رتبها

📢📢📢
حياتك بتبدأ بعد ال٢٥... نعم؟ كيف يعني؟ زى ما سمعت/ي كدا. حياتك بتبدأ فعليا كدا بعد ال٢٥...
طب ارح معاى واحدة واحدة علشان نفهم ليه؟!
تابع/ي الثريد++

مبدئيا كدا، سن النضج الكافي لإتخاذ قرارات مصيرية سليمة إلى يومنا هذا بيختلف من مكان لمكان و غير محدد يعني مثلا:
سن التصويت في الويلز (١٦)، بينما في الإمارات (٢٥)!!...

طيب ازيدكم من الشعر بيت... في بعض الدول زى أمريكا ممكن تتم محاكمتك كبالغ من عمر ال (١٦) و في بعض الولايات السن كمان اصغر و لحد ٢٠٠٥ كان ممكن عادي يتم الحكم عليك بالإعدام في السن دا!!!!

طيب ليه الشئ دا اتغير؟ لأنو الحياة قدام المجرم الصغير طويلة و بيستاهل فرصة تانية؟ لا طبعا... لأنو منظمات طبية قدمت ادلة في علم الأعصاب بتثبت انو الأشخاص اليافعين ما بس غير ناضجين للعين المجردة لكن من ناحية الألياف اللى في دماغهم كمان... نعم؟ ارح نعرف السبب

طيب اولا، أدمغتنا مكونة من عصبونات لونها يبدو رمادي. و كل ما كبرنا في السن بتلتف حولين العصبونات دي عدد متزايد من حاجة بيضة اسمها 'مايلين'... المايلين بيسرع التواصل بين العصبونات ب '٣٠٠٠' مرة 🤯🤯 (سبحان الله) دي عملية مهمة و عظيمة جدا جدا لأنها حرفيا عملية تجديد و صيانة المخ.

طيب علاقة العملية دي شنو بموضوعنا؟؟؟ العملية دي بتبدأ من الجزء الخلفي للمخ من قبل حتى ما نتولد و بتستمر لحد عمر.... حزر فزر؟ ال٢٥!!!

و اخر منطقة بتتطور هى المقدمة و المشكلة إنو دي الحتة اللى احنا اصلا بتعملنا بني آدمين راكزين.... لأنها مسؤوله عن التفكير العقلاني و المنطقي فلمن الواحد يتواجه بموقف، بسبب عدم وجود المايلين، الجزء الأمامي بيتأخر في التواصل مع الجزء الخلفي...ا

فالمؤخرة بتقول للمقدمة :" هى و هى👏🏽👏🏽 زح لى كدى انت و يومك البسنة دا"
و بتقوم تعمل إنقلاب و تستلم زمام الأمور و بالتحدييد حتة اسمها 'اللوزة الدماغية'. طيب وين المشكلة؟ إنها المركز العاطفي في مخنا

ضيف المعلومة دي لمصيبة تانية: تأثير الأصحاب... دخلو شنو؟ ارح نعرف. في ٢٠٠٩ مجموعة من الباحثين اجروا تجربة، خلوا مجموعة من الأشخاص من مختلف الفئات العمرية يلعبوا لعبة محاكاة قيادة السيارات. و اللى بينتهي أسرع بيفوز بجائزة مالية ضخمة.

الكنتة ويييين؟ كانت في انو كل ما مشيت بسرعة علشان تصل اسرع إحتمالية انو تعمل حادث (في المحاكاة) اكبر... في المرة الأولى البالغين و اليافعين اخدوا نفس نسب المخاطرة تقريبا لكن... في الجولة التانية قالوا ليهم الجملة التقيلة "اصحابكم قعد يشوفوكم"، حزر بعد داك اليافعين عملوا شنو؟

اخدوا مخاطرات اكبر بكتييييير. إفراز الدوبامين (الجائزة) بيزيد جدا عند الأشخاص اليافعين...

