أسوء شيء بيمر به لاعب كرة القدم المبهر، هو مقياس إبهاره نفسه عند شريحة كبيرة من الناس، مفيش أسوء من إنك تكون مدهش في أمور مش بيتم ذكرها والناس تقول إنك مدهش وعبقري لأمور أقل من اللي أنت مدهش وعبقري بسببها فعلًا،
ثريد عن لوكا اللي هيحاولوا نسيانه، لدرجة إنهم مش هينسوه أبدًا...
ثريد عن لوكا اللي هيحاولوا نسيانه، لدرجة إنهم مش هينسوه أبدًا...
الكلام ده حصل لكل لاعبي كرة القدم المبهرين بدون إستثناء وأكترهم ميسي واللي بكده بيقللوا من اللي بيقدمه، اللي لحد دلوقتي الناس بتتكلم عن بطولاته والـ7 بالون دور وأرقام أهدافه وأسيستاته، رغم إن كل ده مهم لكنه مش إستثنائي علشان كل ده، هو ميسي لأمور أخرى أكتر إستثنائية وتعقيد وصعوبة.
شوف مودريتش المبهر، عنده 36 سنة وبيعمل كل ده!'
دي أسوء جملة شوفتها لمدح مودريتش ومعيار أفضليته في خط الوسط رغم إن المُراد منها في صالح مودريتش؛ محاولة خلق معيار مش أكثر أهمية من اللي بيقدمه مودريتش في الملعب لشرح وإثبات أفضليته رغم إنه معيار مهم برده هو تقليل من مودريتش اللاعب،
دي أسوء جملة شوفتها لمدح مودريتش ومعيار أفضليته في خط الوسط رغم إن المُراد منها في صالح مودريتش؛ محاولة خلق معيار مش أكثر أهمية من اللي بيقدمه مودريتش في الملعب لشرح وإثبات أفضليته رغم إنه معيار مهم برده هو تقليل من مودريتش اللاعب،
إنه 36 سنة وبيقدم اللي بيقدمه ده شيء عظيم، لكنه أفضل لاعب وسط في العالم علشان اللي بيقدمه مش علشان هو لسه بيقدم اللي بيقدمه في السن ده، ده وضع مودريتش في خانة 'الكبير سنا'، لأن حتى لو مودريتش عنده 26 سنة برده هو أفضل لاعب وسط وبفارق كبير عن أي حد علشان اللي بيقدمه مش علشان عمره.
الكلام ده أنت ممكن تفتكره بسيط، وإنه العادي هي سطحية الشريحة الكبرى من الناس في الكورة ومش الكل محللين طالما النيّة هي التعبير عن أفضلية مودريتش، لكن هو مش كده فعلًا، الكلام ده تسبب في فكرة ذهنية عنه بالنسبة للكل حتى أكبر الإداريين في الكورة عالميًا؛
يعني مثلًا رغم إن البالون دور جائزة مش مهمة بالنسبة لي بسبب معاييرها، لكن الكلام ده وضع مودريتش في المركز الـ29 في الموسم الماضي حسب تصنيف الكرة الذهبية، رغم إنه قدم موسم إعجازي بكل معاني الكلمة، خارق في كل شيء ويستحق مركز متقدم عن كده بكتير، فأصبحت المشكلة إننا بنناقش الفكرة دي.
لو ربطنا بقى معيار السن باللي بيقدمه مودريتش، علشان نستكشف هو بيقدم ايه والطبيعي في عُمره يقدم ايه، مش علشان نقول إنه لسه بيقدم كل ده في عُمره الحالي وبس، هنكتشف إنه أسطوري 'لفظًا' لأسباب كتير أوي،
أهمها إن أي أيقونة في الوسط لفريق معين لما بيتقدم في العُمر والفريق مش بيكون عايز يخرّجه من الملعب أو على الأقل عدد دقائق لعبه لا تقل بشكل كبير، بيحصل على دور متأخر،
يعني ايه؟ يعني بيرجع ورا في الملعب؛ يلعب دور الريجيستا، أو يلعب دور في تنظيم اللعب مش في تطويره، يشارك بمعدل أقل في الحدث في الثلثين المتقدمين لو مهاراته مميزة في الإختراق، لأن تطوير اللعب مُهلِك أكتر من تنظيمه، نقل مركزيات اللاعبين للأمام من خلال لاعب واحد، ده شيء صعب،
الغريب ايه؟ إن مودريتش كل ما بيتقدم في العُمر، كل ما بيحصل على دور 'ريادي' وحر أكبر مش العكس، بل الأغرب إنه آخر موسمين واللي بالنسبة لي من أفضل فترات مسيرة مودريتش، إنه بقى يعمل الإتنين، بل مع مهام دفاعية إلتحامية أكبر، مش بس مهام في سرعة الإنتشار والتغطية العكسية ومساعدة الدفاع.
