رتبها

ثريد جديد عن هاري بوتر فيما يخص الفرق بين الكتب والأفلام وكلمتين عن الreunion، بخبي البطاقة عشان مايبانش سني..

في البداية هاري بوتر تقريباً هو اكتر كتاب اللي بيحبوه عملوا عليه بلبلة وحلقوا له fandoms والكاتبة چي كي رولينج قعدت تضيف في معلومات وتأمن على معلومات لدرجة انك مابقتش تقدر تحدد كل المعلومات ايه مصدرها بس انا هتكلم من منطلق الكتب والمعلومات اللي كانت منطقية بالنسبة لي

في البداية أول فكرة هاري بوتر جت لرولينج لما كانت في القطر وفكرت ايه هيحصل لو القطر ده راكبه طفل رايح مدرسة سحر، والقصة بدأت من هنا.
الكتاب والفيلم الأول هو مدخل بسيط للعالم اللي رولينج خلقته

مفيش أفكار معقدة بس هو بيعرفك على العالم وعلى الشخصيات الأساسية وعلى الضوابط اللي رولينج حطاها ودي نقطة مهمة جداً. رولينج في كتبها حاطة قاعدة مهمة جداً انها تقنعك ان العالم ده حقيقي وموجود انت بس اللي مش عارفه وده بيبان كتير لكن في الكتاب الأول كان باين في حتة ان في muggles بس

نقطة تانية لسة قاريها مؤخراً هو ليه هاجريد ادى لهاري تيكيتس للقطر؟ ما كان ممكن يقوله وخلاص زائد محدش بيبص على التيكيتس والإجابة الفوق العظيمة مستمدة من الكتاب الخامس لما هاري راح عند بيت سيرياس بلاك ادوا له ورقة يقرا فيها العنوان وساعتها شاف البيت

عشان لو ماقريتش العنوان مش هتعرف ان البيت موجود أصلاً فالتفسير ان هو ده سبب التيكيت.
نظرية تانية الناس سألت ليه مولي سألت "what platform is it again?” مع انه على طول زي ما هو مابيتغيرش

والإجابة انه مولي لاحظت هاري وهو واقف لوحده بالشنط وهدويج وحبة تسهل عليه انه ييجي يسألهم فقال الرقم بصوت عالي جنبه ودي اكتر إجابة مولي ويزلي في الدنيا فعلاً

الإختلاف الأساسي بين الكتب والأفلام بالنسبة لي في الجزء الأول هو الكاستينج بس. هيرمويني مش بنت شكلها حلو هي المفروض شكلها عادي، لون عين هاري مش صح واتقال بعد كدة انهم حولوا يلبسوه لينسز بس كان عنده حساسية رون ويزلي كاستينج كويس بصراحة كشكل

في النهاية الجزء الأول هو مجرد مدخل بس وعمل اللي مطلوب منه وزيادة.
الجزء التاني بتبدأ تتعرف على معلومات أهم زي ان هاري بيتكلم لغة تعابين بس هو جريفندور؟ واتساب عليها علامة تعجب والنوتبوك دي عبارة عن ايه وهل ممكن يكون فيه زيها تاني؟ واتساب عليها علامة تعجب

في النهاية برضو الكتب والأفلام مابعدوش اوي عن بعض ومازلنا في إطار رؤية هاري بوتر ككتاب أطفال برضو بشكل او بآخر هو معركة بين الخير والشر وفي النص دروس عن التنمر وتقبل الآخر والفقر مش عيب وغيره، زائد بتخش شوية جوة عيلة ويزلي وبتشوف السحرة عايشين ازاي وان عندهم طبقات إجتماعية ووزارة

الكتاب التاني بتشوف فيه ڤولدمورت كشاب برضو وازاي كان شيك وعلى وضعه وبتعرف انه فعلاً كساحر وشخص سابق سنه وبتعرف انه مستعد يضحي بناس زي هاجريد عشان هو شايف نفسه أعلى منهم وبتعرف ازاي هاجريد اترفد وبتتعرف على أزكابان كمكان

الجزء التالت بقى هو نقلة لهاري بوتر من خطوة انه كتاب أطفال لإنه حاجة اكبر من كدة. في البداية بتشوف تصرف هاري مش كطفل لكن كشخص بدأ يبقى له رأي ويعرف قيمته شوية وده character development مهم

ثانياً بتتعرف على ٤ من أهم شخصيات القصة وهم جيمس وسيرياس ولوبين وبيتر وبتبدأ ترسم خطوط لشخصياتهم. بتبدأ تفهم سبب كره سنيب لهاري. بتبدأ تحس بتفوق هاري كساحر وموهبته مش انه مجرد شخص الحظ اختاره لا هو فعلاً كساحر موهوب وسابق باقي جيله

الكتاب التالت فيه ٣ حتت بحبهم اوي:
-تريليوني لما عملت تنبؤ لهاري اتنفذ بالفعل وده مان اول دليل انها مش هلاسة هي مخبولة بس عندها موهبة بتبان أحياناً
-لما سيرياس قال لهاري لما كل ده يخلص تعالى عيش معايا. رولينج بتحاول توريك تأثير الحرب دي على هاري كإنسان وازاي مفهوم العيلة..

.. هي حاجة هاري مفتقدها، وازاي دي حاجة أهم من البطولة والشهرة والفلوس وكل ده.
-لما هاري رجع اللي رجع بالزمن بص على نفسه قبل ما ينقذ نفسه هو كان فاكر ان اللي عمل الباتروناس ده چيمس باباه عشان كدة فضل مستني شوية عشات كان عنده أمل ان زي ما أصحاب باباه موجودين باباه هيظهر

النقطة برضو انك بتكتشف ان بيتر هو اللي خان بوتر مش سيرياس، وان دي كانت فكرة دمبلدور ان كل الناس هتتوقع ان چيمز هيقول لسيرياس فاحنا خلينا نقول لبيتر كتمويه بس بيتر راح متطوعاً سلمهم. يقال لن دمبلدور كان عايز هو شخصياً يكون حافظ السر بس چيمس قاله لا يا عم وانا أصحابي خو لات ولا ايه

الكتاب التالت بيقفل كل الخيوط اللي كانت مفتوحة من أول كتابين زي ازاي البوترز ماتوا وبيدي تفاصيل اكتر عن ازكابان وبيمهد للي جي بعد كدة

نخش في الجزء الرابع. الجزء الرابع جميل كفيلم ربما يكون الاحسن وجميل ككتاب بس مفيش مقارنة بين الاتنين بصراحة ومشكلتي مع الفيلم انه بدأ يفقد حتة مهمة اوي من الكتب

في الكتاب مبذول مجهود كبير جداً عشان يوضح لك ازاي مناسبة زي كاس العالم بتتعمل بعيداً عن أعين الmuggles، وعجبني جداً انه بيقولك ان ذاكرة الmuggles بيتلعب فيها وضرب مثال عظيم قالك زي ما ساعات تخش أوضة وتنسى انت كنت عايز ايه ده بيبقى بسبب انك شفت حاجة وساحر لعب في ذاكرتك

زائد إستخدامهم لجزمة مرمية على الطريق أو كان بيبسي للسفر، الحاجات دي بالرغم من انها تبان صغيرة الا انها مهمة جداً لزرع حتة ان يا جماعة العالم ده موجود انتم بس اللي مش عارفين

الجزء الرابع برضو بيبدأ يخش شوية في شخصية الأبطال، هاري بيبدأ يتعامل مع سيرياس انه أب كان محتاجه. رون بيبدأ يزهق من كونه على طول في ظل هاري. هيرمويني بتبدأ تتخنق من انهم بيعاملوها على انها حمادة صاحبهم شخصياتهم بشكل عام بتتغير من الشخص الطيب لبني آدمين

الفيلم في الأول بيبدأ بمسابقة لطيفة لكن في بعض الأمور الغريبة زي أحلام هاري اللي بنعرف انها مش أحلام، بنعرف ان ڤولدمورت حالياً قاعد في بيت حد اسمه ريدل فهو بيته او بيت يخص عيلته

الفيلم بيخلص بالحدث الأهم على الإطلاق وڤولدمورت بيرجع بعد ما بيتر هرب وراح أنقذه. وفي الصراع بينهم بيبدأ يظهر أشباح آخر ناس ڤولدمورت قتلهم بالترتيب.

