رتبها

#ثريد سيأخذك للجنون 🫣🫡🫣
أين جيش كوريا الشمالية؟ ..... الشعب الكوري فاهم انهم متواجدين في جزر يابانية و ولايات أمريكية احتلوها بعد الانتصارات
لو مشغول فضلها وإرجع لها بعدين

أي حد يقولك أي معلومة عن كوريا الشمالية .. اسأله هل ذهبت اليها ؟
لو قالك اه اسمع منه .. لو قالك لا قوله يبقا خليك في حالك الله يصلح حالك 🫣🫣

كوريا الشمالية برغم من كل اللي هي فيه الا انها مش من ضمن الدول الخمسة الممنوع السفر لها ... ايه السبب ماتفهمش بقا .... لكن ملهاش سفارات أساسا إلا في كام حتة فقط 👇

في الأول لازم تعرفوا أنا ايه اللي وداني هناك ؟..
سبق وكلمتكوا قبل كده عن اقتصاد الـ Back doors ، فاحنا كنا رايحين بناءا على طلب الحكومة الكورية لهذا السبب

أولا : مدخل كوريا الشمالية هو سفارتها في بكين
بس استنى انت مش بتروح على السفارة كده وتقوله اديني تأشيرة دخول
انت بتتواصل مع مكتب بيوصلك بمكتب تاني تروح تسلمهم نسخة من كل أوراقك و يصورك صورة بكاميراته هو
وبعد 72 ساعة يحددلك ميعاد في السفارة ..

بتقابل فيه كائنات زوحلفية الـ IQ بتاعها عالي جدا
هيستجوبوك كأنك في أمن الدولة
والمحقق لازم يتأكد ان حضرتك مش صحفي ولا سياسي ولا ناشط اجتماعي ولا اتسجنت قبل كده في بلدك 👇

وبما إن انا باسبوري كان متسجل فيه دخول أمريكا 4 مرات .. فتم استجوابي 3 ساعات ، وقعدت علي جهاز كشف الكذب !!
أيوه زي ما قريتها كده حضرتك ،، جهاز كشف الكذب
وكل ده و الزيارة كانت بناءا على طلب الحكومة بتاعتهم أصلا ، مش انا اللي لقحت جتتي عليهم وقلتلهم والنبي نفسي أزور بلدكم

ولما ربنا يكرمك ويتوافق على دخولك ، بيحددلك ميعاد سفرك، وهو اللي بيحجزلك الفندق
لأن هو أصلا فندق واحد مرمي علي حدود العاصمة «بيونج يانج» اسمه فندق اقامة الأجانب ، واسمه «يانج جاك دو» وهو مبنى مكون من 48 طابق وبيسموه « نُـزُل » مش أوتيل ، عشان ممنوع هناك استعمال تعبيرات أو

كلمات مستوردة من الحضارة الغربية
قبل السفر بيوم بتروح مكتب تاااالت غير الأولاني والتاني .بيعرفك علي اسم المراقب اللي هيلازمك طول مدة اقامتك وصورته عشان هيستناك في المطار
ويعرفك المصيبة اللي انت داخل عليها
هيصادر منك أي كتب أو مجلات أو جرايد أو كاميرات .. او أي كتاب مقدس

يعني مثلا اتاخد مني المصحف والسبحتين وسلسلة ومفتاح ... في كوريا الشمالية لا يوجد دين أو إله ... الإله هو الزعيم شمس الشموس الرفيق «كيم سونج إيل» ، و ده اللي هما فاهمينه وبيعتقدوه ، هو بالنسبة لهم مش مجرد رئيس أو حتى زعيم تاريخي ، دا إله بيعبدوه وطاعته واجبة

ممنوع منعا باتا ممارسة أي شعائر دينية من صلاة أو أي نوع من العبادات الخاصة بأي دين ، لأن «كيم سونج » الكبير جد الكلبوظة بتاعهم ومؤسسس الدولة ، أول حاجة عملها لما مسك الحكم هو انه أعلن إلغاء وجود الإله ، وأطلق شعار God has gone away

يعني انا كنت بصلي جوا الدولاب بتاع الهدوم وأقفل عليا من خوفي ، لأنهم مضوني على إقرار اني في حالة ممارستي لأي شعائر دينية واتمسكت هعرض نفسي للسجن
بتوصل المطار بتفضل واقف مكان ما نزلت من الطيارة بتستنى المراقب بتاعك ييجي يستلمك ويوصلك للفندق المحدد لاستقبال الأجانب على حدود الجزيرة

بتطلع الغرفة المحددة وبيركب معاك المصعد ، والحاجة الغريبة اللي لاحظتها ان الأدوار من 7 إلى 15 ممنوع انه حد غريب يدخلهم، ومحدش يعرف مين عايش فيهم
البلد دي بتصحى الصبح على صوت منبه عام زي البوق بتاع صفارات الانذار كده بيرن في الدولة كلها الساعة 5 الصبح ..

الناس بتنزل شغلها 7 الصبح وتمشي 5 ونص بالليل ... يروحوا ياكلوا ويلعبوا شوية رياضة، و الساعة 7 بالليل الكهربا بتتفصل في الشوارع فبسرعة الناس بتفصلها في البيوت وتنام ، يعني النور بيطفي في الدولة كلها، والشباك اللي يبقا منور بعد الساعة 7 بيتقبض على أهل البيت كلهم
هل الناس دي سعيدة ؟

الغريب وبالرغم من كل ده الشعب سعيد جدا وعندهم يقين انهم أرقى شعب فالعالم وشايفين نفسهم متميزين، لأنهم معيشينهم في كوكب موازي
عندهم حاجة اسمها البروباجندا بيتصرف عليها 40% من الموازنة و الـ 52% تسليح ، والباقي من الموازنة اللي هما 8% فقط دول بيتصرفوا على الشعب ومع ذلك راضي وسعيد

البروباجندا دي منقسمة لكذا حاجة
★ تماثيل «كيم سونج » و «كيم إيل» اللي هما أبو وجد الزعيم الحالي
محاوطاك في كل مكان ، والضريح والحرم بتاعهم مقدس ، وزيارتهم فرض عين على كل زائر أو سائح لكوريا .... يعني هتروح هتروح ، مش بمزاجك هي ..

ولما تروح الضريح فمن واجبات وآداب الزيارة شوية حاجات كده لازم تعرفهم .. زي مثلا انه ممنوع ارتداء قبعات الرأس أو أي غطاء .. ممنوع ارتداء نضارات الشمس .. ممنوع وضع ايديك في جيبك ، وما ينفعش تشاور على تماثيل أو صور الزعما بصوابعك ..لازم بايديك الاتنين...

ولازم وانت بتبصلهم تنحني نصف انحناءة ، وإلا تعرض نفسك لعقوبة 15 سنة سجن
وممنوع أي حد يعلق في بيته أي صورة غير صور الزعيم وأبوه وجده ، واللي يظبطوه معلق صورة أي حد تاني بيتم إقتياد رب الأسرة للسجن فورا
هتفولي وهما هيعرفوا منين ..

نسيت أقولك انه فيه عندهم حاجة اسمها اللجنة ودي بتكون ضابط وشوية عساكر ، وانت في أي وقت ممكن تلاقيهم بيخبطوا عليك أو حتى يكسروا عليك باب ج الجيش والمنتخب ؟ ..... الشعب الكوري فاهم انهم متواجدين في جزر أمريكية احتلوها بعد الانتصارات

طاب ازاي الناس دي مش عارفة انهم عايشين في أوهام وأكاذيب ؟
الجواب ، لأنهم عازلينهم وفاصلينهم تماما عن العالم ..مفيش انترنت .. مفيش جرايد الجريدتين القوميتين بيتطبعوا كل يوم ويتحطوا في لوحات زجاجية في الشوارع ، وانت من حقك تقراهم بس مش من حقك تشتريهم ... مفيش إعلام ، هما قناتين بس

قناة بتذيع اخبار الزعيم من 7 لـ 7 وبعد كده تقفل ، وقناة تانية بتذيع تقارير عن الانتصارات اللي بيحققها الجيش الكوري و عظمته في حماية الكوكب من الأوبئة والفيروسات والإشعاعات اللي بيعيش فيها العالم والزعيم العظيم بيحمي شعبه منها ...

