في حاجة عايز اقولها على السريع ، النظام بتاع التسويق الهرمي ده اكبر اكذوبة و مافي اصلا حاجة اسمها تسويق هرمي و لا اي نوع بزنس ، نماذج العمل التجاري في العالم اتنين يا بتبيع خدمة يا بتبيع منتج و متفرعة منها نماذج تانية ، اما نوعية ناس كيو نت أو مسمياتهم دي لا لا عندهم منتج و ..و
و لا خدمة ، حاليا عشان يشرعنو شغلهم بجيبو منتجات اي كلام و بقولو ليك سوقها لي معارفك و هي قيمتها دولارين يقولو ليك بيعها بي ٥٠٠ دولار ، و يقولو ليك جيب ناس معارفك ليه لانو مافي زول بمشي في حنك بيش زي ده من اول مرة الا يجي من طرف زول انتا بتثق فيهو و يشرحو ليك و يأكد ليك انو
ربح و جاتو عمولات من القصة دي في الشهر الفات كذا الف دولار انتا هنا عيونك بتزغلل و لمن ينادوك المحاضرات حقتهم البتكون في قاعة التنوير المعرفي ال ورا الساحة الخضراء بتشوف حماس و طاقة رهيبة ناس بتصفق و بتصفر و بجي كوتش نازل و الناس دي بتكورك ليهو و بحبو و عندهم صفقة جماعية كده
انتا ك زول جاي جديد الشريحة بتركب فيك بتقول انو استحالة انو عدد الناس دي كلها و الموضوع ده طلس ، و بتركب فيك اكتر لمن الكوتش ده يجي خاشي بي عربية برادو أو اوبتيما و يقول ليك انا كنت صيدلي و هسي عندي العربية دي و انتا برضو ح تبقى عندك وووو الناس ديل بعيشوك حلم رهيب في المحاضرة دي
اها الزوووط بجي بعد ما تنتهي و الناس تطلع برا ، الزول الجابك ده بكون عندو كوتش فوق ليهو بجي بقنعك و بشرح ليك و بوريك كيف تجيب الناس و كيف ح تكسب بعد الشهر الاول و التاني وووو اها راسك بسخن لمن يقول ليك قيمة الاشتراك ١٢٠٠ دولار و يقول ليك قيمة الاستثمار بتاعك ده ١٢٠٠ دولار
و يقولو ليك لازم تجازفها و تتدين وووو انتا من الحماس الفيك و الشريحة الدخلت ح تجيبها لو تبيع دهب امك و الزووط لمن يدوك منتجات وهمية زي ساعة موية و حاجات كده اي كلام و يقولو ليك بيعها بي سعر خرافي عشان تاخد عمولات و لمن تغلبك ح يقولو ليك جيب ناسك دخلهم عشان تاخد عمولتك من اي
زول دخل عن طرفك انتا مع كل محاضرة تحضرها ال هي بتكون عبارة عن غسيل مخ و عبارة عن ناس نجحو انتا بتتحول لي انك بقيت مؤمن انو الموضوع ده هو مفتاح الثراء بتاعك ف لمن تمشي تقنع صحبك أو ابوك أو اخوك او الناس الفي الدائرة حقتك المقربة عيونك دي بتكون بتطلع شرار من الحماس و صحبك او صحبك
البجي بدخلك ده بكون مؤمن حقيقي و انتا بتضطر تصدقو و تمشي معاهو المحاصرة و هكذا ، المشكلة يا اهلنا الموضوع ده بدمر صلات العلاقات لانو اي زول بكتشف انو ضحية و في منها لسه ما اكتشفو و بكره و بسب للزول الدخلو في قصة زي دي و في ناس بتستمر عشان ترجع خسارتها ، الموضوع طويل و انا اختصرتو
جدا أنا عايز الناس تمشي تقرا عنو بي استرسال شديد و تسال و تسمع ، و اعرفو حاجة القروش دي ما بتجي بي سهولة أو البزنس الحقيقي ما حاجة سهلة بل شقاء و تعب و تعلم و تقع و تقوم البعملو ده نصب بي احتراف ، دوامة نصب لو دخلت فيها يحلك الله بس
@hussamnasri
استيضاح لي منشورك بتاع الفيس
استيضاح لي منشورك بتاع الفيس
جاري تحميل الاقتراحات...