١- لو سمحتم ، من فضلكم ، انا عارف ان فيه علماء دين كبار بيتابعوا ما أكتبه هنا، لذلك أنا بوجه لهم سؤال، وليسمحوا اي ان أخاطبهم بالعامية فلا يليق لواحد غير متخصص في الدين مثلي أن يخاطب الكبار بلغتهم الفصيحة، أنا على أدي يا جماعة ، ورغم إني مسلم لكنهم بيقولوا اني مسلم غير متخصص
٢- والإسلام مش كفاية فيه علشان تفهمه انك تكون مسلم،لكن لازم تكون مسلم ومتخصص ، فلذلك احنا عايشين وسط عالم من المسلمين غير متخصصين في الإسلام لكن ربنا خلا مسلمين تانيين متخصصين في الإسلام والحمد لله، نبوس إيدينا وش وضهر،لكن انا بكتب الكلام ده لأن فيه حاجة في الإسلام انا مش فاهمها
٣- الحاجة دي عملت ليا كالّو في دماغي ،إذ في يوم أيها المسلمين المتخصصين في الإسلام كنت بقرأ القرآن،وإذ فجأة جت قدامي الآية القرآنية (اتخذوا أحبارهم ورهبانهم أربابا من دون الله) فانا قلت يا واد متفكرش بنفسك وتفهم الآية لوحدك،انت مين انت،انت مسلم لكن غير متخصص ،اسأل المسلم المتخصص
٤- فيا سيدنا أخذت بعضي وروحت للمسلم المتخصص في علوم القرآن،وكان من حسن حظي قاعد معاه مسلم متخصص في علوم الحديث ، ما شاء الله ، حاجة عظيمة، المهم سألتهم عن معنى الآية ،فالمسلم المتخصص في الحديث قال لي بص يا مسلم يا غير متخصص،كان فيه واحد "نصراني" أسلم جديد اسمه عدي بن حاتم الطائي
٥- أيوه يا سيدي،ماله الأخ الطائي ده؟ قال المتخصص في الحديث:تخيل يا غير متخصص،النصراني ده راح للنبي وهو معلق صليب دهب على صدره!! طبعا انا قلت له: يا داهية دقي!! صليب صليب، فقال : أيوه صليب ، لكن النبي قال له اخلع الصليب لو سمحت، فخلع عدي الصليب ، وبعدين قعد يسمع القرآن من النبي
٦- آم إيه قرأ النبي الآية (اتخذوا أحبارهم ورهبانهم أربابا من دون الله) وهنا استكمل معي الشرح المتخصص في تفسير القرآن، وقالي ان الأخ عدي استعجب!! وكأنه في نفسه بيقول :ايه القرآن ده؟ القرآن بيقول حاجات غريبة يا جدع، وطبعا الأخ عدي اتحمق وقال للنبي : يا رسول الله ، إنا لسنا نعبدهم!
٧- لكن النبي هنا حب يديله درس ويدي الدرس ده لكل المسلمين على مدار العصور فقال لعدي:أليس يحرمون ما أحل الله فتحرمونه،ويحلون ما حرم الله فتحلونه؟فقال عدي:بلى! فقال الرسول: فتلك عبادتهم!"
يا نهار منيل،يا سنة سوخة يا ولاد،انا الحقيقة سمعت كلام المتخصصين وروحت بيتي وانا حيران
يا نهار منيل،يا سنة سوخة يا ولاد،انا الحقيقة سمعت كلام المتخصصين وروحت بيتي وانا حيران
٨- احنا كده عبدنا ناس كتييير وخليناهم أربابا من دون الله،أفيدوني يا مسلمين يا متخصصين في الاسلام،هل لما العلماء المتخصصين في الاسلام زمان حرموا المطبعة والمسلمين غير المتخصصين وافقوا على التحريم ده،فيكونوا كده داخلين في الآية دي ويكونوا عبدوا العلماء واتخذوهم اربابا من دون الله؟
٩- وهل نفس الأمر ينطبق على المسلمين غير المتخصصين اللي وافقوا المتخصصين على تحريم القهوة،وتحريم قيادة السيارة للنساء، وتحريم الدراجة باعتبارها حصان إبليس،وتحريم صنبور المياه،لكن كله كوم والأخ مفتي حلب وهو من كبار المتخصصين في القرن ١٩ الذي افتى بتحريم الطماطم لأنها مؤخرة ابليس
١٠- وتحريم كذا وكذا وكذا،وسلسة التحريم برَّه كتاب الله ما زالت مستمرة إلى الآن،يا داهية دقي،يادي المصيبة السودة ،هل المسلمين غير المتخصصين اللي وافقوا المسلمين المتخصصين على التحريم ده يبأوا كده اتخذوهم أربابًا من دون الله ويكونوا كده عبدوهم؟! أفيدوني يا متخصصين أنا دماغي هاتشت
١١- التوقيع: مسلم غير متخصص في دينه يكتب لكم من فراش المرض بعد أن ألزمته الكورونا الفراش، وأعجزه مرض القلب عن احتمال الألم النفسي الذي أصابه من جراء حال المسلمين غير المتخصصين في دينهم
جاري تحميل الاقتراحات...