واحدة من أجمل الحاجات في حياتي الفترة دي بت أختي الفي سنة أولى روضة. مرة أكلت حلاوتها مع أخوها وبعدا قالت لي بكرة حأكلم ماما نجيب ليك معانا، نجيب حلاوة لي ولي جواد وليك أنت، ثلاثة حلاوات عشان أنا بحبك. أنا ما عرفت أرد عليها غير ياهو أني بحب أحضنها كل ما أشوفها.

اليوم البعدو جيت نازل من غرفتي فلقيتها جات من الروضة فسلمت عليها وكذه، لقيتها مشت لي أمها تديها الحلاوة حقتي عشان تسلمها لي، وأمها قالت لي لمن وقفوا في الدكان كانت متذكراني وقالت لي أمها انا قلت للحارث حأجيب ليك حلاوة معانا، فجيبي ليو.

تقريبا دي واحدة من ألطف العلاقات الما بتفشل تسعدني وتثلج صدري كل ما ألجأ ليها، بقعد بس بتكلم معاها وهي بتحكي لي ولا تقول لي اوريها شي جديد، وبنسمع دقات قلوب بعض وبديت اوريها أنه عندنا قلب وشرايين وكده ولقيتها بتستمتع جدا بالونسات دي، ومرات تلقاني ساي تقرر تتونس معاي بس.

ربنا يحفظها وأخوها وأمهم ويعدلها عليهم دنيا وأخرى.