طبعاً بتتعرف على الديث إيترز ومعلومة فيما يخص خطاب ڤولدمورت هو وصف واحد من الديث إيترز انه "I believe he left me forever, he will be killed of course" كان بيتكلم عن سنيب. وفيه ٣ قال انهم ماتوا ٢ منهم هلافيت التالت ريجيلوس بلاك اخو سيرياس واللي اتظلم في الأفلام بس هنروح له لسة

نخش في الكتاب الخامس زي ما احنا عارفين الحكومة بتبدأ تتخاذل ويا باشا الرجل ده كداب وبيعمل كدة عشان عايز يمسك الوزارة هاري بوتر بتبدأ تشوف جانب جديد من شخصيته لما ڤيرنون بيقوله بتتفرج على الأخبار تاني رد قاله ما هي بتتغير كل يوم، جانب هيمتد معاه طول الكتاب

مش هقدر بصراحة اتكلم عن الفرق بين الكتب والفيلم عشان الفيلم الخامس والسادس الفرق كبير اوي بالذات السادس. الجزء الخامس هاري بوتر لوحده دمبلدور عازله عشان مقتنع ان ڤولدمورت بيعرف يقرا أفكاره وكل ما هاري يعرف اكتر ڤولدمورت هيعرف اكتر

هتكلم بس عن حبة نقط مهمة في الكتاب ده..
-بنبدأ نشوف سيرياس بطريقة جديدة في البداية بيبان من أول الكتاب لآخره قد هو شخص غير مسؤول هو مكانش شايف هاري ابن صاحبه هو كان شايف هاري هو چيمس على عكس لوبين اللي كان عاقل كفاية يعرف الفرق.

ثانياً بنبدأ نتعرف على عيلته بشكل اوضح ولو مكانتش باينة في الكتاب خليني اوضحها.
بتعرف ان نارسيسا وبيلاتريكس هم ولاد عم سيرياس ونارسيسا اتجوزت لوشيوس بعدين، بتعرف ان سيرياس هرب وراح عاش مع بوتر وأهله استقبلوه كإنه إبنهم.
وبيبان تعامل عيلة بلاك مع اي حد مش عنصري عاملة ازاي

بنشوف سيرياس وهو بيموت الموتة اللي قد تكون الأصعب في الكتاب لأسباب كتير اوي زي انه بالفعل معاش حياته والسبب الأهم على الإطلاق انك بتشوف آخر أمل لهاري بوتر انه يعيش في عائلة بيطير قدامه وبتشوف لوبين وهو بيشوف آخر صديق له بيحصل چيمس عشان يروح آخر شخص في العالم تقبله تقبل حقيقي

-النقطة التانية بنشوف دمبلدور كإنسان بيغلط، بيتغر وبيشوف انه قادر على انه ياخد قرارات نيابة عن الناس لإنه اذكى منهم زي قراره ان هاري يتعزل وبتشوف انعكاس ده على ان الناس مسلمة لرأيه ١٠٠٪ مش بتناقشه
وفي نفس الوقت بتشوف انه كساحر فارق عن اي حد تاني هو بالنسبة الباقي بيعملوا لعب عيال

-الحاجة التالتة اللي شدتني في الكتاب هو طبعاً النبوءة وهو الحاجة اللي بيدور حولها الكتاب كله. بكل بساطة دمبلدور كان رايح يقابل تريلاوني عشان يعملها انترڤيو وقعد معاها مانبهرش اوي من العته اللي بتقوله وهو أساساً مش محب للمادة دي يعني بس وهو قايم بدأت تتكلم بصوت مختلف

بيفكرنا بنهاية الكتاب التالت، وبدأت تتكلم عن ان في طفل هيتولد شهر كذة ويا هو يا ڤولدمورت اللي هيعيشوا ماينفعش الاتنين يعيشوا، فجأة الباب بيتفتح ويكتشفوا ان سنيب كان بيتصنت عليهم

دمبلدور قالك الست دي أيامها في الدنيا معدودة ڤولدمورت هيعملها موز بلبن لما سنيب يحكي له فشغلها في المدرسة، سنيب حكى لڤولدمورت وهو مايعرفش ان ليلي حامل فڤولدمورت دور لقى في عيلين هيتولدوا في الشهر ده وهم هاري ونيڤيل، قالك اللونجبوتومز دول عبط هو أكيد هاري وراح يقتله وحصل اللي حصل

لازم نقف هنا ثانية ونسأل ايه كان هيحصل لو كان اختار نيڤيل؟ والإجابة ان عشان كدة فكرة التنبؤ بالمستقبل خادعة هي بترمي لك طرف الخيط وتخليك انت تصنع الفستان على مزاجك، لو ڤولدمورت كان اختار نيڤيل كان نيڤيل بقى هو اللي مكان هاري

ولو ڤولدمورت مان كبر دماغه كان ممكن الموضوع كله يعدي بلا قيمة، هو الموضوع اتحقق لإن ڤولدمورت صدقه وهي دي الخدعة..
المشهد بينتهي بquote من افضل ما قريت في حياتي

النبوءة مش هي السبب اللي خلت هاري يروح يحارب زي ما حصل مع ڤولدمورت هاري زيه زي أهله وزي دمبلدور كلهم اختاروا يموتوا عشان اللي هم مؤمنين به ماتجروش للمعركة مجبرين وبالرغم من ان النهاية ممكن تكون واحدة لكن الأسباب اللي في عقل الشخص فعلاً هي الفارق الحقيقي المهم

أفعال الإنسان مهمة والسبب ورا الأفعال دي بنفس الأهمية او أهم. الإنسان اللي مضطر يكون كويس لا يقارن بالإنسان اللي بيختار يكون كويس

-الجزء بيشهد ظهور شخصية تحبها من كتر مابتكرهها وهي أمبريدچ اللي بتمثل البيروقراطية والتعر يص والوصولية والغباء كائن انت كمصري بتقابله بشكل يومي يعني متصور قدامك بصورة عظيمة

-الجزء برضو بيدي صورة جديدة للويزيليس كإتنين مبدعين وبيستغلوا فلوس المسابقة اللي هاري كسبها في الجزء الرابع واداها لهم في انهم يطوروا من شطارتهم

-الجزء ده فيه طبعاً مشهد مهم جداً وهو خناقة چيمس وسنيب، الكتاب بيطلعم من تصور ان سنيب بغيض وچيمس ملاك بتشوف چيمس كعيل متنمر مشافش رباية وبتبدأ تشوف الكره اللي بينه هو وسنيب وازاي چيمس لعب فيه دور قد اللي سنيب لعبه بالظبط

-في نهاية الكتاب في مشهد جميل هاري بيتعشم انه سيرياس ممكن يرجع على هيئة شبح وبيقول ده لشبح جريفندور اللي بيرد عليه يقوله سيرياس انضف واشجع من كدة، وهنا رولينج بترمي هينت ان الموت ده مش نهاية العالم للناس الكويسة

في الكتاب ده برضو بنتعرف على لونا في رسالة واضحة من رولينج ان مهما كان الشخص مختلف لحد التخلف مش من حقك تتريق عليه وبتبدأ تتعرف على چيني الشبح مش الطفلة

الجزء السادس بقى وهو جزء قد يكون الاحسن من بين كل الكتب ككتاب. في الجزء ده رولينج بتظلل على كل الشخصيات وبتحطهم في الخلفية وبتحط نور المسرح على ال٣ أبطال الحقيقيين للقصة هاري وسنيب وڤولدمورت وخلينا نتكلم عليهم واحد واحد

هاري في الكتاب ده هو لوحده فعلاً. رون وهيرمويني ماسكبن في خناق بعض بسبب فيلم العشق والهوى، مش عارف بقرب من رون عشان عايز يشقط اخته، مش عارف يقرب من هيرمويني عشان هي رافضة استخدامه للكتاب، الكويديتش بيدور في الخلفية بالرغم من كونه الكابتن بس هو مش جزء من الفريق بالفعل

حمل النبوءة اللي اترمى عليه اداله بعد تاني، هو مش زي الباقي ناس كلها معرضة تموت في الحرب هو شخص الحرب مش هتنتهي الا بموته الا لو قتل هو مختلف عن الناس دي هو لوحده تماماً.
محدش مصدق هاري في دراكو ديث إيتر.

