رتبها

بتمر سنه وما خلص ليش؟ خلوني اعطيكم تجربتي مع بعض المقاولين وكيف تلاعبهم في هذا المجال

في البداية بعد تعب البحث عن موقع يناسب المشروع لمدة لا تقل عن سنه اخيرا لقيت المكان اللي شفت مستقبل المشروع فيه ان شاء الله.
وهنا كانت بداية الغربلة للبحث عن المقاولين الاقل استغلالًا وبيع الكلام.

بتلاقي عروض اسعار مختلفه وناس بيحطون لك الشمس بيد والقمر بيد ويحسسونك ان المشروع سهل جدا وبيخلص خلال شهر وهنا اول كذبه موحده بينهم الا من رحم ربي.
لذلك حط بعين الاعتبار ان المده اللي بيخلص لك فيها المشروع هي نفسها بس اضربها في عشره

لقيت المؤسسة المناسبة والشخص اللي توقعت انه مناسب وبدينا في بناء المشروع في رمضان وكان الاتفاق ان اوقات العمل في رمضان هي نصف اوقات العمل في غير رمضان. وشكل المقاول عنده مشاكل حسابيه وكان اوقات العمل لا تزيد عن ثلاث ساعات باليوم!

وكان يتعذر لي بحكم ان زحمة الشوارع في رمضان. وهنا طحت انا في اول غلط اللي هو اني ما حاسبته على التأخير وارسل الانذار له.
بحكم اني جاهل في هذا الشيء وقتها، بدا في استغلالي من ناحية تقديم اعذار كل مره يتاخر فيها لدرجة انه مضى على المشروع شهرين ونسبه الانجاز كانت اقل من ٢٠٪ !

*معلومة* : ذكر في العقد ان المشروع سينتهي خلال ٦٠يوم🥲

وبعدها بفتره بدا يطالب بمبالغ عن طريق الاتصال ويقول ان المشروع متعثر بسبب عدم تسديد المبالغ، مع العلم مسدد لهم ٤٥٪ من قيمة العقد.
كنت متحمس ان المشروع يخلص وافتك ودفعت الدفعة اللي طلبها مني ووصل اجمالي عدد الدفعات ٤ وهو ما انجز الا ٢٠٪ تقريبا!

بدينا نستغرب من الموضوع وانه كيف يتلكع، وبدات فقرة المواجهة والنقاش اللي كان اشبه بهواش وتهديد من طرف المؤسسة بانهم يقولون ترا راح نرفع الاسعار عليكم 😂
وكان شريكي في المشروع من الدم الحار وانفجر عليه وقال له بنبرة تهكم " يمه لا خلاص خفنا بنقفل المشروع يوه يوه لا خلاص قفلنا"😂

وبعدها طلعت من عندهم وانا ساكت واتصلت على صديق الطفولة المحامي محمد المقحم وقلت له عن اللي صار وايش الاجراءات المناسبة اتجاهه.
حاولنا حل الامور بطريقة ودية وحاولنا ايضا الاجتماع معهم بوجود محامي عشان نخلص ونفتك ولكن كانوا خايفين بشكل غريب وقلنا بعدها مالنا الا القضاء

بدينا بالاجراءات ورفعنا القضية وجانا امر بعدم لمس المكان او تغيير مسمار واحد فيه. وبعدها طلبت المحكمة بحضور خبير هندسي عن طريق المحكمة وكانت اتعاب الخبير فوق ٢٠الف.
حضر الخبير الهندسي المشروع واخذ اقوال الطرفين وبعدها طلبوا مننا جميع نطلع من المكان عشان يبداون في التحقيق.

بعد ثلاث ايام طلعت تقارير الخبير الهندسي وهنا الصدمة المتوقعه.
نسبة انجاز المشروع تكاد تكون ٣٠٪ والمبالغ اللي دفعت ٨٠٪ من قيمة القعد.
فوق هذا كله كان فيه اخطاء في التنفيذ اللي تتطلب اعاده بناء بعضها وتصحيحها.
يعني المقاول تقدر تقول عنه بجيح او شيء

بعدها بدينا بتكبد خسائر الايجار وتكاليف المحامي وقيمة الخبير الهندسي وتصحيح الاخطاء والبحث عن مقاول اخر.
دفعنا اكثر من مليون ريال على مشروع اجمالي رأس ماله ٥٠٠الف.
لعل في الامر خيره، كل تاخيرة وفيها خيرة.

لكل شخص يريد بناء مشروع أو تأسيس مقهى او مطعم انتبه للأمور التالية:
١- اغلب المقاولين نفس الطينة لذلك لازم تتعامل معهم بحذر
٢-لا تعتمد أبدا على المدة المذكورة في العقد لإنجاز المشروع لانه غالبا راح يكون ضعف المدة أو أكثر
٣-حاسبهم بالساعة اللي يتأخرون فيها وارسل إيميل بشكل فوري

٤-اطلب مستخلصات للدفعات هذي اهم من حياتك ولا تحول مبلغ الا وهو مرسلها
٥-راجع العقد محامي لان مهما قريته من مره بتفوتك اشياء والمحامي هو اللي بيلطقها لك.
٦-لا تاخذ بكلام المقاول وسلك له وسو الي انت تبيه لانه ٨٠٪ دلخ وما يفهم

وللاسف هالشيء منتشر بين المقاولين وما صارت لنا بس.
المقاولات عالم خطير ولازم تكون منتبه