بتكلم عن تجربتي وكيف بديت بزنس براس مال ٣٠٠٠ ريال ووصلت مليون خلال سنتين!
مبدئياً هذا الثريد هو تجربتي الخاصة يعني مو كل شي سويته صح او غلط هي تجارب مريت فيها ممكن تستفيدون ممكن تشوفونها بدائية انا بشارككم الي مريت فيه وتعلمته لكن ما اعتبر نفسي مرجع لريادة الاعمال ابداً🙏🏼
مبدئياً هذا الثريد هو تجربتي الخاصة يعني مو كل شي سويته صح او غلط هي تجارب مريت فيها ممكن تستفيدون ممكن تشوفونها بدائية انا بشارككم الي مريت فيه وتعلمته لكن ما اعتبر نفسي مرجع لريادة الاعمال ابداً🙏🏼
اولاً انا ارسم يوم كان عمري ١٦ عرض علي احد ارسم له على ملابس وهو يبيعها، كان مفروض المشروع شراكة بس طبعاً سحب علي وجاب ناس ثانيين والعقد حقه طلع خربوطي واخر شي خسر مشروعه، بس هذي التجربة علمتني ان الفن والملابس هي شغفي والشي الي حابه اشتغل واكبر فيه، سبب الخسارة: شريك غير موفق❌
صار عمري ١٧ قررت ابدا من نفسي نفس الشغل اللي كنا نسويه بس لحالي وجبت تيشيرتات وصرت ارسم عليها واعرضها على انستقرام بس طبعاً قلة الخبرة خلت كل الملابس تقعد عندي بالبيت وخسرت بكل شي دفعته واهلي قالو ماعاد بيعززون لي مره ثانيه 😂سبب الخسارة: تكلفة عالية ووقت طويل لإنتاج منتج واحد ❌
طبعاً مافيه شي بيوقفني وانا اعرف ان هذا شغفي صار عمري ١٨ وقررت اتعلم من الاشياء الي غلطت فيها من قبل، ماراح ارسم رسم يد على الملابس بطبعها ، بجيب تصاميم جديدة ومو مكررة، ماراح اسوي كمية كبيرة، بحاول اقلل تكاليف قد ما اقدر عشان ابيع باسعار مناسبة
طبعاً ماسويت دراسة سوق ولا ادري مين السوق المستهدف ولا مين المنافسين قررت ابدا وحطيت اسعار من مخي وبس، اول واهم شي التصاميم كلمت زميل معاي بالجامعة معروف شغله بالفوتشوب وقلت له اني ببدا مشروع واحتاجك تساعدني بالتصميم بس ما اقدر ادفع لك لين ابدا واول تيشيرت ببيعه بحول لك على طول
هنا استفدت من علاقاتي بس مو واسطات واعلانات لا علاقات بسيطة من ناس اعرفهم، سويت التصاميم على ذوقي ودورت قد ما اقدر على افكار جديدة من بينترست وربطت التصاميم بمشاعر عاطفية عشان استهدف الناس واحسسهم ان هذي مو بس منتجات لا هذي ممكن تكون تعبر عن شخصياتهم ومشاعرهم وفعلاً نجحت الفكرة
كلفتني التصاميم ٩٠٠ ريال، الحين جا دور المصانع واهم شي عندي كان الجودة دورت كثير لفيت اماكن طباعة لكن ولا شي عجبني وماعندي ميزانية اطلب من برا، دورت بكل مكان لدرجة كتبت بحسابات اسال الرياض ابي مطابع ملابس 😂 تواصل معي مدير شركة سعودية يطبعون على التيشيرتات وقلت له يرسل لي شغل
وصلني وعجبتني الجودة مرره حرفياً هذا اللي ابغاه! بس مشكلته لازم اطلب كمية وشريت تيشيرتات بقيمة "٣٠٠٠" تقريبا، هذي كانت راس مالي اللي دفعته وماعندي غيره لا للتسويق ولا للباكجنق ولا لموقع ولا اي شي! بديت بحساب بتويتر صورت التيشيرتات مع صديقتي بكاميرا جوال والخلفية سيارة بيتهم😂
هنا بدا التحدي! صرت اقول لكل الناس الي اعرفهم اني بديت بزنس حطيت بتويتر سويت زحمة تغريدات حتى قبل ما ابدا وكنت استشير كل احد بالتصاميم والشغل عشان اذا بديت يكون فعلاً شي عاجب الكل! نص التيشيرتات الي كانت عندي وزعتها هدايا والنص الثاني بعته ودفعت قيمة التصاميم لزميلي المصمم!