الأغرب أكتر، إن أصلًا مودريتش كان عنده مشاكل بدنية واضحة من بداية موسم 2018، بل إنه في بداية الموسم الماضي خرج وقال علانيةً إنه مش عايز يستغل مدريد علشان يضمن مكانة مدى الحياة حتى وهو مش قادر يقدم المطلوب، لكن لما ريال مدريد تمسّك بيه تمامًا، قرر يثبت إنه جدير بالأحقية دي،
في تقرير عملته ماركا في بداية الموسم الماضي، استعرضت خطط مودريتش للاستمرار في ريال مدريد فترة أطول، وبداية من الموسم اللي فات قرر مودريتش الخضوع لنظام غذائي وبدني خاص عشان يكون أفضل بدنيًا، نظام بدني خارج الإطار الرياضي وريال مدريد، يعني مش مقصود بيه مجرد تدريبات.
بل نظام كامل لكل حاجة؛ أكل ونوم ومجهود في أي شيء بيعمله بيتطلب حركة، مع متابعة مع أخصائيين طوال الـ24 ساعة، كل ده بيجعلنا نتطرق لنقطة أخرى بقى، وهي شمولية مودريتش، إن الغريب مش إنه بيتقارن بتشافي أو إنييستا، ولا مهم أصلًا نتفق أو نختلف على مين أفضل فيهم، ولكن...
المهم إنه بيتقارن بالإتنين حتى لو هو أقل منهم في بعض الجزئيات، تشافي كان بينظم اللعب بشكل مش خارق، لا، بشكل مش بيتكرر في العُمر غير مرة واحدة، وإنييستا قدر يجمع بين العقل والمهارة وقدر يضفي على منظومة بيب بالإختراق العمودي في منظومة بتلعب بعرض الملعب، وبسبب كده لعب جناح أيسر،
لكن الفكرة إن مودريتش بينظم اللعب وبيطوره وبشكل أسطوري في اللعب، بيقدر يعرّض نفسه للحدث في ثلثي الملعب المتقدمين وبين الخطوط بإستمرار، وبترجع تلاقيه بيسقط لقبل المحاور علشان ينظم اللعب ويدرّج الكورة ويساعد مدريد على الترحيل، مع قوة بدنية هائلة، وخلّوني أقف هنا وهنرجع تاني،
مفهوم الغالبية عن اللاعب البدني إنه الطويل مفتول العضلات صاحب الثنائيات والإفتكاكات، ده مفهوم خاطيء، لاعب زي توماس مولر مثلًا إستثنائي في النقطة دي رغم إن جسمه عادي، تشافي أسطوري مش بس إستثنائي فيها، وده لأن اللاعب البدني هو اللي بيجري ويغغط بكثافة بنفس النسق لمدة 70 دقيقة وأكتر،
مودريتش أقل ماتش بيجري فيه مش اقل من 11,5km، كل ده رغم إن متوسط الاستحواذ لريال مدريد في الموسم ده هو 70%، يعني الكورة في رجل مودريتش أكتر من غيره وبالتالي مش مُطالَب منه الجري كتير، دي مغالطة بيقع فيها جمهور برشلونة أكتر، زي إن تشافي وإنييستا لاعبين فنيين مش بدنيين، وده مش صحيح،
مودريتش وَحش في الضغط العالي والعكسي، بيقطع الكورة بذكاء وجسمه بيساعده عكس الشائع، بتلاقيه بيتخطى ويراوغ لاعب وإتنين وتلاتة مفتولين العضلات بسبب لياقته البدنية أصلا في المقام الأول مش بسبب مهاراته ووعيه الفني، قبل ما مدريد تتعاقد معاه كان بيقطع الكورة بأقل عدد محاولات مع توتنهام،
يعني رقميًا هو بيتصدر كل المشاهد الدفاعية لمدريد، الموسم ده مودريتش بيضغط بمعدل 28 مرة كل مباراة، مع 11 مرة ضغط عكسي وقت تحول الخصم بمرتدة، وده مبهر لأن مودريتش بيصدّ مرتدة بمرتدة، لأنه بيخلق إرتداد مضاد بتحول هجومي على التحول الهجومي للخصم ومدريد سجل أهداف كتير كده في الموسم ده،
كل ده بيُظهِر مثلًا ليه مودريتش بينظم اللعب، وبعد كده يمرر ويخرج من نصف ملعب مدريد بدون كورة وقت تنظيم اللعب عن طريق كروس، علشان يتمركز بين الخطوط، وبعد كده لو المحاولة فشلت يرجع يغطي مع لوكاس فاسكيز أو كارفاخال على اليمين، وبعد كده تتكرر من جديد، بمعنى...