بيكتشف الهوروكوكسز اللي معندوش فكرة هيجيبها ازاي ولا فين وحاجة وسخة، دمبلدور بالذات في رحلتهم الأخيرة مش بيتعامل معاه انه طفل لا بيسلم خلاص ان يا هاري انت اللي المفروض تسوق وبيقوله صراحة انت حياتك أهم من حياتي بكتير

الشخصية التانية سنيب بتبدأ تشوف فيه قد ايه هو مختلف عن الباقي هو مش بيور بلاد ولا غني زي لوشيوس ولا من عيلة كبيرة زي بيلاتريكس هو مجرد شخص شاطر بس. هنتكلم على سنيب اكتر في الجزء السابع بس هلفت انتباهكم انه خد من وقته عشان يقف ويقول لهاري you dare use my spell agains me potter؟

سنيب مش بيكلم هاري سنيب تقريباً بيكلم چيمس، لإن التعويذة اللي چيمس استخدها ضد سنيب ساعة ما كان بيتنمر عليه وقلبه في الجزء الخامس برضو كان سنيب اللي مألفها، هو لف في اللحظة دي وشاف چيمس قدامه وقاله "يابني انت هتعيش خو ل وتموت خو ل؟" مش بيكلم هاري خالص كدة كدة بالنسبة له لا شئ كقوة

الشخصية التالتة اللي الكتاب بيدور حوليها هي توم ريدل..
خلينا نحكي القصة بالتفصيل في الأول ونقف على نقط فيها..

ڤولدمورت اتولد في آخر عيلة كانت بتحمل دم سليذيرين واحد من مؤسسين هوجورتس واللي كانوا ١٠٠٪ بيور بلاد وبيكرهوا الماجلز تماماً إحتراماً لأفكار جدهم الكبير

العيلة دي كان اسمها جانط، بتتكون من الأب وابن وابنة هنكتشف لاحقاً انها أم ڤولدمورت، الإبنة دي كان أبوها بيعرضها للتعذيب بشكل يومي من يوم ما اتولدت وشايف ان قدرتها على قدها وهي تحت الضغط فعلاً كانت ضعيفة وبقدرات محدودة بسبب التعذيب النفسي والجسدي

العيلة من سليذرين لحد ما وصلت لجانط كانت فرتكت فلوسها ومبقاش فاضلهم غير اللهم بيت قاعدين فيه وسلسلة بتاعت سليذرين شخصياً وخاتم هنشوفه بعد كدة

البيت بتاعهم ده كان في حتة أرياف كدة وجنبهم كان في قصر ساكن فيه شخص اسمه توم ريدل (خلي بالك عزيزي المتابع ان ده القصر اللي ڤولدمورت قعد فيه في بداية الجزء الرابع) ، واد أمور وسيكي ميكي كدة بس ماجل طبعاً، بينما البت المعفنة قاعدة تتفرج على توم ابن البشوات من بعيد وتحب فيه

ابوها شافها فقالها نهار ابوكي اسود يا بنت سليذرين ده ماجل يا بت! وراح رازعه تعويذة خفيفة كدة قدامها.
طبعاً ده كسر القانون اللي كلنا عارفينه.
الوزارة بعتت موظف يقوله يا عم الحج انت كسرت القانون والمحكمة عايزاك الحاج قاله محكمة ايه يابو اهبل امشي من هنا

من هنا لهنا الأمور تطورت والموظف طلب مساعدة وحم وقبضوا على الحج كوموه في السجن هو وابنه واحد منهم خد له ٣ سنين مات فيهم والواد خد له ٦ شهور على خفيف كدة وسابوا البت لوحدها

بالحج وابنه برة الصورة البت قدرت ترجع لفورمتها كساحرة وراحت واخدة سلسلة سليذرين وهربانة راحت لتوم اللي بتحبه وحطت له love potion عشان يحبها.
طبعاً حبها واتجوزها وحملت منه وخلينا نقف هنا ثانية.
يقال ان ڤولدمورت مانش بيعرف يحب ولا فاهمه لإنه كان مولود نتيجة love potion مش حب حقيقي

الولية مع الحمل دماغها سوحتها قالت لك ده ابو الواد وانا ربطته خلاص مش محتاجة love potion انا ابطل اديله واشوف اللي هيحصل هو اكيد هيحبني او حتى هيقعد عشان ابنه.
طبعاً التاني أول ما فاق اداها واحدة سلام يابن العبيطة

كسرة قلبها لما مشي خلتها مش قادرة تستخدم السحر تاني، ومع اقتراب الحمل مكانش حيلتها تاكل فراحت باعت سلسلة سليذرين لبورجن اند بيركس اللي بيبيع اي حاجة شمال مشبوهة وراحت قعدت على باب ملجأ وماتت عشان تسيب توم ريدل بتاعنا اللي هو ڤولدمورت يتربى في الملجأ

خد بالك معايا صديقي ان ان هاري وڤولدمورت اللي اتنين عاشوا في مكان قمئ من غير أهل وان الاتنين امهم ضحت بحياتها عشانهم لكن واحد ابوه كان محترم والتاني ابوه خو ل، عزيزتي حواء لا تحاولي ان تfix him نحن في غنى عن ڤولدمورت جديد. شكراً

آخر وصية كانت ان الاد يتسمى على اسم ابوه والاسم الوسطاني مارڤولو اللي هو اسم ابوها هي.
الواد كبر في الملجأ وكطفل كان تقريباً مابيعيطش خالص وبدأ ياخد شكل ابوه الشيك السيكي ميكي

بالرغم من ان محدش قفش عليه حاجة بس هو في مرة قتل الأرنب بتاع واد بيرخم عليه وعلقه في سقف الملجأ ومرة اتنين زعلوه وهم في رحلة خدهم رماهم في كهف هنروح له بعدين وماطلعوش منه سليم

خلي بالك ان الكلام ده ڤولدمورت اتحكم فيه واستخدمه قبل ما يعرف انه ساحر اساساً على عكس هاري الأهبل المحبب لقلبنا اللي لما كان بيجري من العيال ولقى نفسه على السقف قالك اكيد عشان انا رفيع الهوا طيرني

دمبلدور لما راح عشان يقول لڤولدمورت انه ساحر بيلاحظ حاجة مهمة ان ڤولدمورت بيحب يجمع حاجات، وبيلاحظ رد فعل ڤولدمورت لما عرف انه ساحر انه رد قال "اللي انا بعمله ده اسمه سحر؟ انا كنت عارف اني مميز" على عكس هاري اللي مع اكتشافه لعالم السحر شاف فرصة لانه يعيش مع ناس بتحبه

ڤولدمورت شاف فرصة انه يكون احسن من غيره ويتميز عنهم.
في نقاش دمبلدور مع ڤولدمورت برضو بيكتشف انه بيكلم تعابين وده كان اول ريد فلاج ثانياً شاف في كلامه سنة ملحسة وقدرة رهيبة على انه يلبسك العمة

حاجة كمان دمبلدور سأله انت مابتحبش اسمك؟ فرد عليه قاله العالم في اكتر من توم. في لمحة جديدة في شخصيته انه مابيبحش اي حاجة ممكن تجمعه بباقي الناس هو مش زي حد

توم دخل هوجورتس واللحظة اللي القبعة لمست راسه قالت سليذرين. توم في المدرسة كان تشارمينج جداً زي ما قلنا قادر يلبسك العمة بالإضافة لموهبة فذة وباكستوري حزينة زي انه من ملجأ خلت كل اللي في المدرسة يحبوه ويدعموه.
ڤولدمورت من الناحية التانية حب المدرسة وده هيبان كتير قدام

توم ريدل كان متفوق لدرجة انه كان بيرفكت على دفعته. وتوم في المدرسة كان متشوق يعرف اكتر عن عيلته لكن مالقاش حاجة في عالم السحر والسبب لإنه كان دايماً بيدور من ناحية ابوه اللي مش ساحر

طيب ليه كان بيدور من ناحية ابوه؟ عشان على كلامه هو مكانش متقبل انه يكون منتسب لأمه الضعيفة اللي "استسلمت للموت بالضعف ده" ڤولدمورت مان بيكره الموت وشايفه نموذج للضعف

لما ڤولدمورت قعد يدور من ناحية ابوه وملقاش حاجة قرر يستسلم للحقيقة الحزينة ان ابوه مش ساحر وفي لحظتها قرر يغير اسمه من النتانة دي لڤولدمورت وبقى معروف بالإسم ده بين تابعينه في المدرسة.
تابعين ڤولدمورت مكانوش أصحابه هم كانوا تابعينه مجموعة من المتفوقين اللي كانوا بيتبعوه بس

ڤولدمورت بدأ يدور من ناحية أمه ووصل بالفعل لعيلة أمه الجانطس وفي سنة سابعة راح البيت بتاع العيلة ليكتشف ان جده مات في أزكابان وخاله بس اللي عايش في البيت، خاله لما شافه حاول يهاجمه ظناً منه ان ده يبقى توم ريدل الماجل اللي دمر عيلته

طبعاً ڤولدمورت قاله انا ساحر يابا وكلمه بلغة التعابين عشان يصدقه وقاله احكي لي بقى يابو خالو القصة واحدة واحدة فقعد حكاله عن ازاي ابوه هو السبب في ان امه ماتت بعد ما سابها ومشي. وان ابوه لسة عايش في القصر السابق ذكره.

