رتبها

من لاعب الكل يتمنى رحيله، إلى لاعب الكل يطالب له بالكرة الذهبية..
"كان كريم بنزيما مزيجا بين زيدان ورونالدو الظاهرة ، لذلك ذهبت للبحث عنه في ليون”. - فلورنتينو بيريز
🌟| ثريد عن الأسطورة كريم بنزيما..

أولًا ماذا يعني خليط بين لاعب ولاعب أخر بغض النظر عن الأسماء ؟
-يعني أن اللاعب ده عنده نفس الخصائص اللي عنده نفس اللاعبين الآخرين.. نفس الخصائص وليس بالشرط نفس الدرجة من الإجادة.. نفس الخصائص ومش شرط يكون أحسن منهم في أي من الخصائص دي..

كريم بنزيما هو المهاجم المتكامل وصانع اللعب الهداف والجناح الرائع ولاعب الوسط المتقدم.. بنزيما هو تعريف اللاعب الشامل في كل مراكز الهجوم..
بنزيما هو اللاعيب اللي بيقدر يبدأ الهجمة من وسط الملعب ويقوم بدور زيدان، يراوغ ويمرر ويزيد في منطقة الجزاء ويسجل..

أو هو اللاعب اللي بيقدر يستلم الكرة قريب من مناطق الخصم ويروح بمجهود فردي يسجل أو يصنع ويقوم بدور رونالدو نازاريو..
وأحيانًا هو الجناح اللي بيستلم على الخط ويراوغ ويعمل عرضية تتسبب في هدف أو يروح يسجل هو بنفسه ..

وأوقات تانية بنزيما بيكون اللاعيب الـ بوكس تو بوكس اللي بيضغط على حارس ومدافعين الخصم لإجبارهم على إرتكاب أخطاء..

وأوقات كمان بيكون هو اللاعب اللي بيسيب المناطق الهجومية وينزل يضغط على لاعبي وسط الخصم ويقطع الكرة ويبدأ الهجمة..
الهجمات اللي غالبًا هو بيختمها بأهداف من توقيعة..

وأوقات كتير بيكون هو المهاجم اللي مستني غلطة نسبة حدوثها لا تتعدى الـ 1%.. بس مستني وباله طويل ومستعد يقعد 10 مباريات واقف بيستنى الغلطة، اللي غالبا بتجيله في ماتش مهم ويسجل منها هدف تاريخي..

وساعات بنزيما بيكون هو المهاجم الـ 9 الصريح اللي الملعب كله بيلعب عرضيات عليه..
كل ده بنزيما ممكن يعمله في 90 دقيقة .. مش بينزل ماتش معين بمركز معين يفضل عليه الوقت كله..

وأغلب الأوقات بيكون هو اللاعب اللي بينزل يستلم الكرة من وسط الملعب ما بين الخطوط كأنه لاعب وسط أسطوري ويخرج من الضغط بكل سلاسة، لأنه ببساطة لاعيب كورة حريف وصايع..
هو ده "بإختصار شديد" كريم بنزيما، الأسطورة كريم بنزيما..

بنزيما لاعب خجول، طبيعته الهدوء، ويمكن البرود..
مش هيبان عليه انه مهاجم رخم ولزقة للمدافعين طول الوقت، هتفتكره انه مجرد لاعيب كورة حريف وشكرًا على كده.. وساعات هتفكر أنه مجرد مهاجم ذكي، بس هو الحقيقة بنزيما كل حاجة..

بنزيما مهاجم رخم وبيضغط طول الوقت، قرارته في الملعب أغلبها ان لم تكن كلها صح، صح لدرجة ان مستحيل دي تكون قرارات لاعيب بيحب نفسه أحيانًا.. تحس ان بنزيما هو أداة المدرب بيتحكم بيها في الملعب.. قرارته دايمًا لمصلحة فريقه بنسبة 100%..

