البروجرام بتاع الجامعة بتاعتي كان بيضم حوالي اكتر من ٤٠ جنسية مختلفة واتعاملت مع معظم الناس وفي ناس اصبحوا اصدقاء مقربين، فحاسة اني عاوزة اعمل مقارنة ما بين الجنسيات المختلفة، طبعا الموضوع نسبي ودا رأيي مش اكتر مش شرط يكون دي الحقيقة اكيد، يلا بسم الله:
نبدآ بالمصريين طبعا اول انطباع اخدوا أول ما وصلت انهم بيخدوا بالهم من بعض، اللي هو عاوز توصيلة تشتري طلباتك، محتاج تلاجة صغيرة تحطها في الدورم، حسيت بالاحتواء الصراحة، الحاجة المضحكة إن سمعت كلام بيقول المصريين بيحبوا يصاحبوا الامريكان علشان الجرين كارد وكنت لايك الله يكسفنا
تاني حاجة سمعتها ان المصريين اكتر ناس دمها خفيف ودا فعلا اتاكد منه بعد ما اتعاملت مع ناس كتير، مفيش حد بيعرف يهزر زينا الصراحة ودا شئ جامد
تاني جنسية هما الهنود: اول ناس اتصاحبت عليهم واحلي حاجة في الهنود انهم شعب مجتهد فعلا بيحبوا العلم والمذاكرة وانهم بيتعبوا علشان يوصلوا للحاجة، الوحش انهم بيضيعوا كل المجهود دا في التطبيل الفارغ للناس الاعلي منهم مع ان في الغالب مش محتاجين يعملوا كدا..
الهنود اكتر حاجة مشابهة لينا هي الفهلوة، ساعات كتير بيعملوا حاجات بتفكرني كأني في مصر, الحاجة الحلوة أنهم برده محتفظين بالعادات بتاعتهم مش بيحبوا ياكلوا غير اكلهم، يعني صاحبتي كانت جايبة شنطة كبيرة كلها سناكس هندية وكانت كل يوم بتاكلني معاها لول
تالت جنسية هي نيبال: دول بقي اكتر شعب طيب في العالم وغلابة اكتر حاجة لاحظتها فيهم انهم شعب كريم يعني حتي لو مش معاهم فلوس بيحبوا يعزموك علي اي حاجة عندهم، الحاجة الرخمة انهم مش بيفهموا الهزار محتاج تشرح النكتة تلت مرات 🤣
رابع جنسية بكستان: ازاي تعرف الشخص بكستاني هتلاقيه بيقولك انا مش من الهند بصرامة شديدة لو عاوز تضايقه قوله بس شكلك هندي ههه، هيقطع معاك للابد، البكستانين شعب متدين ومش بياكلوا غير اكل حلال حتي لو بيموت من الجوع، ممكن ميبقاش بيصلي بس لو عرف آنه اكل آكل مش حلال هيقعد يومين بيعيط
خامس جنسية منغوليا: شعب طيب ومبتسم وبيحترموا الناس جدا، بيحبوا يلموا بعض وبتلاقيهم ماشيين افواج اكتر من ٢٠ شخص وعلطول بيعملوا جروب مذاكرة، في مرة حاولت اصاحبهم علشان اذاكر معاهم ورحبوا بيا بس انا زهقت للاسف، مش عارفة ليه في كل محادثة بيحبوا يقولوا انهم بياكلوا لحم حصان ذو؟
سادس جنسية الاردن: شعب طيب واجتماعي جدا وشكلهم حلو جدا بسم الله ماشاء الله، محصلش تعامل كتير بس دا الانطباع اللي اخدوا 😂
سابع جنسية فلسطين 🇵🇸: اول مرة كنت اتعامل مع فلسطيين بشكل مقرب بس فعلا الفلسطيين اذكيا جدا ودمهم خفيف اوي وشعب كريم، وحسيت فيهم طباع كتيرة من المصريين
ثامن جنسية أثيوبيا: الاثيبويين اول لما يعرفوا انك مصري مش هيحبوك انا حاولت اعرف هل دا سببه السد ولا ايه الكلام يابا، بس طلع عندهم معتقد ان المصريين كانوا السبب انهم يخلوهم كسلانين اها والله مش افيه، بس لما تعرفهم شغب غلبان ومحتاج فرصة علشان يبقي احسن وبيحبوا يتعلموا ويذاكروا..