ڤولدمورت راح مثبت خاله وخد عصايته وطلع على القصر ولقى ابوه قاعد مع جده وجدته في قعدة عائلية لطيفة راح قاتلهم التلاتة وراجع لخاله لاعب في ذاكرته خلاه يقتنع ان هو اللي قتل توم ريدل ورجع عصاية خاله مكانها وخد الخاتم اللي سبق ذكره ومشي

وركز معايا عزيزي المتابع فقد ايه ده سحر متقدم جداً على شاب في آخر سنة مدرسة، هاري لما كان بيمشي من غير هيرمويني كان بيتكعبل على وشه ومايلاقيش ياكل في نفس السن
طبعاً الوزارة راحت لقت خال ڤولدمورت بيعترف ولقوا العصاية اللي قتلت جنبه والقضية متقفلة شياكة مدوروش وخدوه رموه في السجن

خال ڤولدمورت في السجن.
ڤولدمورت رجع على المدرسة وبنعرف انه بالفعل كان بدأ يدور في قصة الهروكوكسز وازاي ممكن يضمن انه مايموتش وبالفعل كلب البحر اللي كان ماسك سليذرين قاله ان الهوروكوكس هو انك تفصل حتة من روحك تحطها في حاجة فطول ما الحاجة سليمة انت هتفضل عايش

وخلي بالك انه معنى كدة مش ان ڤولدمورت كان بسبع أرواح لا ڤولدمورت ممكن يتقتل ١٠٠ مرة وفي كل مرة هيرجع طول ما فيه هوروكوكس واحد موجود في العالم. ڤولدمورت سأل ازاي تعمل هوروكوكس التاني قاله بالقتل عشان القتل بيدمر روح الإنسان وبيخليها تتكسر
قاله وايه رأيك لو عملنا ٧ مش واحد

التاني قاله ٧ ايه انت أهبل؟ محدش أصلاً جربها في التاريخ غير واحد او اتنين ولما عملوا هوروكوكس واحد حياتهم اتدشملت.

ڤولدمورت في سنة ستة فتح الشامبر اوف سيكريتس دليل تاني على عبقريته واتسبب في قتل ميرتل اللي تحولت لشبح وكانت بتعيط في الحمام واستخدم جريمة القتل دي في صنع أول هوروكوكس وهو المذكرة، وركز معايا عريزي القارئ دلالة ان ده أول واحد تكمن في ان المذكرة شئ تافه لا يحمل قيمة

وبالتالي لا يستحق انه يحمل روح ڤولدمورت الغالية بس هو الرجل كان بيجرب برضو فمانلومش عليه.
لما لقى الناس عاملة بلبلة على جريمة القتل مش عارف ليه، راح ملبسها لهاجريد زي ما كلنا عارفين اللي اتفصل من المدرسة

بعدها بفترة استخدم قتله لأبوه في انه يصنع تاني هوروكوكس من الخاتم اللي سرقه من خاله، ركز معايا عزيزي القارئ ان الخاتم ده هيطلع لاحقة الحجر اللي في الديثلي هالوز بس ڤولدمورت مشافش في الخاتم حاجة اكتر من كونه إرث عائلي قيم

وهو في المدرسة برضو اتكلم مع شبح ريڤنكلو اللي بيكتشف انها بنت ريڤنكلو المؤسسة شخصياً وبتحكي له انها سرقت التيارة او التاج بتاع أمها وأمها ماتت مقهورة بسبب كدة بس قبل ما تموت بعتت البارون اللي هو شبح سليذرين حالياً يدور عليها وهنا البارون قتلها وانتحر عشان الاتنين يتحولوا أشباح

طب التاج مستخبي فين؟ في ألبانيا. وهنا نقف عند نقطتين
- البانيا دي المكان اللي ڤولدمورت لما مات راح استخبى بروحه فيه لحد ما قابل كويرل قبل الكتاب الأول فواضح انه عرفه من لما راح يجيب التاج وهو عايش واستغل المكان لما مات
-قدرة ڤولدمورت على تلبيس العمة لأحياء وأموات وأي حاجة معدية

بعد المدرسة مدرسين كتير حاولوا يقنعوا ڤولدمورت يعمل انترڤيو في الوزارة بس هو رفض. وراح طلب من مدير المدرسة ساعتها ديبيت انه يشتغل مدرس. زي ما قلنا ڤولدمورت كان بيحب فعلاً هوجورتس وبيعتبرها بيته ويمكن هي بمدرسينها هم الحاجة الوحيدة اللي ڤولدمورت حس بمشاعر تقترب من الحب ناحيتهم

طبعاً ممكن نجادل حتى ده ونقول ان ڤولدمورت مكان شايف في قعدت في المدرسة طريقة مثالية لضم ناس جديدة تحته. لكن على اي حال ديبيت رد عليه وقاله انت لسة صغير على التدريس روح كام سنة وتعالى تاني واوعدك افكر

ڤولدمورت قرر يشتغل في بورجن ان بوركس المحل اللي بيبيع الحاجات الشمال، ليه واحد ممكن يشتغل في مكا زي ده رغم تفوقه عشان هو ذكي وكان عايز يختفي لفترة بحيث لما يرجع مايرجعش توم ريدل الشخص المتفوق المشهور يرجع ڤولدمورت اللي محدش يعرف جه منين أساساً

شغلة ڤولدمورت هناك كان انه يلبس ناس العمة ويخليهم يبيعوا له الحاجات ذات القيمة اللي عندهم بأسعار قليلة للمحل. زبونة من الزباين كانت مرة لتاتة كدة بس كان عندها كوباية هافلباف المؤسس شخصياً زائد السلسلة السابق ذكرها اللي كانت اشترتها من بورجن بعد ما ام ڤولدمورت باعتها له وهي حامل

طبعاً ڤولدمورت سمع الكلمتين قالها سلام يا بنت العبيطة وقتلها وخد الاتنين. وعمل من كاس هافلبلاف الهوروكوكس عشان موت الست مايبقاش ببلاش برضو ومشي بس قبل ما يمشي لعب في ذاكرة الهاوس ايلف (زي دوبي كدة) واقنعها ان انت اللي قتلتي الست ولبسها الجريمة ومشي

وبرضو الوزارة راحت لقت الجريمة متقفلة فمفكروش كتير وعلى ما اكتشفوا ان في حاجات ناقصة من البيت كان ڤولدمورت قدم استقالته وهرب اختفى لمدة ١٠ سنين كاملين

في ال١٠ سنين دول ڤولدمورت قتل ماجل وعمل من السلسلة هوروكوكس وراح البانيا زي ما قلنا طلع التاج وقتل ماجل برضو عشان يعمل منها الهوروكوكس الخامس بعد الكتاب والسلسلة والخاتم والكاس وبدأ يخبيهم كالتالي.

