مهم شديد يكون عندنا اهداف وما نكون ماشيين في الحياة زي الكيس البتشيلوا الريح.
بس الاهم من الاهداف هو اننا نشتغل على نفسنا ونعمل الروتين اليومي البوصلنا للهدف وبكدا تحقيق الهدف بكون واقعي وحتمي.
الثريد دا عن:
ليه الاهداف لوحدها ما مهمة وما حتؤدي لي نجاح او نتائج..

1) الناس البتنجح والناس البتخسر كلهم عندهم نفس الهدف.
لو اتكلمنا عن اي مباراة او اي سباق اكيد كل الاطراف المشاركة هدفها تفوز.
لكن البيفوز هو الاشتغل على نفسه صح وكان افضل من التاني.

2) الاهداف بتؤدي الي تغيير لحظي بسيط وبعدها بنرجع ضايعين.
اتخيل شخص هدفوا ينقص 20 كيلو ركز بس انه ما ياكل كتير ويحرم نفسه لغاية ما يحقق الهدف دا.
بمجرد ما يوصل للهدف لو ما كون عادات اكل صحية وكويسة وبيقدر يستمر عليها، ممكن يسمن اكتر من زمان.

3)التركيزعلى الاهداف فقط بيدخلنا في صراع (اما- أو).
#اما اني احقق هدفي واكون ناجح و سعيد، #او ما اتوفق واكون فاشل وتعيس. حتى لو اتحسنت كتير عن لما بديت.

الاهداف ممتازة في انها تحدد لينا الاتجاه بتاعنا، بس الروتين او السستم بتاعنا هو البوصلنا الهدف دا.
من كتاب Atomic Habits by James Clear