ثريد طويل شويه بس مهم عن تكليف الاطباء بالنظام القديم ما قبل نظام الزماله ,, التكليف دا خاص بدفعه ديسمبر ٢٠٢٠ تكليف مارس ٢٠٢٢
١- البدايه بتكون بنزول اعلان التكليف و دا اللي بيحدد مسار المرحله , بشكل الاعلان الحالي اللي نزل بنسبه فوق ال٩٠٪ التكليف هيكون بالنظام القديم و دا هيبان و هيتأكد من خلال نزول شروط الحركه علي موقع التكليف خلال ايام
٢- مرحله تسجيل البيانات لاي حد خلص امتيازه من دفعه ديسمبر ٢٠٢٠ و اللي اسمهم حاليا تكليف مارس ٢٠٢٢ و تسجيل البيانات مرحله ضروريه للخطوات الجايه , شرح التسجيل ف اللينك ده youtu.be
٣- مرحله تسجيل الرغبات و دي اهم مرحله حقيقي , وقتها بتدخل تختار انت عايز تتكلف ايه ( نائي و لا مركزي ) مهم جدا انت خلال الايام دي تكون فاهم و محدد انت عايز ايه بالظبط و انهي مسار فيهم ينطبق علي شخصيتك و ظروفك الاجتماعيه
٤- التكليف النائي بيكون في المحافظات الحدوديه و بعض الاماكن التانيه زي غرب النوباريه في البحيره و القنطره شرق في الاسماعيليه و يوسف الصديق في الفيوم ( هتلاقوا اسماء المناطق النائيه في اعلان التكليف )
٥- ميزه التكليف النائي هي حاجه مهمه جدا ع الاطلاق- حركه نيابات استثنائيه فيها كل التخصصات خاصه بالمكلفين علي النائي فقط- يعني مبيقدمش عليها غير اللي اتكلف نائي بس دول عددهم بيكون ٢٥٠٠ طبيب مقارنه بعدد التخصصات اللي بتنزل و بتكون كتيره جدا بكده فرصه انك تلحق تخصص انت عايزه كبيره
٦- ميزه النائي انك بتشتغل كحد اقصي ١٥ يوم و ١٥ يوم راحه و في اماكن بيشتغلوا اسبوع او ١٠ ايام بس ف الشهر , كمان مرتب النائي الحدودي ممكن يبقي من ٤٠٠٠ ل ٥٠٠٠ جنيه عكس التكليف المركزي من ٣٠٠٠ ل ٣٧٠٠ و بالتالي فلوس اكتر و شغل اقل مقابل ان النائي بعيد و خدماته المعيشيه اقل
٧- النائي فيه منه قسمين ( نائي حدودي يعني محافظات حدوديه : مطروح سيناء اسوان و هكذا و دول حضورهم اقل و فلوسهم اكتر ) و (نائي اداري ) زي سوهاج و قنا و السويس و دول حضورهم اكتر و فلوسهم اقل لكن النائي كله له نفس ميزه حركه النيابات الاستثنائيه , الاختلاف ف الفلوس و الحضور فقط
٨- النائي الاداري زي قنا و سوهاج و السويس دول فلوسهم زي فلوس المركزي يعني من ٣٠٠٠-٤٠٠٠ و شغلهم كتير اوي و مفهمش تقسيم ايام بسهوله , بخصوص الاقصر مفروض انها تامين صحي شامل فلو نزلت ف الحركه هتبقي اختيار كويس عشان فلوسها في رينج ٨-١٠ الاف و دا مبلغ حلو جدا للتكليف
٩- افضل اماكن النائي خصوصا للبنات زي جنوب سيناء و مطروح و قنطره شرق و بعض اماكن البحر الاحمر و اسوان , طبعا لو انت من سوهاج او من قنا او اسوان او اي محافظه نائيه الافضل ليك تسجل محافظتك و هتتعامل كأنك نائي طبعا , فمتبقاش من محافظه نائيه و تروح تقدم ع محافظه نائيه تانيه !😑
١٠- لما بتروح نائي و تقدم علي حركه نيابات منفصله راجع رقم ٥ , التقديم بيكون بعد مرور ست شهور من بدايه التكليف النائي و بتستلم التخصص اول ما تكمل سنه كامله , بتسيب النائي و تستلم تخصصك
١١- بافتراض انك رحت نائي خلاص و جاتلك نيابه بعد ست شهور , وقتها بتقدر تاخد ترشيح وزاري استثنائي تقدم بيه ماستر او دبلومه ف الجامعه اللي فاتحه و دي ميزه مهمه جداااااااااا للنائي لانها مش موجوده لزميلك المركزي
١٢-و بكده انت اتخصصت و سجلت دراسات عليا و انت احيانا لسه مخلصتش سنه التكليف النائيه , و ده بيخليك تنجز وقت جدا عن اصحابك , عيب النائي هو عدم التزام الوزاره بمواعيد الحركات الخاصه بالنيابه و بالتالي ممكن حاجات كتيره تتعطل بالسبب ده
١٣- لو انت قررت تستلم تكليف مركزي مش نائي بقي ، زي قاهره جيزه طنطا ، مرتبك ف حدود ٣٠٠٠-٣٧٠٠ حضورك كتير حوالي ٤ ايام اسبوعيا غير النبطشيات , ريت شغل عالي , و تفتيش عليك كتير طبعا و بالتالي وجع دماغ اكتر
١٤- ميزه التكليف المركزي انك جنب بيتك عايش ف منطقه حيويه فيها كل الخدمات مش زي باقي النائي , مناسب للبنات مش حمل شحططه و سفر خصوصا لو حامل او متزوجه او عندها اي ظروف تمنعها من السفر
١٥- التكليف المركزي له حركتين نيابات ( حركه نيابات ملحه يعني تخصصات فيها عجز زي تخدير طوارئ الخ , دي بتنزل بعد ست شهور من بدايه التكليف و لما بتظهر النتيجه بتخلي من التكليف و تستلم التخصص فورا , يعني مش لازم تكمل سنه تكليف و بكده باي باي تكليف للابد
١٦- الحركه التانيه (حركه اساسيه يعني فيها كل التخصصات زي الرمد كارديو نساء و كمان فيها تخصصات ملحه ) دي بتنزل بعد سنه من بدايه التكليف المركزي و بعد ما تجيلك النتيجه بتخلي من التكليف و تستلم نيابتك و باي باي تكليف للابد
١٧- التكليف المركزي ملوش ترشيح وزاري استثنائي زي النائي , انما ليك ترشيح وزاري عادي بتقدم عليه في شهر ابريل او مايو و بيديك ٣ جامعات بس تقدم فيهم ماستر او دبلومه خلال سنه
١٨- زميلك اللي ف النائي ملوش عدد محد من الجامعات عشان يقدم فيها , و بالتالي فرصته انه يلحق يسجل دراسات عليا ف اي جامعه بتكون اكبر من التكليف المركزي
١٩ - تسجيل الرغبات بيكون ١٥ يوم و النتيجه بعدها باسبوعين لتلاته , بعدها النتيجه بتروح للمديريات و تبتدي تستلم تكليفك و ده وقته هشرحه بالتفصيل , اللي مقدمين تكليف جيش او شرطه بيستلم الاول ف الصحه بعدين بيخلي منها و يروح يستلم ف الجيش او الشرطه و بيعامل معامله التكليف المركزي
٢٠- مهله استلام التكليف بيكون ٣ شهور من بعد ظهور النتيجه , تقدر تعدل تكليفك بعد سنه عمل فعلي ف التكليف سواء كنت تكليف مركزي او نائي بتعدل تكليفك اما علي عنوان سكنك او علي عنوان النيابه بتاعتك , فلو انت من المنيا و تكليفك ف مطروح و نيابتك القاهره تقدر تعدل تكليفك للمنيا او قاهرهل
٢١- لو انت ليك نيابه جامعه خد تكليف مركزي، لو ليك تكليف جيش او شرطه خد تكليف مركزي , كل اللي فات ده حاولت اختصره لان تويتر بيحدد عدد التويتات ف الثريد ، هحاول اعمل روم ع تويتر و نتكلم فيها كلنا عن كل حاجه ,بالتوفيق
جاري تحميل الاقتراحات...