رتبها

مابلاش اللون ده معانا
راح تعب أوي ويانا
و لا إحنا عشان بنحبك تشتري و تبيع في هوانا😌
عودة لل #Afrocentrism
بس إيه دخل الأستاذ عدوية؟ لا ماهي أول مغالطة هانتكلم عنها من مغالطات شيخ أنتا ديوب هى مغالطة اللون!
لوحد قالك كيميت مش يعني الأرض السوداء لكن يعني أرض السود هاترد تقول ايه؟

بشكل عام و من قديم الأزل إرتبطت الألوان بالرمزية و أحيانا بيكون مجرد اللون بيغني عن الكلام!
اللون بيعبر عن الحالة (لونك حزايني ليه يا فسواني)
و بيعبر عن السلوك (مابلاش اللون ده معانا)
يبقى رمزية اللون مش بس بصرية لكن دي كمان لغوية!

شيخ قال أن كلمة كيميت مش معناها (السوداء- أي مصر) لكن معناها أرض السود.. لكن الكلام ده غلط .. ليه؟
لأن الأسود اسمه (كيم) و لما يؤنث يبقى (كيميت)
فلما نحب نقول سود هانقول (كيميو) و لما نحب نقول المنتمون للسوداء هانقول (كيميتيو) .. فتبقى أرض السود (تا كيميو)
واضح الفرق ؟

حاجة تانية .. الصحراء المصري القديم سماها (دشرت) يعني الحمراء (الحارة) و ما ينفعش نترجمها أرض الحمر !
واخد بالك معايا ؟

و في عجالة كده .. الألوان عند المصري القديم مجموعات
يعني مجموعة الفواتح (حِج) و تضم الأبيض و الفضي و الرمادي الفاتح ..و الدواكن (كيم) و يتضم الأسود و البني الغامق و الكحلي و الرمادي الغامق ..و الدافئة (دشر) الحمر و البرتقالي و البنفجسي و البني الفاتح و الوردي

والألوان الباردة و دي بتضم الأخضر و الأزرق بدرجاته .. و أطلق على أي مسطح مائي كبير (بحر أو بحيرة) اسم (واج ور) يعني الأخضر العظيم..و الحقيقة الاسم ده جامع مانع لأن البحر إيه غير بالتة ألوان سايح فيها الأزرق و الأخضر في ملحمة لونية عظيمة😊
في الصور المعبود واج ور و اسمه جوة المربع

نقطة تانية .. المصري ماقالش على البشر اللي لون بشرتهم داكن (كيميو) لأنه استخدم الكلمة دي لوصف الأشياء .. لكن سماهم (نحسيو) و في الأصل كانت تعني (متوهج محترق) و قائد حملة حتشبسوت لبلاد بونت كان اسمه (با نحسي) كان معناها وقتها (سمارة) لكن دلوقت بتترجم (النوبي)

و اتنقلت الكلمة للغة العربية و بقت اسم المعدن اللي لونه متوهج محترق (النحاس) .. و إتنقلت للعبرية كاسم للذكور و بقت (بنحاس)

حلو لحد كده؟ طيب .. المصري القديم لون الناس إزاي في النقوش اللي في المعابد و المقابر ؟
لون الرجالة المصريين باللون البني المحمر و لون الستات باللون الأبيض المصفر (دليل البغددة و أنها متستتة مش بتشتغل في الشمس)

و لون الخدم و الفلاحين ستات و رجالة باللون البني المحمر .. ليه؟
أيوون .. عشان دول بيشتغلوا في الشمس فبياخدوا تان 😌

و لون سكان غرب آسيا و جزر البحر المتوسط باللون الأبيض المصفر بردو (ستات و رجالة) و لون سكان شمال أفريقيا باللون البني المحمر (و بعض قبائلهم كانت شعورهم حمرا) أما سكان النوبة العليا (كوش)- أفريقيا السوداء فلونهم باللون الأسود و البني الغامق و المتوسط و أبرز الملامح الزنجية

شيخ أخد صورة لمنظر عد و تسجيل الأسرى في مقبرة حورمحب في سقارة و قال أن دي صورة لفلاحين مصريين!!
نلاحظ أن الأسرى لابسين حلقان .. عادة لبس الرجالة للحلقان في مصر القديمة بدأت مع الدولة الحديثة و فضلت مقتصرة على الطبقة المخملية فقط مش الفلاحين

دي صور لتمثال الملك شيشانق الأول من الأسرة 22 و الخرم واضح في ودنه
كمان تمثال راس توت عنخ آمون و صورة لسن نفر من مقبرته (مقبرة العنب - البر الغربي بالأقصر) لابس حلق مخرطة 😊