بعدها صار المصنع يسويلي حسب الطلب اي طلب يجيني احول للمصنع قيمة التيشيرت وهم يسوونه وارسل للعميل، بس كان عندي مشكلة انهم يأخرون الطلبات وتقعد الى اسبوعين عشان تيشيرت يوصل! وحتى التغليف كان يوصلهم كيس ارامكس 😂 شغل يفشل بس كان الماركتنق حقي اسطوري الحمدالله وقدرت اوصل فكرتي للناس
ارسلت هدايا لـ Bloggers وهوامير هنا بتويتر وكنت اسوي اعلانات غير مباشرة دايم غير مباشرة وكانت اغلب منتجاتي تصوير جوال وحسيت ان الناس ينجذبون لها اكثر من الصور اللي too perfect وعملائي صارو هم يصورون لي المنتجات ويحاولون يضبطون له صور لان حابين الشغل وحاسين انه فعلاً يعبر عنهم
هنا بدا يمشي الشغل وبدا يصير عندي ميزانية وطبعاً ما خبيتها عشان اطور المشروع صرفت كللل شي يجيني😂 ما كنت حاطه ببالي انه بيكبر اصلاً ماخذه الموضوع طقطقة وبعد شهرين بسحب عليه وجمعت ١٢٠٠ من ارباحي وسويت فيها تصاميم جديدة وبديت احط بالفوتوشوب على تيشيرتات ومودلز ونزلت الكولكشن الثاني
كان بداية كورونا شهر ٢-٢٠٢٠ ! هنا كنت مرسله من الكولكشن الجديدة لحساب فاشن بسناب شات عنده ١٠ الاف متابع ووحده منهم كانت رغد دايز شافت الكولكشن وعجبها وشرت مني ٨ قطع ودفعت قيمتها كاملة! اول ماوصلتها القطع صورتها وكتبت "مو اعلان بس فعلاً يجنن شغلهم" ومن هنا بدت القوة الحمدالله
كنت ادخل ٣-٥ الاف بالشهر وبعد اعلانها دخلت ١٠٠ الف بالشهر طبعاً كان اكثر من ٧٠٪ تكاليف لاني اصنع حسب الطلب ومصنع سعودي ف كان ربحي جداً بسيط وكنت انا ماسكة خدمة العملاء وتجهيز الطلبات وماعندي موقع كل احد يكلمني دايركت عشان يطلب وهنا جا ضغط مو طبيعي وخسرت عملاء كثير ماقدرت انفذ لهم
طبعاً انا ادرس هندسة وكنت ارجع من الجامعة الساعة ٥ واجلس ارد واخذ طلبات واجهزها لين الفجر وما انام حرفيا وكمية صداع كلمت وحده من صديقاتي وصرت ادفع لها ٨٠٠ بالشهر وتساعدني بالرد وانا اسوي واجهز الطلبات وهنا بديت اجمع فلوس بس بنفس الوقت مضغوطة بشكل مو طبيعي لين شخص عزيز علي نصحني
وقال حنين اللي تسوينه هذا خرابيط كل شغلك وتعبك يروح تكاليف بدال ماتقعدين نفس ما انتي ابدي صنعي برا الاسعار ارخص بكثير و تصيرين تطلعين الطلبات بوقت قياسي جودة افضل وخدمة أفضل والحمدالله انه جا ونصحني لاني قبلها ما كنت استشير احد بالبزنس مسويه نفسي خريجة هارفارد للاعمال 😂
ابد جمعت المبلغ خلال فترة كورونا من شهر ٢-٦ وطلبت من الصين وكان فرق السعر مو طبيعي وعلى بال ما دورت مصانع و انلعب علي وارسلو لي مقاسات صينية وصغيييرة القماش حلو بس الطباعة مغبشة وانا دافعة فوق ال ٤٠ الف بس وش اسوي اول تجربة وماعندي اي فكرة كيف اختبر جودة المصنع ومشاكل الشحن
وصلت الشحنة للجمارك وطلع فيه شي اسمه سابر لازم نطلعه للمنتجات وانا كنت طالبة كمية تعتبر كبيره حول ٨٠٠ تيشيرت وكمية قروشة وتوقعت ان بينتهي المشروع لاني ماقدرت اطلع المنتجات 😂 وادور واسال واخر شي اوقع تعهد ان اي شحنة جايه بسوي سابر والحمدالله طلعت مو نهاية العالم