ادى الكتاب للوشيوس مالفوي اللي كان تابع وفي له، خلي بالك ان كونها الاقل قيمة برضو كانت اقل واحدة اهتم يخبيها من جانب تاني هي كانت سلاح لقدرتها على انها تسيطر على حد تاني فهي برضو فيها ذكاء وفي ذكاء في انها ماتبقاش معزولة تماماً وكلنا شوفنا ازاي استخدمها فعلاً في الجزء التاني

الخاتم راح دفنه في بيت عيلته مكان ما امه وخاله وجده كانوا عايشين.
الكاس اداه لتابع تاني له وهي بيلاتريكس وقالها تخبيه في خزنتها في جرينووتس.
السلسلة حطها في الكهف اللي دشمل فيه العيال زمان وهو طفل.

الخامس اللي هو التاج قرر انه لازم يكون جزء منه حوة المكان اللي بيعتبره بيته فراح هوجورتس لدمبلدور اللي كان اتعين مدير ساعتها وطلب منه الشغلانة ودمبلدور رفض، توم وهو ماشي راح الroom of requirements اللي غروره صور له ان محدش يعرفها غيره وخبى التاج

في الزيارة دي واللي هي اول ظهور لڤولدمورت بعد ١٠ سنين مختفي ڤولدمورت مكانش توم ريدل الشيك السيكي ميكي، وشه بقى شكله كإنه محروق نتيجة للقتل وتقسيم روحه اللي بدأت تبان على وشه زي ما شوهته من جوة

يقال ان ڤولدمورت لما دمبلدور رفض بديله شغلانة الDADA professor قرر يسحر المنصب ان محدش يشتغل فيه اكتر من سنة وده اللي شوفناه كلنا على الاقل في السبع سنين اللي حضرناهم.

في ال١٥ سنة اللي بعد كدة ڤولدمورت بدأ خطته اللي مان بيجهز لها بتعيين ديث ايترز جداد وعمالقة وديمينتورز وبقى اقوى ساحر في العالم والناس بقترتخاف تقول اسمه. مبقاش يقتل لسبب معين بقى بقى ماشي بيقتل شياكة كدة لحد ما بيسمع عن البروفاسي وبيحصل زي ما قلنا

ڤولدمورت بيختار ان هاري بوتر هو اللي النبوءة بتتكلم عليه وراح يقتل هاري. النقطة ان سنيب لما قال لڤولدمورت على النبوءة مكانش يعرف انها بتتكلم عن ابن ليلي لكنه سرعان ما عرف فراح قاله ارجوك ماتقتلش ليلي. سنيب اللي التاس شايفاه نضيف راح قال لڤولدمورت اقتل هاري وابوه بس سيب ليلي

ففولدمورت دخل قتل حيمس وزق ليلي وحاول يقتل هاري بس ليلي نطت ما بينهم عشان تنقذه بدافع الحب لإبنها وده اتسبب ان بقى فيه حماية بسبب الحب ده حولين هاري خلت تعويذة ڤولدمورت ترد والمفروض تقتله بس ماقتلتوش ليه؟ عشان الهوروكوكسز بالظبط

في اللحظة دي جزء من روح ڤولدمورت بقت جدء من هاري وصنعت من هاري الهوروكوكس السادس اللي حتى ڤولدمورت مكانش يعرف عنه حاجة.
وهرب ڤولدمورت لألبانيا زي ما قلنا لحد ما قابل كويرل وبتبدأ قصتنا

لما بيتر لقى ڤولدمورت جاب له موظفة وزارة خلاه يقتلها وعمل لنفسه سابع هوروكوكس -هو كان فاكر انه السادس- اللي هي ناچيني التعبان وهنا بتقف كل المعلومات اللي المفروض نكون عارفينها لحد الكتاب السابع بترتيب اتمنى انه يكون كان واضح

قبل ما اخش ف الجزء السابع عايز اقول ان الفيلم السادس مالوس اي علاقة بالكتاب، ولا التزم بقوانينه ولا حرف واحد فيه صح وآخرهم جنازة دمبلدور اللي اتشالت، للي ماقراش الكتاب دمبلدور اتعمله جنازة كبيرة في هوجورتس شارك فيها كل المخلوقات بما فيهم السيناتورز اللي المفروض مابيتدخلوش في حاجة

بتخش الجزء السابع والعالم مكان مختلف خلاص رجوع ڤولدمورت بقاله سنة على عينك يا تاجر واعظم ساحر في العالم والوحيد اللي الناس كانت مقتنعة انه قادر يكسب ڤولدمورت ڤولدمورت قدر يقتله بإنه حط سنيب اللي قدر يخدع دمبلدور ١٨ سنة كاملة

طبعاً مش هنحكي الكتاب بس هتكلم على حبة نقط
بداية الكتاب بيدور في نقطتين القضاء على الهوروكوكسز ومحاولة الوصول للديثلي هالوز التلاتة. طبعاً ڤولدمورت استحالة يقرا كتاب أطفال فمكانش عارف دول ايه بس كان سمع عن العصاية

خلينا نفتكر اني قلت ان ابطال القصة هم سنيب هاري وڤولدمورت وخلينا نفصص الديثلي هولوز من هنا. بداية القصة بتدور عن ٣ اخوات عدوا على مكان اللي بيعدي منه بيموت فقرروا يعملوا جسر بالسحر ويعدوا، الموت حس انهم خدعوه فكشف نفسه لهم بإنه قلع عبايته اللي بيتسخدمها عشان يختفي عن الناس

وقالهم شباب انتم روشين جداً كل واحد فيكم له طلب هنفذه له: الأول قاله انا عايز عصاية سحرية تغلب أي حد فعمله عصاية سحرية تغلب اي حد، التاني كان بيحب واحدة وماتت فقاله انا عايز حاجة ترجع اللي ماتوا فعمله حجر يرجع اللي ماتوا والتالت قاله بقولك ايه هات عبايتك دي كدة عايزها في كلمتين

القصة دي حتى في هاري بوتر كانوا بيقولوا انها مجرد قصة أطفال لكن ال٣ حاجات دول موجودين وغالباً كان فيه ٣ إخوات فعلاً بس مقابلوش الموت ولا حاجة هم بس كانوا صيع فاخترعوا الحاجات دي بالسحر عادي

القصة بتستمر ان الاخ الاول دخل بار قعد يسكر ويتكلم على عصايته وفي واحد سمعه راح رايح باللي قاطع رقبته وواخذ العصاية وبكدة الموت قدر ياخد أول أخ زي ما كان عايز للعصاية دي بقى في دلالات لإنها قعدت تنتقل عبر التاريخ ومابتنتقلش الا عن طريق ان الشخص "يكسب" الشخص القديم

خلي بالك معايا مش يقتل لا يكسب، يعني لو شخص اولريدي ميت او بيموت وانت خدتها منه مع السلامة هي انتهت. العصاية في النهاية وصلت لرجل صانع عصى غير أوليڤاندرو اللي احنا عارفينه ومين اللي وصل للشخص ده؟ ايوة جريندلوالد اللي هو الشرير في فانتاستيك بيستس

مين اللي كسب جريندلوولد؟ دمبلدور وخد عصايته قبل ما يرميه في السجن وبالتالي العصاية انتهت عند دمبلدور، خطة دمبلدور كانت صايعة انه يخلي سنيب يقتله بس مايكسبوش لان دمبلدور كدة كدة مسلم له نفسه وبكدة قوة العصاية تنتهي بموته وماتروحش الحد وخليكم فاكرين الخطة دي عشان هنرجع لها

العصاية بينتهي بها الحال زي ما احنا عارفين في ايد ڤولدمورت اللي بيموت وهو ماسكها عشان يكون the one who died for power زي الأخ الكبير في القصة بالظبط

الحجر في القصة يقال ان صاحبه خده ورجع اللي بيحبها بس مارجعتش كإنسانة رجعت كشبح معلق بين الحياة والميت وكانت عايزة تموت اريح من التعليقة دي فالأخ سابها تموت وقتل نفسه وبكدة الموت قدر ياخد الأخ التاني

الحجر ده قعدت تتوارثه الأجيال على شكل خاتم لحد ما وصل لمين؟ لخال ڤولدمورت بالظبط اللي ڤولدمورت قتله وعمل من الخاتم هوروكوكس خباه في البيت. دمبلدور عرف القصة وراح طلع الخاتم وخده المكتب كسره لقى حواه الحجر

