ثريد عن ما كتبته "ذا أثليتك" عن تجديد عقد محمد صلاح مع ليفربول بعنوان "توقف صلاح حول تجديد عقده يدور حول.. الفلوس ، الاحترام ، التقدير".. وطبعا حاطين الفلوس أول حاجة قبل الاحترام والتقدير ومستغرب لأني مشفتش ده اتعمل مع دي بروين وهو بيجدد مع سيتي ولا كانتي وهو بيجدد مع تشيلسي...1
التقرير بادئ بعد العنوان بـ تعدد المميزات التي يملكها محمد صلاح في ليفربول.. من جماهير بتعشقه وتغنيله لـ مدرب عالمي يورجن كلوب خلاه في حتة تانية لـ نجوم صف أول بيلعبوا معاه في الفريق لـ فريق بينافس على كل البطولات وفريق أثبت أنه عنده طموح وقوة بدفع 50 مليون لضم دياز في يناير...2
يكمل التقرير بأن في عيون صلاح لسه في شئ ناقص وهو عقد يضاهي قيمته الحالية كواحد من أفضل اللاعبين في العالم.. وأن توقف المفاوضات بين صلاح وليفربول مش عشان صلاح عايز تجربة جديدة أو عايز ينتقل لأي غريم لـ ليفربول في إنجلترا ولكن بسبب الفلوس ، الاحترام ، التقدير....3
ويؤكد التقرير أن صلاح أكد أكتر من مرة رغبته في البقاء مع ليفربول وتجديد عقده خاصة وأن صلاح مبينكرش البيئة الجيدة جدا سواء للعيشة أو للتطور اللي هو فيها مع ليفربول وخلته مستقر مع زوجته وبناته في مقاطعة "شيشاير" وهو ما بين ليفربول ومانشستر.....4
ولكن.. بيأكد التقرير أن الفرق ما بين ما يعرضه ليفربول على صلاح وبين ما يريده صلاح كبير وكبير جدا.. وأن صلاح متمسك بموقفه أنه مبيطلبش "طلبات مجنونة" خاصة وأن لاعب زي جاك جريليتش اللي سيتي لسه متعاقد معاه بيتقاضى 300 ألف جنيه إسترليني أسبوعيا وصلاح عقده الحالي هو 200...5
استشهد التقرير بـ تصريحات كلوب الأخيرة "أنه قرار صلاح..النادي عمل ما يستطيع وما قدمه هو مناسب بالنسبة لي..لم يحدث شئ بعد ذلك.. صلاح لم يوقع ولم يرفض.. علينا الانتظار".. ودي تصريحات كلوب الجمعة الماضية... اللي رد عليها رامي عباس بعد ساعة على تويتر حاطط 7 إيموجي ميتين من الضحك...6
وبيقول التقرير أن دي مش أول مرة يعملها رامي عباس ويعمل عناوين غير مساعدة لـ وكيله "محمد صلاح" في هذا الموسم.. وأن معظم الوكلاء اللي بيتعاملوا مع ليفربول بتفضل الإدارة أنهم يقوله اللي هما عاوزينه في الغرف المغلقة وميكونوش نجوم عموما ويحبوا الدوشة...7
ونشره تعليق رامي "أتمنى أنهم يشاهدون" تعليقا منه على هدف محمد صلاح الأول في مرمى نورتيش سيتي في الجولة الأولى من البريميرليج هذا الموسم.. وقالوا أن إدارة ليفربول ترغب بالتأكيد في بقاء صلاح ولكن "مش بأي ثمن"....8
وبيوضح التقرير أن إدارة ليفربول مستعده أنها تخلي صلاح أعلى راتب في تاريخ النادي بس برضه مش هيدمره سقف الرواتب اللي عندهم اللي ماشيين بيه كويس ومستقرين بيه واللي دلوقتي بيتصدروا فان دايك ومن بعده صلاح وتياجو..9
وفي رأيين حاليا من جماهير ليفربول ما بين "ادفعوا لـ صلاح اللي هو عايزه" و"مفيش حد أكبر من النادي"..بعد التقرير بيستعرض أرقام وإحصائيات صلاح منذ وصوله ليفربول حتى ليكون تاسع أفضل هداف في تاريخ النادي وضمن أفضل المهاجمين في تاريخ البريميرليج بالأرقام مع هنري وشيرار وأجويرو و....10
يكمل أن صلاح اللي هيتم عامه الـ30 في يونيو المقبل مقدمش أي مظاهر من تراجع المستوى وقارنوه مثلا بموقف فينالدوم اللي شافه مستواه حاليا مع باريس وكانوا هم صح أنهم ميجددوش عقده بالفلوس اللي طلباها خاصة وأنه عقد الجديد كان هيخليه في ليفربول حتى عامه الـ34 أو الـ35...11
رجعوا وذكروا كلام كلوب "لا داعي للتسرع" بس التقرير شايف أن وضعية صلاح خطيرة كل ما بنقترب من مايو رغم أن التقرير شايف برضه أن صلاح معندوش اختيارات كتيرة خاصة لو مبابي راح مدريد وسعتها باريس سان جيرمان هتبقى وجهته الأقرب ماليا ولكن تساءل هل الحياة في الدوري الفرنسي هتناسبه...12
خاصة كمان أن برشلونة يعاني ماليا وعلما بأن ليفربول مش هيبيع صلاح لأي غريم في إنجلترا إلا إذا قرر صلاح البقاء في ليفربول لنهاية عقده ثم الرحيل مجانا في 2023 سعتها كل السيناريوهات واردة.. 13
ختم التقرير بإجمالا أن ليفربول مش فريق "الرجل الواحد" وأبرز دليل تألق دياز الأخير اللي كان رجل مباراة برايتون وأن دي التوليفة اللي عملها كلوب في ليفربول.. ولكن في الأخر التقرير شايف أن آخر حاجة عايزها ليفربول حاليا هو أي تأثير سلبي على منافسته على اللقب...14
وأن لازم صلاح وليفربول يقعدوا مع بعض تاني لأنهم مقعدوش قعدة تفاوض منذ ديسمبر الماضي.. ويتفقوا على تقارب وجهات النظر لأن عمليا وفنيا ومعنويا صلاح وليفربول "ثنائية مربحة جدا للطرفين"...
رأي بقى أنا أن صلاح لازم يتمسك بقيمته وطلباته لأن دي قيمته الحقيقية بغض النظر أنه مش إنجليزي زي جريليتش ورغم أنه مش في سيتي ولا تشيلسي ولا يونايتد كان خد اللي هو عاوزه..وأن لو قراره ده معناه أنه يروح باريس يروح..زيدان جاي ويعمل تجربة مختلفة في نهاية مسيرته عندا في ليفربول مش اكتر
جاري تحميل الاقتراحات...