والناس هناك ممنوعين من تعلم اللغات، يعني بيتكلم اللغة الكورية وبيتعلموا اللغة الشعبية قبل الانفصال عن الجنوبية عشان دي قوميتهم
اللي بيتكلم لغات هما الاطباء ، ودول برضو ظباط في الجيش ، يعني الطب هناك عسكري
والعسكريين بيتعلموا لغات عشان تكنولوجيا تطوير السلاح

والمراجع والمراقبين اللي بيستقبلوا الوافدين و دول أفراد عسكريين برضو
المكتبة الوحيدة اللي عندهم كل الكتب اللي فيها ألفها كيم إيل سونج وابنه اللي هما جد و ابو الزعيم الحالي، وطبعا كلها عبارة عن وجهة نظرهم في الحياة ونظرية الذوتشهه والسونكون

وطبعا مترجمينهم للانجليزي والفرنسي
وأي زائر لازم غصب عن عين أمه يتاخد للمكتبة دي ويتصفح الكتب دي وأضافوا اليها الكتب اللي بيكتبها الريس كمان
ما هو اكتشف فجأة انه أديب ومفكر وشاعر كمان
مفيش عندهم كُتّاب ولا مفكرين ولا مثقفين عشان الزعيم وأجداده بيفكروا بدل منهم ومش عاوزين يتعبوهم

دا غير انهم لو فتشوا بيتك ولقيوا كتاب مثلا أو مجلة، كل العيلة هيتم اعتقالها واعتقال اللي وصلها الممنوعات دي
وأساسا لو حبوا يتثقفوا هيتثقفوا منين وهيطلعوا مفكرين ومثقفين إزاي ، ماهو مفيش لا نت ولا إعلام ولا كتب
و فيه هناك حائط عليه اسم الدول اللي اعتنقت الشيوعية لفترة واللي

زارها المؤسس كيم سونج واللي اتبعت لها كتب الذوتشهه والسونكون ومنها لبنان والسودان والاردن، ومعرفش مين في السودان ممكن يقرا النظريات دي اصلا
على فكرة ، انت كزائر ممنوع انك تتكلم مع حد من الشعب .. المراقب هيبلغ عنك ويسلمك بتهمة التجسس ـ وأصلا الشعب هناك مش ممكن يقرب يتكلم

معاك كشخص غريب، لأنه خايف منك عشان انت اكيد مشبع بالاشعاعات النووية الخارجية بتاعة الحروب اللي دايرة برا وهتضرهم
وممنوع منعا باتا ان أي حد من الشعب ده كله بيخرج بره كوريا لأي سبب ، وأي محاولة للخروج هي محاولة هروب تستوجب الاعدام ، وأصلا صعب جدا انك تلاقي حد هناك عايز يخرج

بره البلد ، ما هما مفهمينهم ان العالم كله خارج كوريا عايش في حروب ومتدمر وكله اشعاعات نووية
الشعب ده منفصل عن العالم ومغيب تماما
لكنه رغم كل ده شايف نفسه جنس آخر متميز و أرقى
يعني انت كشخص غير كوري غير مسموح لك انك تنال شرف التعامل بالعملة المحلية اللي عليها صورة

شمس الشموس انما انت بيعتبروك كائن درجة تالتة حقير تتعامل بالعملات الحقيرة زي اليورو والدولار وأصلا البيع والشرا مع الحكومة
العياط والشحتفة اللي بتشوفوها في التليفزيون دي حقيقية .. الراجل ده بالنسبة لهم إله عظيم وبيحميهم
الفقر في البلد دي فوق ما تتخيلوه .. الناس دي ماتعرفش طعم

اللحم البقري والضاني ، لأن اللحوم دي غالية ومحدش بياكلها غير ضباط الجيش وأهل الحكم ، انما الشعب بياكل قطط وكلاب وفيران
كل حاجة عندهم بيحددها لهم الزعيم ومساعديه
الملابس محددة .. تسريحات الشعر محددة ..حتى نغمات التليفون والأغاني لازم تكون موسيقى ونغمات حربية
مفيش تليفون دولي

. مفيش راديو بيذيع حاجة إلا اذاعة بيانات وخطب الزعيم الملهم ، مع فواصل من الاغاني الحماسية والانتصارات
والترفيه الوحيد اللي عندهم هو مهرجان سنوي للرقص و الهيلاهوب و ركوب الدراجات
عمرك شفت رئيس دولة محدش يعرف عياله أو عددهم أونوعهم ؟
حتى أخته اللي هي أشرس منه واللي بيجهزوها

للحكم لو مات فجأة ، حتى اخته دي ماتعرفش عدد اولاده ونوعهم
المترو هناك بدائي جدا ، هو محطتين بنركب من محطة وتنزل ستاير سودا على شبابيك المترو ويقف في محطات الأبواب مش بتفتح فيها وماقدرتش أعرف فيها إيه ، لأنه فيه محطات داخلية غير مسموح للأجانب بالنزول فيها..