ولإن دمبلدور عنده مشاكل كلنا عارفينها فيما يخص اخته قرر انه يرجعها من الموت ولو ثانية يستسمحها تسامحه لكن بمجرد ما لبس الخاتم ايده اتحرقت وكان هيموت واللي انقذه كان سنيب، لكن سنيب ما انقذوش من الموت هو احل موته بس ولذلك دمبلدور قاله بدل ما تموت على الفاضي اقتلني وامسب ثقة ڤولدمرت

الخاتم طبعاً لاحقاً دمبلدور بيحطه في السنيتش لهاري اللي بيستخدمه في الآخر، وبالرغم من ان الحجر ماوصلوش وممكن مكانش يعرف برجوده بس the one who died for love زي الأخ اللي في القصة لا جدال انه سنيب بطلنا التاني

الأخ التالت خد العباية واستخدمها في انه يستخبى من الموت لحد ما كبر وقرر ان كفاية عيشة كدة and he welcomed death like an old friend. في الحقيقة العباية دي قعد يتوارثها جيل ورا جيل لحد ما وصلت من چيمس لهاري زي ما احنا عارفين وهاري زيه زي الأخ الكبير welcomed death twice like an old

كدة شرحنا الديثلي هالوز ومسارهم في قصتنا. هتكلم على حاجتين كمان بعدها كام ملحوظة بحبهم واقفل الثريد.
النقطة مبانتش في الفيلم خالص وهي ليه ڤولدمورت فشل يقتل هاري مع انه كان معاه العصاية اللي اتكلمنا عليها وقوة ڤولدمورت اكيد اقوى من هاري

السبب ببساطة ان خطة دمبلدور في ان العصاية تنتهي معاه فشلت. فشلت امتى لما مالفوي قابل دمبلدور على السطح وطير العصاية من ايده في اللحظة دي دمبلدور كان خسر وقوة العصاية راحت لمالفوي. ڤولدمورت ماتوقعش ان الزبلة اللي اسمه مالفوي ممكن يكون كسب دمبلدور

دماغه راحت للي قتل دمبلدور. وخلي بالك هنا من ان مرة تانية نظرة ڤولدمورت للموت على انه هزيمة بتقضي عليه، ڤولدمورت قالك سنيب قتل دمبلدور يبقى هو اللي كسبه فراح قاتل سنيب وقالك بس العصاية كدة بقت بتاعتي

هاري على الجانب الآخر كان فهم اللي فيها القوة راحت لمالفوي اللي بالرغم من انه لا يعرف حاجة عن العصاية ولا عمره لمسها لكنه بالفعل هزم دمبلدور بس ماوقفتش هناك عشان لما هاري في نص الجزء السابع اتقبض عليه وراح لقصر مالفوي هاري في آخر ثانية خطف عصاية مالفوي منه وهي العصاية اللي

هاري بيكمل بها لآخر الفيلم، وبالرغم من ان العصاية العظيمة دي مكانتش في المشهد كله الا ان هاري قدر يكسب مالفوي فالعصاية بقت تابعة لهاري، ولذلك في آخر الفيلم العصاية رفضت تقتل سيدها اللي هو هاري وقتلت ڤولدمورت.

المشهد ده انا بنصح الناس تقراه حتى لو مش هيقروا الكتاب

انصحكم تقروا الحتة دي واتكيفوا من العظمة اللي فايتاكم بجد

النقطة التانية اللي عايز اوضحها من الكتاب قبل ما اخش في ملحوظات بحبها هي قصة سنيب بالتفصيل زي دمبلدور.. الشخصية الأكثر تعقيداً في الكتاب..

سنيب اتولد لساحرة اسمها حاجة برينس ورجل ماجل ومن هنا جه اسمه half blood prince.
سنيب اتولد في منطقة معفنة وابوه عمال يلطش لامه وكان بيحلم باليوم اللي هيسيب كل ده ويروح هوجورتس كبداية جديدة

سنيب وهو عنده ١٠ سنين بدأ يحب جارته ليلي بنت الناس الكويسين وبدأ يراقبها ولاحظ انها هي كمان ساحرة وراح اتعرف عليها وقالها انت ساحرة زيي ليلي طبعاً أهلها ماجلز قالت له انت هتتن اك علي يلا يا جربوع هش من هنا. خاصة لما بدأ يشتم اخت ليلي بيتونيا اللي كلنا عارفينها "ماجل"

وبالرغم من ان الاتنين مايعرفوش معنى ماجل بس حسوا انه بيتن اك عليهم فسابوه ومشيوا.
بعدها ليلي وسنيب علاقتهم بتتحسن وبيبقوا صحاب وفي يوم وسنيب عندهم في البيت شاف جواب بيتونيا كانت كاتباه لدمبلدور بتطلب منه تروح هوجورتس مع اختها لكن دمبلدور رد بشياكة قالها ريحي مش عايزين عبط

وده سبب كره بيتونيا للسحر. المهم سنيب وليلي بقوا صحاب وبدأوا يتكلموا وليلي سألته هل كونها من عيلة كلها ماجلز دي تقل منها في حاجة قالها لا خالص انت يا خبر ده انت فلة.

ليلي وسنيب راحوا لهوجورتس وهم صحاب وهم في القطر كانوا قاعدين مع بعض وسنيب قاله بقولك ايه انت تيجي سليذرين معايا.. مين كان معاهم وسمع؟ چيمس. چيمس لف قالهم سليذرين ايه وخرا ايه انا هخش جريفندور وشاب رابع في العربية اتحمس

الشاب ده هو سيرياس ودي اللحظة اللي چيمس وسيرياس بيبقوا صحاب فيها واللي سنيب بيكره ميتين أمهم فيها خاصة ان الأمر بينتهي بليلي في جريفندور بالفعل. بالرغم من عند اللحظة دي في للقطر ليلي كانت واخدة صف سنيب صاحبها

سنيب طبعاً دخل سليذرين واللي استقبله كان البيرفكت ساعتها اللي هو لوشيوس مالفوي. سنيب كان طفل شاطر في المدرسة في اغلب المواد وسمى نفسه الhald blood prince زي ما قلنا. وبدأ يخترع تعويذات زي ما احنا عارفين في الكتاب السادس

سنيب وچيمس بشلته فضلوا بيكرهوا بعض طول سنين المدرسة وچيمس كان خنزير بري بيقعد يتنمر على سنيب. في نفس الفترة دي چيمس وبيتر وسيريوس زي ما احنا عارفين كانوا بيتحولوا لحيوانات عشان يشاركوا لوبين اللحظة.
سنيب لاحظ إختفائهم

سنيب بدأ يمشي وراهم وسرياس خلاه يمشي وراه لحد ما خلاه يخش على لوبين وهو ديب. طبعاً سنيب كان هيموت عشان سيرياس يعمل إفيه شقي بس في اللحظة دي چيمسد اتدخل وانقذ سنيب. عند اللحظة دي علاقة چيمس وسنيب اتدمرت لإن لو في أمل تتجاهل شخص رخم فمفيش أمل تتجاهل شخص رخك انقذ حياتك وعلم عليك

سنيب شاف ان چيمس عمل كدة عشان ينقذ لوبين مش عشان ينقذه. ليلي وسنيب بيفضلوا أصحاب لفترة بعد كدة قالت له صراحة اللي انت ماشي معاهم دول براعم الديث إيترز ياسطى انت بتعمل ايه سنيب قالها طب چيمس متنمر فليلي قالت له انت مالك بهم من هنا الخناقة كبرت وليلي قالت له المفروض تعاملهم كويس

على الأقل بعد ما چيمس انقذ حياتك.
سنيب سحب صوت وحش وقالها انقذ حياة مين يابو حياة دي كان بينقذ نفسه انت شكلك هبلة فليلي قفشت عليه راح جايب ورا وقايلها على فكرة چيمس بحلو عشان يعجبك قالت له چيمس ده هلفوت عمري ما هبص له.

