اللوحة دي اول مرة شفتها حقيقي كان في متحف الاورسيه في باريس وانا داخل الصالة الخاصة بالتاثيريين او الانطباعيين في الدور التاني بمتحف الاورسيه سنة 94 اتجمدت عند الباب ودموعي نزلت . كنت شفتها وغيرها كتير في كتب قراتها عن الفن التشكيلي لكن اشوفها حقيقي ما قدرتش امسك نفسي.
اللوحة لادوارد مانيه اسمها غداء علي العشب غير الافطار علي العشب لكلود مانيه - دايما اغلط فيهم - وكان معايا ابراهيم اصلان اللي استغرب من دمعتي لكن نسيته وقعدت اتفرج علي باقي لوحات التاثيريين ومابعد التاثيريين . كانت احسن جولة لي في اوربا في المتاحف بافتكرها دايما اكتر ما بافتكر
الكتب . اما اللوحة دي " فريق الاعدام لجويا وبتصور الفرنسيين بيعدموا المقاومين الاسبان بعد ما احتل نابليون بونابرت اسبانيا فقعدت قدامها علي الارض طول النهار اتفرج علي لوحات جويا في متحف البرادو بمدريد . ولما رجعت كتبت مقال مجنون عن العلاقة بين اللوحة دي ومشهد السلالم في فيلم
المدرعة بوتومكين وازاي الاحساس بطول السلالم في الفيلم مش بيخلص والناس بتجري من جنود القيصر وازاي في اللوحة دي الضحايا حاسين بالبنادق قريبة اوي والعادة ان الاعدام رميا بالرصاص مش بيكون عن قرب كدا . انا رغم اني اديب لكن روحي بتطير في الفضا مع الفن التشكيلي والموسيقي والسينما
اكتر من اي حاجة في الدنيا وزعلان اني مش قادر اروح الاوبرا ولا ازور معارض في مصر بس الحمد لله الموسيقي قدامي علي اليوتيوب وباسمع دلوقت كسارة البندق لتشايكوفسكي اما المعارض فشفت كتير ويمكن ييجي يوم اشوف تاني . عندي امل .
الفن التشكيلي والسينما يعلموا الاديب ازاي يختصر في اقل مساحة اللي ممكن يقوله في صفحات اما الموسيقي فتعلمه ازاي اللغة ممكن تتحرك وترقص وتبكي مع شخوص الرواية وماتبقاش مجرد حكي تقريري من الخارج .
جاري تحميل الاقتراحات...