الثريد ده مش تحليل، ومش مقال دسم ولا كلام كبير، لكنه كلام بسيط بيغفل عنه ناس كتير ومش عارفين تشافي عمل ايه فعلًا في برشلونة،
تشافي هيرنانديز،
ورقة وقلم!
ثريد...
تشافي هيرنانديز،
ورقة وقلم!
ثريد...
لو ربطنا الموضوع بنادي تاني، علشان الفكرة توضح أكتر عن طريق مثال آخر، فأكتر مشكلة بيمر بيها مانشستر يونايتد مثلًا، وده موضوع هتكلم فيه بإستفاضة في مقال قادم قريب جدًا، إنك لو سألت أي شخص له قرار فعلي داخل النادي، من 9 سنين لحد تعيين رانجنيك،
وقولتله ايه المخطط اللي النادي ماشي عليه علشان تدريجيًا يرجع للمنافسة من جديد، هيسكت ومش هيرد،
ده موضوع كارثي، مش بس لأن النادي من حوالي 10 سنين مش بيتقدم خطوة، لكن لأنك منتظر فعلًا نتيجة إيجابية للعشوائية دي، والمشكلة الأكبر، إنك صرفت ملايين على مدربين بدون دراسة، وبالتبعية صرفت ملايين برده على لاعبين بدون دراسة؛
يعني مثلًا تعاقدت مع مويس، ومن ثم لويس فان جال، ومن ثم مورينيو، ومن ثم سولشاير، 4 مدارس مختلفين تمامًا عن بعض بكل إهانة لكرة القدم، وكل مدرب كان بيتعاقد مع لاعبين في فريق هو أصلًا مبني غلط، علشان البناء الغلط يبقى بناء غلط أكتر،
والنتيجة؟ إن أول ما تم التعاقد مع مدرب دارس بيعمل ايه، وبيخرج يتكلم في سلبيات الفريق والنقاط اللي إتطور فيها، واللي مازال متأخر فيها، وتشوف إن كل ماتش عن ماتش بيكون فيه ميزة حصلت فعلا هو إتكلم عنها، ومستلم فريق في نصف الموسم بعد أداء لا يرتقي لفريق بيلعب في الدوري الانجليزي حتى،
بيحصل النتيجة الطبيعية، إن اللاعبين مش عارفين يعملوا أي حاجة، ومحتاجين وقت كبير جدًا علشان على الأقل يقفوا على رجلهم، وبالتبعية وقت كبير جدًا للمدرب اللي المفروض إنه يتحمل مسؤولية كل 'العَك' والعشوائية اللي حصلوا لسنوات،
حتى لو آخر الموسم هيروح للدور اللي تم التعاقد معاه بسببه أصلًا وهو 'المستشار الفني' الرئيسي للنادي بصلاحيات كبيرة.
الحقيقة، إننا لو شيلنا إسم 'مانشستر يونايتد' من كل اللي فات، وحطينا إسم 'برشلونة'، مش هنحس بفارق في أي حاجة، نفس اللي حصل لليونايتد هو اللي حصل لبرشلونة، بل وبشكل أسوء لبرشلونة لأن كان فيه فساد مش بس إساءة للكورة بجهل كبير، لكن بفارق واحد بس وهو ميسي، كان مُسكّن فعّال للنادي.