في السنة الخامسة في مرة من المرات اللي چيمس كان بيتنمر على سنيب فيها ومعلقه ليلي جت تدافع عن سنيب فچيمس قالها هسيبه لو خرجتي ديت معايا ليلي قالت له شايف السبيط ده انا ممكن اخرج معاه قبل ما ابص في وشك. في اللحظة دي سنيب قام ضرب چيمس بس چيمس علقه تاني والناس قعدت تضحك عليه

ليلي كانت هتضحك لثانية بس اتدخلت وقالت له نزله راح چيمس سامع كلامها، سنيب كان لسة هيضربهم راح سيرياس متدخل ومجمده في مكانه.
ليلي واحت داخلة مزعقة لچيمس وسيرياس وفكت سنيب.
چيمس قاله حظك حلو ان ليلي هنا وساعدتك
سنيب رد عليه قاله انا مش مستني مساعدة mudblood وسخة زي دي

وده مان المسمار اللي سنيب دقه في نعش علاقته بليلي وبالرغم من محاولات سنيب انها تصالحه لكنها مارديتش لحد ما اتخرجوا.
سنيب بعد كدة بيتخرج وبيحقق حلمه ويبقى ديث ايتر قد الدنيا بينما جيمس وليلي اتجوزوا

سنيب سمع النبوءة لاحقاً زي ما قلنا وراح حكاها لڤولدمورت وزي ما قلنا خد وعد من ڤولدمورت مايقتلش ليلي.
بعدها سنيب راح قابل دمبلدور وقاله ابوس ايدك الحقها انا قلت لڤولدمورت بس ده رجل مش مضمون

دمبلدور قاله حرفياً "انت مقزز" انت هامك ليلي ومش فارق معاك الطفل ولا چيمس! فسنيب قاله طيب انقذهم التلاتة وأمري لله دمبلدور قاله مقابل ايه؟ سنيب قاله أي حاجة

بعد كدة احنا عارفين اللي بيحصل وڤولدمورت بيختفي. سنيب عرف ان ليلي ماتت ووقع على الأرض عشان يكمل حياته تعيس لإنه كان سبب في موت اللي بيحبها.
سنيب راح لدكبلدور وقاله انت وعدتني ودمبلدور قاله ان ليلي راحت بس هاري موجود ونقدر نحميه عشانها

اقف معايا هنا لحظة وخد بالك ان سنيب لحد اخر لحظة مكانش فارق معاه خير وشر ولا الناس اللي ڤولدمورت قتلهم كل اللي فارق معاه ليلي وده بالنسبة لي سبب كافي اني اعتبر سنيب شخص سئ مهما عمل. برضو خد بالك من تعامل دمبلدور كالعادة مع الموضوع

بحث دمبلدور عن الgreater good او المصلحة في صورتها الكبيرة ماتغيرش من وهو طفل للما بقى عجوز هو شاف مدخل يقدر يستغل به سنيب واستخدمه مافرقش معاه الدوافع ايه هي

سنيب بيبدأ رحلته في الدراسة ولأن طبعاً سنيب خنزير دافعه الوحيد هو الحفاظ على ابن ليلي عايش للإنتقام له مش انه يبقى شخص كويس قعد سنين بيعامل هاري معاملة خنازير لكنه كان بينقذ حياة هاري

خلي بالك دمبلدور مان عنده نظرية ان سنيب بيحافظ على حياة هاري لسبب تاني بجانب انه ابن ليلي هو كان بيحاول يرد لچيمس الجميل في إنقاذ حياته بإنه ينقذ حياة ابنه

سنيب كان الشخص اللي دمبلدور قاله على معلومة ان هاري هوروكوكس ولازم يموت وهنا سنيب بيتعصب دمبلدور بيحاول يحط حتة حب لهاري في قلبه وبيقوله ايه ياسطى بقيت تحب ابن چيمس دلوقتي خلاص؟
سنيب بيطلع عصايته وبيعمل باتروناس زي بتاع ليلي..
معروف ان الباتروناس مابيتغيرش الا لو حاجة انت بتحبها

فلما طلع الباتروناس نفس بتاع ليلي دمبلدور قاله after all this time قاله always.
المشهد ده اللي الناس بتتخذه دليل على ان سنيب شخص كويس هو في للحقيقة دليل ان سنيب شخص سئ لحد آخر لحظة سنيب بيثبت انه بيعمل كل ده عشان ليلي مش حباً في حد ولا حتى حباً في الخير والشر

حبة نقط حابب اقولهم عشان بحبهم:
-بعد ما فريد مات چورچ مابقاش قادر يعمل باتروناس لإن كل ذكرياته الحلوة فريد كان جزء منها

-نقطة تانية السلسلة اللي كانت هوروكوكس اللي زي ما قلنا ڤولدمورت خباها في الكهف واللي دمبلدور وهاري راحوا يجيبوها ولقوا مكانها سلسلة بلاستيك اللي لقاها بالفعل كان ريجيلوس اخو سيرياس بلاك

ريجيلوس بلاك كان عكس سيرياس وزي عيلته كان ديث ايتر، ڤولدمورت طلب منه الهاوس ايلف عشان يساعده في حاجة وريجيلوس طبعاً وافق الإيلف لما رجع حكي لريجيلوس اللي حصل فيه وازاي ڤولدمورت عذبه وهما ريجيلوس قرر يقلب على ڤولدمورت وراح خاص نفس الرحلة وسرق السلسلة

وبالرغم من انه مكانش يعرف السلسلة دي ايه بس كان عارف مدى أهميتها فشالها في البيت عنده. بعدها بدأ يحارب ڤولدمورت ومات وهو بيعمل كدة دون ان يذكره التاريخ السلسلة بعد كدة اتسرقت من البيت ووصلت لأمبريدچ زي ما احنا عارفين في الفيلم

- نقطة كمان وغالباً دي آخر حاجة في دماغي دلوقتي انا بحب الفكرة اللي في الصورة دي جداً دي جداً. بالنسبة لموضوع الحشرة دي هيرمويني عملت كدة في ريتا سكيتر في كتاب من الكتب فعلاً بس هي كانت تستحق بس حتى بعيداً عن كدة فهيرمىيني بالفعل بالرغم من انها دايماً بتقول انها بتحترم القوانين

الا انها اكتر واحدة في الكتاب بتكسر القوانين. هيرمويني زيها زي دمبلدور بيحترموا القوانين لما تطبق على الناس مش عليهم لإن إمكانياتهم تسمح لهم ياخدوا شورتكاتس. هم عارفين ان ده لو اتعمم على العالم العالم هيخرب بس هم مش هيتنازلوا عن الحق ده لنفسهم بحثاً عن "المصلحة العامة"

شكراً لكم كلكم مش عارف لو في حد عنده صحة يقرا كل ده الحق يقال انا استمتعت وانا بكتبه هاري بوتر طول عمره هو المكان اللي انا بروح له لما احس اني متضايق وعمره ما خذلني اتمنى ان قراية الثريد تكون ممتعة زي كتابته وشكراً على وقتكم تاني

بما ان الثريد عجب ناس كتير خليني ازود عليه حبة. هتكلم عن شخصية من اكتر الشخصيات اللي حبتها في الكتب وهي ذا وان اند ارنلي اريبريسابل مينيرڤا ماكنوجال..
الكلام اللي هقوله ده لا في الكتاب ولا في الأفلام ولا اعرف متجاب منين انا شوفته في فيديو على يوتيوب وعلى كلام الرجل رولينج قالته

تاني الكلام مش من الكتاب ولا الأفلام فانت حر تقتنع به ولا لا بس صدقوني هيبهركم. الڤيديو على YouTube channel اسمها movieflame عليها حاجات كتير حلوة وخلينا نبدأ

روبرت متكنوجال وإيزابيل كانوا عايشين في منطقة هادية وكانوا جيران ووهم صغيرين بدأوا يعجبوا ببعض. روبرت كان ماجل وإيزابيل كانت مفهماه انها في مدرسة داخلية بنات بس بينما كانت بتروح هوجوورتس. مع الوقت الاتنين اتصاحبوا لكنهم احتفظوا بعلاقتهم كسر بعيد عن أهلهم

بعد ما اتخرجوا الاتنين هربوا من أهلهم واتجوزوا من غير ما إيزابيل تعرفه ان هي ساحرة او غيره. روبرت اشتغل في الكنيسة وبمرتبه المحدود إيزابيل كانت بتتصرف وفضلت محافظة على سرها.
مع الوقت خلفوا مينيرڤا. بعد الخلفة إيزابيل بدأت تفتقد العالم بتاعها وبقت على طول متزرزرة محدش فاهم ليه