كريم لاعيب ممتاز لدرجة ان في الماتش الواحد ممكن يلعب في 3 أو 4 مراكز بسلاسة تامة بحيث إنه يكون بيعمل كده علشان يريح زملاؤه في الملعب.. بنزيما دايما خيار تمرير لزملايه..
دي الخريطة الحرارية لبنزيما في دوري الأبطال الموسم الحالي..

أي إنسان لعب كورة عارف ان ده أمر يكاد يكون مستحيل، اللاعيب بيحتاج مباريات كتير وأسابيع تدريب عشان يكون قادر يأدّي وظيفة في مركز غير مركزه..
فـ ما بالك بلاعب بيقدر طول الوقت لمدة سنين انه يغير مركزه في الملعب..
حتى لو ده هيجي على حساب مجده الشخصي وأرقامه وهو مهاجم..

بنزيما سجل 79 هدف في دوري الأبطال (ضربة جزاء واحدة فقط).. رابع الهدافيين التاريخيين لدوري الأبطال.
مستحيل لاعب اسمه "مهاجم" ولابس رقم 9 في ريال مدريد يستحمل انه يقعد سنين ورا سنين منهم 4 سنين فازوا بالبطولة ويشوط ضربة جزاء واحدة بس.. ده شخص مش مهتم بمجده الشخصي نهائيًا..

بنزيما بيقول : في ليون أنا كنت الهداف ، وفي ريال مدريد رونالدو كان الهداف وألعب معه دورًا آخر ، لقد سجلت الأهداف ولكني كنت أقدم تمريرات حاسمة و أقوم بالبناء من الخلف ، و كنت دائما أحاول فتح المساحات -1-

أنا أحاول أن يكون لدي أسلوب لعب مختلف ، في السنوات السابقة ربما كان رونالدو الرقم 9 هو هداف ريال مدريد ، صحيح بأنه كان لاعب جناح لكنه كان يتوغل في المحور ، أما أنا انتقل بعيدا لتحرير مساحة والسماح له بالتسجيل -2-

جملة فتح مساحات دي كانت محل تريقة سنين طويلة، لكن لو شخص فينا جرب يفتح فاينال اليوفي وريال مدريد ويشوف هدف رونالدو مثلا ويشوف الي بنزيما عمله في الهدف ده، ويبعد الحب والكُره وشاف اللقطة من جانب فني بس
أي مهاجم كان هيروح يشوط الكرة دي، بنزيما سحب المدافعين كلهم، وسهلها لرونالدو.

بنزيما لاعب فنيا لا خلاف عليه إلا إذا كنت أحمق.. بنزيما من اللاعيبة القليلين أو يمكن اللاعيبة النادرة في العالم اللي ممكن تقول عليه"لاعيب شوارع".
موهبته نقية، مش تدريب أكاديميات أوحافظ كرة.. كريم فنيا فوق الممتاز ومستواه الفني كافي يخليه من أساطير اللعبة

زين الدين زيدان أسطورة فرنسا وريال مدريد بيقول : بنزيما هو المُهاجم الأفضل في تاريخ فرنسا
المدح بالشكل ده مستحيل يكون صدفة، بنزيما بيعمل لقطات من اللي بيعملها أساطير اللعبة التاريخين يوميًا .. لقطات بتعيش في ذهب المتابع سنين، بنزيما بيعملها بشكل يومي..

اللاعيبة القديمة دايًما بتاخد حق أكبر من حقها، ده مش معناه انهم منفوخين او شيء من هذ القبيل، إطلاقًا.. لكن ده بيجي على حساب اللاعيبة الحالية.. مع إنك لو جيت تركز وتشوف اللي بنزيما بيعمله في ملخصات المباريات في شهر واحد بس، هتلاقي أساطير للكورة عملوه في سنين..

اللقطات والتجميعات دايمًا بتجيب الشيء الحلو ، بنزيما بيعمل الشيء الحلو واللقطة الجميلة بالكورة في كل وقت بيلمس الكورة فيه.. طبعا الكلام ده في الغالب هيتقدر بعد إعتزال بنزيما.. بس نحاول نبص للموضوع من جانب فني بس بعيد عن النوستاليج، بنزيما بيعمل بالكورة اللي عمله الأساطير..

