عندي موضوع يخوف مره وأشوف فيه تساهل هالفترة جدًا ولا أخفيكم اني كنت منهم لكنه والله شيء مروع وأشوفه بكثرة سواء في المدارس أو حتى بين الأصدقاء..
أنا مانيب مختصة في المجال هذا ولاني طالبة علم أنا عامية وكلامي من باب السواليف والتحذير لأني والله أشوف أبعاد خطيرة للشيء ذا،
( المزاح بفعل قوم لوط ) أو اللي ودكم تسمونه.. صراحة أنا كنت قبل فترة أقولها من باب المزاح أو المجاملة ولا أقصد بها شيء وغالبنا كذا بنية طيبة لكن والله اني شفت أثر المزحة ذي في اللي حولي سواء في البيئة المدرسية أو غيرها،
انتشر الشيء المقرف هذا بشكل مخزي وصرت أشوفه بعيني والله العظيم واخشى أن تعتاد عيني النظر لمثل هذي الكبائر حتى مع تكرار المشهد يغسل مخي وأظن الفعل هذا حق نسأل الله العافية
قبل أن أتطرق لموضوع إنكار المنكر وغيرها أنا بنوه على شغله ألا وهي النقطة اللي ذكرتها في البداية؛ يا جماعة ابعدوا عن المزاح في هذي الأمور لأن لو ترجعون لبداية ما هم عليه نسأل الله السلامة بتلقون انه كان مزاح حتى تطور وصار فيه تقبل للأمر ذا والشيطان قام بالواجب..
فيه مثل نسيت صيغته بالضبط لكن معناه إن إذا جبت شيء ما تتقبله النفس ولا المجتمع وودك يصيرون معك أدخله عليهم من باب المزاح والهزل، وهذا والله اني شفته بعيوني واتفق معه بشدة و أوجه الكلام هذا لنفسي قبل لا يكون لكم انتبهوا من المزح في الأمور المحرمة ترى الشيطان شاطر
وهذي حيلة من حيله إذا ما عندكم علم، ثانيًا إذا استطعتم إنكار المنكر فلا تقصرون أنا صرت أشوف البنات في الفصل يصير اللي يصير قدامهم وهم يشوفونهم ويسولفون ولا أحد مهتم، والله العظيم إن قلبي يتفظر من اللي أشوفه غيرةً على دين الله والتساهل اللي قاعد يصير!!
شيء يحزن لكن الله المستعان، فتكفون لا تتهاونون في المزاح بمثل هذي الأمور ترى العواقب وخيمة نسأل الله العافية
جاري تحميل الاقتراحات...