الميديا بتاعتهم مبوظة صورة مصر خالص بس لما تكلمهم كدا بالمنطق هيقولك عندك حق والله وانا كمان نفسي ازور الاهرامات ومصر جميلة، وهيخليك تدمع
تاسع جنسية الكاميرون: شعب بيحب الرقص والغنا علطول مشغلين اغاني وبيرقصوا، وبيتكلموا فرنسي جامد، وبيحبوا يقولوا ماما افريكا في اي جملة حتي لو ملهاش علاقة باللي بتتكلموا فيه، عندهم انتماء للقارة الافريقية بشكل مبالغ فيه بس كيوت ذو
عاشر جنسية الارجنتين: شعب مجنون مفيش حاجة اقدر اقولها عير انهم مجانين، كل امريكا الجنوبية شيفاهم شعب مجنون وعندهم مشاكل مينتال كتير، بس انطباعي كان انهم مجانين فعلا و بيحبوا يقولوا نكت دارك فشخ، اللي هو تسمع النكتة متبقاش عارف تضحك ولا تقطع شرايينك؟
الجنسية الحداشر فينزويلا: شعب مثقف بيحب القراية بس غريبي الاطوار، تحسهم فجاة يكونوا طيبين معاك وبعد كدا يقولوا حاجة مريبة كدا بيحبوا الاكل جدا وخاصة اللحوم، الجامعة بتاعتنا كانت نباتية بشكل كامل فكان كل يوم بيشتموا في الهنود وفي الجامعة والحياة
الجنسية الاتناشر تونس، شعب فرفوش بيحب يضحك ويهزر وبيحبوا الحياة واجتماعيين وبيحبوا يساعدوا الناس، هيجاملوك دايما يعني لو قلت كلام سخيف هيضحكوا علي كلامك وهيحسسوك ملك الفكاهة
الجنسية الثلات عشر الجزائر: قابلت ناس متدينة كتير بس اول مرة اقابل ناس تبقي متدينة بشكل سلس يحببك في الدين بيحبوا الدين وبيتعلموا عنه علطول، كلامهم طيب وبيريح القلب وبيعرفوا يعيشوا حياتهم بتوازن جميل ما بين ازاي يجمعوا ما بين الدنيا والاخرة، شعب مريح في التعامل
الجنسية الاربعتاشر امريكا، طبعا مفروض تبقي اول جنسية علشان انا في امريكا لول بس البرنامج بتاعنا معمول للطلاب الانترناشونال تعاملي معاهم كان يئما الدكاترة او الستاف او الطلاب في تخصص تاني او ناس عشوائية بقابلهم، الامريكان شعب هلاس وبيحب يهزر وتحس دايما شاربيين سجارة من نوع ما
النوع التاني اللي مش هلاس بيبقي ناس جد كدا شوية وبيحبوا يشتغلوا كتير وعبيد الرأسمالية، الامريكان مش شريرين عامة بس entitled سيكا، الناس هنا في الريف غلابة وطيبين ولو شخص عنصري ميبقاش عارف انه عنصري في الغالب بيبقي جهل مش اكتر
الجنسية الخمستاشر الدومينيكان: مكنش في تعامل كتير خالص فكلامي هيبقي سطحي وستريوتايب شكلهم باد اس جدا وتحسهم بيخلصوا يومهم وبيرحوا العصابة بليل
خلاص أنا تعبت من الكتابة ونص كلامي تايبوز فهكمل لاحقا، المهم انا معنديش سلبيات كتير أقولها لأن مؤسس الجامعة بتاعنا كانت جملته "العالم كله وطني"، فبحس الناس كلها كانت داخلة وهي عاوزة تتعرف علي ثقافات تانية ومعظم الناس بتحترم بعض، علشان كدا تجربتي في المعظم مع الناس حلوة الحمدلله
جاري تحميل الاقتراحات...