الصورة اللى على اليسار: إفراز الدوبامين عند البالغين
اللى على اليمين (فقاعات بنفسجية) حقت اليافعين. النشوة بتاعت:
١. المخاطرة
٢.السعي إلى التجديد (تجارب جديدة)
٣. العلاقة مع الأقران
بتفرز دوبامين اكتر و بتكون النشوة حقتها احلى بكتيييييرو

في حياتنا بيكون في اصوات جوانا، صوت "الناس حتقول على شنو؟" الصوت دا بيلازمك طول عمرك بس لمن تكون يافع بيكون الصوت عالي شدييييد. فبتفسر سعينا المستمر في البحث على 'القبول و الرضى'

و يمكن دا السبب (دا إجتهاد شخصي مني ما عندي ليهو مصدر) اللى ربنا عظم بيها على لسان سيدي المصطفى (ص.ع.س) عبادة الشباب
قَالَ : ( سَبْعَةٌ يُظِلُّهُمُ اللَّهُ فِي ظِلِّهِ يَوْمَ لاَ ظِلَّ إِلاَّ ظِلُّهُ - وفيه : - وَشَابٌّ نَشَأَ فِي عِبَادَةِ رَبِّهِ )
رواه البخاري و مسلم

لأنو عارف جل جلاله قدر شنو الواحد في العمر دا بيكون عايز يجرب و يبهر أصحابه و يأخد مخاطرات قد تؤذيه في دنياه و في آخرته فحفزنا شباب على بنات بجائزة على الصمود في العمر دا و الجائزة ظله يوم لا ظل إلا ظل عرشه❤❤

و ممكن كمان يكون سبب (برضو إجتهاد شخصي مني) سبب تعظيم ربنا لمكانة الصديق لمن ساوى الصديق بالأقرباء من الدرجة الأولى... لأنو الصاحب مهما كنت صنديد في شخصك حيأثر عليك لا محالة.
نصيحة: إختر أصدقائك بحكمة بالغة

طيب هل دا معناتو انو اى شخص يافع:
*غير ناضج
*غير منطقي
*غير قادر على إتخاذ قرارات سليمة
*بتدفعوا العاطفة إلى شفير الهاوية
*لا يجب ان يؤاخذ على افعاله و لا يتحاسب عليها
HELL NAWWW

كنت حضرب مثل بشخصيات صغيرة في السن غيرت التاريخ و كنت حقول:
ملالا يوسف و هانز كونراد و غريتا تانبرغ لكن حقول،
عبد السلام كشه و عبد الرحيم و ست النفور و مطر و سائر شهداء ثورتنا...
الحماس دا لو تم توظيفو في الخير في كوكب ٢ من اصل كل ٣ من سكانه يافعين ما بقدر اوصف ليكم+

كم التغيير و التحسين اللى ممكن نعملوا في الدنيا... و برضو الثريد دا كتبتو بعد شفت تويتة لبنت كيوت بتقول إنها عايزة تغير تخصصها و الناس اللى بيقولوا ليها غيري و مالو، قالت ليهم "انتوا بتشتروا عمركم من الآنفال؟)😂😂

لفت نظري ندم الناس في الكومنتات و ناس عارفين انو في حاجة ما مناسباهم بس مكملين فيها علشان 'العمر'... قرار التخصص قرار مصيري جدا و بناخدو في عمر احنا ما جاهزين ليهو، حتى عمر ال٢٥ دا عمر تجربة و يمكن كل العشرينات لحد ما تلقى نفسك+

شلة اصحاب انت عارفها كرور و مرجعاك لورا؟ سيبها
تخصص اخترتو و انت صغير تحت ضغوطات و توهان و اكتشفت بعدين انو ما حقك؟
غير
مرتبط بشخص ما لاقي معاهو إحساس 'الأنس' و الراحة اخترتو بناء على عاطفة جياشة من الصبآ؟
سيبو

و اخر حاجة عايزة اختم بيها الثريد..
مخنا بيتعامل معانا بنظرية: USE IT OR LOOSE IT... و العصبونات اللى حكيت ليكم عنها بتفقدها لمن ما تعمل صيانة مستمرة لمخك في سن صغير، زى توصيلات الكهرباء، لو ما كشفت عليها و جددتها من فترة لفترة بتتحرق؛ إن لعصبوناتك عليك حق😂😂
آتي كل ذي حق حقه❤

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد