صباح الخير يا عمنا @ibmeguid ربنا يمتعك بالصحة، تيجي اقلدك واكتب ذكريات حضرتك محورها. احنا الصعايدة لحد وقت الدليفري كنا لا نملك للكتب الا فرع الهيئة واكشاك الصحافة وبسطات الكتب قصاد المساجد ودي بطبيعتها متخصصة في نوع واحد من المعرفة، المهم كان كل صاحب كشك يلم عزوته
من شباب القراء يوم توزيع الاصدارات الجديدة لمكتبة الاسرة، كانت في محافظتي كل سبت، يجي قطار الصحافة وفي الحتة البعيدة اول الرصيف من بحري كل سريح ياخد حصته من الجرايد، ويوم السبت تبدا العركة بتاعت الكتب طالما في اصدارات جديدة ولحد محبوب، فكل سريح لازم يبان انه هيعرف يوزع نصيبه
ومفيش مرتجع. انا كنت من رواد عم حنا صاحب اهم كشك صحافة بالمحافظة، عشان بيطل على اكبر ميدان فيها، وضهره لسور الفيلا الملكية الكبيرة واللي اتحولت لمقر الحزب الوطني. المهم عم حنا كان تاجر على ابوه برده، عارف مين بيحب عمنا فيجري ريقه قابلها بمدة كويسة عشان يظهر معاه مخصوص على رصيف
المحطة يوم الطريحة، كان يوم وارد قناديل البحر يا عمنا، شوف الكلام 98 وانا فاكره كانه امبارح، قاعد راجل كبارة كدة على الكرسي الخشب ابو ضهرية مقوسة ده وعمال يشخط وينطر في السريحة ويناول ويسحب، طبعا انا وقتها عيل 16 سنة وفاتح للدنيا صدري، معجبتنيش طريقته ومعجبنيش انه هيناول حنا 6نسخ
سالت مين ده قالولي مدير مكتب الاهرام، الدم فار في عروقي، دا شغل هيئة مالك انت ومال التوزيع، وطبعا حبتين سوء نية انه بيحابي حبايبه وافكار من النوع ده، قمت ساحب الكرسي الخشب من رجله وناطر الرجل على ضهره. الدنيا اتقلبت بين اللي بيضحك واللي بيسند واللي يزعقك، وحلف ليعمل محضر وعمل
المهم ادخل الكبار من عنديه وعندينا وعملوا مجلس عرب، شد وجذب وزعاق وانا قاعد في اخر المجلس وعارف انها لو متلمتش ابويا استاذ الجامعة هيوقع قتيل، وحصل وقف ابويا بعد مهاترات كتير وقالهم ما يتسجن بس على راس كل شهر في سجنه هوقع لكم راجل، بصراحة التهديد مش اللي لم الليلة، خالي كان مدير
المعهد الديني، ووقتها كان منصب له مكانة، حتى كانو بيسموه شيخ الازهر باعتباره نائب الامام في المحافظة يعني، خالي كان ياخد الناس افراد وجماعات على جنب ويتفاوض وما شابه لعند ما وصله لحل نهائي ووافق ابويا عليه، ايه الحل بقا يا سيدنا غرامة 2000 ج وابوس انا راس الراجل بعدصلاةالجمعة
انا الوحيد في مصر يا عمنا اللي دفع في الرواية الفين جنيه😂وطبعا حضرتك عارف ان ده وقتها كان رقم رقم يعني، خليني اقولك ان بعد ما تمت التنازلات والاجراءت والقصة خلصت ابويا رفع لي مصروفي 3 ضعف وعرف الصعيد الفلوس في ايد الشباب مفسدة رد عليهم كلهم بجملة منسهاش عمري العيال بتجيب لاهلها
النعيرة في الحرام بنات ولا مخدرات لكن اول عركة كبيرة لابني في كتب وثقافة دي مفخرة وحاجة تشرف. انا صحيح متفرج مش فاعل تغريد وردود على تويتر بس متابع جيد لكل كتابتك انت اثرت في تكوين جيل يا عمنا ومازلت ربنا يزيح عنك الألم ويمتعك بكل صحة وعافية😍😍
جاري تحميل الاقتراحات...