبست في أوراقها القديمة لقت أن في إتفاقية موقعة عليها هى و تشيلي هى إتفاقية مناهضة التعذيب و بموجبها أصرت على إسقاط حصانة بينوشية و تسليمه لأسبانيا ليحاكم أمام محكمتها .. و حصل فعلا 😌

لكن .. سنة 2000 الحالة الصحية بينوشية خلتهم أفرجوا عنه و رجع لبلده ! جت الحزينة تفرح مالقتلهاش مطرح 🙄
و لما رجع طبعا كان لسه بيتمتع بالحصانة داخل الأراضي التشيلية .. لكن كانت أسر الضحايا و المحامين في إنتظاره بغضب كبير و إصرار أكبر 💪

و لأن الجرائم ضد الإنسانية لا تسقط بالتقادم و لأن الدولة أيقنت أن اللي له حق مش هايسكت عن المطالبة بيه بعد كل السنين دي من الكفاح بتسقط حصانة الوغد سنة 2004 و بيتقدم للمحاكمة بتهم ما يعلم بيها إلا ربنا !!
يااااااا صبر أيوب 😭

و بدأ التحقيق معاه فعلا مع مطالب بالكشف عن مصير المفقودين و أماكن دفنهم لو كانوا ماتوا .. و بردو كان في جهود كبيرة لعرقلة تقديمه للمحاكمة من ذوي النفوذ
لكن و آه من كلمة لكن ..

القدر بينقذه و بيخذل المتعطشين للقصاص و بيموت بينوشية سنة 2006 قبل إتمام المحاكمة .. لكن الكويس أن على ار التحقيق معاه تم توجيه إتهامات لعناصر من الجيش بالتورط في الجرايم دي و فعلا قدموا إعترافات تفصيلية .. و هنا بتعبر مبادرة المصالحة الوطنية لبر السلامة و بالقصاص هديت النفوس ❤️

الثريد طول معلش 🙏
لكن دي تجربة شعب تستحق إننا نحكيها و إحنا نستحق إننا نعرفها .. المعرفة قوة❤️
برشح لكم يا رفاق تقروا كتاب ماركيز (رحلة خطرة) موجود على النت و كمان في نسخة صوتية على يوتيوب حلوة .. الكتاب جميل و السرد ممتع

كمان روايات الكاتبة التشيلية إيزابيل الليندي دايما هاتلاقوا فيها شذرات إنسانية و شهادات عن الفترة دي .. الحاجات اللي الناس بتعيشها و لا تذكرها كتب التاريخ ..
فوتكم بعافية 🙏❤️

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد