قال ليك في واحد اسمو عبدالقادر..
عبد القادر دة عندو اختو سمحة شديد..
مافي زول ما بيتكبكب قدامها..
شباب الحلة متشارطين بقروش كتيرة..
انو مافي زول بيقدر يدق ليها الباب..
وتفتح هي ويقدريقول ليها "عبدالقادر قاعد"..
اي زول ينفخ ريشو..
يستنى اخوها يطلع..
يمشي يدق الباب..
تفتح (1/5)

البت..
وتبدا الكبكبة..
"عبدالقاعد قادر؟"
اي زول بيدق الباب بيتكبكب..
المهم جا واحد عامل فيها دون جوان زمانو..
وما شاف البت قبل كدة..
سامع بيها بس..
قال ليهم انا بقول ليها "عبدالقادر قاعد؟"
ومن غير كبكبة..
يا زول شباب الحلة اتلمو في الدكان..
مستنين اخوها يطلع من البيت (2/5)

..
عشان يمشي يدق الباب..
اخوها طلع..
صاحبنا مشى..
السكة كلها في سرو "عبدالقادر قاعد..عبدالقادر قاعد.. عبد القادر قاعد"..
لحد ما وصل الباب ودق الباب ..
شغال في سرو "عبد القادر قاعد.. عبدالقادر قاعد"..
بس البت السمحة فتحت الباب..
وهو طوالي "عبد القادر قاعد؟" بي طول (3/5)

حسو..
البت قالت ليهو "معليش قلت شنو؟"
قال ليها "اقول ليهو منو لمن يجي؟"…
اسي الواحد من الاستراتيجيين ديل ..
يقول ليك انا بنجض ليك احمد طه..
وجيبوهو لي..
وبقع بيهو الواطة..
اول ما يطلع في التلفزيون ..
ببقى في "عبد القاعد قادر؟"..
"واقول ليهو منو لمن يجي"
"وانت (4/5)

عارف!"..
"واسال الجنبك"..
و "ما تسالني"!!
يا جماعة ما ضروري يضربوا ليك تطلع في الهوا مباشر!
الموضوع دة اختياري!!
اعتذر!
قول ليهو بنوم بدري!
بعد صلاة العشا بلمو مني التلفون!
كلو ولا جنس الجرسة والعولاق دة! (5/5)