الإعجازي بقى، إن تشافي إخترق كل المنطق، وعمل النقيض تمامًا، إن برشلونة إتحسن معاه في جزئيات كتير ولو مدرب غيره مهما كان إسمه كان ده مش هيحصل بالدقة دي والسرعة دي كمان، وعلشان تعرف إن دي نقطة لا تُعيب في حق رانجنيك أصلًا وإن تشافي هو اللي إعجازي،
إن الطبيعي عملية التطوير مع إسكواد زي ده عملية إنتحارية أصلًا، إسكواد خارج التقييم لأنه حتى مش سيء، إسكواد حتى مش ثابت والكل بيتصاب، كل ما تشافي يحاول يعتمد على لاعب بيتصاب وبدون إستثناء، وده مش موضوع بسيط لأن التعامل مع اللاعب بيحتاج وقت، الوقت ده حتى مسلوب من تشافي،
الكلام ده أنت هتنتقده دلوقتي لما تقرأه، وده الغريب فعلًا، إن الراجل عرف يخرّج من كل اللاعبين في فترة سريعة كل اللي ممكن يخرج منهم، مع تطور تكتيكي هايل على مستوى الهيكلة وشكل الحيازة على الكورة والتصدي السريع بالضغط المضاد لما بيتم فقدها داخل نظام وإطار فعلي إفتقده برشلونة لسنوات،
وتحسُّن واضح في عمل الدفاع، سواء الدفاع الطرفي في العرضيات أو محاولة أي خصم لتوظيف لاعب حر على الطرف،
أو الدفاع الوقائي في الكرات المكشوفة وبسببها بيكيه مثلًا مستواه إتغير تمامًا مع تشافي، والتمركز لكل اللاعبين بتوظيف مميز، مفيش لاعب تحس إنه مش بيلعب مع التاني، قوة ترابط بين الخطوط كانت مستحيل تحصل في وقت سريع زي ده، وكل الصفقات إندمجت بسرعة بسبب اللي بيعمله ده.
الفكرة الأدهش بقى، إن في الوقت اللي كل الفرق فسدت فيه آخر 10 سنين في الكورة، كل فرق العالم فسدت حرفيًا بكل أشكال الفساد -وده موضوع هكتب عنه مقال قريب وعن نتائجه المستقبلية لخريطة الكورة في العالم-، أصبحت كل الفرق الكبيرة لا تملك الأموال من الأساس للشراء، ولا المواهب أصلا لشراءها،
بالتالي جيل برشلونة الحالي ده هيكون منجم ذهب لبرشلونة وقت ما كل الفرق مش هتلاقي لاعبين بوفرة للتعاقد معاهم، وأعتقد ده موضوع ظاهر للأعمى يعني، اللاعب الصغير في فريق متوسط اللي بيسجل هدفين حلوين بيتم التعاقد معاه بـ80 مليون كأقل سعر، يعني تعالى نعكس الوضع،
تخيل بايرن مثلًا معاه فلوس وعايز يشتري مدافع، هيشتري مين؟ مين أصلًا ممكن يتقال عليه مدافع قوي ومميز حاليًا غير 3 أو 4 أسماء؟
وعلشان كده تقييم الناس للاعبين هيتغير وهيتم التغاضي عن عيوب كتير في أي لاعب، لأن البحث عن اللاعب المثالي حاليًا أصبح شبه مستحيل، بل إن الفرق كمان هتغير نظرتها عن شراء المواهب بس، وهترجع حقبة شراء اللاعبين النجوم أصحاب الـ29 سن، لأن نغمة شراء موهبة وتستمر مع فريق 10 سنين مش موجود.
تخيل بقى إن برشلونة يملك -بمختلف درجات التميز للاعبين- ديست وآراوخو وجارسيا، دي يونج وبيدري وجافي ونيكو وبويج، بالدي وفاتي وأخكوماش وتوريس والزلزولي، منجم ذهب قادم، مع تشافي، اللي عارف يخرّج كل شيء منهم.
قوة تشافي بالنسبة لي، إنه عارف هو بيعمل ايه، وعارف هو عايز يعمل ايه في الأساس، وبيشتغل على ده، الثقة اللي أصبحت موجوده لكل اللاعبين كانت مستحيل تحصل لو حد غيره كان موجود، وده كان بيحصل فعلًا مع اللي قبله لما كان بيخرج بأعذار إنهزامية بعد كل ماتش.
تشافي حاليًا، معاه قلم وكتاب، بيكتب فيه تاريخه اللي كلنا بنشوفه دلوقتي، ولحد دلوقتي حسب المعطيات، هيتكتب في الكتاب ده، إنه واحد من الصفوة اللي مروا على الكورة وواحد من أحسن العقول اللي مرت في الكورة، كلاعب، وقريبًا كمدرب.
شكرًا لوقتكم للثريد البسيط ده،
إنتهى! 🙌♥️
شكرًا لوقتكم للثريد البسيط ده،
إنتهى! 🙌♥️
جاري تحميل الاقتراحات...