فقدت الشغف؟
20 نصيحة غيرت حياتي تماماً للأفضل وكلما أفقد الشغف أركز عليها والله بس أقراها يتغير تفكيري من السلبي إلى الإيجابي.
20 نصيحة غيرت حياتي تماماً للأفضل وكلما أفقد الشغف أركز عليها والله بس أقراها يتغير تفكيري من السلبي إلى الإيجابي.
1- أفضل من تفضفض له همومك هو الله، يسمعك، يلهمك، يرشدك بدون ما تحس، يفتح أمامك طرق وأبواب ما كانت في الحسبان، بإختصار يقود حياتك إلى كل ماهو خير لك، فقط أصدق النية معه.
2- لا تخلي أي شخص ياخذ من تفكيرك أكثر من اللازم، كل شخص عنده حياة، لما تتعلق بشخص وتتعود عليه، حاول تبعد عنه شوي، لأن بالنهاية محد يبقى لأحد، وإذا صارت بينكم مشكلة مين يسد عندك فراغ التعود؟
3- حط ببالك دائمًا أن الله قادر على كل شيء، "كل شيء" ، مافي شي صعب عند الله، مهما كانت ظروفك تشوفها صعبة ومستحيلة هي عند الله كلمة "كن" فيغيّر حالك بين يوم وليلة.
4- لما تبي شيء، تذكر أن الله لا ينقصه مثقال ذرة من خزائنه، اطلب من الله كل شيء، كل صغيرة وكبيرة، الله لا يعجزه شيء في السماوات ولا في الأرض.
5- أنا كـ صفاء: 90% من صداقاتي كوّنتها على الإنترنت، من 2012 حتى الآن 80% من صداقاتي هي عبر الإنترنت، والحمدلله لقيت منهم دروس وتجارب وأمور ما كنت أقدر ألقاها في صداقاتي الواقعية.
6- لا تعلق أمر من أمور حياتك على شخص، حتى ولو كان الشخص هذا عنده نفوذ عالية، حتى لو امك او ابوك، كل امورنا وحاجاتنا بيد الله، وهو المعني بأن يصلح أحوالنا.
7- أعظم علاقة إنسانية في حياتك هي علاقتك مع أمك، أبوك، أخوانك وأخواتك، مستحيل تلقى شخص يراعيك أفضل منهم، حتى ولو حسيت أن أهلك ضدك، مو معبرينك، هم أفضل من غيرهم في كل الحالات.
8- فهمك للأمور والأشخاص يكون حسب عقليتك وشخصيتك، لا تجزم أن اللي قدامك غلط 100% مهما صار، أنت تشوف الأمر من ناحية وغيرك يشوفه من ناحية ثانية، وهذا سبب المشاكل، لو فهمته راح تتصالح مع نفسك وغيرك.
9- التغيير يبدأ منك أنت! إذا تبي تغير بيئتك! تغير نفسك، البيئة تتكوّن من "أشخاص" يعني بشر مثلك، كل واحد ينتظر غيره يتغير، وتمر السنوات ما تغيّر أي شيء، لذلك أفضل حل تبادر وتغير نفسك سبحان الله على طول اللي حولك يبدأون يتغيرون.
10- اختر شخص تظهر قدامه بكل حالاتك مثلما أنت بدون تصنّع، راح يساعدك هالشيء على تخطي مشاكل عظيمة بحياتك بعد فضل الله، لأننا بشر نبي يد تمسكنا وسط الظلام، ولأنك ما تقدر تعيش "وحيد".
11- لا تتعلق بالشهادة لدرجة تكون مُحبَط إذا ما قدرت تكمّل دراستك، كل إنسان له قدرات تختلف عن الثاني، أحيانًا في أشخاص ما ينتظمون بالدراسة لكن ينجحون بالعمل.
12- التجربة بوجهة نظري أعظم من الدراسة والشهادة، الشخص اللي يجرب سنة = اللي يدرس 4 سنوات في نفس المجال، معناها لو جربت 4 سنوات واستمريت راح تكون قيمتك مثل 4 طلاب متخرجين من الجامعة، فكيف بشخص يدرس ويجرب بنفس الوقت!
13- إذا أنت طالب، لا تأجل التجربة بعد التخرج، لأن دراسة + تجربة = استثمار بعييييد المدى، راح تتخرج وأنت عندك مصدر دخل جاهز + تطبيقك للي درسته يعطيك تجربة حقيقية.
14- تتعلّم بالسؤال، هذا أعظم درس أخذته آخر 5 سنوات، أي شيء ما فهمته أو ما عرفت تستوعبه، بادر بالسؤال من أهل الخبرة، أحيانًا قوقل يعطيك معلومات مشبّكة ما تقدر تفهمها، إذا سألت خبير تقدر تسأله كذا أسئلة في نفس السؤال.
15- لا تحصر نفسك على موهبة او مهارة وحدة، خذ كل مهارة لمدة 3-6 شهور جربها عطها وقت، إذا ناسبتك كملها بس لا تحصر نفسك عليها، تعلم أشياء أكثر، خلك مُلم بالأمور.
16- إحنا كبشر كل يوم نتقدم بالعمر، طاقتنا تضعف، استيعابنا يضعف، أفضل سنين عمرك للتجربة والتعلّم هي الآن وكل ما تقدم عمرك قلّت كمية الاستعياب في عقلك، قلّت طاقتك للتجربة.
17- تقبل واقعك مهما كان، الأشياء اللي تشوفها سيئة ربي كتبها لك لأنه يعرف أنها خير لك، ربي يمهد كل إنسان لخير عظيم كل يوم في حياتنا، تحس الأمور ظاهرها شر بس بعد فترة تكتشف أنها كانت خير.
18- لا تنتظر رد العطاء من أي شخص، لأن ببساطة الإنسان ينسى، ينسى أن فلان أعطاه، عشان يرد العطاء + ما يستوعب أن الشخص اللي قدامه ينتظر رد العطاء، اعذر الناس "بالنسيان" عشان تنام مرتاح البال.
19- كل الناس تردد أن الفشل سلم النجاح، بس محد يفهمنا كيف نتقبل الفشل؟ تقبل الفشل يعني أنت راضي ومبسوووط بالفشل، انك تعلمت حاجة جديدة، خطأ جديد ما راح تكرره، غلطة كبيرة راح تتجنبها المرة الجاية، تقبل الفشل عشان تنجح.
20- خلك لين هين لطيف مع الكل، ما تدري ظروف أحد ووش مر عليه خلال اليوم، ممكن عليه هم كبير ويفكر فيه طول الوقت وهذا اللي ممكن خلاه منفس وزعلان مع الكل، لكل شيء سبب، خلك سبب الخير كل مكان تتواجد فيه.
جاري تحميل الاقتراحات...