المترو تحت الأرض بـ 100 متر ومحصن ضد الانفجارات النووية والصواريخ .... واللي عامل المترو ده السوفييت
لكن رغم كل ده الناس مقتنعة انهم أفضل شعب لأن عندهم اكل وشرب ومعندهمش اشعاعات ولا نووي
الشعب لأنه مؤمن بالانتصارات دي فبيضحي من اقتصاده للتسليح .... لدرجة ان طفل سألني

هو انت سويدي فلما سألته ليه قالتل عشان عينيك عسلي، قولتله لا أنا مصري .. هو وأبوه وأمه مايعرفوش ان مصر دولة مستقلة، هما يعرفوا ان افريقيا كلها تحت سيادة الزعيم الكوري الكبير
ويعرفوا السويد لأن دي الدولة الوحيدة اللي لها سفارة هناك عشان أخدو منهم 1000 عربية فولفو سنة 1972 ومادفعوش

فلوسهم لحد دلوقت
وهما اللي موجودين لحد الآن
طاب هما مصدر دخلهم إيه... يعنى الدولة بتنتج إيه أو بتكسب إيه عشان تشترى بيه أكل للشعب ؟
بيصنعوا حاجات محتاجها الصين وفيتنام وروسيا بيصنعوها عندهم أرخص وياخدوا مكانها احتياجات غذائية
يعني يصنعوا مثلا تليفزيونات و راديوهات للصين

يقفلوا عربيات لروسيا
أغذية معلبة وخمور لفيتنام و ماليزيا
دا غير انهم شعب زراعي أصلا وعندهم زراعات حبوب وفواكه ، والسبب اللي رحنا عشانه هو تسويق منتجات زراعية .. لكن ممنوع تكلم حد من مدرسة الزراعة، فيه ظابط مخابرات بياخد منهم الكلام ويترجملك

العرض العسكري اللي بنشوفوه ده حقيقي وكل ده نووي فعلا ، عشان كده امريكا أجبن من انها تزعلهم أو تمد ايديها عليها .. لأن الناس دي بتؤمن بنظرية السوكون يعني الشعب هو السيد العسكري على الكوكب وإلا فليذهب الكوكب للجحيم
اللي بياكل ويشرب ويتصل مع العالم هما حاشية الزعيم «كيم» فقط

الشعب ده مش هيثور ولا نفسه يخلص من «كيم» لأنه بيعبده وبيعبد أبوه و جده ، ومحدش يخلص من ربه ... عايشين سعدا جدا وحاسين بالتميز كمان
المنطقة الحدودية بين كوريا الشمالية والجنوبية عبارة عن منطقة أرضية مزروعة بالألغام ومكهربة كلها بكهرباء صعق عالي وترسانة حربية

محدش محاصر كوريا الشمالية.. هي اللي محاصرة العالم وتعتبر كابوس على كوريا الجنوبية واليابان
محدش يعرف تعداد الشعب ومحدش يعرف اسم زوجة الزعيم الحقيقي ولا أهلها ولا عدد أولاده
وهو اللي بيحدد لها تتنفس امتى مش تروح فين بقا

عندهم هناك خبراء في تحليل لغة الجسد ، ولغة جسدك ممكن تكون سبب للسجن ، لأن الكوريين بيعتبروا لغة الجسد عدائية ضد الزعيم وسخرية منه، فبيبلغوا عنك بنفسهم ويقبضوا عليك
وأنا لأني body talking فكنت دايما مربعة ايدي لأني عايزة أخرج منها ..

فيه عندهم شارع اسمه علماء المستقبل هو واهمهم ان الشارع ده عايش فيه العلماء والعباقرة والمهندسين التكنولوجيين الكوريين اللي مسيطرين على العالم كله
فتخيلوا شعب زي ده ممكن يثور إزاي .. وهو مغيب ومعزول عن العالم كله
كانت زيارة سودا أصابتني بكوابيس زي كوابيس رأفت الهجان كده ...

ومكررتهاش وانسحبت من الشغلانة كلها
انا يوم ما خلصنا ووصلت مطار «بكين» قعدت أعيط وماكنتش متخيلة اني هشوف عيالي تاني
انا كنت في سجن كبير
ده بقى حكم العسكر كما يجب أن يكون .. مش تقولي مصر

إنتهي الثريد
اتمني الدعم برت ولايك ❤️
وشكرا لكم 🙏🙏

المزيد من هذا الكاتب

مواضيع ذات صلة

الأكثر اعجابا

المزيد من هذا الكاتب

مواضيع ذات صلة

الأكثر اعجابا

فك الثريد