أكيد كلنا فاكرين لقطات بنزيما المشهورة دي أتليتيكو مدريد لما لم مدينة مدريد كلها وراوغهم على الخط.. عاوزك تتخيل ان اللي عمل كده لاعيب برازيلي من 25 سنة مثلا.. كان هيتقال فيه كل الأشعار..

بنزيما كذلك عنده جزء الروح القيادية، حاجة من ريحة زيدان.. مش أقل منه فيها، بنزيما بينزل الماتش الكبير بيلعب فيه أحسن ألف مرة من الماتش العادي.. بنزيما قصاد أحسن أندية وأحسن مدافعين في العالم قادر يحطهم في مواقف محرجة لوحده.. حتى لو الريال خسر في النهاية لكن بنزيما بيكون حط بصمته.

بنزيما وقت ما فريقه يكون محتاج هداف بيكون الهداف، فريقه محتاج قائد بيكون القائد، فريقه تحت الضغط بينزل يطلعهم من الضغط، فريقه محتاج لاعب يستحوذ على الكورة بيستحوذ..
ببساطة، بنزيما هو النسخة الآدمية من ليونيل ميسي..

ثقة زملاء بنزيما فيه شيء لا يُقدر بثمن الحقيقة، وحاجة لا يمكن وصفها..

ثقة بنزيما في نفسه نفسها شيء مش محل شك نهائيًا.. هدف مهم في مشوار حسم الليجا في الدقائق الأخيرة بقدمه الضعفية من وضعية صعبة وشبه مستحيله.. بنزيما رائع، أروع ما يكون..

أي شخص لعب كورة هيكون عارف مدى صعوبة أو استحالة اللي بنزيما عمله هنا
بنزيما لو كان موجود قبل ما الارقام تطغى على الكورة كان اتصنف من احسن اللاعيبة في التاريخ..

الهداف الخرافي السابق ده طبعًا لو شوفته لأول مرة هتقول إنه وليد الصدفة..
لكن بنزيما فعلًا لاعب خارق، مش لاعب صدفة..

لو اللي سجل الهدف ده لاعب لاتيني من 20 سنة، كان زمانه بيتم مقارنة بميسي ورونالدو حاليًا..

رونالدو البرازيلي بيقول : بنزيما هو أفضل لاعب فرنسي، هو لاعب لاعب رائع، ويمثل كل ما يتطلب من الرقم 9".

تريزيجيه مهاجم فرنسا السابق بيقول: "بنزيمة مزيج بين راؤول وبوتراغينيو ، فهو يعطي اللعبة أكثر بكثير من مجرد الإحصائيات."

مسعود أوزيل بيقول: "لقد استمتعت حقًا باللعب مع بنزيمة. إنه مثل ، دعنا نقول (البرازيلي رونالدو).. إنه ذكي جدًا وجيد في التعامل مع الكرة. إنه مجرد لاعب مميز."

Streets will never forget KB9.

الحقيقه ان بكاء بنزيما بعد الجول التالت امبارح جاي بعد تعب كبير، بنزيما عاش حياته كلها في ضغط سواء من طفولته الصعبه في حواري فرنسا و تريقه زمايله الكبار في ليون علي طريقه كلامه.. -1-

حتي مورينيو في ريال مدريد اللي كان بيجرأ الصحافه عليه لدرجه انهم اطلقوا عليه لقبBenezena "الna في نهايه اي كلمه اسبانيه بمعني لا شئ"الكوره كانت هتبقي ظالمه لو انتهت مسيرته من غير ما الناس تنصفه و تقدر مجهوده و حتي من غير هاتريك امبارح-2-
بنزيما أثبت لكل جمهور الكورة انه اسطورة.

هكمل باقي الثريد بعدين لما يكون الناس قرأت ده..

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد