بلدنا حالها وقف تمامًا، قتل وضرب ونهب للمواطن من القوات الأمنية،انفلات أمني،إنهيار أقتصادي،غلاء فاحش وزيادة مستمرة في أسعار العيش والبنزين والمواصلات …الخ..
لازم نتوحد كلنا
لازم نقيف مع بعض وننزع حقوقنا
عندنا شهداء قدموا ارواحهم عشان البلد دي
البلد دي حقتنا كلنا ..
#خلاص_ضاقت

كلنا تعبانين يشهدالله ..
كان من الناحية الأمنية او الاقتصادية او حتى النفسية، عمرنا ضايع مستقبلنا مجهول في ظل وجود الوضع الحالي ..
موظفين وأستاذة وأطباء رواتبهم ما بتكفي ل ١٠ أيام بسبب التضخم الحصل في الفترة القليلة دي ..
طلاب الجامعات متأخرين في الدراسة بسبب الظروف المتقلبة ..

حتى الأطفال فقدوا براءتهم بخافوا من حاجة اسمها "عسكري او شرطي" لأنو أرتبط بي ذهنهم انهم مجرمين ما بعرفوا غير القتل و الضرب ..

بقينا ننوم ونصحى بي حال البلد ..
ونسأل ..
بكرة في موكب؟ الليلة الكباري فاتحة؟
المليونية متين؟ الدولار عمل كم؟
البنزين زاد؟ السكر بي كم؟
فقدنا شهيد ..
عايزين ضامن في القسم ..
اخونا مضروب في مستشفى عايزين دم ..
بمبان في بري .. رصاص في شارع الاربعين …الخ..
#خلاص_ضاقت

حرفياً كل فئات المجتمع متضررة من الحاصل دا مافي زول عايز الوضع يستمر غير الانقلابيين و تجار الأزمات، وتجار العُملة، وفلول النظام البائد .
أعيد وأكرر
لازم نتوحد .. لازم نتوحد .. لازم نتوحد
#خلاص_ضاقت