شعب تاني 5/1
فيها شعب تاني بيصدق رامز جلال و انه بيعمل مقالب بجد. فيها شعب بيكلم خبيره الأبراج و المركز المغربي للعلاج الروحاني وجلب الحبيب وفك السحر. مصر فيها شعب لما بيتصل ببرامج التوك شو مابيعرفش انه لازم يوطي التليفزيون و بيطلب انه يكون صديق البرنامج.

شعب تاني 5/2
مصر فيها شعب بيتفرج علي أحمد موسي ومصدق ان مرتبه مش بيكفيه بسبب المؤامره الصهيونيه الماسونيه الأمريكيه الإيرانيه التركيه القطريه المهلبيه علي مصر.

شعب تاني 5/3
مصر فيها شعب فاكر ان العلمانيه كفر او شذوذ او اباحه جنسيه او كل دول مع بعض. شعب فاكر الغرب ربنا غضبان عليهم و عايشين عيشه سوده لأنهم كفره

شعب تاني 5/4
مصر فيها شعب مصدق ان السياح لما بييجوا مصر بينبهروا بعبقريه الشعب المصري الحالي وان كل اجنيبه بتحلم بفحوله الرجل المصري. شعب بيهلل لما يشوف شخبطه علي بيضه و يترجمها علي انها لفظ الجلاله. شعب مؤمن ان المكوه بتاعته باظت علشان ساب الشبشب مقلوب

شعب تاني 5/5
إتضح ان الشعب اللي فوق ده هو الأغلبيه . و اننا بنكلم بعض و فاكرين نفسنا الشعب اتارينا احنا الأقليه. احنا اللي شعب تاني مش هم