متردده كثير بس قررت اكون شجاعه واحكيكم عن تجربتي مع احدى امراضIBD والمعاناه الصامته الي يعيشوها هالفئة،هالثريد بيكون ثقيل دم ومو مهم للاغلب والغرض ان الي يبحث عن المرض يلقى احد يشاركه تجربته ومخاوفه، اذا كنت مشخص او مشتبه بكرونز ، التقرحي، المجهري ممكن هالثريد يخفف عنك شوي ❤️١
قبل ايشي انا بخير الان وخلصت كورس العلاج،وحابه اوجه شكر عميق لصديق تويتري غالي جدا ع قلبي ووقف معي بكل خطوه وبكل وقت كنت ثقيله دم وضعيفه ، في وقت ماكنت اشارك احد اي مخاوف او الم كان موجود بكل قلبه وبدون اي مصلحه، اعرف اني مستحيل التقي فيك وشكرا ع كل لحظه ضحكتني فيهاوانا ابكي❤️٢
وكمان ابقلكم ان الاصدقاء التويترين نعمه سؤالكم حبايبي واهتمامكم🥺 وصديقي الي عارف نفسه كل مااقله شي يروح يبحث عنه بنفس الوقت 😂 حابه اقلك انك كيوت وتجنن واي احد ابدى اهتمامه وحبه شكرا لكم 💕
البدايه كانت بتشخيص غلط ع مدى سنوات ، كنت اعاني من الم في البطن والمعده واسهال وسوء هضم مع فقر دم شديد وانخفاض الحديد والم مفاصل وكل مره كنت اروح اطباء كان يصرفون لي ادويه قولون وحبوب حديد وهالوضع استمر وتعودت عليه لين زاد سوءا خلال ٦ الشهور الماضيه ٣
زهقت من الاطباء الغير مهتمين وبديت ابحث بنفسي لين لقيت نفس اعراضي بمجموعه امراض اسمهاIBD وتنطبق على ثلاث امراض مناعيه تصيب القولون وتسبب اعراض متشابه والاختلاف في التشخيص والعلاج وقوه المرض ، طبعا انا شكيت في الكرونز وهو مرض مزعج كرييه ويغير حياتك تماما وتلتزم معه بعلاج قوي٤
رحت للطبيب وطلبت انه يشيك ع هالمرض بالذات ،الطبيب انتبه لزياراتي المتكرره ووافقني وحولني لطبيبه اكثر اختصاصا، اجريت منظار قولون والي جربه يعرف قديش مزعج التحضير له ، بعد اسبوعين من القلق والانتظار اخبرتني الدكتوره ان الصوره اعراض كرونز لكن النتيجه من العينه لا وصرفت لي كورتيزون٥
ولان فقدت الثقه بالاطباء ماقتنعت بكلامها وجلست ابحث اكثر في دراسات طبيه وابحث عن الاطباء ولقيت طبيب في مستشفى الحبيب متخصص بهالحالات، وطبعا خلال كل هالفتره كنت اعاني من الالام في البطن والاسهال بشكل مستمر وخصوصا بالليل ٦
رحت للطبيب ومعي تحاليلي واشعتي والي رفضها كلها وطلب يسوي كل شي من جديد وهنا واجهتني مشكله التأمين الي مايغطي هالمستشفى ، فالي يقول الفلوس وسخ دنيا بحط رجلي بفمه، وبديت رحله البحث عن حل لرفع تاميني ورفعت طلبي لمجلس الاداره وبعد اسبوعين كمان حصلت الموافقه ٧
طبعا هذا كله وانا اتالم ونفسيتي تعبانه ومرهقه عقليا وجسديا، ولا كنت اشارك اهلي مراعاه لنفسيتهم، وبديت الفحوصات من جديد منظار للقولون والمعده وتحاليل كثيره، والانتظار لنتايج العينه للاشتباه : سرطان قولون او معده، كرونز ، مجهري او شي اخر يبين معنا ع كلام الطبيب ٨
في المنظار الطبيب ماشاف التقرحات الي شافتها الطبيبه بالمنظار الاول ، القولون كان جدا رقيق وينزف لاي لمسه، ضمور بجدار المعده ٩