سويت اول جلسة تصوير وكانت سيئة فعلاً مافي شي مرتب وجاهز محد يدري وش السالفة وش نصور انا شخصياً ما ادري وش السالفة وامسك لست الاغلاط الي سويتها بهالفوتوشوت واوعد نفسي ماعاد اسويها، المبيعات كانت عاديه والتسويق كان معتمد على المشاهير الصغار والهدايا لين قررت قرار ليتني ماقررته
قلت بعلن عند واحد مشهور ودفعت له ١٥ الف ( كانت كل شي موجود بحسابي) اخترته على اساس كل الي يتابعونه بنات و شباب واعمارهم نفس اعمار عملائي المهم سوا الاعلان وجتني ٣ طلبات منه 😂 بدون اعلان يجيني اكثر حرفياً خسرت المبلغ وبموت من القهر الى اليوم ومحد يرد علي عشان ارجعه وكل تعبي راح
المهم ماخليت شي يوقفني واعتمدت على فكرة اسوي خصومات واحاول اخلص الستوك الي عندي وكنت اجهز كل الطلبات من صالة بيتنا واهلي شوي ويطردوني واذا صار عندي زحمة ولا ضغط اجمع صديقاتي يجون يساعدوني والحمدلله ماقصرو معاي، درجاتي نزلت بالجامعة للاسف و صرت ما اقدر اعطيها وقتي وحتى شغفي
بديت اجهز للشتا واطلب طلبية ثانية بعد ما كمل المشروع سنة الحمدالله وكان مجموع مبيعاتي ما تعدى ال ٢٠٠ الف، كان تحدي كبير اني بطلب للمره الثانية وماعندي ميزانية الا دخلي من كولكشن الصيف و ابداً مافيه ميزانية للماركتنق غير جلسة التصوير، دفعت كل شي عندي لكولكشن الشتا وتوكلت على الله
طبعاً لاحظو كل شي ادفعه بالمشروع اكون طلعته من قبل، ما زدت ولا ريال من جيبي على ال ٣ الاف اللي حطيتها، طبعاً مشاكل الصين ماتخلص وللاسف ما وصل الكولكشن الا على نهاية شهر ١٢ و انا عندي كمية هوديز مفروض تتقسم على ٥ شهور والشتا كله شهرين😂 رعب رعب كنت احس خلاص هذي النهاية
سويت جلسة التصوير والحمدالله يارب توفقت فيها ركزت على الابداع واني اسوي شي جديد طوّرت التسويق عندي صرت اوزع هدايا على عملائي اكثر من المشاهير ولاحظت الفرق بهالشي على المبيعات! خلاص كل شي كامل باقي بس اركز على البيع وهنا قررت اوزع على المحلات لان الوقت محدود وعندي كمية كبيرة
وزعت على المحلات بعضها توفقت فيها وبعضها للاسف رجعت لي المنتجات نفس ماهي.. نهاية سنة ٢٠٢٠ قفلنا ٤٦٠ الف مجموع مبيعات و ٥٠ الف من بداياتنا ب اوقست ٢٠١٩ ❤️ مين كان متخيل اني بجيب هالرقم اصلاً يوم ارسلت لي المحاسبة انصدمت من الرقم ( ما اشتغلت مع محاسبة الا نهاية السنة)
قبل ما اشتغل معها كنت احط كل الارقام من مخي كيف احدد الكميات الميزانية التسعير مجموع المبيعات كم اقدر اصرف كم عندي ماكان عندي اي فكرة عن هذي الاشياء كان كل شي على الله والحمدالله ماشي 😂 بدينا ٢٠٢١ وانا متأملة بقوة شغلي واحاول اني ما اخسر اكثر من ما اني احاول اربح 😂 Stay alive
عدى كولكشن الشتا و جا وقت كولكشن الصيف قلت بسوي شي جديد وتكلفت فيه بي للاسف ما مشت ولا قطعة من الكولكشن وماعندي وقت اني اشتغل على افكار جديدة سويت ريستوك للكولكشن القديم بالوان جديدة وقررت ان جلسة التصوير هي بتكون اكثر شي يجذب الناس والحمدالله نجحت وكانت جداً قوية ومُلهمة❤️❤️❤️
صار عندي ميزانية كويسة وقررن اوظف احد يساعدني بالطلبات لان لو ما وظفت احد برسب بكل موادي 😂 ما اعرف ايش يعني توظيف وايش يعني مؤهلات رحت شفت صديقاتي مين تبي تتوظف وخليتها تشتغل معاي وللاسف هذا اسوء قرار اتخذته لاني خسرت بالشغل وخسرت صديقتي لان لا انا اعرف ادير ولا هي بالمكان الصح
استأجرت مستودع وحركات ( المستودع غرفة ههه ) اشتغلت معاي ٣ شهور وخلال هذي الشهور حسبت اني بعت زين حسب كلامها ورحت طلبت زياده وانا لسى ما بعت الا ٤٠٪ من الكمية الي عندي وكلفتني الكمية الجديدة ٣٥ الف تقريباً توهقت بنفسي بس شفت اني قربت كثير اني اكمل النص مليون الثاني
كانت امنيتي اني اجيب هالرقم قبل ادخل ٢٠ سنة لكن دخلت ٢٠ وانا لسى ٨٠٠ 🥲 هنا حطيت ميزانيتي كلها باعلانات مشاهير قويه ترجع لي شوي ميزانية المبالغ الي خسرتها ( رواتب واخر شي صديقتي استقالت، مستودع وانا ماقدر اتحمل تكاليفه، كميات جديدة وانا ما احتاجها ) هذي كلها اكثر من٥٠ الف طارت💔
اذكر حرفياً كلمت رغد دايز وقالت بيكلف الاعلان رقم معيّن وبعدين مع الضريبة صار فرقه عن الي بحسابي ١٢٠٠ قلت لها اني وقفت الرواتب عشان ادفع للاعلان ووعدتها اني بكمل باقي المبلغ بعد الاعلان والحمدالله تعاونت معي ودعمتني صدق ربي سخرها لي 🙏🏼 كان اعلانها قوي وعوض جزء ممتاز من خسارتي
وصل الدخل مليون ريال الحمددالله لكن زي ما انتو شايفين من حفرة لدحديرة كل ما تضبط من هنا تخرب من هنا قررت اشارك براند ثاني بكولكشن عشان اخفف التكاليف واسوي طلب مسبق عشان تكفي معاي ميزانية الشتا، اشتغلنا شغل ممتاز بس قبل نبدا تصنيع فجاه قررت قرار وماكنت ابي اتراجع عنه، ايش تتوقعون؟
قررت ابيع البراند، وصراحة لحد يسألني ليش وكيف فيه اسباب كثيرة، اول شي احس عندي ابداع اكثر بكثير من براند ستريت وير والفئة المستهدفة كانت ناس تحب الستريت وير ما اقدر اغير جوّهم بالملابس ولا اقدر اخرب على نفسي العملاء اللي بنيتهم وتعبت كثير عشان اوصل لهم! بس عندي اشياء اكبر اقدمها
واسباب ثانية احس كان فيه اغلاط كثيرة انا ك شخص ماعنده سيولة ماديه ما لقدر اجلس اعوضها، احتاج ابدا من جديد بداية رابعة اخذ منها كلل الاغلاط اللي تعلمتها و ابدا بدايه صح ! لكن ما يعني ان شغلي كان سيء او البراند فشل بالعكس انا عطيت كل شي اقدر اعطيه والحين يحتاج يتطور ويكبر
انا ك شخص ما عنده خبرة كافيه بالبزنس ولا سيولة مالية كنت اعرف اني يا بقعد اخسر واغلط والبراند يقعد نفس ماهو او اسلمه لشخص فعلاً يقدر يطوره ويكبره ويخليه بكل مكان ! كان اصعب قرار اتخذته بحياتي واصلاً فكرة اني القى شخص انا وهو عندنا نفس الهدف للبراند كانت شبة مستحيلة!
جوني ناس غريبة الي يبي يشتري المشروع ب خمسين الف واللي يبي يغير فكرته تماماً والي مب عاجبه الشغل ويطقطق😂 لكن سبحان الله ربي سخر لي وتواصل معاي شخص من شركة استثمارية تفاوضنا لمدة شهرين ووصلنا لصفقة مناسبة للطرفين وكانت بداية جديدة و صفحة جديدة وقرار صغيرة عليه بس قوّيت نفسي
الحمدالله كان قرار صحي واحلى شي ان كان جزء من عقد البيع اني اشتغل في بناء فريق العمل و سويت interviews حقيقية مع ناس فعلاً مؤهلين! تخيلو انا توني دخلت العشرين واسوي مقابلات واحجر 😂 هنا عشت افضل تجربة تعلمت كيف اطور مهاراتي ك مدير و ك بناء فريق وغلطت بالادارة برضو 😂 "للحين اغلط"
انتهت قصة هذا المشروع اتمنى استفدتو لو بشي بسيط والجاي اوعدكم انه اقوى وبتشوفون شغل ماقد صار❤️❤️❤️❤️❤️
جاري تحميل الاقتراحات...