بعد عشر سنين جواز اكتشفت ان كل حاجة كانت مضيقاني في جوزي و عيزاه يغيرها هي السبب في اننا لسة مع بعض دلوقتي.
على سبيل المثال كنت بكره فيه هدوء اعصابه المُبالغ فيه، و بحسه بارد و مُجرد من الاحاسيس 😅 خاصةً اني شخص هيستيري و موسوس جدا. لحد ما في يوم كنا حرفيا بنغرق احنا و couple تاني و هدوء اعصابه بعد ستر ربنا هو اللي انقذنا و الاتنين اللي كانوا معانا غرقوا بسبب التوتر اللي كانوا فيه.
كنت بتضايق منه انه دايما بيتفه من مخاوفي و مبياخدهمش ابدا على محمل الجد. لحد لما من كام سنة اكتشفت اني بعاني من الوسواس القهري و الدكتور قالي ان لولا تتفيه جوزي من مخاوفي دي كان زمان حالتي سائت اكتر بكتير و انه كان بيعملي التوازن اللي محتجاه عشان اهدى من غير ما يحس😃
على الجانب الاخر حاجات كتير اتغيرت فيه بسببي برضه، كنت مثلا بالنسباله شخص رغاي بما انه كتوم جدا و مش بيعرف يعبر عن نفسه خالص ولا بيحاول و كنت بقعد اقوله هما كانوا بيكهربوك و انت صغير ولا ايه يابني؟ 😅 دلوقتي بقى شخص مُختلف و مُعبر verbally and physically
كنت ساذجة جدا لما تخيلت ان السر في نجاح العلاقات ان الاتنين يكونوا نسخة من بعض و على نفس الخط دايما! اختلافنا ده هو اللي مخلينا دايما مش عارفين اخر كل واحد ايه، هو اللي مخلينا بعد ١٠ سنين لسة بنكتشف حاجات في بعض، ولسة بنتفاجئ. عدينا بخناقات و صدامات كتير بس عمرنا ما حسينا بملل.
جاري تحميل الاقتراحات...