الخبر الحلو ع كلام الدكتور انه مو سرطان ولا كرونز ولا تقرحي ، الخبر المو حلو انه القولون المجهري والتهاب معده ضموري وسلياك ، وطبعا كلها بسيطه مقارنه بالباقي ولها خطه علاجيه وحميه وبديت العلاج بشهرين كورتيزون واموري زانت بعد اول اسبوع ونمت اول نومه بدون الم 🥺❤️١٠
واي احد حاب تفاصيل ع العلاج والتشخيص ممكن افيده خاص
( يتبع)
( يتبع)
الان ايش رسالتي وانت الي تقرالي لان يهمك هالامر؛ اولا لازم تؤمن بنفسك وتسمع جسمك ، الطبيب انسان يغلط ينسى يلهى بطنه تعوره وزوجته تتهاوش معه وتسبه واتس ، انت مسؤل عن نفسك الطبيب اداه علميه وانت لازم تساهم انك تستخدمه صح ، اسال دور واقرى ولا تستسلم لطبيب او علاج ماتثق فيه ١١
العرب محتواهم زباله،تكتب مرض يلفك سبع لفات وبالاخير كلام مترجم مكرر سخيف،قله قليله من العرب يشاركون تجاربهم مع المرض لانهم يشوفون المرض عار وضعف وابتلاء وعقاب،بينما المرضى الاجانب يعطونك كل التفاصيل لي تريحك وتحسسك انك مو لوحدك تعاني ،غير الدراسات المفيده عن كل شي لغير المتخصص١٢
المستشفيات اغلبها تجاريه اذا ماكنت منتبه وحريص وفاهم بيستغلوك ، الاطباء بشر فيهم وفيهم فاختار بعنايه، والفلوس اهم شي ! قديش حسيت بحزن ع كل احد يعاني ومايقدر يتعالج! كيف باقي البلدان التي ترزح تحت الحروب والفساد وصحه الناس تعتبر رفاهيه ١٣
اذا كنت تحس بالالام وتغيرات بجسمك غير مفهومه لا توقف بحث لين تلقى شي مقنع التشخيص الصحيح اهم شيء، وحتى لو كان العلاج صعب او غالي ( ابر البيولجي لعلاج الكرونز مثلا توصل لعشر الاف شهريا مدى الحياه) برضو لا تيأس وابحث عن قروبات دعم وجمعيات ولا تترك صحتك تتدهور ١٤
لكل شخص يعاني اعرف كثير معاناتك وانا ببلد غني ، فمابالك ببلد فقير ! وهذا اسوء شي بالحياه ببلدان لاتهتم بجوده حياه الانسان! صحه الناس ليست رفاهيه ياعرب ! ١٥
اذا كنت مشخص باحدى هالامراض المناعيه فانت مو لوحدك ، في قروبات وكثير ناس مثلك وتقدر تتفهم معاناتك ، شاركهم بكل التفاصيل السخفيه والاسئله الي تنحرج تسالها الطبيب او تشاركها اصحابك الاصحاء الي اكيد مارح يفهمو الي تمر فيه
واذا كنت صديق او احد افراد عائله ترى مو لان شكله طبيعي هو مايعاني ، هو يبدو بخير لكن ماهو بخير ، لا تضغطو عليه بالاكل او الخروج في اشياء مايقدر يقولها، وابعدوه عن الزعل قد ماتقدرو لا تعلقو ع الوزن زياده او نقصان، ولا تقولون شكلك تدلع ومافيك شي
وع طاري الزعل سمعت كم مريضه ومريض اجنبي قالو ان المرض بين معهم بعد صدمه عاطفيه، ماعرف اذا كان كلامهم دقيق بس ردات الفعل المناعيه للجسم حقيقيه ، واذا كان حقيقي فالي ساهم بمعاناتي شخص كان احب الناس لقلبي ، فلا تاذو الاخرين ولا تدخلو علاقات عاطفيه انتو مو قدها ولا تعطو وعود وتخونوا
جاري تحميل الاقتراحات...