يعني تبدأ المحاولة من جديد لحد ما يأخد الكورة ويسند الهجوم في مواقع الكثافة الهجومية في الثلث الأخير، بل إنه أصبح أقرب للمرمى في المواسم الأخيرة، كل ده أنت ممكن متلاحظوش، وهتبقى معذور، وتعالى أقولك ليه،
مودريتش من اللاعبين اللي مش بيعملوا شيء إستفاضي، يعني مش هتلاقيه بيأخذ قرار مش مناسب لمجرد إنه أخذه، لكنه بيأخذ القرار اللازم في الموقف المحدد لو يستدعي الأمر، فبيكون إستهلاكه لنفسه بمعدل منطقي حتى لو مش منطقي بالنسبة لعُمره.
لو رجعنا من جديد لوضع إسم مودريتش بجانب إنييستا وتشافي، وكل وسط برشلونة بمَ فيهم ميسي، فبرده المعضلة هنا مش إنه يتقارن بيهم أو لا، الفكرة الأهم إن ريال مدريد مقدرش يواكب الكورة على الأرض ضد برشلونة بجيلها التاريخي إلا مع مودريتش، ولو عكسنا النقطة هنا هنلاقي مبرر منطقي لـ...
هنلاقي مبرر لسبب سحق برشلونة لمدريد في أغلب مواجهات الفترة من 2008 لـ 2012، وده لأن كورة مدريد كانت بدائية؛ ألونسو بيلعب الطولية دائمًا لرونالدو سواء عالية أو على الأرض، اللي بيتحرك بعكس حركة بنزيما علشان عملية صنع المساحة الأفقية لرونالدو، مع فرديات أوزيل خلف الدفاع وسرعات بيل،
وبالتالي لما بيب قال إن برشلونة معاه كمان هيدافع بالكورة هو كان فاهم بيقول ايه، بل إن كمان دفاعه مع السيتي أغلب الوقت أصبح مش بالكورة وعكس كورته مع برشلونة، وكل ده متوالية منطقية فعلًا، لأن مودريتش قدر يكسر نصف ملعب برشلونة بشكل أكبر من السابق، مش كروس ومش كاسيميرو ومش أي حد تاني
مودريتش أصبح مَرِن أكتر كمان، مش بس حركيًا ومش بس في أسلوب إختراقه لنصف ملعب الخصم ومش بس في تكنيك تحركه بالكورة ضد المواجهات الفردية والثنائية للخصم، بل في التمريرات كمان،
موضوع إن مودريتش بيبقى مضغوط عليه ووشه لنصف ملعب مدريد ويقدر يلف وسطه بـhalf-turn مبهر 180 درجة ولاعب قطرية لجناح مدريد على أقصى الفلانك اليمين من لمسة واحدة من غير ما يبص ده غريب، الأغرب بقى إنه بيعملها 180 درجة للشمال برده من لمسة واحدة برجله الضعيفة من غير ما يبص،
الموضوع صعب إن لاعب يكون مستريح ومَرِن كده في اللعب حول مركز جسمه 360 درجة، ليه؟ لأن أغلب اللاعبين بتشوف جنب واحد من الملعب والتاني blind side، إنما مودريتش بيلعب 180 درجة بظهره، مش بيبقى باصص قبل ما يمرر عشان يهرب من الضغط، ده بيساعده في أغلب الثنائيات مع الخصم وقت الضغط عليه.
- طيب نسأل أسئلة سريعة مهمة بقى،
هل كل ده بيتحسب في عقل مودريتش وبسرعة إيقاع اللعب؟ لا.
هل كل ده مودريتش على عِلم به أصلًا؟ مش كله، وحتى مش معظمه.
طيب ازاي؟
هل كل ده بيتحسب في عقل مودريتش وبسرعة إيقاع اللعب؟ لا.
هل كل ده مودريتش على عِلم به أصلًا؟ مش كله، وحتى مش معظمه.