مع الوقت وفي سن صغير منيرڤا بدأ يبان ان عدنها قدرات سحرية زي انها كانت بتعرف توصل للعب اللي في رفوف عالية او تخلي القطة بتاعتهم تجيب لها حاجات.
إيزابيل بدأت تستوعب ان السر مش هيطول فقالت لجوزها انا عندي سر بصراحة كدة

روبرت تقبل الموضوع وفضل يحبها لكنه قفش انها كدبت عليه وواجه مشكلة تانية انه بقى مضطر يكدب على الناس حوله ودي حاجة بتعارض مبادئه الصارمة جداً.
مينيرڤا وهي بتكبر كانت بتتفرج على أهلها وهم عايشين مشاكل بسبب كدبة بدأوا بها حياتهم لكنها كانت بتساعد قدر المستطاع خاصة في تربية

إخواتها الاتنين الصغيرين اللي كانوا سحرة برضو.
لما مينيرڤا جالها جواب هوجورتس أمها بدأت تحس بنوع من الغيرة عشان مينيرڤا هترجع لعالم السحر بينما هي مضطرة تعيش في الكدبة دي بعيد عن كل حاجة تخصها

بنبدأ جانب جديد من حياة مينيرڤا لما بتخش هوجورتس ويقال ان الهات فضلت ٦ دقايق مش عارفة تختار جريفيندور ولا راڤنكلو قبل ما تقرر جريفيندور.
مينيرڤا كانت طالبة متفوقة طبعاً خاصة في مادة الترانسيفيجيراشن. اللي كان بيدرسها ساعتها دمبدلور..

مينيرڤا في المدرسة برضو بتتعرف على صديقة عمرها سبراوت (مدرسة الهيربولوچي لاحقاً)
مينيرڤا كانت دحاحة بس بجانب كدة كانت كمان كابتن الجريفندور تيم في الكويديتش لكن في آخر سنة واحد من سليذرين اداها كتف كسر ضلوعها من ساعتها وهي عندها مشكلة رياضية معاها

في المدرسة وبمساعدة دمبلدور قدرت تطور قدراته لإنها تتحول لقطة زي ما احنا عارفين.
بعد التخرج مينيرڤا جالها شغل الوزارة وقبلته بس قالت ترجع تقضي الصيف مع أهلها الأول.
في الصيف ده مينيرڤا حبت شاب ماجل جارها اسمه دوجل

على اخر الصيف دوجل اتقدم لها ووافقت بس في ليلتها قعدت تفكر في مستقبلها اللي هيبقى بين انها تعيش في كدبة او تصارحه بالحقيقة ولو صارحته مستقبلها في الوزارة هينتهي.
تجنباً لتكرار مأساة أمها مينيرڤا بتفركش معاه وسابته وهم الاتنين متدشملين واتجهت تشتغل في الوزارة

مينيرڤا في الوزارة مكانتش مبسوطة بالجو العام خاصة العنصرية اللي الناس كانت بتتكلم بها عن الماجلز فكشخص عاش حياته وسط الماجلز كانت مخنوقة من الوضع.
الجانب المشرق ان رئيسها الفنستون في الشغل كان شخص لطيف جداً وكانت بتحترمه

مينيرڤا بعد سنتين بس اتعرض عليها تترقى لكنها رفضت وراحت باعتة جواب لهوجورتس بتسأل لو ممكن تدرس، الرد مخادش اكتر من ساعات واتوافق عليها من دمبلدور اللي كان رئيس قسم ساعتها.
مينيرڤا ركزت في شغلها وبدأت تتحول تدريجياً للشخصية الصارمة اللي نعرفها

بعيداً عن انها قررت تنهي ماضيها من حياتها بس هي فضلت محتفظة بصور لعيلتها ولدوجل في صندوق.
وهي في هوجورتس أمها قالت لها ان دوجل اتجوز أصلاً فدخلت تعيط في فصل.
وهي في الفصل شافها دمبلدور وقعدوا يتكلموا فحكت له القصة

دمبلدور حكى لها على قصة اخته وازاي هو خايف يكون هو اللي قتلها واتطورت علاقتهم من مجرد زملاء لصحاب.
مينيرڤا كملت شغلها وبقت العيد اوف جريفندور وفي يوم رئيسها القديم في الشغل جه اتقدم لها لكن لكونها لسة بتحب دوجل رفضت

الفنستون ماستسلمش بسهولة وحاول كذة مرة لكنها كانت بترفض.
مكنوجال مكانتش فرد رسمي من الأوردر في الحرب الأولى لكنها كانت بتساعدهم بكل طاقتها.
في خلال الحرب دي مينيرڤا خسرت اخوها الصغير

اللي زاد الطين بلة ان أمها قالت لها ان دوجل ومراته الجديدة وعياله كمان اتقتلوا في هجوم عشوائي.
الموضوع على قد ما كان صادم لكنه ادى فرصة لها انها تموڤ اون وأخيراً قبلت تتجوز مديرها السابق

دي كانت الفترة اللي الفيلم بيبدأ فيها وبنشوف ازاي فيها روح الأمومة في خوفها على هاري بوتر من وهو طفل من انه يتساب مع الديرسليز ومن فترة للتانية كانت بتروح تطمن عليه من بعيد.
جوزها اشترى شقة في هوجزميد جنب هوجورتس واتجوزوا فيها

ومكنوجال أصرت تحتفظ بإسمها الأخير اللي هو اسم عيلة ماجلز عن انها تاخد اسم جوزها البيور بلاد. في الفترة دي الناس اتعجبت ليه ممكن تخسر بريڤليدچ زي ده لكن احنا طبعاً فاهمين انها كانت بتحب ابوها وموقفها ايه من الماجلز بشكل عام.

مكنوجال ماخلفتش بس ولاد اخواتها كانوا بيجولها وعاشت فترة سعيدة في حياتها لحد ما جوزها مات.
بعدها ماكنوجال قررت ترجع تعيش في هوجورتس ومرة تانية بترمي نفسها في الشغل

هنا قصتنا بتبدأ وكلنا عارفين مساعدتها لهاري وحمايتها له وتشجيعها له.
في الحرب التانية مينيرڤا كانت عضو في الأوردر وبتكمل الحرب زي ما احنا عارفين وطبعاً مانقدرش ننسى حواراتها العظيمة مع أمبريدچ.

مش عايز اخش في تفاصيل اوي عشان مكنوجال واحدة من الناس القليلة اللي الأفلام ادتها حقها والممثلة كانت اكتر من عظيمة بس عايز اجيب حتة عظيمة من الكتاب في الجزء السابع أول ما هاري دخل المدرسة. الحتة دي كانت عظيمة في الفيلم بس خلينا نشوفها في الكتاب

لاحظ معايا ان اي الكتاب هم كانوا في راڤنكلو تاور وهاري كان مستخبي تحت العباية وكان ضرب واحدة من الديث إيترز والتاني كان لسة واقف مش عارف الضربة جت منين لما مينيرڤا دخلت عليه

ركز معايا في حاجتين هنا جملة
“Why would Harry Potter try to get inside Ravenclaw Tower! Potter belongs in my House!”
مكنوجال بتتعامل مع هاري انه ابنها حتى في أسوأ اللحظات ان محدش هياخدوا مني

ركز من الناحية التانية هاري بيستخدم تعويذة من التلاتة اللي لا تغتفر حاجة معملهاش في الكتاب الا مرات محدودة ولما بيكون مضطر لكن هنا ماترددش للحظة لمجرد ان حد أهانها

الحرب بتستمر ومكنوجال بعد الحرب بتتعين مديرة للمدرسة لسنين كتير في خلالها بتعين نيڤيل كمدرس.
فاضل حاجة واحدة بس عايز اتكلم عنها وهي الممثلة

ماجي سميث بجانب عبقريتها في تمثيل الشخصية بشكل عظيم فهي في الجزء السادس تم تشخيصها بسرطان الثدي وكانت بتمر بعلاج كيماوي خلال فترة التصوير وده كلامها
ماجي سميث كانت احسن واحدة ممكن تمثل مكنوجال and she was a true Gryffindor 🦁 ♥️

شكراً لكم مرة تاني وعارف ان التفاصيل مش من الكتاب لكنها من اكتر التفاصيل اللي بحبها فحبيت اشاركها معاكم

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد