رتبها

بمناسبة ذكرى العندليب الموجي أما جه يلحن رسالة من تحت الماء -حسب روايته- كلم نزار وقاله القصيدة صعب تتلحن علشان الأبيات آخرها ساكن; أعمقْ أزرقْ أغرقْ …. فلازم تقطم اللحن مع كل قفلة بيت فطمعانين يعني تشكلها علشان تدينا براح، نزار اداله واحدة طب ما خلاص متلحناش سهلة أهي

بعيدا عن الهزار بس دا فعلا كان مضمون الحوار بينهم، ونزار قال ساعتها دي مش قصيدة تتغنى أصلا ومش كاتبها علشان تتغنى ومش هزقدر أغير القفلات فيها، فالظاهر الموجي حلف يمين بعظيم هيلحنها يعني هيلحنها وطلع بالملحمة اللي خلت عبد الوهاب يقول اللي عمله الموجي نقطة تحول في تلحين القصائد

الأغنية فيها ٢ صولو كمانجا دوا وشفا
أستاذ محمد مصطفى في المقدمة الأولى لأول مرة ع الكمان الكهربائي مكانش حد عملها قبل الموجي في الأغاني الشرقي
وأستاذ الحفناوي في آخر كوبليه

الأغنية مقامها الأساسي عجم والمقدمة عجم بس في النص هيدخل صبا كتمهيد يعني إنه هيستخدم المقام في الأغنية بس حطها في الخباثة كده ما بين عجم قبلها وبعدها زي السكينة في الحلاوة
الحتة الصبا هي حتة الكمانجات اللي قبل دخلة الإيقاع ومن أول الإيقاع بيرجع عجم

طب حتة إن الأبيات آخرها ساكن عمل فيها إيه؟
عمل حاجتين والحاجتين عكس بعض والحاجتين كانوا عظمة
١- إن كنت حبيبي ساعدني كي أرحل عنكْ
أو كنت طبيبي ساعدني كي أشفى منكْ
خلى الكمانجات تبدأ معاه وتكمل كأنها هي اللي بتكمل الكلام فمحستش إنت بالسكون دا خالص وحسيت إن الكمانجا جزء من الكلام

٢- وقام عاكس الكلام دا كله وراها ع طول وخلى الإيقاع والمزيكا يقطموا مع قطمة السكون
المرتين أنا كمستمع لا حسيت إن السكون دا مشكلة ولا إن في حاجة غلط ولا صعوبة كلها ماشية زي المياه سهلة يا نزار

المعروف عندنا معشر الهواة والسميعة (المحترفين مش معانا طبعا) إن الصبا مقام نغمه حزين المطرب وشه وصوته بيقلب فيه حزايني، فلما تلاقي مقام الصبا بيرقصك إعرف إن الملحن متمكن، زي فريد الأطرش في زينة زينة دي مقام صبا بس مزيكا بترقص
فالموجي قالك آدي الصبا وآدي الإيقاع المقسوم اتفضل سقف

طب الموجي هيسيبه يغني الكوبليه عادي كده؟ ميبقاش الموجي
الكوبليه أساسي عبد الحليم هيستمله صبا والمقام مناسب جدا للكلام علشان كله حزن واشتقت إليك فعلمني ألا أشتاق … وهتلاحظ بيلحم قدر المستطاع قفلة البيت في البيت اللي وراه علشان يغطي ع حتة السكون
"عند يا من صورت لي الدنيا"يعمل إيه؟

يطلع بالحتة دي ع مقام الحجاز وياخده بالبلدي كده من درجة عالية كإنه بينادي عليه بس كده هيتزنق هيقفلها إزاي؟
ييجي عند حتة فأنا مفتون من رأسي حتي قدمي يخلي عبد الحليم يغنيها حجاز في كل المرات زي ما احنا وآخر مرة يغنيها صبا تاني (هتلاحظها) علشان تبقى قريبة لدرجة العجم اللي ف "لو أني"

معلش أنا قطعت الفيديو اللي فات علشان الحتت دي كلها تتلم في فيديو واحد
المهم يتبقى كوبليه أخير الموجي قرر يستعرض فيه عضلاته فوق ما استعرضها

يغير المقام للكرد
أو للدقة هيستخدم في الكوبليه دا من أول المزيكا الكرد وفرعين من فروعه يعني عندك كإنهم ٣ مقامات كرد، كرد وأثر كرد وطرزنوين
يبدأ بجملة موسيقية ويكررها بكذا آلة، وعبدالوهاب علق ع الحتة دي وقال الموجي أبدع إنه بجملة واحدة ملعوبة من كذا آلة حسسك إنهم كذا جملة

يقعد الموجي يشقلبنا في الكرد لحد إني أغرق يقوم مرجعنا تاني لدرجة العجم ويقوم من حيث لا نحتسب طالع نهاوند في يا كل الحاضر والماضي يا عمر العمر …. كل الشقلبظات دي حصلت في أقل من دقيقة ونص
خلي بالك دي القصيدة اللي نزار قال متتلحنش واخدلي بالك

نيجي للقفلة والقفلة هتبقى عجم زي ما بدأنا سيبك من المقام مش موضوعنا
هي مشكلة القصيدة كانت إيه السكون صح؟
طيب شوف آخر "عوم" الموجي هيخلي العندليب يعمل فيها إيه جاب السلم كله فيها
كان ناقص يقوله و آدي السكون بتاعك يانزار أهو