طيب ازاي؟
كل ده بيحصل للاعبين الكورة، مش بيكونوا على عِلم ووعي كامل باللي بيعملوه، وده لسببين؛
الأول بيمثل العادات السليمة اللي نشأ بها ومخزون المواقف المشابهة اللي حلها بنفسه طوال السنين الماضية، وهنا نستذكر مقولة كرويف في ميسي وقت ما كان لسه شاب في لامسيا، لما قال إن ميسي موهبة ممنهجة،
الأول بيمثل العادات السليمة اللي نشأ بها ومخزون المواقف المشابهة اللي حلها بنفسه طوال السنين الماضية، وهنا نستذكر مقولة كرويف في ميسي وقت ما كان لسه شاب في لامسيا، لما قال إن ميسي موهبة ممنهجة،
مودريتش واحد من أعظم النماذج الحيّة على اللاعبين الموهوبين اللي بيتحطوا في سياق أكاديمي صحيح يقدر يعظّم إمكانياتهم بالشكل اللي احنا شايفينه ده، لأن مودريتش مش مجرد لاعب موهوب،
يعني ايه؟ يعني لو فتحت يوتيوب وشوفت مسيرة مودريتش مع توتنهام، هتلاقيه كان بيعمل كل ده عادي، صحيح مش بنفس الجدارة دي، ولكن بنفس الخصائص، بالتالي الموهبة لازم تتقل وتتّقل في إطار جماعي ومنظومي أكبر، وعلشان كده المواهب البرازيلية مثلًا مش بتكمّل في الكورة، عكس الأوروبيين،
السبب الثاني بيمثل الحدس، مودريتش مش بس بيحل المواقف دي لأنه تعرضلها قبل كده أو بسبب تفكير مسبق، يعني الحسبة اللي حسبتها فوق دي معظمها مودريتش مفكرش فيها أصلًا، لكن هو بيتصرف بمَ يمليه عليه حدسه وإحساسه، وهنا فيه 3 مراحل تصاعدية بيمر بها اللاعب ومودريتش قفّل اللعبة في النقطة دي،
الأولى إسمها the intuitive game، اللاعب بيتحول فيها من عدم المعرفة اللاواعي لعدم المعرفة الواعي، بيركز على الكورة وجسمه بس لدرجة إن لو تركيزه إتشتت في حاجة تانية الكورة هتهرب منه وده مش موضوعنا،
الثانية إسمها intentional game، إدراك اللاعب بيكون أكبر فيها للمطلوب منه ولازم يعمل ايه في الملعب بشكل واعي بعد ما أتقن كل جوانب اللعبة خصوصًا الحركية منها أو السلوكية يعني،
الثالثة إسمها self-regulated game ودي أعلى درجات الحدس، إنه بيتحول من معرفة واعية وسبب كل فعل وليه وازاي وإمتى، لمعرفة غير واعية وده ليفيل الوحش، بعد ما أتقن كل الجوانب ومر بها، فإحساسه هيقوله يعمل ايه من غير ما يكون فكر بشكل مسبق،
عايز أقف في المرحلة الأخيرة لأنها مش بيوصلها غير أتقن لاعبي اللعبة دي واللي مودريتش منهم، وده بيفسر ليه أي حد بيتفرج على مودريتش بعد ما إتفرج عليه ألف مرة إنه ينبهر به تاني، والتفسير إنه لسه بيقدر يبهرهم ويعمل حاجات غير عادية بتلقائية وسهولة غير مفهومة في أحيان كتير خصوصا جسديا
الاجابة إن بمرور الوقت الحدس ده بيتعاظم والإدراك بيتعزز وفيه نوعيات من المهارات والقدرات بتتضخم بمرور الوقت، مش بتقل، يعني مودريتش كل ما عُمره يكبر، هيقدر يقدم النسخة دي وأفضل، وده لغز غريب.
مودريتش هو رجل ثلاثية وسط مدريد التاريخية اللي بتعيش آخر فترة؛ كاسيميرو كان قاطع كرات ممتاز في فترة من الفترات رغم نواقصه كلاعب كورة، كروس أدواره محددة ومميز فيها، إنما مودريتش قدر يكون المُكمِّل، اللي بيعمل الحاجات اللي مش بيعملوها لأنه بيعرف يعمل كل حاجة وبأفضل شكل وجعلهم أفضل،
علشان كده كاسيميرو ممكن يتعوض مع مدريد، كروس حتى ممكن يتعوض، إنما مودريتش؟ أعتقد شبه مستحيل.
إنتهى الثريد!
شكرًا لوقتكم! 🙌♥️
إنتهى الثريد!
شكرًا لوقتكم! 🙌♥️
جاري تحميل الاقتراحات...