نيجي بقى لنقطة مهمة جدا .. أوزير !
شيخ إعتمد فرضية مافيش أي دليل أثري على صحتها حتى اليوم .. و هى إن أوزير (أوزيريس) شخصية تاريخية مش شخصية أسطورية!
و جاب كام صورة لأوزير و هو متلون باللون الأسود .. و قالك بس .. أوزير مؤسس مصر الحقيقي و كان زن جي من حدانا 😊

و تجاهل تمااااما صور أوزير الأزرق و أوزير الأخضر و أوزير الأحمر كمان 😊
و يمكن ما يعرفش أو عارف بيستهبل أن لون وجه المعبود في مصر القديمة ذو دلالة رمزية تخدم السياق اللي بيتكلم عنه المنظر
الصورتين لأوزير الأزرق من معبد سيتي في أبيدوس و الأخضر من مقبرة نفرتاري

الآلهة لما بيلونها المصري القديم باللون الأزرق فده لأن اللون ده لون السما سكن الآلهة و عشان كده سماهم (أي الآلهة) سادة اللازورد .. على فكرة كان بيجيب اللازورد من أفغانستان .. تصور ؟؟ 🥴
الصور لبتاح و آمون من معبد سيتي الأول - أبيدوس

و الألوان مع اوزير بالذات هى تجسيد بصري رمزي للفصول الزراعية في مصر .. أسود (موت الأرض و عودة الفيضان) أخضر (قيامة أوزير و إنبات الأرض) بني محمر ( نضج المحاصيل و الحصاد
الصورة لجسد أوزير

و أوزير موضوع كبير بتمتد جذوره لعصور ما قبل التاريخ و لا يتسع المجال دلوقت للإستفاضة فيه .. كل اللي هاقوله هو إن كل شعب من شعوب العالم له أوزيره الخاص .. لأن أوزير (الفكرة) هو روح الشجرة .. من أيام ما كان الإنسان ساكن الغابة و بعد إكتشاف الزراعة بقى (روح الحنطة)

و بالمناسبة دي هاحكي لكم حكاية كنت أحد شهودها 😊
في يوم كنت في متحف الأقصر معايا ضيوف و في اليوم ده كان المتحف فيه زوار كتير و فجاة خرم ودني صوت شخص كبارة كده بيشرح لمجموعة من علية القوم بصوت عالي منظر لآمون ملون باللون الأسود
المنظر اللي في الصورة ده

و بيقول لهم أن المصريين القدماء ربنا فرض عليهم أربع صلوات فلما ضيعوا الصلاة .. سود الله وجوههم !!
بس يا محترم .. المتحف بقى هس هس ترمى الإبرة ترن😂
أنا و كل الزملاء خرسنا و كأن على رؤوسنا الطير 🥴

الأستاذ حس أن الدنيا سكتت .. فإعتبر إننا سكتنا عشان نستزيد من علمه و بص لنا شذرا و مشي يكمل جولته بكل خيلاء الجهبذ العلامة !!
و ما شكش للحظة إننا جت لنا كرشة نفس من هول ما سمعناه 😂😂
و الحقيقة أن دي مآساة 💔

آمون هنا لونه إسود لأنه متخذ هيئة المعبود (مين) رب الخصوبة .. و اسمه (كاموتف - فحل امه) و لو المنظر كامل كنا هانشوفه بعضو ذكري منتصب و رافع دراعه و هو ماسك ال(النخخ) مذبة الحكم
نفس الهيئة اللي في الصورة دي

هأقولكم على مثال كمان على اللون الأسود .. الملكة (أحمس نفرتاري) و اللي كانت موميائها ضمن مومياوات موكب نقل المومياوات .. غالبا تصور باللون الأسود القاتم .. لأنها بعد موتها إعتبروها الناس في العقيدة الشعبية حامية جبانة طيبة .. العالم الآخر يرمز له بالأسود

مع أن صورتها المجسدة على تابوتها مش سودا !!
التابوت كان في المتحف المصري في التحرير مش عارفة نقلوه ولا لأ
يبقى اللون الأسود كان رمزي في سياق المناظر الخاصة بالعالم الآخر كربة من رباته الحاميات

و لما حد يقولك زي ما بيقولوا لي أن تمثال الملك منتوحتب التاني في متحف القاهرة في التحرير بيقول أنه من أصول زن جية .. قوله ده تمثال طقسي كان متكفن لما لقاه كارتر و مدفون في مقبرته ضمن طقوس (اليوبيل - حب سد) عشان كده لونه أسود و أن ملامح و لون الملك الحقيقية في الصورة التانية أهي

طولت عليكم سامحوني 😅
فوتكم بعافية ❤️

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد