في بداية اللقاحات في مصر قلت لأبويا و أمي يسجلوا و ياخدوا اللقاح أمي بدون تفكير سمعت كلامي لأنها واثقة فيا و اللي هقوله هتعمله، أما أبويا لقيت أصحابه مخوفينه من اللقلح و واكلين دماغه وراسه و ألف سيف مياخدهوش، قلتله ساعتها نسبة إنك يجيلك أي مضاعفات من اللقاح لا تقارن بنسبة إصابتك
ولا بنسبة المضاعفات، و لو اتصبت المستشفيات مليانة و مش هنلاقي مكان و لو دخلت مستشفى خاصة هتبيع البيت اللي أنت قاعد فيه، مش عايز تاخده أنت حر بس متكلمنيش لما تتصاب و أنت مش واخده و أنت حر طبعا ده اختيارك، بعدها بفترة أخده و أصحابه اللي بقوا بيسألوه أنت عملت أيه علشان تاخده
عارف إن كلامي كان حاد و صريح بس أحيانًا لازم يكون كده علشان كل شخص يعرف أيه تبعات قراره دي خصوصًا لو مش متوقفة على نفسه بس لا دي ممكن تدمر أسرة بحالها معاه نتيجة اختياره، و نتيجة أصحابه البهايم اللي بعد ما كانوا بيضحكوا على اللقاح و يقهقهوا و بيحلفوا مش هياخدوه خدوه عادي
أبويا حاليا بيسأل أخويا على معاد الجرعة التنشيطية و عايز ياخدها خايف لتكون فاتته، لأنه شاف حالات كتير حالتها اتدهورت و دخلت رعايات و اللي مكانش لاقي مكان و اللي مات... في أوقات كده مينفعش تاخد فيها 100% أمان ده لما تبقى بتكلم ربنا، ده حتى ممكن تموت في عملية بسيطة خالص عادي
أنا من شهرين أخدت جرعة تنشيطية فايزر بعد اتنين استرازينيكا و مستعد كل ست شهور آخد جرعة تنشيطية لحد ما العلم و العلماء يوصلوا لحل أو يحصل تغيير، وهعمل كده مع أبويا و أمي، فكرة خايف على نفسك أنت مش أهم من المواطن الأبيض أنت بتنضرب بالرصاص الحي أصلا و بالبراميل المتفجرة
اللقاح مبيمنعش من الإصابة بس كنسبة و تناسب بيقلل فرص دخولك للمستشفى و بالتبعية الوفاة، هل في حاجة تضمنلك الأمان 100% لو بتفكر كده تبقى تموت أحسن لأن حتى و أنت في بيتك أنت مش آمن 100% من أي شئ فعيش كده و اعمل اللي عليك و اختار و خد المنفعة الأكبر
ميزة العلم إنه مش مبني على الرأي و المزاج و أي وقت بيثبت فيه قصور في شئ بيصحح من نفسه في لحظة ثبوت ده بدون ما يكابر و يوجد مبررات و تأويلات علشان كده العلم دايمًا واخد الطريق الصح بشكل مستمر و تصاعدي، و دايمًا فايدة الاعتماد عليه أقل ضرر بعشرات المرات من الابتعاد عنه.
لو عندك مشكلة مع المنظمات العلمية شمر كده و ادخل و اثبت بشكل علمي محترم خطأ كلامهم على فكرة هيرحبوا بيك و هيرفعوك السما و هيصقفولك لأنك ساعدتهم في توجيههم، مش هيبقوا متضايقين خالص، لكن يبقى كلامك كله مجرد رأي و ميول و اعتقادات و حب و كره الكلام ده ملهوش أي قيمة و تضليل
جاري تحميل الاقتراحات...