أنا ما قريتش التعليقات ومش عارف حد ذكر دا ولا دا بس موسيقا القرن التاسع عشر وسيمفونيات فاغنر ألهمت ناس تعمل حرب عالمية عادي وعصر هوليوود الدهبي ما منعهمش يمحوا مدينتين من على وش الأرض. نفسي جو نؤمن بالفنون ونعتنق دين الإنسانية وأخلاقي هي بوصلتي دا ينتهي عشان ما لوش أي معنى.

وتاريخ أوروبا الفني من عصر النهضة مقترن بتاريخ الحرب بين الدول والأقاليم الأوروبية وبإبادة السكان الأصليين وإرسال بطاطين لهم فيهم جدري عشان يموتوا، كفاية تشدق بمصطلحات فضفاضة وما لهاش معنى زي الفن والموسيقا والحضارة هيخلوناس ناس كويسة.

إنت ممكن تروح تقرا نيتشه وتطلع منه بتصور بوجود عرق متفوق على الآخرين وإن فيه ناس تستحق الإبادة عادي عشان اتولدوا في مكان معين، ساعتها هيبقى اسمك حمار وعنصري مش مثقف.

الحضارة مش فن وموسيقا وتطور تكنولوجي بالمناسبة، الحضارة تنوع واختلاف بس بالمعنى الحقيقي للكلمة مش بالمعنى اللي الجماعة بتوع العالم الأول بيحاولوا يضحكوا بيه ع الناس. فالحضارة الغربية الحالية من المنظور دا مضمحلة من لحظة قيامها عشان هي قامت على عكس دا بالظبط،

ووصلت لذروتها في استعمار القرن ال١٩ وحربين عالميتين جرونا فيهما معهم وبعدها مقاومة حركات التحرر الوطنية وبعدها زرع موالين لهم في السلطة ونهب مستمر لثروات جنوب الكرة الأرضية. على رأي ستراوس، الحضارة دي كان عندها فرصة دهبية تبقى متحضرة فعلا وتقيم حوارا مع الآخر بس أبادته وقضت عليه.